.jpg)
លោកស្រី ជូ ប៊ុនអេង (កណ្តាល) អនុប្រធានអចិន្រៃ្តយ៍ គជបជ។ រូបថត NCCT
ភ្នំពេញៈ កម្ពុជាត្រូវបានដាក់បញ្ចូលក្នុងបញ្ជីនៃប្រទេសជយលាភីក្នុងការអនុវត្តកតិកាសញ្ញាពិភពលោកស្តីពីទេសន្តរប្រវេសន៍ដោយសុវត្ថិភាព រៀបរយ និងស្របច្បាប់ ដោយអង្គការសហប្រជាជាតិស្តីពីទេសន្តរប្រវេសន៍ក្នុងចំណោមប្រទេសសរុបចំនួន ១៨ លើសកលលោក បន្ទាប់ពីកម្ពុជាបានប្តេជ្ញាចិត្ត និងបង្ហាញឆន្ទៈខ្ពស់ចំពោះការអនុវត្តបានយ៉ាងខ្ជាប់ខ្ជួន។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ ប្រាប់ ភ្នំពេញ ប៉ុស្តិ៍ ពីម្សិលមិញថា ការសម្រេចនេះជាកិត្តិយស និងជាមោទនភាពរបស់កម្ពុជា ក្រោមការដឹកនាំរបស់លោក ហ៊ុន សែន ដែលបានពុះពារគ្រប់បែបយ៉ាង ដើម្បីដោះស្រាយបញ្ហាប្រឈមនៃការធ្វើចំណាកស្រុក ឬទេសន្តរប្រវេសន៍របស់ពលរដ្ឋ។
លោកស្រីថ្លែងថា បញ្ហាចំណាកស្រុក ឬទេសន្តរប្រវេសន៍របស់ពលរដ្ឋនាពេលបច្ចុប្បន្ននេះបានក្លាយជាប្រធានបទដ៏ក្តៅគគុកមួយសម្រាប់ពិភពលោកដែលត្រូវប្រឈមដោះស្រាយដោយសារតែការកើនឡើងនូវបរិមាណនៃជនធ្វើទេសន្តរប្រវេសន៍ទាំងស្របច្បាប់ និងមិនស្របច្បាប់ដែលបានប្រឈមនឹងភាពរងគ្រោះកាន់តែច្រើនឡើង និងត្រូវក្លាយជាបន្ទុកប្រទេសប្រភព និងប្រទេសគោលដៅលើការងារគ្រប់គ្រង ការរ៉ាប់រងនូវសេវាសន្តិសុខសង្គមការដោះស្រាយវិបត្តិសេដ្ឋកិច្ច ការដោះស្រាយវិបត្តិនៃការរំលោភបំពានអំពើជួញដូរមនុស្ស និងការកេងប្រវ័ញ្ចលើមនុស្សរហូតក្លាយជាទាសភាព ការកើនឡើងនូវឧក្រិដ្ឋកម្មឆ្លងដែនគ្រប់រូបភាព។
លោកស្រីបញ្ជាក់ថា៖ «ការប្តេជ្ញាចិត្តរបស់ព្រះរាជាណាចក្រកម្ពុជាក្នុងការអនុវត្តកតិកាសញ្ញាពិភពលោកនេះមានសារៈសំខាន់ក្នុងការដោះស្រាយបញ្ហានានាឆ្លើយតបទៅនឹងបញ្ហាប្រឈមរបស់ខ្លួនតាមរយៈកិច្ចសហប្រតិបត្តិការអន្តរជាតិដើម្បីទាញយកឱកាសពីការធ្វើចំណាកស្រុក ឱ្យក្លាយជាកាលានុវត្តភាពសម្រាប់ប្រជាជន និងប្រទេសជាតិ»។
បើតាមលោកស្រី ជូ ប៊ុនអេង ដោយមានការលើកទឹកចិត្តពីអង្គការទេសន្តរប្រវេសន៍អន្តរជាតិ (IOM) ថាប្រទេសកម្ពុជាគួរតែត្រូវបានស្នើសុំដាក់បញ្ចូលជាប្រទេសជយលាភីស្តីពីទេសន្តរប្រវេសន៍ ដោយសារតែកម្ពុជាបានធ្វើកិច្ចការងារច្រើន និងបានខិតខំប្រឹងប្រែងធ្វើ និងដោះស្រាយបញ្ហាទេសន្តរប្រវេសន៍បានល្អប្រសើរ។ ដូច្នេះបានជាលោក ហ៊ុន សែន បានធ្វើលិខិតស្នើសុំទៅអង្គការសហប្រជាជាតិបង្ហាញពីឆន្ទៈក៏ដូចជាការប្តេជ្ញាចិត្តរបស់ខ្លួនថា កម្ពុជាពិតជាអាចធ្វើបានលើបញ្ហាទេសន្តរប្រវេសន៍ដោយសុវត្ថិភាព រៀបរយ និងស្របច្បាប់។
អង្គការសហប្រជាជាតិបានផ្ញើលិខិតឆ្លើយតបមកកម្ពុជាកាលពីខែកុម្ភៈ ឆ្នាំ ២០២១ ដោយបានសម្តែងការអបអរសាទរ ចំពោះកម្ពុជាដែលបានបង្ហាញនូវសមិទ្ធផលជាច្រើន និងឆន្ទៈនៅក្នុងការធ្វើឱ្យបញ្ហាទេសន្តប្រវេសន៍ត្រូវបានដោះស្រាយបណ្តើរៗបើទោះបីកម្ពុជាជួបបញ្ហាប្រឈមទៅនឹងជំងឺកូវីដ១៩ ក៏ដោយទើបគេដាក់ឱ្យកម្ពុជាជាប្រទេសជយលាភី ក្នុងចំណោមប្រទេសទាំង ១៨ នៅលើពិភពលោក។
យ៉ាងណាក៏ដោយ លោកស្រី ប៊ុនអេង ពន្យល់ថា ប្រទេសជាជយលាភីដែលទទួលបាននេះមិនមែនគេប្រគល់ពានរង្វាន់ ឬបណ្ណសរសើរទេ។ ប៉ុន្តែគេគ្រាន់តែចង់ឃើញប្រទេសនីមួយៗបង្ហាញពីឆន្ទៈ និងការប្តេជ្ញាចិត្តរបស់ខ្លួន ទៅតាមគោលដៅដែលខ្លួនបានជ្រើសរើសហើយកម្ពុជានឹងក្លាយជាប្រទេសគំរូដល់បណ្តាប្រទេសដទៃទៀតក្នុងការអនុវត្ត និងការប្តេជ្ញាចិត្តចំពោះការអនុវត្តបញ្ហាទេសន្តរប្រវេសន៍នេះបានយ៉ាងល្អ។
លោកនាយករដ្ឋមន្ត្រីកាលពីខែមករាដើមឆ្នាំនេះបានសរសេរលិខិត ១ ច្បាប់ជូនលោក Antonio Vitorino អគ្គលេខាធិការអង្គការអន្តរជាតិសម្រាប់ទេសន្តរប្រវេសន៍ប្រចាំនៅទីក្រុងហ្ស៊ឺណែវថា រាជដ្ឋាភិបាលកម្ពុជាបានចាប់អារម្មណ៍ក្នុងការដាក់បញ្ចូលប្រទេសជាជយលាភី ដែលជាការឆ្លើយតបទៅនឹងការរីកចម្រើន ការប្តេជ្ញាចិត្តរបស់ខ្លួនចំពោះការអនុវត្តកតិកាសញ្ញាពិភពលោកស្តីពីទេសន្តរប្រវេសន៍ដោយសុវត្ថិភាព រៀបរយ និងស្របច្បាប់។
លិខិតរបស់លោកនាយករដ្ឋមន្ត្រីបានសរសេរថា រាជរដ្ឋាភិបាលកម្ពុជាស្វាគមន៍ពោះគំនិតផ្តួចផ្តើមដាក់ឱ្យដំណើរការបណ្តាញអង្គការសហប្រជាជាតិស្តីអំពីទេសន្តរប្រវេសន៍ (UNNM) ដើម្បីគាំទ្រជាអាទិភាពទេសន្តរប្រវេសន៍ជាតិ ចំពោះកិច្ចប្រជុំ អនុវត្តកតិកាសញ្ញាពិភពលោកស្តីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់ (GCM) តាមរយៈការអនុវត្តយ៉ាងសកម្មរបស់ខ្លួននៃការចូលរួមស្ថាបនា និងផ្តល់ជាអាទិភាពជាតិអនុសញ្ញា Colombo Process ជាមួយនឹងការផ្តោតសំខាន់លើទេសន្តរប្រវេសន៍ក្នុងក្របខ័ណ្ឌកិច្ចសហការពហុភាគី និងតំបន់៕
