The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ត្រូវការ​ប្រហែល​ ៤,២ ​ពាន់​លាន​ដុល្លារ​សម្រាប់​ឆ្នាំ​ ២០១៦




កម្ពុជា​ត្រូវការ​ប្រហែល​ ៤,២ ​ពាន់​លាន​ដុល្លារ​សម្រាប់​ឆ្នាំ​ ២០១៦

លោក អូន ព័ន្ធមុនីរ័ត្ន ថ្លែង​នៅក្នុង​កម្មវិធី​ម្សិលមិញ​​។
លោក អូន ព័ន្ធមុនីរ័ត្ន ថ្លែង​នៅក្នុង​កម្មវិធី​ម្សិលមិញ​​។ ផា លីណា

កម្ពុជា​ត្រូវការ​ប្រហែល​ ៤,២ ​ពាន់​លាន​ដុល្លារ​សម្រាប់​ឆ្នាំ​ ២០១៦

ភ្នំពេញៈ ថវិកា​ថ្មី​របស់​កម្ពុជា​សម្រាប់​ឆ្នាំ​សារពើពន្ធ​ខាង​មុខ​​គឺ​មាន​ចំនួន​​ប្រមាណ​ ៤,២ ពាន់​លាន​ដុល្លារ ដែល​កើនឡើង​ប្រហែល​ ១១ ​ភាគរយ​ពី​ឆ្នាំ​ ២០១៥ ​។ នេះ​បើ​តាម​​មន្រ្តី​រដ្ឋាភិបាល​ជាន់ខ្ពស់​។

លោក វង្ស៊ី វិសុទ្ធ រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ​ថ្លែង​ថា​៖ «​យើង​នឹង​​ត្រូវការ​ប្រហែល​ ៤២០០ ​លាន​ដុល្លារ ដែល​កើនឡើង​ប្រហែល​ ១១ ភាគរយ​ពី​ឆ្នាំ​មុន​»​។

សិក្ខាសាលា​តំណាងរាស្រ្ត​ស្តីពី​​ការ​យល់ដឹង​នៃ​​ក្របខ័ណ្ឌ​ម៉ាក្រូ​សេដ្ឋកិច្ច​ និង​​គោលនយោបាយ​ហិរញ្ញវត្ថុ​សាធារណៈ​​សម្រាប់​ការ​រៀបចំ​សេចក្តី​ព្រាង​ច្បាប់​​​​ស្តីពី​ការ​គ្រប់គ្រង​ថវិកា​ជាតិ​​ឆ្នាំ​ ២០១៦ បាន​ធ្វើ​ឡើង​នៅ​​រដ្ឋសភា​កាលពី​ថ្ងៃ​អង្គារ ដោយ​មាន​​​​តំណាងរាស្រ្ត ព្រឹទ្ធ​សមាជិក និង​តំណាង​រដ្ឋាភិបាល តំណាង​ធនាគារ​អភិវឌ្ឍន៍​អាស៊ី និង​តំណាង​​ក្រុម​ការងារ​ថវិកា​ពី​សង្គមស៊ីវិល​ប្រមាណ​ ៣០០ ​នាក់​​បាន​ចូលរួម​។

លោក អូន ព័ន្ធមុនីរ័ត្ន រដ្ឋមន្រ្តី​ក្រសួង​សេដ្ឋកិច្ច និង​ហិរញ្ញវត្ថុ បាន​ថ្លែង​ថា គឺជា​ការ​​រៀបចំ​ជា​មុន​សម្រាប់​​រដ្ឋាភិបាល​ក្នុង​ការ​​តាក់តែង​ថវិកា​​ជាតិ​ឆ្នាំ​ ២០១៦ ​​ខាង​មុខ ដែល​ចាប់ផ្តើម​ជាមួយ​ផែនការ​យុទ្ធសាស្រ្ត​ថវិកា​ឆ្នាំ​ ២០១៦ ​​ក្នុង​ខែ​ឧសភា​។

រដ្ឋមន្រ្តី​បាន​ថ្លែង​​នៅក្នុង​សុន្ទរកថា​៖ «​ហើយ​សារាចរ​ព្រាង​ស្តីពី​ចំនួន​​ប៉ាន់​ប្រមាណ​ថវិកា​សម្រាប់​​ច្បាប់​ហិរញ្ញវត្ថុ​ឆ្នាំ​ ២០១៦ ដែល​ត្រូវ​​ដាក់​ឲ្យ​ប្រើប្រាស់​​នៅក្នុង​សប្តាហ៍​ទី​មួយ​នៃ​ខែ​មិថុនា​»។

លោក​បាន​ថ្លែង​ថា សិក្ខាសាលា​នេះ​​មាន​គោលបំណង​​ជំរុញ​ការ​សន្ទនា​​រវាង​​ស្ថាប័ន​នីតិប្បញ្ញត្តិ​ និង​​ស្ថាប័ន​នីតិប្រតិបត្តិ​ព្រមទាំង​​ភាគី​​ពាក់ព័ន្ធ​ដទៃៗ​ទៀត​សម្រាប់​ការ​​បង្កើត​​គោលនយោបាយ​ជាតិ​ យុទ្ធសាស្រ្ត និង​ផែនការ​អភិវឌ្ឍ​​​ដែល​មាន​តម្លាភាព​​ និង​គណនេយ្យភាព។

លោក​រដ្ឋមន្រ្តី​បាន​ថ្លែង​ថា មួយ​ក្នុង​ចំណោម​គោលនយោបាយ​ផ្តោត​ដទៃ​ទៀត​​រដ្ឋាភិបាល​នឹង​​លើក​កម្ពស់​​ស្តង់ដារ​រស់នៅ​របស់​មន្រ្តី​រដ្ឋាភិបាល​ និង​កម្លាំង​ប្រដាប់អាវុធ​ដោយ​ដំឡើង​​ប្រាក់ខែ​អប្បបរមា​​​ឲ្យ​បាន​ច្រើន​ជាង​​មួយ​លាន​រៀល​​ក្នុង​ឆ្នាំ​ ២០១៨ ​​​ស្រប​ទៅ​តាម​របៀបវារៈ​របស់​រដ្ឋាភិបាល​។

លោក​ថា​៖ «​ឥឡូវ​នេះ វា​សំខាន់​ជាង​ពេល​ណាៗ​ទៀត យើង​ត្រូវការ​ធ្វើការ​ជាមួយ​គ្នា​ក្រោម​វប្បធម៌​សុន្ទនា​នៅក្នុង​លក្ខណៈ​ស្ថាបនា​ជាមួយ​ស្មារតី​ស្ថាបនា​ និង​យោគយល់​ដើម្បី​អត្ថប្រយោជន៍​សន្តិភាព ស្ថិរភាព អភិវឌ្ឍន៍ និង​វិបុលភាព​កម្ពុជា​ និង​ប្រជាជន​កម្ពុជា​»។

ទោះ​យ៉ាងណា​ក្តី ក្នុង​អំឡុង​បទបង្ហាញ​អំពី​ម៉ាក្រូ​សេដ្ឋកិច្ច​ និង​ថវិកា​ជាតិ​ឆ្នាំ​ ២០១៦​ លោក វិសុទ្ធ បាន​ថ្លែង​ថា ការ​ដំឡើង​ប្រាក់ខែ​អប្បបរមា​ត្រូវតែ​ធ្វើ​ទៅ​តាម​គោលដៅ ប៉ុន្តែ​នៅពេល​ជាមួយ​គ្នា​​​ក៏​ត្រូវ​មាន​កំណែទម្រង់​​រដ្ឋបាល​សាធារណៈ​ផង​ដែរ​ ដូចជា ទប់ស្កាត់​មិន​ឲ្យ​មាន​មន្រ្តី​ខ្មោច មន្រ្តី​ជ្រើសរើស​ថ្មី និង​មន្រ្តី​ដែល​មិន​មក​ធ្វើ​ការងារ​ទៀងទាត់​។

លោក​ថ្លែង​ថា​៖ «​​ប្រាក់​ឈ្នួល​អប្បបរមា​ឆ្នាំ​ ២០១៨ ​​​ត្រូវតែ ត្រូវ​​ទៅ​តាម​គោលដៅ ប៉ុន្តែ​​វា​ជា​កន្លែង​ភ្លើង​ក្រហម ដែល​យើង​កំពុង​បារម្ភ ហេតុដូច្នេះ យើង​​ត្រូវការ​កំណែទម្រង់​រដ្ឋបាល​សាធារណៈ​​ឲ្យ​បាន​​សមស្រប​»​។ «​ថវិកា​ឆ្នាំ​ ២០១៦ គឺជា​អាទិភាព​ទី​មួយ​សម្រាប់​កិច្ចការ​សង្គម​»។

លោក យ៉ែម បុញ្ញឫទិ្ធ និង​លោក សុន ឆ័យ ​តំណាងរាស្រ្ត​មកពី​គណបក្ស​សង្គ្រោះជាតិ យល់ស្រប​ថា​សិក្ខាសាលា​​នេះ​​ល្អ​​ដើម្បី​យល់​អំពី​ស្ថានភាព​ម៉ាក្រូ​សេដ្ឋកិច្ច ប៉ុន្តែ​​សេចក្តី​លម្អិត​​នៃ​ថវិកា​ជាតិ​ និង​ការ​ចំណាយ​នៅតែ​មិន​បាន​បង្ហាញ​​ទៅ​ដល់​​តំណាងរាស្រ្ត​។

លោកថា​៖ «​​ម្តង​ហើយ​ម្តង​ទៀត យើង​ចង់​ឲ្យ​រដ្ឋាភិបាល​ផ្តល់​សេចក្តី​លម្អិត​​អំពី​ចំណូល​ និង​ការ​ចំណាយ​​ ដូចជា សេចក្តី​លម្អិត​អំពី​ចំណូល​ពី​កាស៊ីណូ សម្បទាន​ដី ព្រៃឈើ ប៉ុន្តែ​តួលេខ​ទាំងនោះ​នៅ​តែ​មិន​លម្អិត​»។

លោកស្រី គីម ណាតាចា តំណាង​នៃ​ក្រុម​ការងារ​ថវិកា​ស៊ីវិល បាន​ថ្លែង​ក្នុង​អំឡុង​​​បទបង្ហាញ​របស់​លោកស្រី​ថា ថវិកា​ជាតិ​​ និង​ឯកសារ​ពាក់ព័ន្ធ​នៅតែ​មិន​ទាន់​បើកចំហ​ដោយ​សេរី​​សម្រាប់​សាធារណៈ​។ លោកស្រី​បាន​បញ្ជាក់​ថា​៖ «​​យើង​ចង់​ឃើញ​​ថវិកា​មួយ​ដែល​មាន​តម្លាភាព​ និង​គណនេយ្យភាព​»៕ PS

អត្ថបទគួរចាប់អារម្មណ៍