.jpg)
អ្នកតវ៉ាសុំឱ្យមានការដោះលែងលោក រ៉ុង ឈុន ពីថ្ងៃទី ២៤ សីហា នៅមុខការិយាល័យ UN។ ហ៊ាន រង្សី
ភ្នំពេញៈ ក្រសួងយុត្តិធម៌ និងក្រសួងមហាផ្ទៃឆ្លើយតបចំពោះករណីចាប់ខ្លួន លោក រ៉ុង ឈុន ទៅនឹងក្ដីបារម្ភរបស់អ្នករាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិដែលទទួលព័ត៌មានថា ការចាប់ខ្លួនធ្វើឡើងតាមទំនើងចិត្ត។ ក្រសួងទាំង ២ បញ្ជាក់ថា ការចាប់ខ្លួនធ្វើឡើងស្របតាមច្បាប់កម្ពុជា ដោយហេតុថាបុគ្គលរូបនេះព្យាយាមធ្វើឱ្យមានការយល់ច្រឡំដល់មតិជាតិ និងអន្តរជាតិ និងបង្កភាពចលាចលក្នុងសង្គម។
ការឆ្លើយតបនេះធ្វើឡើងតាមរយៈលិខិតរបស់ស្ថានបេសកកម្មអចិន្រៃ្តយ៍នៃព្រះរាជាណាចក្រកម្ពុជាប្រចាំអង្គការសហប្រជាជាតិនៅទីក្រុងហ្ស៊ឺណែវចុះថ្ងៃទី ៣០ តុលា ដែលត្រូវបានការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា (OHCHR) ផ្សព្វផ្សាយកាលពីថ្ងៃទី ៤ វិច្ឆិកា។
នៅក្នុងលិខិតឆ្លើយតបនេះក៏ធ្វើឡើងបន្ទាប់ពីអ្នករាយការណ៍ពិសេសចំនួន ៤ រូបរួមទាំងលោកស្រី រ៉ូណា ស្ម៊ីត និងក្រុមការងារប្រឆាំងការចាប់ខ្លួនតាមទំនើងចិត្តបានស្នើសុំឱ្យរដ្ឋាភិបាលកម្ពុជាពន្យល់អំពីអង្គហេតុ និងអង្គច្បាប់ករណីលោក រ៉ុង ឈុន។
កាលពីថ្ងៃទី ១៧ ខែតុលា OHCHR បានផ្សព្វផ្សាយលិខិតរបស់ក្រុមអ្នករាយការណ៍ពិសេសខាងលើដែលក្នុងលិខិតនោះ ក្រុមអ្នករាយការណ៍ពិសេសបញ្ជាក់ថា ពួកគេបានទទួលព័ត៌មានថា លោក រ៉ុង ឈុន ត្រូវបានចាប់ខ្លួននៅយប់ថ្ងៃទី ៣១ ខែកក្កដា ដោយមនុស្សប្រមាណ ៣០ នាក់ដោយគ្មានដីកា។ ការចាប់ខ្លួនធ្វើឡើងបន្ទាប់ពីលោក រ៉ុង ឈុន បានបង្ហាញក្ដីបារម្ភពីការរាយការណ៍ថា មានការរំលោភដីធ្លីនៅតាមព្រំដែនកម្ពុជា-វៀតណាម។
ក្រុមអ្នករាយការណ៍ពិសេសមានក្ដីបារម្ភថា ការចាត់ទុកសម្ដីរបស់លោក រ៉ុង ឈុន ជាបទល្មើសនោះហាក់ដូចជាមិនស្របទៅតាមស្មារតីនៃមាត្រា ១៩ នៃកតិកាសញ្ញាអន្តរជាតិស្តីពីសិទិ្ធពលរដ្ឋ និងសិទិ្ធនយោបាយ ហើយការចាប់ខ្លួននេះប្រហែលមិនធ្វើឡើងតាមស្តង់ដាដែលចែងអំពីបទល្មើសជាក់ស្ដែងទេ ហើយប្រហែលផ្ទុយនឹងច្បាប់អន្តរជាតិ។
ក្រុមអ្នករាយការណ៍ពិសេសបានសរសេរថា៖ «សូមផ្ដល់ព័ត៌មានអំពីអង្គហេតុនិងអង្គច្បាប់សម្រាប់ការចាប់ និងឃុំខ្លួនលោក រ៉ុង ឈុន និងថា តើអង្គហេតុនិងអង្គច្បាប់នេះស្របទៅនឹងគោលការណ៍ និងស្ដង់ដាអន្តរជាតិលើបញ្ហាសិទ្ធិមនុស្សយ៉ាងដូចម្ដេចអំពីសេរីភាពនៃការបញ្ចេញមតិ និងសេរីភាពនៃការចូលរួមក្នុងកិច្ចការសាធារណៈ»។
ក្រុមអ្នករាយការណ៍ពិសេសបន្តថា៖ «សូមផ្ដល់ព័ត៌មានបន្ថែមអំពីភាពសមាមាត្រនៃការចាប់ខ្លួននេះទៅនឹងសិទ្ធិសេរីភាព និងសន្តិសុខបុគ្គល រួមមានទាំងការបញ្ជាក់ពីការចាប់ខ្លួន និងហេតុផលនៃការចាប់ខ្លួន»។
ឆ្លើយតបនឹងក្ដីបារម្ភនេះក្រសួងមហាផ្ទៃបានថ្លែងថាលោក រ៉ុង ឈុន ត្រូវបានចាប់ខ្លួនដោយមានការសម្របសម្រួលនីតិវិធីពីព្រះរាជអាជ្ញារងនៃសាលាដំបូងរាជធានីភ្នំពេញ ហើយបន្ទាប់មកក៏ត្រូវបានឃុំខ្លួនដោយមានការសម្រេចពីចៅក្រមស៊ើបសួរ។
ក្រសួងបន្តថា លោក រ៉ុង ឈុន បានធ្វើសេចក្ដីថ្លែងការណ៍ភ្ជាប់ជាមួយនឹងវីដេអូឃ្លីបដែលរៀបរាប់ពីសកម្មភាពរបស់លោកនៅតាមព្រំដែន ដោយមានបំណងញុះញង់ឱ្យបាត់សណ្ដាប់ធ្នាប់សង្គម ចលាចល ដែលបង្កឱ្យមានភាពវឹកវរក្នុងសង្គមប៉ះពាល់ដល់សន្តិសុខជាតិ និងសណ្ដាប់ធ្នាប់សាធារណៈ។
ក្រសួងមហាផ្ទៃបញ្ជាក់ថា៖ «នគរបាលមានកាតព្វកិច្ចចូលរួមក្នុងការរក្សាសន្តិសុខសង្គម និងសណ្ដាប់ធ្នាប់សាធារណៈ ដើម្បីជាប្រយោជន៍ជាតិ និងដើម្បីសន្តិភាពសម្រាប់ប្រជាពលរដ្ឋ»។
ចំណែកក្រសួងយុត្តិធម៌បានបកស្រាយថា ការចាប់ខ្លួនលោក រ៉ុង ឈុន ធ្វើឡើងស្របតាមមាត្រាមានចែងក្នុងក្រមព្រហ្មទណ្ឌរបស់កម្ពុជាគ្រប់ដំណាក់កាល។ លោក រ៉ុង ឈុន បានបំភ្លៃព័ត៌មានអំពីការបោះបង្គោលខណ្ឌសីមាព្រំដែនកម្ពុជា-វៀតណាម ដោយមានបំណងធ្វើឱ្យមតិសាធារណជនយល់ខុស និងញុះញង់ឱ្យបាត់បង់សណ្ដាប់ធ្នាប់សាធារណៈ និងភាពវឹកវរប៉ះពាល់ដល់សន្តិសុខជាតិ។
ក្រសួងយុត្តិធម៌បានបញ្ជាក់ថា៖ «ខ្លឹមសារនៃឯកសារដែលលោក រ៉ុង ឈុន បានចែកចាយព្យាយាមធ្វើឱ្យមតិជាតិ និងអន្តរជាតិមានការយល់ច្រឡំ ក៏ដូចជាបង្កចលាចលសង្គម»៕
វីដេអូ៖
