.jpg)
ពលករខ្មែរមានជំងឺនៅប្រទេសកូរ៉េដែលត្រូវបានជួយឲ្យមានកិច្ចគាំពារផ្នែកសុខភាព។ រូបថត ហ្វេសប៊ុក
ភ្នំពេញៈ ស្ថានទូតកម្ពុជាប្រចាំសាធារណរដ្ឋកូរ៉េបានអន្តរាគមន៍ជួយពលករខ្មែរម្នាក់ ដើម្បីទទួលបានកិច្ចគាំពារផ្នែកសុខភាព និងកំពុងស្រាវជ្រាវករណីបាត់ខ្លួនស្ត្រីខ្មែរម្នាក់ ដោយគ្មានមូលហេតុ បន្ទាប់ពីបានរៀបការទៅរស់នៅប្រទេសកូរ៉េបាន ២ ខែ។ នេះបើតាមលោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េពីម្សិលមិញ។
លោក ឡុង ឌីម៉ង់ ប្រាប់ ភ្នំពេញ ប៉ុស្តិ៍ថា កាលពីថ្ងៃទី ២២ កុម្ភៈ ក្រុមមន្ត្រី ស្ថានទូត ទទួលបន្ទុកផ្នែកការងារគ្រប់គ្រងពលករខ្មែរនៅសាធារណរដ្ឋកូរ៉េ បានអន្តរាគមន៍ជួយបុរសជាពលករខ្មែរម្នាក់ដែលបម្រើការងារក្នុងរោងចក្រផលិតគ្រឿងបន្លាស់ និងដំឡើងទូទឹកកក ១ កន្លែងស្ថិតក្នុងតំបន់ Gimhae ភាគខាងត្បូងទីក្រុង Busan ដើម្បីឲ្យពលកររូបនោះទទួលបានកិច្ចគាំពារព្យាបាលជំងឺដូចពលករដទៃទៀត។
លោកបញ្ជាក់ថា៖ «តាមសេចក្ដីរាយការណ៍ដែលក្រុមការងារយើងទទួលបាន ពលករខ្មែរដែលបម្រើការងារនៅក្នុងរោងចក្រនោះមានចំនួន ៧ នាក់ ក្នុងនោះមានម្នាក់មានជំងឺបាត់បង់ផ្នែកសតិស្មារតី»។
ទោះជាយ៉ាងណា ពលករខ្មែរមានជំងឺនោះមិនត្រូវបានអនុញ្ញាតឲ្យបញ្ចេញនូវអត្តសញ្ញាណឡើយ។
លោកបន្តថា៖ «ពលកររូបនោះបានធ្វើឲ្យបាត់បង់នូវឯកសារសំខាន់ៗមួយចំនួន ដូចជា លិខិតឆ្លងដែន និងបណ្ណសម្គាល់ខ្លួននៅកន្លែងការងាររបស់គាត់ដែលធ្វើឲ្យគាត់ពុំអាចចេញទៅរកសេវាព្យាបាលសុខភាពរបស់គាត់បាន។ ប៉ុន្តែ នៅពេលនេះគាត់អាចទៅមន្ទីរពេទ្យ ដើម្បីពិនិត្យសុខភាព និងបើកថ្នាំយកមកលេបនៅផ្ទះបានហើយ»។
បើតាមឯកអគ្គរាជទូតរូបនេះ ក្រុមអនុព័ន្ធទទួលបន្ទុកការងារពលករបានស្នើឲ្យភាគីថៅកែរោងចក្រព្រមទាំងពលករខ្មែរដែលកំពុងបម្រើការងារក្នុងរោងចក្រនោះជួយមើលថែទាំ និងនាំពលករ ដែលមានជំងឺនោះទៅមន្ទីរពេទ្យ ដើម្បីពិនិត្យព្យាបាល និងបើកថ្នាំយកមកលេបនៅផ្ទះដែលគាត់កំពុងស្នាក់នៅក្នុងប្រទេសកូរ៉េជាបណ្ដោះអាសន្ន។ ក្រុមការងារក៏បានផ្ដល់ដំណឹងទៅក្រុមការងារពាក់ព័ន្ធនៅប្រទេសកម្ពុជា ដើម្បីជួយទាក់ទង និងផ្ដល់ដំណឹងទៅគ្រួសាររបស់គាត់ និងដើម្បីឲ្យគ្រួសាររបស់គាត់ទាក់ទងត្រឡប់មកក្រុមការងារស្ថានទូតតាមរយៈអ្នកធ្វើការជាមួយពលករនោះវិញ។
លោក ឡុង ឌីម៉ង់ បន្ថែមថា៖ «នៅពេលស្ថានភាពជំងឺរបស់គាត់មានភាពល្អប្រសើរឡើងវិញនោះ ក្រុមការងារយើងនឹងជួយសម្របសម្រួលធ្វើលិខិតបើកផ្លូវដើម្បីឲ្យគាត់បានវិលត្រឡប់ទៅកម្ពុជាវិញ»។
លោក ឌីម៉ង់ ឲ្យដឹងទៀតថាកាលពីថ្ងៃទី ២២ កុម្ភៈក្រៅពីជួយសម្រួលឲ្យពលករខ្មែររូបនោះទទួលបានកិច្ចគាំពារផ្នែកសុខភាព ក្រុមការងារស្ថានទូតក៏បានទាក់ទងភ្លាមៗទៅគ្រប់ភាគីពាក់ព័ន្ធ ទាំងនៅកូរ៉េ និងនៅកម្ពុជាដើម្បីជួយស្វែងរកស្ត្រីខ្មែរ ម្នាក់ឈ្មោះ ឌុច រតនា អាយុ ២១ ឆ្នាំដែលបានបាត់ខ្លួនពីគេហដ្ឋានខាងប្ដីរបស់នាងក្នុងទីក្រុង Seoul។
លោកថ្លែងថា៖ «តាមសេចក្ដីជូនដំណឹងរបស់អាជ្ញាធរក្រុង Seoul ដែលក្រុមការងារយើង ទទួលបានកាលពីព្រឹកថ្ងៃទី ២២ កុម្ភៈ ឆ្នាំ ២០២១ អ្នកស្រី ឌុច រតនា ទើបបានទៅរស់នៅប្រទេសកូរ៉េក្នុងរយៈពេល ២ ខែប៉ុណ្ណោះ ហើយគាត់បានបាត់ខ្លួនពីផ្ទះដោយគ្មានមូលហេតុរយៈពេល ២៣ ថ្ងៃមកហើយ»។
លោកបានអំពាវនាវដល់អ្នកស្រី ឌុច រតនា ឬក្រុមគ្រួសារសាច់ញាតិអ្នកស្រីនៅ កម្ពុជាជួយផ្ដល់ព័ត៌មានមកស្ថានទូត ជាបន្ទាន់ ករណីកំពុងរស់នៅដោយលាក់ខ្លួន ឬបានត្រឡប់ដល់ប្រទេសកម្ពុជា វិញ ដើម្បីឲ្យក្រុមការងារស្ថានទូតបានជួយអន្តរាគមន៍តាមផ្លូវច្បាប់ទាន់ពេលវេលា៕
