The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ចង់​ពិនិត្យ​មើល​វត្ថុ​បុរាណ​ដែល​អាជ្ញាធរ​ថៃ​រឹប​អូស​ពី​ក្រុម​ចោរ

កម្ពុជា​ចង់​ពិនិត្យ​មើល​វត្ថុ​បុរាណ​ដែល​អាជ្ញាធរ​ថៃ​រឹប​អូស​ពី​ក្រុម​ចោរ

រូប​បដិមា​ដែល​តុលាការ​អាមេរិក​សម្រេច​ប្រគល់​មក​ឲ្យ​កម្ពុជា​វិញ​កន្លង​មក។
រូប​បដិមា​ដែល​តុលាការ​អាមេរិក​សម្រេច​ប្រគល់​មក​ឲ្យ​កម្ពុជា​វិញ​កន្លង​មក។ ហេង ជីវ័ន

កម្ពុជា​ចង់​ពិនិត្យ​មើល​វត្ថុ​បុរាណ​ដែល​អាជ្ញាធរ​ថៃ​រឹប​អូស​ពី​ក្រុម​ចោរ

ភ្នំពេញៈ កម្ពុជា​ចង់​ត្រួត​ពិនិត្យ​វត្ថុ​បុរាណ ដែល​ប្រមូល​ដោយ​ក្រុម​ជន​ល្មើស​របស់​មន្ត្រី​រដ្ឋាភិបាល​ថៃ​ម្នាក់ ដែល​បាន​បណ្តេញ​ចេញ​ពី​តំណែង បន្ទាប់​ពី​ទទួល​បាន​ដំណឹង​ថា វត្ថុ​បុរាណ​នោះ​អាច​មាន​រូប​ចម្លាក់​បុរាណ​ខ្មែរ​ជាច្រើន។

លោក កុយ គួង អ្នក​នាំ​ពាក្យ​ក្រសួង​ការ​បរទេស បាន​ឲ្យ​ដឹង​ថា ស្ថានទូត​កម្ពុជា​នៅ​ទីក្រុង​បាងកក បាន​ចេញ​កំណត់​ទូត​មួយ​កាល​ពី ២ សប្តាហ៍​មុន ទៅ​រដ្ឋាភិបាល​ថៃ ដោយ​ស្នើ​សុំ​ពិនិត្យ​វត្ថុ​បុរាណ​ដែល​រឹប​អូស​បាន​ក្នុង​ពេល​ថ្មីៗ​នេះ។

ប៉ុន្តែ​ស្ថានទូត​ខ្មែរ​នៅ​បាងកក​មិន​ទាន់​បាន​ទទួល​ចម្លើយ​តប​នៅ​ឡើយ​ទេ។

លោក កុយ គួង បាន​បញ្ជាក់​ថា៖ «កិច្ចការ ទី១ ដែល​យើង​ត្រូវ​ធ្វើ គឺ​មើល និង​ពិនិត្យ​វត្ថុ​បុរាណ»។

យោង​តាម​ប្រព័ន្ធ​ផ្សព្វ​ផ្សាយ​របស់​យោធា​ថៃ បាន​ឲ្យ​ដឹង​ថា វត្ថុ​របស់​ចោរ​នោះ​ត្រូវ​បាន​រាយការណ៍​ថា បាន​រឹប​អូស​យក​បាន នៅ​ក្នុង​ការ​ស៊ើប​អង្កេត​លើ​ក្រុម​ជំរិត​ទារ​ប្រាក់​របស់​លោក Pongpat Chayapan អតីត​ប្រធាន​ការិយាល័យ​ស៊ើប​អង្កេត​កណ្តាល​ថៃ។

យោង​តាម​កាសែត បាងកក ប៉ុស្តិ៍ បាន​ឲ្យ​ដឹង​ថា ការ​សូក​ប៉ាន់​និង​ការ​បំភិត​បំភ័យ ការ​លាង​លុយ​កង្វក់ និង​ប្រមាថ​ព្រះ​មហាក្សត្រ គឺជា​បទ​ចោទ​ប្រកាន់​មួយ​ចំនួន ដែល​ត្រូវ​បាន​ចោទ​មក​លើ​ក្រុម​នេះ។

ក្រៅ​ពី​វត្ថុ​បុរាណ មាន​ស្បែក​សត្វ​កម្រ ភ្លុក​ដំរី ប្រាក់​សុទ្ធ និង​ឈើ​ប្រណីត​ត្រូវ​បាន​រក​ឃើញ​ក្នុង​ចំណោម​ទ្រព្យ​ផ្សេងៗ ដែល​កាន់​កាប់​ដោយ​សម្ងាត់ ដោយ​បណ្តាញ​ឧក្រិដ្ឋ​ជន​នេះ។

វត្ថុ​បុរាណ​មួយ​ចំនួន​តូច​ក្នុង​ចំណោម​វត្ថុ​បុរាណ​រាប់​ពាន់ ដែល​បាន​រឹប​អូស​ពី​ផ្ទះ​សម្ងាត់​របស់​បណ្តាញ​ចោរ ត្រូវ​បាន​បញ្ជាក់​ថា ជា​វត្ថុ​បុរាណ​ពិត។

យោង​តាម​ក្រសួង​វប្បធម៌​ថៃ បាន​ឲ្យ​ដឹង​ថា ទោះ​ជា​យ៉ាង​ណា ក្នុង​ចំណោម​វត្ថុ​បុរាណ​ដែល​បាន​ពិនិត្យ​រួច​នោះ វត្ថុ​បុរាណ​ជាច្រើន ត្រូវ​គេ​គិត​ថា ជា​រូប​ចម្លាក់​របស់​ប្រទេស​កម្ពុជា។

លោក Bovornvet Rungrujee អគ្គ​នាយក​នៃ​នាយកដ្ឋាន​វិចិត្រ​សិល្បៈ​ថៃ បាន​ឲ្យ​ដឹង​ក្នុង​សន្និសីទ​សារ​ព័ត៌មាន នៅ​ដើម​ខែ​នេះ​ថា៖ «លទ្ធផល​បឋម​បង្ហាញ​ថា រូប​ចម្លាក់​ខ្មែរ​យ៉ាង​ហោច ១០ គឺ​ពិត ដែល​ខ្លះ​ត្រូវ​លួច​មក​ពី​ប្រាសាទ​ភ្នំ​ដា​មាន​អាយុ​កាល ១៤០០ ឆ្នាំ​មុន​រហូត​ដល់​សតវត្សរ៍ ទី៧»។

ដើម្បី​សម្រួល​ដល់​ការ​បញ្ជូន​ផល​ចោរកម្ម​ទាំង​នេះ​ទៅ​ប្រទេស​ដើម​វិញ នាយកដ្ឋាន​បាន​ឲ្យ​ដឹង​ថា នាយកដ្ឋាន​នឹង​បង្ហោះ​រូប​វត្ថុ​បុរាណ​លើ​វេបសាយ​របស់​ខ្លួន។ ប៉ុន្តែ បដិមា​ទាំង​នោះ​ពុំ​ទាន់​បង្ហាញ​ទេ ពី​ម្សិល​មិញ។

ក្រសួង​វប្បធម៌​ថៃ បាន​បដិសេធ​មិន​ផ្តល់​ការ​អត្ថាធិប្បាយ​ទេ​កាល​ពី​ម្សិល​មិញ ព្រោះ​ត្រូវ​សុំ​ការ​ឯកភាព «មុន​ពេល​យើង​អាច​ផ្តល់​ព័ត៌មាន​ដល់​ជន​បរទេស​ឬ​ប្រព័ន្ធ​ផ្សព្វ​ផ្សាយ»។

លោក កុយ គួង បាន​ថ្លែង​ថា លោក​មិន​អាច​និយាយ​បាន​ទេ​ថា តើ​កម្ពុជា​អាច​ចាត់​ចែង​អ្វី​ខ្លះ​លើ​រូប​ចម្លាក់​នោះ ប្រសិន​បើ​រូប​ចម្លាក់​នោះ​ត្រូវ​បញ្ជូន​មក​វិញ​ឬ​ក៏​លោក​ជឿ​ថា ចម្លាក់​ទាំង​នោះ​ជា​របស់​ចោរ​លួច​មែន​នោះ។

ទោះ​ជា​យ៉ាង​ណា អ្នក​ជំនាញ​បុរាណវិទ្យា បាន​រក​ឃើញ​ប្រភព​ស្រប​ច្បាប់​មួយ​ចំនួន​សម្រាប់​វត្ថុ​បុរាណ​កម្ពុជា ដែល​ត្រូវ​បាន​លួច​ពី​ប្រាសាទ និង​ជួញ​ដូរ​ខុស​ច្បាប់ ជា​ផ្នែក​នៃ​បណ្តាញ​ឧក្រិដ្ឋកម្ម​ឆ្លង​ដែន មុន​នឹង​ទៅ​ដល់​ដៃ​ឯកជន។ លោក Tess Davis មេធាវី និង​អ្នក​ស្រាវ​ជ្រាវ​វត្ថុ​បុរាណ​នៅ​សាកល​វិទ្យាល័យ Glasgow បាន​ឲ្យ​ដឹង​ថា៖ «រាល់​វត្ថុ​បុរាណ​លើ​ទីផ្សារ​ត្រូវ​លួច​ពី​កន្លែង​បុរាណ​វិទ្យា»។

ទោះ​ជា​យ៉ាង​ណា នា​ពេល​ថ្មីៗ​នេះ កម្ពុជា​បាន​ទទួល​ជោគជ័យ​សំខាន់ៗ ក្នុង​ការ​ទាមទារ​ស្នាដៃ​ដែល​បាន​ជួញ​ដូរ​ទៅ​ក្រៅ​ប្រទេស។ កាល​ពី​ឆ្នាំ​មុន សារមន្ទីរ Metropolitan Museum of Art នៃ ទីក្រុង​ញូវយ៉ក បាន​យល់​ព្រម​ប្រគល់​រូប​ចម្លាក់​ចំនួន​ពីរ​មក​ឲ្យ​កម្ពុជា​វិញ។

បន្ទាប់​ពី​ការ​តស៊ូ​ក្តី​ក្តាំង ក្រុមហ៊ុន​ដេញ​ថ្លៃ Sotheby ក៏បាន​លះបង់​រូប​ចម្លាក់​សតវត្សរ៍ ទី១១ មក​ឲ្យ​កម្ពុជា​វិញ។

គ្រប់​វត្ថុ​បុរាណ​ទាំង​អស់​ដែល​បាន​ប្រគល់​មក​ឲ្យ​កម្ពុជា​វិញ បច្ចុប្បន្ន​កំពុង​ដាក់​បង្ហាញ​នៅ​សារមន្ទីរ​ជាតិ​នៅ​ភ្នំពេញ ដោយ​ក្តី​សង្ឃឹម​ថា ថ្ងៃ​មួយ​រូប​ចម្លាក់​ទាំង​នោះ​នឹង​ត្រូវ​យក​ទៅ​កន្លែង​ដើម​វិញ នៅ​ប្រាសាទ​ក្នុង​ព្រៃ​ដាច់​ស្រយាល គឺ​ប្រាសាទ​ចិន ខាង​ត្បូង​តំបន់​អង្គរ។

លោក​ប្រធាន​សារមន្ទីរ​ជាតិ បាន​ថ្លែង​ថា លោក​សង្ឃឹម​ថា អ្នក​ស្រាវជ្រាវ​អាច​កំណត់​ពី​ប្រភព​ដើម​នៃ​ស្នាដៃ​ដែល​រឹប​អូស​បាន​នៅ​ថៃ ហើយ​រូប​ចម្លាក់​នោះ​អាច​វិល​មក​ប្រទេស​ដើម​វិញ​ក្នុង​ពេល​ឆាប់។

លោក គង់ វីរៈ ប្រធាន​សារមន្ទីរ​ជាតិ បាន​ថ្លែង​ឲ្យ​ដឹង​កាល​ពី​ម្សិល​មិញ​ថា៖ «ប្រសិន​បើ​ជា​រូប​ចម្លាក់​ខ្មែរ យើង​ត្រូវ​ទាមទារ​កេរ​ដំណែល​យើង​វិញ។ ប៉ុន្តែ យើង​មិន​អាច​និយាយ​ឲ្យ​ច្បាស់​ថា បាន​មក​ពី​កម្ពុជា​ឬ​បាន​ពី​ប្រាសាទ​ខ្មែរ​នៅ​ថៃ​ឡើយ បើ​គ្មាន​ការ​ស្រាវជ្រាវ​បន្ថែម​ទេ​នោះ»៕

រាយការណ៍​បន្ថែម បាងកក ប៉ុស្តិ៍

អត្ថបទគួរចាប់អារម្មណ៍