ភ្នំពេញៈ រាជរដ្ឋាភិបាលកម្ពុជាមានគម្រោងបញ្ជូនសិក្ខាកាម និងកម្មករជំនាញដែលបានទទួលការបណ្តុះបណ្តាលរួចទៅធ្វើការនៅប្រទេសជប៉ុនបន្ថែមទៀត នៅពេលដែលភាគីទាំង ២ ឯកភាពនូវមធ្យោបាយ និងនីតិវិធីក្នុងការធានាឱ្យបាននូវការទប់ស្កាត់ការឆ្លងជំងឺកូវីដ១៩។
គម្រោងនេះត្រូវបានលើកឡើងក្នុងជំនួបរវាងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង ជាមួយនឹងឯកអគ្គរាជទូតជប៉ុន ប្រចាំកម្ពុជាលោក មីកាមិ ម៉ាសាហ៊ីរ៉ូ នាព្រឹកថ្ងៃព្រហស្បតិ៍ម្សិលមិញនេះនៅទីស្តីការក្រសួង។
លោក អ៊ិត សំហេង បានថ្លែងនៅក្នុងជំនួបនោះថា ក្របខ័ណ្ឌកិច្ចសហប្រតិបត្តិការវិស័យការងារ កម្ពុជា-ជប៉ុន បានចុះអនុស្សរណៈនៃការយោគយល់គ្នាចាប់តាំងពីឆ្នាំ ២០០៧ ដើម្បីទទួលយកកម្មសិក្សាការីកម្ពុជាទៅធ្វើការនៅប្រទេសជប៉ុន និងបានចុះអនុស្សរណៈនៃការយោគយល់គ្នានៅឆ្នាំ ២០១៩ ដើម្បីទទួលយកពលករជំនាញទៅធ្វើការនៅប្រទេសជប៉ុន ខណៈបច្ចុប្បន្ននេះ កម្មសិក្សាការី និងពលករជំនាញរបស់កម្ពុជាដែលកំពុងបម្រើការនៅប្រទេសជប៉ុនមានចំនួនជាង ១០ ០០០ នាក់។
លោកបានថ្លែងថា៖ «ខ្ញុំសូមអំណរគុណចំពោះភាគីជប៉ុនដែលបានយកចិត្តទុកដាក់ដល់សិក្ខាកាម និងកម្មករជំនាញរបស់កម្ពុជា ព្រមទាំងអនុញ្ញាតឱ្យពួកគាត់ចេញ-ចូលប្រទេសជប៉ុន តាមរយៈវិធានការធ្វើចត្តាឡីស័កនៅផ្ទះ។ តាមគ្រោងទុកកម្ពុជានឹងបញ្ជូនសិក្ខាកាម និងកម្មករជំនាញដែលបានបណ្តុះបណ្តាលរួចទៅប្រទេសជប៉ុនបន្ថែមទៀតក្នុងពេលឆាប់ៗ នៅពេលដែលភាគីទាំង ២ ឯកភាពនូវមធ្យោបាយ និងនីតិវិធីក្នុងការធានាឱ្យបាននូវការឆ្លងជំងឺកូវីដ១៩»។
ទន្ទឹមនឹងនោះដែរ រដ្ឋមន្ត្រីក្រសួងការងារក៏បានស្នើឱ្យលោក មីកាមិ ម៉ាសាហ៊ីរ៉ូ បន្តជួយគាំទ្រថែមទៀតលើការអភិវឌ្ឍធនធានមនុស្ស និងជំរុញលើកទឹកចិត្តដល់អ្នកវិនិយោគជប៉ុនឱ្យបង្កើនការវិនិយោគនៅកម្ពុជាបន្ថែមទៀត។ នាឱកាសនោះដែរ ភាគីទាំង ២ បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អរវាងកម្ពុជា-ជប៉ុន លើគ្រប់វិស័យ ដោយឡែកវិស័យការងារ និងបណ្តុះបណ្តាលវិជ្ជាជីវៈក៏ជាក្របខ័ណ្ឌកិច្ចសហប្រតិបត្តិការ ដែលភាគីទាំង ២ កំពុងបន្តជំរុញយកចិត្តទុកដាក់ និងពង្រីកនូវកិច្ចសហប្រតិបត្តិការថ្មីៗថែមទៀត។
រដ្ឋាភិបាលនៃប្រទេសទាំង ២ សុទ្ធតែបានដាក់ចេញនូវវិធានការប្រកបដោយប្រសិទ្ធភាពក្នុងការទប់ស្កាត់ការរីករាលដាលជំងឺកូវីដ ១៩។ ជាមួយគ្នានេះដែរ ឯកអគ្គរាជទូតជប៉ុន លោក មីកាមិ ម៉ាសាហ៊ីរ៉ូ បានកោតសរសើរចំពោះវិធានការដ៏មានប្រសិទ្ធភាពរបស់រាជរដ្ឋាភិបាលកម្ពុជាលើបញ្ហាកូវីដ ១៩ និងវិធានការដោះស្រាយផលប៉ះពាល់ពីជំងឺរាតត្បាតជាសកលនេះ ដោយសាររាជរដ្ឋាភិបាលកម្ពុជាបានជួយដោះស្រាយទាំងបញ្ហាសង្គម និងសេដ្ឋកិច្ចក្នុងប្រទេស។ ដោយពិភពលោករួមទាំងកម្ពុជាផងនោះ កំពុងជួបប្រទះនូវវិបត្តិជំងឺកូវីដ ១៩៕