.jpg)
កិច្ចប្រជុំរបស់មន្ត្រីនគរបាលកាលពីថ្ងៃទី ៦ ខែមីនា។ រូបថត នគរបាល
ភ្នំពេញៈ កម្ពុជាបានរៀបចំរួចជាស្រេចហើយនូវអនុគណៈកម្មការសន្តិសុខ សណ្តាប់ធ្នាប់ និងសង្គ្រោះនៃគណៈកម្មាធិការជាតិរៀបចំកិច្ចប្រជុំកំពូល អាស៊ី-អឺរ៉ុប (ASEM) លើកទី ១៣ ដែលគ្រោងធ្វើចាប់ពីថ្ងៃទី ១៦-១៧ ខែវិច្ឆិកាខាងមុខ ដោយបានត្រៀមកងកម្លាំងជាង ១ ម៉ឺននាក់ ខណៈដែលកិច្ចប្រជុំអន្តរជាតិមួយនេះនឹងមានថ្នាក់ដឹកនាំមកពីជាង ៥០ ប្រទេសចូលរួម។
នេះបើតាមរបាយការណ៍បង្ហាញក្នុងកិច្ចប្រជុំរៀបចំផែនការការពារ សន្ដិសុខ សណ្ដាប់ធ្នាប់សម្រាប់កិច្ចប្រជុំអាស៊ីអឺរ៉ុបកាលពីថ្ងៃទី ៦ ខែមីនា ដឹកនាំដោយ លោក នេត សាវឿន អគ្គស្នងការនគរបាលជាតិ និងជាប្រធានអនុគណៈកម្មការសន្តិសុខ សណ្តាប់ធ្នាប់ និងសង្គ្រោះនៃគណៈកម្មាធិការជាតិរៀបចំកិច្ចប្រជុំកំពូលអាស៊ីអឺរ៉ុបលើកទី ១៣ ឆ្នាំ ២០២០ និងលោក ហ៊ីង ប៊ុនហៀង អគ្គមេបញ្ជាការរង និងជាមេបញ្ជាការនៃបញ្ជាការដ្ឋានអង្គរក្ស។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងកាលពីម្សិលមិញថា កម្លាំងសមត្ថកិច្ចជាង ១ ម៉ឺននាក់ដែលនឹងការពារក្នុងកិច្ចប្រជុំកំពូលអាស៊ីអឺរ៉ុប លើកទី ១៣ ដែលកម្ពុជាធ្វើជាម្ចាស់ផ្ទះគឺជាកងកម្លាំងរួមរបស់កម្ពុជាតែម្ដង។
នៅពេលដែលសាកសួរទាក់ទងនឹងករណីការរីករាលដាលនៃវីរុសកូវីដ ១៩ នៅទូទាំងពិភពលោកក្នុងនោះកម្ពុជាទើបតែរកឃើញករណីថ្មីកើតឡើងលើបុរសវ័យ ៣៨ ឆ្នាំម្នាក់នៅខេត្ដសៀមរាប និងបានបិទទ្វារសាលារៀននៅក្នុងក្រុងសៀមរាប ថាតើអាចឈានដល់ការលើកពេលកិច្ចប្រជុំអាស៊ី-អឺរ៉ុបនេះដែរឬយ៉ាងណាលោក សុភ័គ ថ្លែងថា៖ «ខ្ញុំមិនទាន់ទទួលបានព័ត៌មានពីរឿងនេះនៅឡើយទេ»។
របាយការណ៍កិច្ចប្រជុំផែនការការពារសន្ដិសុខសណ្ដាប់ធ្នាប់សម្រាប់កិច្ចប្រជុំអាស៊ី-អឺរ៉ុប បញ្ជាក់ថា៖ «កម្លាំងចូលរួមប្រតិបត្តិការក្នុងកិច្ចប្រជុំកំពូលអាស៊ី-អឺរ៉ុបលើកទី ១៣ ឆ្នាំ ២០២០ មានចំនួនសរុប ១២៧២៦ នាក់»។
របាយការណ៍នេះបញ្ជាក់ថា៖ «គណៈដឹកនាំកិច្ចប្រជុំបានទាមទារឱ្យប្រើប្រាស់វិធានការសរុបកម្លាំងសរុប មធ្យោបាយសរុប សំដៅធានាដល់កិច្ចប្រតិបត្តិការការពារកិច្ចប្រជុំកំពូលអាស៊ី-អឺរ៉ុបលើកទី ១៣ ឆ្នាំ ២០២០។ ពង្រឹងការងារប្រមូល ក្ដាប់ព័ត៌មាន សភាពការណ៍សន្ដិសុខពាក់ព័ន្ធដល់កិច្ចប្រជុំ និងម្ចាស់ការចាត់វិធានការដោះស្រាយ សភាពការណ៍ និងមានផែនការពង្រឹងស្ថានការណ៍សន្ដិសុខទូទាំងប្រទេស»។
កិច្ចប្រជុំកំពូល អាស៊ី-អឺរ៉ុបលើកទី ១៣ នេះត្រូវបានរាជរដ្ឋាភិបាលកម្ពុជា ប្រកាសជាផ្លូវការធ្វើជាម្ចាស់ផ្ទះកាលពីថ្ងៃទី ៣១ ខែមករា ឆ្នាំ ២០២០ ដោយសម្រេចយកអគារពិព័រណ៍អន្ដរជាតិថ្មីរបស់ក្រុមហ៊ុន OCIC នៅតំបន់អភិវឌ្ឍន៍ជ្រោយចង្វារធ្វើជាទីកន្លែងរៀបចំកិច្ចប្រជុំ និងកំណត់យកថ្ងៃទី ១៦-១៧ ខែវិច្ឆិកា ខាងមុខជាកាលបរិច្ឆេទនៃកិច្ចប្រជុំ។
កិច្ចប្រជុំអាស៊ី-អឺរ៉ុប (Asem) លើកទី ១៣ នេះនឹងមានការចូលរួមពីមេដឹកនាំជាង ៥០ នាក់មកពីបណ្តាប្រទេសនានានៅលើពិភពលោក និងសមាជិកពាណិជ្ជករ និងក្រុមវិនិយោគិនរបស់ពួកគេដែលធ្វើឡើងក្រោមប្រធានបទ «ការពង្រឹងពហុភាគីនិយមសម្រាប់កំណើនរួម»។
បើយោងតាមក្រសួងការបរទេស និងកិច្ចសហប្រតិបត្តិការអន្តរជាតិក្នុងកិច្ចប្រជុំកំពូលនេះកម្ពុជានឹងរៀបចំព្រឹត្តិការណ៍ចំនួន ៧ នៅក្រៅជំនួបនេះគឺកិច្ចប្រជុំភាពជាដៃគូសភាអាស៊ី-អឺរ៉ុបវេទិកាសេដ្ឋកិច្ច និងពាណិជ្ជកម្មអាស៊ី-អឺរ៉ុប កិច្ចប្រជុំកំពូលមេដឹកនាំវ័យក្មេង Asef និង អ្នកសម្របសម្រួលតុមូល Asef។ ក្រៅពីនេះក៏នឹងរៀបចំវេទិកាការងារអាស៊ី-អឺរ៉ុបវេទិកាប្រជាជនអាស៊ី-អឺរ៉ុប និងពិធីបុណ្យវប្បធម៌ Asem ផងដែរ។
លោក កុយ គួង អ្នកនាំពាក្យក្រសួងការបរទេសមិនអាចសុំការបកស្រាយបន្ថែមជុំវិញគម្រោងនៃការរៀបចំកិច្ចប្រជុំអាស៊ី-អឺរ៉ុបនេះបានទេកាលពីម្សិលមិញដោយទូរស័ព្ទរបស់លោកពុំមានអ្នកទទួល និងការផ្ញើសារតាមបណ្ដាញតេឡេក្រាមមិនទាន់ឆ្លើយតប៕
