.jpg)
គ្រូបង្រៀនទទួលបានការចាក់វ៉ាក់សាំងការពារជំងឺកូវីដ ១៩ នៅបឋមសិក្សាកុលាប ១ ក្នុងខណ្ឌដូនពេញ កាលពីម្សិលមិញ។ ហុង មិនា
ភ្នំពេញៈ កម្ពុជាបានចាប់ផ្តើមយុទ្ធនាការចាក់វ៉ាក់សាំងកូវីដ ១៩ ទ្រង់ទ្រាយធំនៅទូទាំងប្រទេសកាលពីម្សិលមិញទៅតាមគម្រោងរបស់រដ្ឋាភិបាលដែលត្រូវចាក់ឱ្យបាន ១ លានដូសក្នុងរយៈពេល ១ ខែ ខណៈរដ្ឋាភិបាលជប៉ុនបានផ្តល់ជំនួយថវិកាបន្ទាន់ជិត ១ លានដុល្លារ ដើម្បីកែលម្អការគ្រប់គ្រងប្រព័ន្ធត្រជាក់សម្រាប់ទុកដាក់វ៉ាក់សាំង។
លោក គឹម សួរភិរុណ ប្រធានមន្ទីរសុខាភិបាលខេត្តកំពង់ចាមថ្លែងពីថ្ងៃម្សិលមិញថា សម្រាប់ខេត្តកំពង់ចាមបានទទួលវ៉ាក់សាំងចំនួន ៣៩ ០០០ ដូស សម្រាប់ចាក់ជូនដល់ប្រជាពលរដ្ឋចំនួន ១៨ ០០០ នាក់។
លោកថ្លែងថា៖ «មន្ទីរសុខាភិបាលខេត្តកំពង់ចាមបានរៀបចំចាក់វ៉ាក់សាំងដល់ប្រជាពលរដ្ឋឱ្យទាន់ពេលវេលា ដែលមានទីតាំងចំនួន ២៩ កន្លែងក្នុងខេត្ត និងបានបណ្តុះបណ្តាលគ្រូពេទ្យចំនួន ៣៦០ នាក់សម្រាប់យុទ្ធនាការចាក់វ៉ាក់សាំងនៅក្នុងខេត្តនេះ»។
ចំណែកក្រសួងអប់រំ យុវជន និងកីឡាក៏បានចាប់ផ្តើមចាក់វ៉ាក់សាំងទៅដល់គ្រូបង្រៀននៅទូទាំងប្រទេសនៅថ្ងៃម្សិលមិញនេះដែរ។ បើតាមអ្នកនាំពាក្យក្រសួងអប់រំលោក រស់ សុវាចា ជាទូទៅដំណើរការចាក់វ៉ាក់សាំងជូនបុគ្គលិកអប់រំសាធារណ: និងឯកជនតាមគោលការណ៍ស្ម័គ្រចិត្តពីថ្ងៃម្សិលមិញបានប្រព្រឹត្តទៅបានរលូន មិនទាន់មានហេតុការគួរឱ្យកត់សម្គាល់កើតឡើងនៅឡើយទេ។
លោក រស់ សុវាចា ថា៖ «បុគ្គលិកអប់រំសាធារណ: និងឯកជន ដែលបានស្ម័គ្រចិត្តចាក់វ៉ាក់សាំងមានចំនួនសរុប ១៦៨ ០០០ នាក់នៅទូទាំង ២៥ ខេត្ត-រាជធានី។ ការចាក់វាក់សាំងជូនបុគ្គលិកអប់រំនេះស្ថិតក្រោមគោលការណ៍ស្ម័គ្រចិត្ត»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមិនអាចទាក់ទងសុំការអធិប្បាយពីដំណើរការយុទ្ធនាការចាក់វ៉ាក់សាំងនេះទេពីម្សិលមិញ។ ប៉ុន្តែតាមសេចក្តីប្រកាសព័ត៌មានកាលពីថ្ងៃទី ៣១ ខែមីនា លោកស្រីបានបញ្ជាក់ថា ក្រសួងសុខាភិបាលបានកំណត់ក្រុមគោលដៅដែលត្រូវចាក់វ៉ាក់សាំងសរុបចំនួន ៧៤៥ ០០០ នាក់ សម្រាប់ចំនួនដូសទី ១ នៃការចាក់វ៉ាក់សាំងស៊ីណូវ៉ាក់ (Sinovac) ទៅដល់ប្រជាពលរដ្ឋដែលមានអាយុចាប់ពី ១៨ ឆ្នាំឡើងទៅ ដើម្បីការពារខ្លួនឯងផ្ទាល់ ការពារក្រុមគ្រួសារខ្លួនឯង និងការពារសហគមន៍ទាំងមូល។
កាលពីម្សិលមិញនេះដែរ អង្គការយូនីសេហ្វ បានចេញសេចក្តីប្រកាសព័ត៌មានមួយថា ប្រទេសជប៉ុនបានផ្តល់ថវិកាជិត ១ លានដុល្លារ ដើម្បីគាំទ្ររាជរដ្ឋាភិបាលកម្ពុជាក្នុងកិច្ចខិតខំប្រឹងប្រែងចាក់វ៉ាក់សាំងកូវីដ១៩ ជាពិសេសដើម្បីបង្កើនសមត្ថភាពនៃប្រព័ន្ធត្រជាក់តាមរយៈការរៀបចំនូវហេដ្ឋារចនាសម្ព័ន្ធ បរិក្ខារ មធ្យោបាយដឹកជញ្ជូន និងផ្តល់ការបណ្ដុះបណ្ដាលដល់បុគ្គលិកសុខាភិបាល។ សមត្ថភាពនៃប្រព័ន្ធត្រជាក់មានសារៈសំខាន់យ៉ាងខ្លាំងសម្រាប់ការដឹកជញ្ជូនវ៉ាក់សាំងដែលត្រូវរក្សាទុកក្នុងសីតុណ្ហភាពត្រជាក់ដើម្បីរក្សាប្រសិទ្ធភាព រាប់បញ្ចូលទាំងវ៉ាក់សាំងកូវីដ១៩ផងដែរ។
សេចក្តីប្រកាសនេះបញ្ជាក់ថា កាលពីខែធ្នូ ឆ្នាំ ២០២០ ជាផ្នែកមួយនៃការរៀបចំសម្រាប់យុទ្ធនាការចាក់វ៉ាក់សាំង រាជរដ្ឋាភិបាលកម្ពុជា យូនីសេហ្វ និងដៃគូដទៃទៀតបានធ្វើការវាយតម្លៃសមត្ថភាពនៃប្រព័ន្ធត្រជាក់សម្រាប់ទុកដាក់វ៉ាក់សាំងរបស់ប្រទេសនេះ។ ការវាយតម្លៃបានរកឃើញនូវចំណុចមួយចំនួនដែលត្រូវពង្រឹងបន្ថែមដោយប្រើប្រាស់ថវិកាគាំទ្រថ្មីនេះ។
ប្រភពដដែលបានលើកឡើងថា៖ «ថវិកាជំនួយនេះនឹងបង្កើនសមត្ថភាពនៃប្រព័ន្ធសុខាភិបាលរបស់ប្រទេសកម្ពុជា ខណៈដែលប្រទេសនេះកំពុងចាប់ផ្ដើមអនុវត្តកម្មវិធីចាក់វ៉ាក់សាំងរហ័ស និងក្នុងទ្រង់ទ្រាយធំបំផុតដែលមិនធ្លាប់មាននៅក្នុងប្រវត្តិសាស្ត្រ»។
យូនីសេហ្វថា ជាការសំខាន់ណាស់ដែលត្រូវធានាថាការបែងចែកវ៉ាក់សាំងកូវីដ ១៩ នឹងមិនដាក់បន្ទុកធ្ងន់ធ្ងរពេកមកលើសមត្ថភាពបច្ចុប្បន្នដែលអាចបង្កឱ្យមានការរំខានដល់សេវាផ្ដល់ថ្នាំបង្ការសម្រាប់កុមារ ហើយក្នុងពេលជាមួយគ្នាត្រូវពង្រឹងសមត្ថភាពនៃប្រព័ន្ធសុខាភិបាលដែលមានស្រាប់ ដើម្បីឱ្យប្រទេសកម្ពុជា នៅតែទទួលបានប្រយោជន៍ ក្រោយពេលចប់ជំងឺរាតត្បាតជាសកលនេះ។
ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជាលោក មីកាមិ ម៉ាសាហ៊ីរ៉ូ ថ្លែងថា៖ «ការចែកចាយផ្ដល់វ៉ាក់សាំងគឺមានសារៈសំខាន់ដូចគ្នាទៅនឹងវ៉ាក់សាំងដែរ។ រាជរដ្ឋាភិបាលជប៉ុនប្ដេជ្ញាជួយកែលម្អកម្មវិធីផ្ដល់វ៉ាក់សាំងនៅប្រទេសកំពុងអភិវឌ្ឍន៍»។
លោកបន្តថា បទពិសោធច្រើនឆ្នាំរបស់យូនីសេហ្វក្នុងកិច្ចសហការជាមួយនឹងរាជរដ្ឋាភិបាលកម្ពុជាលើការអនុវត្តកម្មវិធីផ្ដល់ថ្នាំបង្ការ គឺជាហេតុផលដែលធ្វើឱ្យយើងមានទំនុកចិត្តទាំងស្រុងថា ថវិកាជំនួយនេះពិតជានឹងនាំឱ្យសម្រេចបាននូវលទ្ធផលវិជ្ជមានយ៉ាងធំធេងមកលើយុទ្ធនាការចាក់វ៉ាក់សាំងកូវីដ ១៩។ «យើងនឹងបន្តសហការជាមួយយូនីសេហ្វ និងរាជរដ្ឋាភិបាលកម្ពុជា រហូតដល់ពេលដែលយើងអាចនិយាយបានយ៉ាងពិតប្រាកដថា យើងពិតជាទប់ស្កាត់បានទាំងស្រុង និងអាចស្តារទ្បើងវិញពីការរាតត្បាតជាសកលនៃជំងឺកូវីដ ១៩»។
លោកស្រី ហ្វ័រូហ្គ ហ្វូយូហ្សិថ នាយិកាយូនីសេហ្វប្រចាំកម្ពុជាបានសម្ដែងការដឹងគុណចំពោះរាជរដ្ឋាភិបាលជប៉ុនដែលបានគាំទ្រដល់កម្ពុជាក្នុងពេលដ៏ចាំបាច់នេះ ជាពិសេសក្នុងពេលដែលចំនួនករណីកូវីដ១៩កំពុងកើនឡើង។
លោកស្រីបញ្ជាក់ថា៖ «ជំងឺរាតត្បាតជាសកលពុំស្គាល់ព្រំដែននោះឡើយ ហើយវ៉ាក់សាំងត្រូវតែបានផ្តល់ទៅដល់មនុស្សដែលងាយឆ្លងមេរោគនេះជាងគេ និងមុនគេ។ មូលនិធិដែលផ្ដល់ដោយរាជរដ្ឋាភិបាលជប៉ុនមានតម្លៃមិនអាចកាត់ថ្លៃបាន ដើម្បីជួយឱ្យយើងទាំងអស់គ្នាអាចបន្តគាំទ្រដល់រាជរដ្ឋាភិបាលកម្ពុជាក្នុងការអនុវត្តយុទ្ធនាការចាក់វ៉ាក់សាំងកូវីដ ១៩»។
លោកស្រី ហ្វ័រូហ្គ ហ្វូយូហ្សិថ ថានេះគឺជាជំហានមួយដ៏សំខាន់ក្នុងការត្រួសត្រាយផ្លូវឆ្ពោះទៅរកការស្ដារឡើងវិញពីវិបត្តិនេះ។
គិតត្រឹមព្រឹកថ្ងៃទី ១ ខែ មេសា ឆ្នាំ ២០២១ នេះ កម្ពុជាមានអ្នកឆ្លងសរុបចំនួន ២ ៤៧៧ នាក់អ្នកជាសះស្បើយចំនួន ១ ២៤០ នាក់ អ្នកកំពុងព្យាបាលចំនួន ១ ២១៩ នាក់ និងអ្នកស្លាប់ចំនួន ១៦ នាក់៕
