.jpg)
លោក ស ខេង រដ្ឋមន្ត្រីក្រសួងមហាផ្ទៃ។ រូបថត អគ្គនាយកដ្ឋានរដ្ឋបាល
ភ្នំពេញៈ កម្ពុជាត្រូវធ្វើជាម្ចាស់ផ្ទះដោយសហការជាមួយអង្គការសហព័ន្ធសន្ដិភាពសកល (UPF) ដើម្បីរៀបចំកិច្ចប្រជុំកំពូលអាស៊ីប៉ាស៊ីហ្វិកលើកទី ២ ដែលនឹងត្រូវប្រារព្ធឡើងនៅថ្ងៃទី ១៩ ខែវិច្ឆិកា ក្រោយនេះនៅវិមានសន្ដិភាព។ មន្ត្រីបានអះអាងថា រដ្ឋាភិបាលបរទេសចំនួន ១៤៦ ប្រទេស នឹងត្រូវអញ្ជើញមកចូលរួមកិច្ចប្រជុំកំពូលនេះ។
ក្នុងចំណោមក្រុមអ្នកចូលរួមកិច្ចប្រជុំកំពូលអាស៊ីប៉ាស៊ីហ្វិក ក្រៅពីមានមេដឹកនាំ និងអតីតមេដឹកនាំប្រទេសមួយចំនួនក្នុងនោះក៏មានក្រុមប្រធានរដ្ឋសភា សមាជិករដ្ឋសភា មេដឹកនាំសាសនាធំៗក្នុងពិភពលោក មេដឹកនាំស្ដ្រី និងអ្នកតំណាងមកពីស្ថាប័នសារព័ត៌មាន អ្នកសិក្សា ពាណិជ្ជករ សិល្បករ យុវជន និងអង្គការសង្គមស៊ីវិលចូលរួមផងដែរ។
កិច្ចប្រជុំកំពូលនេះនឹងបង្ហាញអំពីផលវិជ្ជមានអំពីកិច្ចសហប្រតិបត្តិការរវាងអង្គការសង្គមស៊ីវិលក្នុងការកសាងសន្ដិភាព និងការផ្សះផ្សាជម្លោះនានា ការនាំមកនូវការអភិវឌ្ឍ ភាពរុងរឿង និងការនាំមកនូវដំណោះស្រាយសម្រាប់បញ្ហាផ្សេងៗនៅក្នុងសង្គម។
ប្រសិនបើគ្មានអ្វីប្រែប្រួលទេ មេដឹកនាំបច្ចុប្បន្ន និងអតីតមេដឹកនាំប្រទេសមួយចំនួនដែលត្រូវអញ្ជើញមកចូលរួមធ្វើជាវាគ្មិនក្នុងកិច្ចប្រជុំកំពូលអាស៊ីប៉ាស៊ីហ្វិកនេះរួមមាន ប្រធានាធិបតីណូរូ លោក BARON DIVAVESI WAQA និងប្រមុខរដ្ឋ Samoa លោក TUIMAIEALIFANO VAALETO''A SUALAUVI II។ លោក GEORGE SOKOMANU អតីតប្រធានាធិបតីសាធារណរដ្ឋវ៉ានូទូ លោក MADHAV KUMAR NEPAL អតីតប្រធានាធិបតីប្រទេសនេប៉ាល់។ លោក DAV GOWDA អតីតនាយករដ្ឋមន្ត្រីឥណ្ឌា លោក SYED YUSUF RAZA GILANI អតីតនាយករដ្ឋមន្ត្រីប៉ាគីស្ថាន និងរួមទាំងអតីតអនុប្រធានាធិបតីអ៊ីរ៉ង់ អតីតប្រធានាធិបតីកូឡុំប៊ី។ ខណៈនោះលោកនាយករដ្ឋមន្ត្រី ហ៊ុន សែន ក៏គ្រោងនឹងមានជំនួបទ្វេភាគីជាមួយប្រមុខរដ្ឋ និងរដ្ឋាភិបាលមួយចំនួនផងដែរ។
ក្រៅពីកិច្ចប្រជុំនៅវិមានសន្ដិភាពនៅថ្ងៃទី ១៩ វិច្ឆិកាក្នុងនោះក៏មានការរៀបចំមហោស្រពស្ដីពីការកសាងជាតិ និងសន្ដិភាព និងមហោស្រពស្ដីពីវប្បធម៌អាស៊ីសម្រាប់សន្ដិភាព និងការអភិវឌ្ឍដែលត្រូវរៀបចំឡើងនៅថ្ងៃទី ២០ វិច្ឆិកា នៅមជ្ឈមណ្ឌលកោះពេជ្រ។
លោក ឯក ថា អនុប្រធានអង្គភាពអ្នកនាំពាក្យរដ្ឋាភិបាលបានប្រាប់ភ្នំពេញប៉ុស្ដិ៍កាលពីថ្ងៃទី ២៨ តុលា ថារហូតមកដល់ពេលនេះមានភ្ញៀវបរទេសប្រហែល ៦០០ នាក់ហើយត្រូវបានអញ្ជើញ។ ភ្ញៀវជិត ៤០០ នាក់មកពីប្រទេសប្រហែលចំនួន ៤០ បានឆ្លើយតបដោយអះអាងអំពីការចូលរួមកិច្ចប្រជុំកំពូលនេះ ខណៈមេដឹកនាំរដ្ឋាភិបាលបរទេសដែលត្រូវអញ្ជើញទាំងអស់គឺមានចំនួន ១៤៦ ប្រទេស។ សមាជិកសភាបរទេសចំនួន ៩៩ នាក់ ស្ថាប័នសារព័ត៌មានបរទេសចំនួន ៣៣ សាកលវិទ្យាល័យចំនួន ២២ អង្គការក្រៅរដ្ឋាភិបាលបរទេសចំនួន ៥០ និងតំណាងចំនួន ២២ នាក់មកពីវិស័យជំនួញ។
លោកបន្តថា កាលពីឆ្នាំ ២០១៨ លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូដ៏ធំបំផុតដើម្បីទៅចូលរួមកិច្ចប្រជុំកំពូលអាស៊ីប៉ាស៊ីហ្វិកលើកដំបូងដែលបានរៀបចំនៅក្នុងប្រទេសនេប៉ាល់ ដើម្បីបង្ហាញអំពីការប្ដេជ្ញាចិត្តដ៏ខ្លាំងក្លារបស់កម្ពុជាចំពោះគំនិតផ្ដួចផ្ដើមបង្កើតកិច្ចប្រជុំកំពូលនេះ។ អ្នករៀបចំកិច្ចប្រជុំបានជួបពិភាក្សាជាមួយលោក ហ៊ុន សែន ស្ដីពីលទ្ធភាពដែលកម្ពុជាអាចធ្វើជាម្ចាស់ផ្ទះសម្រាប់កិច្ចប្រជុំសម្រាប់ឆ្នាំ ២០១៩។
លោកបន្ថែមថា អង្គការសហព័ន្ធសន្ដិភាពសកលរកឃើញថាកម្ពុជាគឺជាប្រទេសគំរូមួយដែលបានរួចផុតពីអតីតកាលដ៏ខ្លោចផ្សាតាមរយៈមធ្យោបាយសន្ដិភាពដូចជាការផ្សះផ្សាជាតិតាមរយៈការដាក់ចេញគោលនយោបាយឈ្នះ ឈ្នះ របស់លោក ហ៊ុន សែន កាលពីឆ្នាំ ១៩៩៨ ដើម្បីបញ្ឈប់សង្គ្រាមស៊ីវិល។ លើសពីនេះនយោបាយឈ្នះ ឈ្នះនេះក៏បាននាំឱ្យមាននូវការគោរពតាមបែបសាសនា និងជំនឿផ្សេងៗ ស្រច្បាប់ជាតិ និងអន្តរជាតិ ការកសាងសន្ដិភាព និងការអភិវឌ្ឍប្រកបដោយនិរន្តរភាព សម្រាប់ផលប្រយោជន៍ទូទៅ។
លោកថ្លែងថា៖«UPF បានពិនិត្យឃើញថា កម្ពុជាគឺជាបេក្ខភាពដ៏មានសក្តានុពលដើម្បីធ្វើជាម្ចាស់ផ្ទះកិច្ចប្រជុំកំពូលអាស៊ីប៉ាស៊ីហ្វិក។ ដោយហេតុថា ព្រះរាជាណាចក្រអច្ឆរិយនេះពោរពេញដោយសន្ដិភាព ស្ថិរភាពនយោបាយ ជាមួយនឹងការអភិវឌ្ឍសង្គម និងសេដ្ឋកិច្ចគួរឱ្យកត់សម្គាល់ក្នុងរយៈប្រហែល ២០ ឆ្នាំចុងក្រោយនេះ»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស (អាដហុក) បានលើកឡើងថា អង្គការលោកមិនទាន់ទទួលបានការអញ្ជើញឱ្យចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិកនេះទេ ហើយលោកក៏មិនទាន់ដឹងថា តើអង្គការសង្គមស៊ីវិលនានានៅក្នុងស្រុកនឹងត្រូវអញ្ជើញឱ្យចូលរួមក្នុងកិច្ចប្រជុំនោះ ឬយ៉ាងណាឡើយ។
លោកបានបញ្ជាក់ថា៖ «យើងមិនទាន់ដឹងថាយ៉ាងម៉េចទេ ឬដោយសារគេមិនទាន់អញ្ជើញយើង ក៏មិនដឹង»។
ជាមួយគ្នានេះលោក អំ សំអាត មន្ត្រីអង្គការការពារសិទ្ធិមនុស្ស (លីកាដូ) និងលោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា ក៏បានលើកឡើងថា ខាងអង្គការរបស់ពួកលោកក៏មិនទាន់ទទួលបានលិខិតអញ្ជើញដែរ។ ប៉ុន្តែពួកគេថានឹងស្វាគមន៍ ប្រសិនបើមានការអញ្ជើញឱ្យចូលរួមកិច្ចប្រជុំកំពូលនេះពីរដ្ឋាភិបាល។
បើតាមលោក ឯក ថា គឺលោក ហ៊ុន សែន នឹងថ្លែងសុន្ទរកថាបើកកិច្ចប្រជុំកំពូលអាស៊ីប៉ាស៊ីហ្វិកលើកទី ២ នៅវេលាម៉ោង ៩:៣០ នាទីព្រឹកថ្ងៃទី ១៩ វិច្ឆិកា និងថ្លែងសុន្ទរកថាក្នុងព្រឹត្តិការណ៍ យុវជន និងគ្រួសារដែលរៀបចំនៅមជ្ឈមណ្ឌលកោះពេជ្រនៅម៉ោង ១០ ព្រឹកថ្ងៃទី ៣០ វិច្ចិកា៕
