.jpg)
ភ្នំពេញៈ កម្ពុជានឹងបញ្ជូនកងវិស្វកម្មលេខ ៥៩៤ ចំនួន ២១៦ នាក់ទៀតទៅចូលរួមបេសកកម្មរក្សាសន្តិភាពក្រោមស្លាកអង្គការសហប្រជាជាតិនៅសាធារណរដ្ឋអាហ្វ្រិកកណ្តាលនាព្រឹកថ្ងៃទី ២ ខែវិច្ឆិកាស្អែកនេះ។ នេះបើតាមសេចក្តីប្រកាសរបស់អ្នកនាំពាក្យក្រសួងការពារជាតិកាលពីថ្ងៃម្សិលមិញ។
លោក ឈុំ សុជាតិ អ្នកនាំពាក្យក្រសួងការពារជាតិបានប្រាប់ភ្នំពេញប៉ុស្ដិ៍ម្សិលមិញថា ការបន្ដបញ្ជូនកងវិស្វកម្មទៅចូលរួមបេសកកម្មរក្សាសន្តិភាព ក្រោមស្លាកអង្គការសហប្រជាជាតិនៅសាធារណរដ្ឋអាហ្វ្រិកកណ្តាលនេះគឺតាមរយៈការប្ដេជ្ញាចិត្ដរបស់លោកនាយករដ្ឋមន្ដ្រី ហ៊ុន សែន ក្នុងការចូលរួមរក្សាសន្ដិសុខ និងសន្ដិភាពជូនប្រជាពលរដ្ឋនៅលើសកលលោក ព្រោះប្រទេសកម្ពុជាធ្លាប់ឆ្លងកាត់បទពិសោធឈឺចាប់ចំពោះការរងគ្រោះដោយសង្គ្រាមដែលបានបន្សល់ទុកគ្រាប់មីនរហូតដល់បច្ចុប្បន្ន។
លោកបន្ដ៖ «នេះជាការប្ដេជ្ញាចិត្ដរបស់សម្ដេចតេជោក្នុងការចូលរួមរក្សាសន្ដិសុខ និងសន្ដិភាពដើម្បីស្វះស្វែងរកសន្ដិភាពជូនប្រជាពលរដ្ឋក្នុងសកលលោកព្រោះយើងមានបទពិសោធនាពេលកន្លងមកក្នុងសង្គ្រាមស៊ីវិលដោយជួបប្រទះបទពិសោធជូរចត់ដោយសារប្រទេសយើងមានមីនច្រើន»។
សេចក្តីប្រកាសក្រសួងការពារជាតិបានឲ្យដឹងថា ក្នុងចំណោមកងវិស្វកម្មលេខ ៥៩៤ ចំនួន ២១៦ នាក់ក្នុងនោះមានកងនារី ១០ នាក់ផងដែរនឹងត្រូវទៅចូលរួមបេសកកម្មនៅសាធារណរដ្ឋអាហ្វ្រិកកណ្តាលនេះ ហើយការជូនដំណើរកងវិស្វកម្មទាំង ២១៦ នាក់នឹងប្រព្រឹត្តដោយមានការចូលរួមពីលោក ប៉ុល សារឿន ទេសរដ្ឋមន្ត្រីទទួលបន្ទុកបេសកកម្មពិសេសនៅមូលដ្ឋានទ័ពអាកាសពោធិ៍ចិនតុង រាជធានីភ្នំពេញ។
សេចក្ដីប្រកាសដដែលបានបន្ដថាក្រៅពីរៀបចំជូនដំណើរកងវិស្វកម្មលេខ ៥៩៤ កម្ពុជាក៏រៀបចំកម្មវិធីមាតុភូមិនិវត្តន៍នៃកងវិស្វកម្មលេខ ៩៥៤ ចំនួន ២១៦ នាក់ពីសាធាណរដ្ឋអាហ្វ្រិកកណ្តាល និងកងរាជអាវុធហត្ថលេខ ៦១៨ ចំនួន ៧៣ នាក់ពីសាធារណរដ្ឋស៊ូដង់ខាងត្បូងផងដែរ។
ចំពោះការទទួលមាតុភូមិនិវត្តន៍នឹងត្រូវបានរៀបចំឡើងក្រោមអធិបតីភាពលោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនៅម៉ោង ៣ និង ៣០ នាទីរសៀលថ្ងៃទី ៣ ខែវិច្ឆិកា ឆ្នាំ ២០១៨ នៅមូលដ្ឋានទ័ពអាកាសពោធិ៍ចិនតុង។
សេចក្តីប្រកាសដដែលឲ្យដឹងថាកងវិស្វកម្មលេខ ៥៩៤ គឺជាកងវិស្វកម្មលើកទី ៥ ហើយដែលកម្ពុជាបានបញ្ជូនទៅចូលរួមបេសកកម្មរក្សាសន្តិភាពនៅសាធារណរដ្ឋអាហ្វ្រិកកណ្តាល ហើយកងនេះនឹងត្រូវទៅប្តូរវេនជំនួសកងវិស្វកម្មលេខ ៩៥៤ ដែលបានសម្រេចភារកិច្ចដោយជោគជ័យក្នុងបេសកកម្មរក្សាសន្តិភាពអាណត្តិ ១ ឆ្នាំរបស់ខ្លួននៅសាធាណរដ្ឋអាហ្វ្រិកកណ្តាល។
លោក ហ៊ុន សែន បានថ្លែងនៅក្នុងឱកាសជួបសំណេះសំណាលជាមួយកម្មករជាង ៦ ពាន់នាក់នៅស្រុកមុខកំពូល ខេត្តកណ្តាលកាលពីម្សិលមិញថា លទ្ធផលជោគជ័យនៅក្នុងដំណើរបេសកកម្មនៅក្រៅប្រទេសកាលពីពេលថ្មីៗកន្លងមកនេះលោកបានសម្រេចនូវកិច្ចការងារសំខាន់ៗជាច្រើនសម្រាប់ប្រទេសជាតិ និងប្រជាពលរដ្ឋកម្ពុជា។
លោកបានបញ្ជាក់ថា៖ «ជាក់ស្តែងដូចជាភាពជោគជ័យនៅអង្គការសហប្រជាជាតិដែលខ្ញុំបានថ្លែងសារសំខាន់ៗទៅកាន់ពិភពលោករួមទាំងបំណងល្អរបស់កម្ពុជាក្នុងការបន្តបញ្ជូនកងកម្លាំងរក្សាសន្តិភាពជាមួយអង្គការសហប្រជាជាតិ ការបង្កើនកិច្ចទំនាក់ទំនងការទូត និងសហប្រតិបត្តិការល្អជាមួយប្រទេសជាច្រើនលើឆាកអន្តរជាតិ»។
គួរបញ្ជាក់ថាចាប់តាំងពីឆ្នាំ ២០០៦ មកកម្ពុជាបានបញ្ជូនកងកម្លាំងរក្សាសន្តិភាពចំនួន ៥ ២៥៧ នាក់ហើយឲ្យទៅបំពេញបេសកកម្មរក្សាសន្តិភាពនៅបណ្តាប្រទេសមួយចំនួនក្រោមស្លាកអង្គការសហប្រជាជាតិ ប៉ុន្តែមិនមែនទាំងអស់ទេដែលមានសំណាងបានវិលត្រឡប់មកកាន់ស្រុកកំណើតវិញដោយមានជីវិតនោះ។ បន្ទាប់ពីមានការវាយប្រហារនៅក្នុងសាធារណរដ្ឋអាហ្វ្រិកកណ្តាលដែលបានសម្លាប់មន្ត្រីរក្សាសន្តិភាពកម្ពុជាចំនួន ៤ នាក់ លោកនាយករដ្ឋមន្ត្រី ហ៊ុន សែន បានបង្កើនការប្តេជ្ញាចិត្តរបស់កម្ពុជាទ្វេដង ដោយសន្យាថានឹងបង្កើនចំនួនមន្ត្រីរក្សាសន្តិភាព៕
