ភ្នំពេញៈ កម្ពុជានឹងប្រើប្រាស់បទដ្ឋានបច្ចេកទេសអគ្គិសនីថ្មីតាមស្តង់ដាររបស់ប្រទេសសិង្ហបុរីក្នុងការរៀបចំបណ្តាញដំឡើង និងប្រើប្រាស់ប្រព័ន្ធអគ្គិសនីក្នុងអគារ និងលំនៅឋានតាមលក្ខណៈបច្ចេកទេសដើម្បីកាត់បន្ថយគ្រោះថ្នាក់អគ្គិសនីដែលអាចកើតឡើង។
ការប្រកាសនេះធ្វើឡើងក្នុងពិធីបញ្ចប់គម្រោងរៀបចំ «បទដ្ឋានបច្ចេកទេសនៃព្រះរាជណាចក្រកម្ពុជាដើម្បីសុវត្ថិភាពសម្រាប់រៀបចំបណ្តាញអគ្គិសនីក្នុងអគារ និងលំនៅឋាន» ដែលមានតម្លៃជាង ២២ ម៉ឺនដុល្លារដែលជាជំនួយរបស់ Temasek Foundation នៃកិច្ចសហប្រតិបត្តិការទ្វេភាគីលើវិស័យថាមពលរវាងកម្ពុជា និងសិង្ហបុរីកាលពីម្សិលមិញនៅសណ្ឋាគារភ្នំពេញ។
រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានថ្លែងថារាជរដ្ឋាភិបាលកម្ពុជាបាននិងកំពុងពង្រីកបណ្តាញបញ្ជូន និងចែកចាយដើម្បីឆ្លើយតបនឹងសេចក្តីត្រូវការអគ្គិសនីដែលមានកំណើនប្រមាណ ២០ ភាគរយក្នុងមួយឆ្នាំហើយបណ្តាញចែកចាយនឹងត្រូវពង្រីកបន្ថែមឲ្យទៅដល់ទីប្រជុំជន តំបន់ជនបទ និងតំបន់ដាច់ស្រយាលថែមទៀត។ តាមរយៈស្ថិតិលោកថាការប្រើប្រាស់ថាមពលអគ្គិសនីកើនពីជាង ៣ ពាន់ ៥ រយលានគីឡូវ៉ាត់ម៉ោងនៅឆ្នាំ ២០១៣ ទៅជាង ៤ ពាន់ ១ រយសែសិបលានគីឡូវ៉ាត់ម៉ោងនៅឆ្នាំ ២០១៤ ពោលគឺកើនឡើងប្រមាណ ១៧ %។
លោក ស៊ុយ សែម បន្តថា៖ «ប្រព័ន្ធអគ្គិសនីមានសារៈសំខាន់ណាស់ក្នុងជីវភាពប្រចាំថ្ងៃប៉ុន្តែអគ្គិសនីក៏អាចឲ្យមានគ្រោះថ្នាក់ខ្លាំងណាស់ដែរបើសិនជាយើងមិនចេះប្រើវា។ យ៉ាងណាមិញប្រព័ន្ធចែកចាយអគ្គិសនីនៅទីសាធារណៈក្នុងបរិវេណក្នុងអគារ និងក្នុងលំនៅឋានអាចឲ្យកើតមាននូវគ្រោះថ្នាក់ផ្សេងៗដែលបណ្តាលមកពីការរៀបចំ ការដំឡើង ការប្រើប្រាស់ប្រព័ន្ធអគ្គិសនីទាំងនេះខុសបច្ចេកទេស ឬខ្វះគោលការណ៍សុវត្ថិភាព ឬពុំមានវិធានការការពារគ្រោះថ្នាក់»។
លោក Bernard Nee ជំនួយការអគ្គនាយក EMA (Energy Market Authority of Singapore) បានឲ្យដឹងថាបទដ្ឋានបច្ចេកទេសនៃព្រះរាជាណាចក្រកម្ពុជាដើម្បីសុវត្ថិភាពសម្រាប់រៀបចំបណ្តាញអគ្គិសនីក្នុងអគារ និងលំនៅឋានក្រោមគម្រោងរយៈ ១៦ ខែនេះត្រូវបានរៀបចំឡើងដោយអនុលោមទៅតាមស្តង់ដារអនុវត្តរបស់សិង្ហបុរីដែលស្របនឹងស្តង់ដារអន្តរជាតិ។
លោកថា៖ «ប្រទេសសិង្ហបុរីក្រោយពេលអនុវត្តតាមស្តង់ដារនេះយើងបានសង្កេតឃើញមានការថយចុះនៃគ្រោះថ្នាក់ក្នុងលំនៅឋានគួរឲ្យកត់សម្គាល់គ្រោះថ្នាក់បានថយចុះពី ៥ ករណីជាមធ្យមក្នុង ១ ឆ្នាំទៅតិចជាង ៥ ករណីក្នុងរយៈពេល ៣០ ឆ្នាំ។
បើតាមលោក Bernard Nee ជាច្រើនឆ្នាំកន្លងមកសិង្ហបុរីតែងតែពិនិត្យឡើងវិញ និងកែសម្រួលច្បាប់បណ្តាញអគ្គិសនីរបស់ខ្លួនស្របតាមការអភិវឌ្ឍនៃបច្ចេកវិទ្យា និងដើម្បីធានាថាស្តង់ដាររបស់ខ្លួនមិនមានចន្លោះប្រហោង។
កាលពីថ្ងៃទី ៨ ខែឧសភា ឆ្នាំ ២០១៥ លោកនាយករដ្ឋមន្ត្រី ហ៊ុន សែន បានលើកឡើងថាគ្រោះថ្នាក់អគ្គិភ័យភាគច្រើនគឺបណ្តាលមកពីឆ្លងចរន្តអគ្គិសនី ឬទុស្សេខ្សែភ្លើង។ លោកបានប្រកាសឲ្យស្ថាប័នជំនាញយកចិត្តទុកដាក់ និងត្រួតពិនិត្យឡើងវិញជាបន្ទាន់នូវបណ្តាញអគ្គិសនីដើម្បីចៀសវាងកុំឲ្យមានហេតុការណ៍ (គ្រោះថ្នាក់) ដដែលៗកើតឡើង។
លោកថា៖ «នៅពេលដែលខ្សែវាចាស់ពេក កុងតាក់វាចាស់ពេក ទាមទារឲ្យមានការផ្លាស់ប្តូរ»។
គិតចាប់ពីខែមករាដល់ខែឧសភា ឆ្នាំ ២០១៥ គ្រោះថ្នាក់អគ្គិភ័យបានកើតឡើងក្នុងរាជធានីភ្នំពេញចំនួន ៦២ លើក បណ្តាលឲ្យមនុស្សស្លាប់ម្នាក់ និងរបួសម្នាក់។ តួលេខនេះបានកើនឡើងជាង ២០ លើកបើធៀបនឹងរយៈពេលដូចគ្នាកាលពីឆ្នាំ ២០១៤ ដែលមានត្រឹមតែ ៤០ ករណីប៉ុណ្ណោះ៕
