ភ្នំពេញៈ ក្រសួងការបរទេសបានចេញសេចក្ដីថ្លែងការណ៍បញ្ជាក់ពីជំហររបស់កម្ពុជាក្នុងការគោរព «គោលនយោបាយចិនតែមួយ» ហើយចាត់ទុកស្ថានការណ៍កំពុងវិវត្តនៅទីក្រុងហុងកុងថា ជាកិច្ចការផ្ទៃក្នុងរបស់សាធារណរដ្ឋប្រជាមានិតចិន។
សេចក្ដីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិផ្សព្វផ្សាយកាលពីថ្ងៃសៅរ៍បានសរសេរថា៖ «ប្រទេសកម្ពុជាគាំទ្រនូវរាល់ចំណាត់ការចាំបាច់នានារបស់រដ្ឋាភិបាលនៃសាធារណរដ្ឋប្រជាមានិតចិន និងតំបន់រដ្ឋបាលពិសេសទីក្រុងហុងកុងដើម្បីរក្សាសន្តិភាពសណ្ដាប់ធ្នាប់សាធារណៈ សន្តិសុខជាតិ និងការរួមរស់នៅជាមួយគ្នាប្រកបដោយភាពសុខដុមរមនាក្នុងសង្គមដោយអនុលោមទៅតាមច្បាប់ និងបទប្បញ្ញត្តិទាំងឡាយរបស់ប្រទេស និងការប្រតិបត្តិជាអន្តរជាតិ»។
ក្រសួងការបរទេសបញ្ជាក់ថា កម្ពុជាចង់ឃើញការវិលត្រឡប់មករកភាពប្រក្រតីឡើងវិញឲ្យបានឆាប់នូវជីវភាពរស់នៅប្រកបដោយសុខសន្តិភាពរបស់ប្រជាជនហុងកុងទាំងមូល។
លោក កេត សោផាន់ អ្នកនាំពាក្យក្រសួងការបរទេសបដិសេធអត្ថាធិប្បាយបន្ថែមដោយលោកថ្លែងថា សេចក្ដីប្រកាសព័ត៌មានបានបញ្ជាក់ច្បាស់ហើយ។
ពលរដ្ឋទីក្រុងហុងកុង ជាពិសេសនិស្សិតបានធ្វើបាតុកម្មអស់ជាច្រើនខែមកហើយប្រឆាំងនឹងសេចក្តីព្រាងច្បាប់ធ្វើបត្យាប័នជនល្មើសពីទីក្រុងហុងកុង ទៅកាត់ទោសនៅក្នុងប្រព័ន្ធតុលាការរបស់ចិន។
ស្ថានទូតចិនប្រចាំកម្ពុជាក៏បានចេញសេចក្ដីថ្លែងការណ៍ផងដែរកាលពីថ្ងៃទី ១៦ សីហា ដោយប្រកាសប្រឆាំងដាច់ខាត ភាពចលាចលនៅទីក្រុងហុងកុង។ តាមរយៈការអត្ថាធិប្បាយ ៤ ទំព័រ ជាភាសាខ្មែរលោក Wang Wentian ឯកអគ្គរដ្ឋទូតចិនប្រចាំកម្ពុជាថ្លែងថា សកម្មភាពបាតុកម្មនៅទីក្រុងហុងកុងបានដើរហួសពីព្រំដែននៃការធ្វើបាតុកម្មធម្មតា ហើយបានប្រែក្លាយជាសកម្មភាពហិង្សាជ្រុលនិយមដែលធ្វើឲ្យប៉ះពាល់ធ្ងន់ធ្ងរដល់ស្ថិរភាពសង្គមសុវត្ថិភាព អាយុជីវិត និងទ្រព្យសម្បត្តិរបស់ប្រជាជនហុងកុង។
លោក Wang ក៏បានអរគុណដល់កម្ពុជាដែល «តាំងពីដើមរៀងមកប្រកាន់ជំហរគាំទ្រភាគីចិនយ៉ាងមុតមាំចំពោះបញ្ហាទាំងឡាយដែលពាក់ព័ន្ធនឹងផលប្រយោជន៍របស់ប្រទេស ចិន យើងសូមថ្លែងអំណរគុណយ៉ាងជ្រាលជ្រៅចំពោះចំណុចនេះ»។
បើតាមលោក Wang ប្រទេស ចិន បន្តអនុវត្តឥតងាករេចំពោះគោលលំនាំ «ប្រទេសមួយប្រព័ន្ធគ្រប់គ្រង ២»។ «ការប្រឆាំងតទល់ដោយសន្តិភាព» របស់បាតុករតាមពិតគឺជាអំពើហិង្សាដោយបានបង្កគ្រោះថ្នាក់បំផ្លាញទ្រព្យសម្បត្តិផ្សេងៗ។
លោកថា៖ «ច្បាស់ណាស់សកម្មភាពជនបង្កហិង្សាមួយចំនួននៅហុងកុងមិនមែនដើម្បីទាមទារប្រឆាំងនឹងច្បាប់បត្យាប័នជនសង្ស័យនោះទេ គោលដៅរបស់ពួកគេគឺបង្កឲ្យហុងកុងកើតចលាចល និងធ្លាក់លិចលង់រួចកម្ទេចប្រទេសមួយប្រព័ន្ធគ្រប់គ្រង ២»។
លោក Wang ថារដ្ឋាភិបាលមជ្ឈិមចិនប្ដេជ្ញាដាច់ខាតគាំទ្រលោកស្រី Carrie Lam ដែលជាប្រធានប្រតិបត្តិក្រុងហុងកុង។ លោកថាចលាចលនៅហុងកុងគឺដោយសារការជ្រៀតជ្រែកពីខាងក្រៅដោយបានលើកឡើងចំៗថាស្ថាប័នរបស់អាមេរិកនៅហុងកុងបានជួបជាមួយអ្នកដឹកនាំបាតុកម្ម ដើម្បីធ្វើជាខ្នងបង្អែកដល់ការធ្វើបាតុកម្មខុសច្បាប់។
លោក សុខ ទូច ប្រធានរាជបណ្ឌិត្យសភាកម្ពុជាថ្លែងថាការប្រកាសរបស់កម្ពុជាគាំទ្រដល់វិធានការច្បាប់របស់ចិន និងរដ្ឋបាលក្រុងហុងកុងគឺដោយសារតែកម្ពុជាធ្លាប់ឆ្លងកាត់ការប្រឆាំងធ្វើបាតុកម្មជាច្រើនដងមកហើយតាំងពីមុនឆ្នាំ ១៩៧០ ប៉ុន្តែជាលទ្ធផលមិនមានអ្វីល្អទេគឺពលរដ្ឋជាអ្នករងគ្រោះមិនមែនអ្នកនៅពីក្រោយនោះទេ។ លោកថាហុងកុងស្ថិតក្រោមការគ្រប់គ្រងរបស់ចិន ដូច្នេះត្រូវគោរពតាមគោលនយោបាយរបស់ចិន។
ចំណែកឯលោក មាស នី អ្នកវិភាគបញ្ហាសង្គមយល់ថាការប្រកាសគាំទ្ររបស់កម្ពុជាលើវិធានការរបស់រដ្ឋាភិបាលចិនគឺជាសារនយោបាយរបស់ប្រទេសមួយដែលមាននិន្នាការទៅរកចិន ដើម្បីឲ្យមហាអំណាចចិនមានការពេញចិត្តជាមួយនឹងទំនាក់ទំនងបច្ចុប្បន្ន។ «នៅក្នុងរឿងនេះខ្ញុំគិតថាគ្រាន់តែជាផ្នែកមួយដែលរដ្ឋាភិបាលកម្ពុជាធ្វើឲ្យចិនសប្បាយចិត្តហើយក្លាយទៅជាអ្នកដែលគិតគូរមួយល្អ ជាមិត្តភក្តិល្អមួយដែលស្មោះត្រង់ដែលការពារប្រយោជន៍ចិនទាំងអស់ទាំងផ្លូវមួយខ្សែក្រវាត់មួយទាំងព្រឹត្តិការណ៍នៅហុងកុង»។
លោកបន្តថា តាមគំនិតរបស់លោកកម្ពុជាគួរតែនៅស្ងៀមចំពោះព្រឹត្តិការណ៍នៅហុងកុង ពីព្រោះពិភពលោកកំពុងតាមមើលព្រឹត្តិការណ៍នេះ៕