.jpg)
កងទ័ពមួកខៀវកម្ពុជា ពេលត្រៀមចេញទៅចូលរួមក្នុងបេសកកម្មថែរក្សាសន្ដិភាពជាមួយអង្គការសហប្រជាជាតិ នាពេលកន្លងមក។ ហេង ជីវ័ន
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងការពារជាតិនឹងបញ្ជូនកងទ័ពមួកខៀវប្តូរវេនចំនួន ១៨៤ នាក់ទៅកាន់សាធារណរដ្ឋលីបង់ ដើម្បីចូលរួមក្នុងបេសកកម្មថែរក្សាសន្តិភាពជាមួយអង្គការសហប្រជាជាតិនៅចុងខែមករានេះ។ នេះបើតាម កញ្ញា កុសល ម៉ាលីនដា អ្នកនាំពាក្យមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតគ្រាប់មីន និងគ្រាប់មិនទាន់ផ្ទុះ។
កញ្ញា កុសល ម៉ាលីនដា បានប្រាប់កាសែតភ្នំពេញប៉ុស្តិ៍កាលពីម្សិលមិញថា កម្លាំងទ័ពមួកខៀវដែលត្រូវបន្ដវេននៅសាធារណរដ្ឋលីបង់ទាំង ១៨៤ នាក់នោះគឺមានមកពីក្រសួងការពារជាតិ អគ្គមេបញ្ជាការដ្ឋាន មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតគ្រាប់មីននិងគ្រាប់មិនទាន់ផ្ទុះ កងពលធំអន្តរាគមន៍លេខ ២ សាកលវិទ្យាល័យការពារជាតិ បញ្ជាការដ្ឋានកងទ័ពជើងគោក យោធភូមិភាគផ្សេងៗ និងពីអង្គភាពមួយចំនួនទៀត។
កញ្ញាបានបន្តថា បេសកកម្មថែរក្សាសន្តិភាពជាមួយអង្គការសហប្រជាជាតិនេះ ទាក់ទងនឹងផ្នែកបោសសម្អាតមីន បោះបង្គោលព្រំដែន និងសាងសង់សំណង់ដេកសំណង់បញ្ឈរ ជាច្រើនទៀត។
យ៉ាងណាក៏ដោយ កញ្ញា ម៉ាលីនដាមិនបានបញ្ជាក់ពីកាលបរិច្ឆេទនៃការចេញដំណើរច្បាស់លាស់ទេ ដោយគ្រាន់តែថា នៅចុងខែមករាឆ្នាំ ២០១៩។
កញ្ញាបានបញ្ជាក់ថា៖ «តាមព័ត៌មានបឋមហ្នឹងក្នុងថ្ងៃ ១៥ ឬ១៧ នេះ ប៉ុន្តែប្រហែលជាអាចមានការលើកថ្ងៃដោយសារ UN សុំលើកថ្ងៃទៅចុងខែមករាវិញ។ យើងបញ្ជូននៅចុងខែមករា។
យើងប្តូរវេនរាល់ឆ្នាំ យើងបញ្ជូន ១៨៤ នាក់ទៅ និង ១៨៤ នាក់ត្រឡប់មកវិញ។ កញ្ញា បានរំឭកថា ប្រទេសកម្ពុជាបានទទួលការកោតសរសើរពីការបោសសម្អាតមីនដោយសារកម្លាំងមួកខៀវរបស់កម្ពុជាគឺជាប្រទេសទី ១ ដែលបានប្រើគ្រឿងចក្រដើម្បីបោសសម្អាតមីននៅសាធារណរដ្ឋលីបង់។ មុនពេលបញ្ជូនទៅសាធារណរដ្ឋ លីបង់កងកម្លាំងមួកខៀវកម្ពុជាសុទ្ធតែត្រូវបានហ្វឹកហ្វឺនតាមស្តង់ដារនិងមេរៀនរបស់អង្គការសហប្រជាជាតិ ជាពិសេសគឺហ្វឹកហ្វឺនឲ្យគាត់ស្គាល់ពីស្តង់ដារនៃការបោសសម្អាតមីន ហើយពួកគាត់ក៏ត្រូវបានបង្រៀនអំពីភូមិសាស្ត្រនិងការពារសុខភាពផងដែរ។
បើតាមកញ្ញា កុសល ម៉ាលីនដា ប្រទេសកម្ពុជាបានចាប់ផ្តើមបញ្ជូនកម្លាំងមួកខៀវទៅកាន់សាធារណរដ្ឋលីបង់ក្នុងក្របខ័ណ្ឌបំពេញបេសកកម្មថែរក្សាសន្តិភាពជាមួយអង្គការសហប្រជាជាតិតាំងពីឆ្នាំ ២០១០ មកហើយ។
សូមបញ្ជាក់ថា ចាប់តាំងពីឆ្នាំ ២០០៦ មក កម្ពុជាបានបញ្ជូនកម្លាំងមួកខៀវរបស់ខ្លួន ទៅចូលរួមបេសកកម្មរបស់អង្គការសហប្រជាជាតិសរុបប្រមាណជាង ៥ ៧៨៣ នាក់ហើយ ក្នុងនោះ មានស្ត្រីចំនួន ២៧៧ នាក់ ខណៈបច្ចុប្បន្នកម្ពុជា មានកម្លាំងប្រមាណ ១០០០ នាក់ កំពុងបំពេញបេសកកម្មនៅក្នុងប្រទេសចំនួន ៤ រួមមាន៖ សាធារណរដ្ឋស៊ូដង់, ស៊ូដង់ខាងត្បូង,អាហ្រ្វិកកណ្តាល,លីបង់ និងម៉ាលី។ កម្លាំងមួកខៀវទាំងអស់នេះហើយដែលបានធ្វើឱ្យកម្ពុជាក្លាយជាប្រទេសបរិច្ចាគកម្លាំងរក្សាសន្តិភាព លេខរៀងទី ៣ នៃប្រទេសអាស៊ាន៕
