The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា​ត្រូវ​សម្រេច​គោលដៅ​អប់រំ​សម្រាប់​ទាំងអស់​គ្នា




កម្ពុជា​ត្រូវ​សម្រេច​គោលដៅ​អប់រំ​សម្រាប់​ទាំងអស់​គ្នា

សិស្ស​សាលា​បឋមសិក្សា​វត្ត​កោះ​កំពុង​គោរព​ទង់ជាតិ​កន្លង​មក​។
សិស្ស​សាលា​បឋមសិក្សា​វត្ត​កោះ​កំពុង​គោរព​ទង់ជាតិ​កន្លង​មក​។ ហេង ជីវ័ន

កម្ពុជា​ត្រូវ​សម្រេច​គោលដៅ​អប់រំ​សម្រាប់​ទាំងអស់​គ្នា

ភ្នំពេញៈ កម្ពុជា​ត្រូវ​សម្រេច​ឲ្យ​បាន​នូវ​គោលដៅ​អភិវឌ្ឍន៍​ប្រកប​ដោយ​និរន្តរភាព (SDG) ​ពាក់ព័ន្ធ​ការ​អប់រំ​សម្រាប់​ទាំងអស់​គ្នា​របស់​អង្គការ​សហប្រជាជាតិ​ក្នុង​រយៈពេល​ ១៥ ​ឆ្នាំ​បន្ទាប់​ក្នុង​ឆ្នាំ​ ២០៣០​។

គោលដៅ​នេះ​ទាមទារ​ការ​​ធ្វើ​វិសោធនកម្ម​ច្បាប់​អប់រំ​ដើម្បី​កំណត់​ទៅ​ «ជា​កាតព្វកិច្ច» ​ចំពោះ​រដ្ឋ​ក៏​ដូចជា​អាណាព្យាបាល​ឲ្យ​បញ្ជូន​កូន​ទៅ​សាលា​រហូត​ដល់​ថ្នាក់​ទី​ ៩ ​បើ​មិន​អ៊ីចឹង​​ទេ​អាច​​ប្រឈម​នឹង​ផ្លូវ​ច្បាប់​។

លោក ជិន ចន្ទវាសនា ​នាយកប្រតិបត្តិ​​អង្គការ​ភាព​ជា​ដៃគូ​អប់រំ​នៃ​អង្គការ​ក្រៅ​រដ្ឋាភិបាល​បាន​ថ្លែង​កាលពី​ម្សិលមិញ​ថា ក្នុង​ចន្លោះ​ពី​ឆ្នាំ​ ២០១៦ ដល់​ ២០៣០ ដើម្បី​សម្រច​គោលដៅ​នៃ​​ការ​អប់រំ​សម្រាប់​ទាំងអស់​គ្នា​ (EFA) ត្រូវ​តែ​ប្រើ​ពាក្យ «Compulsory (ជា​កាតព្វ​កិច្ច)» ដែល​ជា​បញ្ញត្តិ​ថ្មី​ក្នុង​ SDG ​ក្រោយពី​គោលដៅ​អភិវឌ្ឍន៍​សហស្សវត្សរ៍ (MDG) ត្រូវ​បញ្ចប់​នៅ​ឆ្នាំ​ ២០១៥ ​។

ការ​ថ្លែង​បែប​នេះ​ក្នុង​ពេល​ដែល​ក្រសួង​​អប់រំ​យុវជន និង​កីឡា ​និង​អង្គការ​យូណេស្កូ បាន​ចេញ​ផ្សាយ​របាយការណ៍​ពិនិត្យ​លើ​ EFA ​ជា​សកល​ក្នុង​គោលដៅ​អភិវឌ្ឍន៍​សហស្សវត្សរ៍​នៅក្នុង​រយៈពេល​ពី​​ឆ្នាំ​ ២០០០ ដល់​​​ ២០១៥ កាលពី​ម្សិលមិញ​។

លោក​​បន្ត​​ថា​៖ «​ពេល SDG ចូល​ជា​ធរមាន​ប្រទេស​មួយ​ចំនួន​ត្រូវ​កែ និង​ធ្វើ​វិសោធនកម្ម​ច្បាប់​ដើម្បី​ឲ្យ​ស្រប​ថា កុមារ​ទទួល​ការ​អប់រំ​ដល់​ថ្នាក់​ទី​ ៩ ​ដោយ​មិន​គិត​ថ្លៃ ហើយ​ទាំង​រដ្ឋ​ក៏​ជាប់​កាតព្វកិច្ច និង​ឪពុក​ម្តាយ​ក៏​ជាប់​កាតព្វកិច្ច​»​។

លោក​បន្ថែម​ថា៖ «អ៊ីចឹង​យើង​ជឿជាក់​ថា បើ​យើង​កែប្រែ​ច្បាប់​ [អប់រំ]​ យើង​អាច​ធ្វើឲ្យ​ឪពុក​ម្តាយ​មួយ​ចំនួន​នឹង​ខ្លាច​ច្បាប់ ព្រោះ​ច្បាប់​នឹង​ដាក់​ទោស​គាត់​បើ​មិន​បញ្ចូន​កូន​គាត់​ឲ្យ​ទៅ​រៀន»​។

លោក​បន្ត​ថា បើ​មិន​មាន​ការ​ជាប់​កាតព្វកិច្ច​ដូច្នេះ​ទេ អាណាព្យាបាល​អាច​នឹង​មិន​​ខ្វល់​​ចំពោះ​ការ​បញ្ជូន​កូន​តូច​ទៅ​រៀន​ដែល​ធ្វើឲ្យ​មាន​ការ​កើន​នៃ​អត្រា​បោះបង់​ការ​សិក្សា​ក្រោយ​​កម្រិត​បឋមសិក្សា​ដើម្បី​ងាក​មក​រក​ការងារ​ចិញ្ចឹម​ជីវិត​។

លោកស្រី Anne Lemaistre តំណាង​ការិយាល័យ​អង្គការ​យូណេស្កូ​ប្រចាំ​កម្ពុជា​បាន​គាំទ្រ​ចំពោះ​ការ​ជាប់​កាតព្វកិច្ច​របស់​រដ្ឋ និង​អាណាព្យាបាល​ដើម្បី​បញ្ជូន​កូន​ទៅ​សិក្សា​ឲ្យ​បាន​គ្រប់​គ្នា​ដល់​ថ្នាក់​ទី​ ៩ ។

លោក​ស្រី​បន្ត​ថា គោលដៅ​ទាំង​ ៦ នៃ​ការ​អប់រំ​សម្រាប់​ទាំងអស់​គ្នា​គឺ​ការ​គាំពារ​ និង​ការ​អប់រំ​កុមារ​តូច ការ​អប់រំ​នៅ​បឋម​សិក្សា​ជំនាញ​សម្រាប់​យុវជន និង​មនុស្ស​​ពេញវ័យ អក្ខរកម្ម​មនុស្ស​ពេញ​វ័យ សមភាព​យេនឌ័រ និង គុណភាព​នៃ​ការអប់រំ ត្រូវ​កម្ពុជា​សម្រេច​បាន​ស្ទើរ​ទាំងអស់​នៃ​គោលដៅ​ទាំងនេះ​។

ទោះ​យ៉ាង​ណា គោលដៅ អក្ខរកម្ម នៅតែ​មិន​ទាន់​សម្រេច​បាន​នៅ​ឡើយ ដែល​កាលពី​ខែ​មីនា រដ្ឋាភិបាល​បាន​ធ្វើ​យុទ្ធនាការ​ដើម្បី​ឲ្យ​មាន​ការ​ចុះ​ឈ្មោះ​ចូល​រៀន​ថ្នាក់​អក្ខរកម្ម ហើយ​គោលដៅ​ត្រូវ​មាន​មនុស្ស​ ៩០០០០ ​នាក់​ចូល​រៀន​។

លោក ហង់ ជួន ណារ៉ុន រដ្ឋមន្ត្រី​ក្រសួង​អប់រំ យុវជន​ និង​កីឡា បាន​ប្រាប់​ភ្នំពេញ​ប៉ុស្តិ៍​ថា ការ​ធ្វើ​វិសោធនកម្ម ឬ​កែប្រែ​បញ្ញត្តិ​ផ្សេងៗ​បាន​ដើម្បី​ឲ្យ​សមស្រប​នឹង SDG លុះត្រា​តែ​រដ្ឋាភិបាល​នៃ​ប្រទេស​ជា​សមាជិក​អង្គការ​ UN អនុម័ត​នូវ​គោលដៅ​នេះ នា​ខែ​កញ្ញា​ខាង​មុខ​នេះ​នៅ​ក្រុង​ញូវយ៉ក សហរដ្ឋ​អាមេរិក​។

លោក​បន្ត​ថា៖ «​នៅពេល​អនុម័ត SDG ហើយ យើង​នឹង​ប្រជុំ​ថ្នាក់​ជាតិ.​..យើង​ស្នើ​គោលការណ៍​ទៅ​រដ្ឋាភិបាល​ដើម្បី​ស្នើសុំ​ធ្វើ​វិសោធនកម្ម ឬ​យ៉ាង​ណា ព្រោះ​យើង​ត្រូវការ​ឲ្យ​ឪពុក​ម្តាយ​ឲ្យ​កូន​រៀន​ដល់​ថ្នាក់​ទី​ ៩ ​»។ ​

លោក​បន្ថែម​ថា ត្រូវ​មាន​ការ​ពិភាក្សា​គ្នា​យ៉ាង​ច្រើន​ជាមួយ​សង្គម​ស៊ីវិល ដើម្បី​ឲ្យ​គោលដៅ​នេះ​សម្រេច​បាន​នៅ​ឆ្នាំ​ ២០៣០។

បើ​តាម​លោក​រដ្ឋមន្ត្រី សម្រាប់​កម្ពុជា​ការ​សម្រេច​ការ​អប់រំ​សម្រាប់​ទាំងអស់​គ្នា​នៅ​កម្ពុជា គឺ​អត្រា​ចុះ​ឈ្មោះ​ចូល​រៀន​កម្រិត​បឋមសិក្សា​មាន​កម្រិត​ខ្ពស់​បំផុត​គឺ​ ៩៨ ​ភាគរយ​ទៅ​ហើយ នៅ​ឆ្នាំ​ ២០១៥ ​នេះ ដែល​មាន​សិស្ស​ប្រមាណ​ ២ ​ម៉ឺន​នាក់​ចូល​រៀន ប៉ុន្តែ​ពួកគេ​បាន​បោះបង់​សាលា​នៅ​កម្រិត​ក្រោយ​បឋម សម្រាប់​សិស្ស​ក្រីក្រ និង​នៅ​ខេត្ត​ឆ្ងាយៗ​។

លោក​មាន​ប្រសាស៍​ថា​៖ «​វិស័យ​កាត់ដេរ បាន​ទាក់ទាញ​យុវជន​យើង​ឲ្យ​បោះបង់​ចោល​ការ​សិក្សា​ចំណាក​ស្រុក​ក៏​ទាញ​យុវជន​យើង​ដែរ ពិសេស​ប៉ះពាល់​ខេត្ត​ជាប់​ព្រំដែន​»។ ប៉ុន្តែ​គោលដៅ​រយៈពេល​វែង​របស់​កម្ពុជា​គឺ​ការ​ធានា​ឲ្យ​កុមារ និង​យុវជន​មាន​ការ​អប់រំ​រយៈពេល​ ១២ ​ឆ្នាំ ដោយ​ឥត​គិត​ថ្លៃ​ប្រកប​ដោយ​គុណភាព​ និង​គុណធម៌​នៅ​កម្រិត​បឋមសិក្សា​ និង​មធ្យម​សិក្សា​៕

អត្ថបទគួរចាប់អារម្មណ៍