ភ្នំពេញៈ កម្ពុជាគ្រោងនឹងរៀបចំកិច្ចប្រជុំកំពូលអាស៊ី-អឺរ៉ុប (ASEM) លើកទី ១៣ នៅខែឧសភា ឬខែមិថុនា នាពាក់កណ្ដាលឆ្នាំក្រោយ បន្ទាប់ពីលើកពេលកិច្ចប្រជុំដែលគ្រោងធ្វើនៅពាក់កណ្តាល ខែវិច្ឆិកា ឆ្នាំ ២០២០ នេះ ដោយសារតែវិបត្តិនៃជំងឺកូវីដ ១៩។ នេះបើតាមលោក កុយ គួង អ្នកនាំពាក្យក្រសួងការបរទេសកម្ពុជាប្រាប់ភ្នំពេញប៉ុស្ដិ៍ពីម្សិលមិញ។
សេចក្តីប្រកាសព័ត៌មានរបស់ក្រសួងការបរទេសកម្ពុជាស្តីពីលទ្ធផលនៃកិច្ចប្រជុំឧត្តមមន្ត្រីអាស៊ី-អឺរ៉ុប តាមប្រព័ន្ធវីដេអូដែលបានប្រព្រឹត្តទៅអស់រយៈពេល ២ ថ្ងៃកាលពីថ្ងៃទី ២ ដល់ថ្ងៃទី ៣ កក្កដា ឆ្នាំ ២០២០ បានបញ្ជាក់ថា ដោយសារតែវិបត្តិនៃជំងឺកូវីដ ១៩ កម្ពុជាបានសម្រេចលើកពេលនៃកិច្ចប្រជុំកំពូលអាស៊ី-អឺរ៉ុបលើកទី ១៣ ទៅធ្វើនៅពាក់កណ្តាលឆ្នាំ ២០២១ វិញ។ ប៉ុន្ដែកាលពីដំបូងកិច្ចប្រជុំកំពូលអាស៊ី-អឺរ៉ុបលើកទី ១៣ នៅកម្ពុជាគ្រោងធ្វើនៅពាក់កណ្តាល ខែវិច្ឆិកា ឆ្នាំ ២០២០ ក្រោមប្រធានបទ «ការពង្រឹងពហុភាគីនិយម ដើម្បីកំណើនរួមគ្នា»។
លោក កុយ គួង បានថ្លែងថា៖ «ក្រសួងកាបរទេសកម្ពុជានឹងមិនមានការជូនដំណឹងផ្លូវការបន្ថែមក្រៅពីសេចក្ដីប្រកាសព័ត៌មានខាងលើនេះទេ។ ប៉ុន្ដែតាមការគ្រោងទុកកម្ពុជានឹងរៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ នេះនៅក្នុងខែឧសភា ឬខែមិថុនានៅពាក់កណ្ដាលឆ្នាំ ២០២១»។
យោងតាមសេចក្ដីប្រកាសព័ត៌មានស្ដីពីកិច្ចប្រជុំនេះកាលពីថ្ងៃទី ២ ដល់ ថ្ងៃទី ៣ កក្កដា ឆ្នាំ ២០២០ បានឱ្យដឹងថា ដោយសារតែផលវិបាកអាក្រក់នៃការរីករាលដាលនៃជំងឺកូវីដ ១៩ ឧត្ដមមន្ដ្រីទទួលបន្ទុកកិច្ចប្រជុំអាស៊ី-អឺរ៉ុប ទាំងអស់បានបង្ហាញការឯកភាពប្រកបដោយស្មារតី យោគយល់ និងគាំទ្រជាឯកច្ឆន្ទចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលនេះទៅប្រព្រឹត្តនៅពាក់កណ្ដាលឆ្នាំ ២០២០ វិញ។
កម្ពុជាបានក្លាយជាសមាជិកនៃកិច្ចប្រជុំកំពូលអាស៊ី-អឺរ៉ុប កាលឆ្នាំ ២០០៤ និងត្រូវបានផ្តល់សេចក្តីទុកចិត្តឱ្យធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប លើកទី ១៣ នេះដោយនឹងមានការចូលរួមពីសំណាក់ថ្នាក់ដឹកនាំកំពូលនៃប្រទេសនៅតំបន់អឺរ៉ុប និងអាស៊ី លេខាធិការដ្ឋានអាស៊ាន និងសហភាពអឺរ៉ុបចំនួន ៥៣ ប្រទេស និងដៃគូ។ នេះបើយោងតាមការផ្សាយរបស់ភ្នំពេញប៉ុស្ដិ៍នាពេលកន្លងមក៕