ភ្នំពេញៈ កម្ពុជាបានធ្លាក់ចុះចំនួន ១០ ចំណាត់ថ្នាក់នៅក្នុងសន្ទស្សន៍សេរីភាពសារព័ត៌មានពិភពលោក និងមានហានិភ័យធ្លាក់ដល់ស្ថានភាពបំបិទសំឡេងរិះគន់ប្រកបដោយគ្រោះថ្នាក់ដូចនៅប្រទេសចិន។ នេះបើតាមទិន្នន័យថ្មីពីអ្នកកាសែតគ្មានព្រំដែន។ ការដាក់ចំណាត់ថ្នាក់នេះដែលចេញកាលពីថ្ងៃពុធម្សិលមិញបង្ហាញថា កម្ពុជាឥឡូវនេះត្រូវបានដាក់ចំណាត់ថ្នាក់ទី ១៤២ ក្នុងចំណោមប្រទេស ១៨០ ដែលធ្លាក់ចុះពីចំណាត់ថ្នាក់ ១៣២ កាលពីឆ្នាំមុន។
ក្រុមសេរីភាពសារព័ត៌មានបានថ្លែងថាកម្ពុជា «ហាក់បីដូចជាចុះទៅរកផ្លូវដូចចិត្តដែលមានលក្ខណៈគួរឲ្យគ្រោះថ្នាក់ ខណៈចិនបានបិទសារព័ត៌មានឯករាជ្យជាច្រើន និងបានធ្លាក់ចុះចំនួន ១០ ចំណាត់ថ្នាក់ដែលជាការធ្លាក់ចុះមួយក្នុងចំណោមការធ្លាក់ចុះធំបំផុតក្នុងតំបន់»។
ការដាក់ចំណាត់ថ្នាក់នេះបានលើកឡើងថា៖ «របបរបស់នាយករដ្ឋមន្ត្រី ហ៊ុន សែន បានចាប់ផ្តើមការវាយប្រហារមួយដោយគ្មានការញញើតទៅលើសេរីភាពសារព័ត៌មានក្នុងឆ្នាំ ២០១៧»។ សន្ទស្សន៍នេះបានបន្តថា៖ «ការបង្ក្រាបរបស់គាត់ទៅលើសំឡេងឯករាជ្យ ការបង្កើនឥទ្ធិពលកាន់តែខ្លាំងឡើងទៅលើប្រព័ន្ធផ្សព្វផ្សាយ និងការគ្រប់គ្រងដោយយកចិត្តទុកដាក់ទៅលើប្រព័ន្ធផ្សព្វផ្សាយគឺជាវិធីសាស្ត្រមួយក្នុងចំណោមវិធីសាស្ត្រដែលគួរឲ្យបារម្ភ ដែលប្រើក្នុងប្រទេសចិនដែលមានការវិនិយោគរាប់លានអឺរ៉ូនៅក្នុងប្រព័ន្ធផ្សព្វផ្សាយគាំទ្ររដ្ឋាភិបាលរបស់កម្ពុជា»។
ប្រេកង់វិទ្យុឯករាជ្យជាង ៣០ ត្រូវបានបិទកាលពីឆ្នាំមុន ហើយបំណុលពន្ធប្រមាណ ៦,៣ លានដុល្លារដែលគេជឿថា ជាហេតុផលនយោបាយបានបង្ខំឲ្យមានការបិទកាសែតឌឹខេមបូឌាដេលី ដែលជាកាសែតភាសាអង់គ្លេសឯករាជ្យ កាលពីខែកញ្ញា។ វិទ្យុអាស៊ីសេរី និងវិទ្យុសំឡេងអាមេរិកក៏បានបិទប្រតិបត្តិការក្នុងប្រទេសរបស់ខ្លួនផងដែរក្នុងអំឡុងការបង្ក្រាបយ៉ាងទូលំទូលាយក្នុងប្រទេសកម្ពុជា ហើយអ្នកកាសែត ៣ នាក់ត្រូវបានចាប់ដាក់ពន្ធនាគារពីបទចោទប្រកាន់ពាក់ព័ន្ធនឹងសន្តិសុខជាតិ។
អ្នកកាសែតគ្មានព្រំដែនបានថ្លែងថានេះរួមបញ្ចូលជាមួយនឹងអំពើឃាតកម្មកាលពីឆ្នាំ ២០១៦ ទៅលើលោក កែម ឡី ដែលជាអ្នកវិភាគ និងអ្នកអត្ថាធិប្បាយនៅក្នុងប្រព័ន្ធផ្សព្វផ្សាយ «បានបណ្តាលឲ្យមានបរិយាកាសភ័យខ្លាចមួយដែលបានរារាំងសេរីភាពសារព័ត៌មាន»។
ខណៈធ្លាប់ត្រូវបានចាត់ទុកថាជាប្រទេសនាំមុខគេនៅអាស៊ីអាគ្នេយ៍ចំពោះសេរីភាពសារព័ត៌មានកម្ពុជាឥឡូវនេះត្រូវបានដាក់ចំណាត់ថ្នាក់ក្រោមប្រទេសថៃ និងប្រទេសមីយ៉ាន់ម៉ា ប៉ុន្តែនៅស្ថិតនៅលើប្រទេសឡាវ វៀតណាម និងប្រទេសសិង្ហបុរីដែលសារព័ត៌មានត្រូវបានគ្រប់គ្រងដោយរដ្ឋយ៉ាងខ្លាំង។ ជាលក្ខណៈទូទាំងពិភពលោក ប្រទេសកម្ពុជាត្រូវបានដាក់ចំណាត់ថ្នាក់ក្រោមប្រទេសហុងឌូរ៉ាស (Honduras) និងលើប្រទេសវេណេស៊ុយអេឡា (Venezuela) និងប្រទេសស៊ូដង់ខាងត្បូងដែលជាប្រទេសមានភាពចលាចល។
លោក មឿន ឈានណារិទ្ធិ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានបានថ្លែងថាលោកមានការខកចិត្តចំពោះការបិទសារព័ត៌មានឯករាជ្យ។ លោកបានថ្លែងបន្តថា៖ «អំពីខាងសារព័ត៌មាន យើងមានអារម្មណ៍ក្រៀមក្រំ និងខកចិត្តដែលស្ថានភាពនេះបានកើតឡើង ហើយយើងសង្ឃឹមថា និន្នាការនេះនឹងត្រឡប់ទៅរកភាពល្អប្រសើរវិញជាពិសេស បន្ទាប់ពីការបោះឆ្នោត»។
លោកបន្តថា៖ «ប៉ុន្តែ ប្រសិនបើពួកគេដាក់កំហិតទៅលើសេរីភាពសារព័ត៌មានទាំងស្រុងពួកគេនឹងបិទសារព័ត៌មានដទៃៗទៀតដូចជាកាសែតភ្នំពេញប៉ុស្តិ៍ និងវិទ្យុបារាំងអន្តរជាតិ»។
ប៉ុន្តែលោកថ្លែងថាកម្ពុជាមិនទាន់លិចលង់ដូចប្រទេសដទៃៗទេហើយលោកមិនយល់ស្របនឹងការលើកឡើងថា កម្ពុជាកំពុងស្ថិតនៅក្នុងផ្លូវស្រដៀងគ្នានឹងចិននោះទេ។ លោកបន្តថា៖ «ប្រទេសចិនមិនមានសារព័ត៌មានឯកជនណាមួយទេ ដូច្នេះយើងមិនអាចនិយាយថា កម្ពុជាកំពុងចម្លងតាមគំរូចិន សម្រាប់ប្រព័ន្ធផ្សព្វផ្សាយ និងសេរីភាពសារព័ត៌មាននោះទេ»។
លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា និងជាអនុរដ្ឋលេខាធិការក្រសួងមហាផ្ទៃបានថ្លែងថាលោកមិនមានក្តីបារម្ភ អំពីការដាក់ចំណាត់ថ្នាក់នេះទេ។ លោកបានថ្លែងបន្តថា៖ «ខ្ញុំមិនខ្វល់»។ «បញ្ហាមួយចំនួនកើតឡើង [មាន] ឧបសគ្គសម្រាប់ប្រព័ន្ធផ្សព្វផ្សាយក្នុងប្រទេសកម្ពុជា... យើងចាំបាច់ទទួលស្គាល់បញ្ហានោះ ប៉ុន្តែខ្ញុំមិនដឹងថាវាប្រសើរ ឬអាក្រក់ទេ។ ខ្ញុំមិនចង់ប្រៀបធៀបប្រទេសរបស់ខ្ញុំទៅប្រទេសដទៃៗទេ»។ នៅពេលសួរអំពីឥទ្ធិពលរបស់ចិន លោក វណ្ណៈ បានសើច។ លោកបានសួរថា៖ «ហេតុអ្វីជនជាតិស្បែកសមានទស្សនៈអវិជ្ជមានចំពោះចិន? ខ្ញុំមិនយល់ស្របចំពោះការយល់ឃើញរបស់លោកខាងលិច ចំពោះចិន និងការយល់ឃើញមកលើកម្ពុជា។ ប្រសិនបើអ្នកគោរពសេរីភាព អ្នកត្រូវគោរពសេរីភាពនៃការជ្រើសរើស»។
ក្នុងរយៈកាលប៉ុន្មានឆ្នាំចុងក្រោយនេះគេឃើញមានការប្រែប្រួលចុះឡើងចំពោះការដាក់ចំណាត់ថ្នាក់សេរីភាពសារព័ត៌មានរបស់កម្ពុជាដែលបានធ្លាក់ចុះពីចំណាត់ថ្នាក់ ១៣៩ ក្នុងឆ្នាំ ២០១៥ និងឡើងរហូតដល់ ១២៨ ក្នុងឆ្នាំ ២០១៦ និងធ្លាក់ចុះវិញដល់ ១៣២ កាលពីឆ្នាំមុន៕ PS