.jpg)
លោក សាយ សំអាល់ រដ្ឋមន្ត្រីក្រសួងបរិស្ថាន នាពេលកន្លងមក។ សហការី
ភ្នំពេញៈ កម្ពុជានឹងធ្វើជាម្ចាស់ផ្ទះ ក្នុងការរៀបចំកិច្ចប្រជុំថ្នាក់រដ្ឋមន្ត្រីបរិស្ថានមកពីបណ្តាប្រទេសអាស៊ាន លើកទី១៥ និងកិច្ចប្រជុំពាក់ព័ន្ធផ្សេងទៀត ចាប់ពីថ្ងៃទី ៧ ដល់ថ្ងៃទី ១១ ខែ តុលា នៅខេត្តសៀមរាបខណៈដែលបញ្ហាបរិស្ថានកំពុងតែក្លាយទៅជាក្តីកង្វល់ដ៏ធំមួយទាំងនៅថ្នាក់តំបន់ និងពិភពលោក។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់ភ្នំពេញប៉ុស្តិ៍កាលពីថ្ងៃពុធថា ក្រសួងបរិស្ថានក៏ដូចជាអ្នកពាក់ព័ន្ធនានា បានត្រៀមខ្លួនរួចជាស្រេចហើយ ចំពោះកិច្ចប្រជុំនេះ។
ប៉ុន្តែលោក ភក្ត្រា មិនទាន់អាចប្រាប់លម្អិតបានទេថា តើកម្ពុជាត្រូវត្រៀមអ្វីខ្លះនោះ។ លោកបញ្ជាក់ថា៖ «ខ្ញុំមិនអាចជម្រាបបានទេ ពាក់ព័ន្ធនឹងការត្រៀមរៀបចំព្រោះខ្លះពាក់ព័ន្ធជាមួយនឹងសន្តិសុខ»។
កាលពីថ្ងៃអង្គារលោក សាយ សំអាល់ រដ្ឋមន្រ្តីក្រសួងបរិស្ថាន បានដឹកនាំកិច្ចប្រជុំមួយ ដើម្បីត្រៀមរៀបចំកិច្ចប្រជុំថ្នាក់រដ្ឋមន្រ្តីបរិស្ថានអាស៊ាន និងកិច្ចប្រជុំពាក់ព័ន្ធនេះ។
សមាសភាពអ្នកចូលរួមកិច្ចប្រជុំនៅខែតុលាខាងមុខមាន រដ្ឋមន្រ្តី និងមន្ត្រីបរិស្ថានអាស៊ានទាំង ១០ ប្រទេស អគ្គលេខាធិការអាស៊ាន និងរដ្ឋមន្រ្តីបរិស្ថាន ចិន ជប៉ុន កូរ៉េ និងរដ្ឋមន្ត្រីមកពីបណ្តាប្រទេស រុស្សី សហរដ្ឋអាមេរិក ឥណ្ឌា អូស្រ្តាលី និងនូវែលសេឡង់។
លោក ស ម៉ូរី អនុប្រធានបណ្តាញយុវជនកម្ពុជា ដែលតែងតែចូលរួមចុះល្បាតព្រៃដើម្បីទប់ស្កាត់ការកាប់បំផ្លាញព្រៃឈើ បានប្រាប់ភ្នំពេញប៉ុស្តិ៍ កាលពីថ្ងៃពុធ ថា នេះជាគំនិតមួយល្អ ដែលរដ្ឋមន្ត្រីអាស៊ាន មានគំនិតផ្តួចផ្តើមឱ្យមានការជួបជជែកគ្នា អំពីកិច្ចសហការ និងការប្តេជ្ញាចិត្តក្នុងការចូលរួមការពារបរិស្ថាន ជាពិសេសការរៀបចំយន្តការថ្នាក់តំបន់ ដើម្បីចូលរួមដោះស្រាយបញ្ហាបរិស្ថាន។ លោកថា បញ្ហាបរិស្ថានមិនត្រឹមតែជាបញ្ហានៅក្នុងកម្រិតជាតិនោះទេ តែជាបញ្ហាក្នុងតំបន់ និងសកលលោកផងដែរ។
លោក ស ម៉ូរី បញ្ជាក់ថា៖ «ខ្ញុំគិតថា ជំនួបរបស់រដ្ឋមន្ត្រីក្រសួងបរិស្ថាន ដែលជាអ្នកបច្ចេកទេសនេះ វាជារឿងមួយល្អ ដែលអ្នកជំនាញផ្នែកបរិស្ថាន ឬក៏រដ្ឋមន្ត្រីផ្នែកបរិស្ថានពីប្រទេសនីមួយៗនឹងផ្តួចផ្តើមក្នុងការបង្កើតក្របខ័ណ្ឌច្បាប់ ហើយនិងគោលនយោបាយដើម្បីតាមដាន ត្រួតពិនិត្យ ហើយនិងដោះស្រាយបញ្ហាបរិស្ថាន»។
លោកបញ្ជាក់ថា កន្លងមកឃើញមានយន្តការជាច្រើន របស់គណៈកម្មការទន្លេមេគង្គ (MRC) តែមិនត្រូវបានយកអនុវត្តឱ្យមានប្រសិទ្ធភាពទេ។ លោក ស ម៉ូរី បន្តថា រដ្ឋមន្ត្រីនៃក្រសួងបរិស្ថានក្នុងបណ្តាប្រទេសអាស៊ាន និងអ្នកជំនាញបរិស្ថានអាស៊ាន មកពីតំណាងរដ្ឋនីមួយៗ គួរមានយន្តការឱ្យបានច្បាស់លាស់ ហើយយន្តការនេះត្រូវធានាឱ្យមានការចូលរួមពេញលេញពីប្រជាពលរដ្ឋមូលដ្ឋាន និងពង្រឹងភាពជាដៃគូជាមួយសង្គមស៊ីវិល និងសហគមន៍ឱ្យបានប្រសើរ ដើម្បីចូលរួមដោះស្រាយបញ្ហាបរិស្ថានក្នុងតំបន់។
កាលពីរសៀលថ្ងៃទី ១៦ ខែ កក្កដា ឆ្នាំ ២០១៩ សមត្ថកិច្ចពាក់ព័ន្ធបានគាស់ទូកុងតឺន័រ ចំនួន ៨៣ ដែលត្រូវបានគេនាំចូលមកពីសហដ្ឋអាមេរិក និងកាណាដា មកដាក់តម្រៀបនៅក្នុងបរិវេណកំពង់ផែក្រុងព្រះសីហនុ ដើម្បីពិនិត្យជាក់ស្ដែង។ នៅពេលធ្វើការពិនិត្យទូកុងតឺន័រទាំងនោះ ក៏រកឃើញសុទ្ធតែសំរាមប្លាស្ទិក ដែលមានទម្ងន់ប្រមាណជិត ១ ៦០០ តោន ដែលបញ្ហានេះបានធ្វើឲ្យមានកង្វល់អំពីបញ្ហាបរិស្ថាន ខណៈដែលខេត្តព្រះសីហនុកំពុងជួបបញ្ហាប្រឈមជាច្រើន ដែលបានបង្កឲ្យមានផលប៉ះពាល់ដល់បរិស្ថាននេះ៕
