ភ្នំពេញៈ ក្រសួងធនធានទឹកនិងឧតុនិយម នៅព្រឹកថ្ងៃអង្គារនេះ បានចេញសេចក្ដីជូនដំណឹងមួយឱ្យថា ចាប់ពីថ្ងៃទី ២៤ ដល់ថ្ងៃទី ៣០ ខែ មីនា ឆ្នាំ ២០២១ នេះ នឹងមានភ្លៀងលាយឡំខ្យល់កន្ត្រាក់ និងផ្គររន្ទះ កើតឡើងក្នុងកម្រិតពីតិចទៅច្រើន ពិសេសក្នុងតំបន់វាលទំនាបកណ្ដាល។
ការព្រមានអំពីបាតុភូតធម្មជាតិខាងលើនេះបានធ្វើឡើងបន្ទាប់ពីក្រុមមន្ត្រីជំនាញផ្នែកអាកាសធាតុបានពិនិត្យអង្កេតអំពីការវិវត្តនៃទ្រនុងសម្ពាធខ្ពស់ប៉ាស៊ីហ្វិក និងជ្រលងសម្ពាធទាបពីប្រទេសឥណ្ដូនេស៊ី ដែលកំពុងមានឥទ្ធិពលគ្របដណ្ដប់លើបណ្ដាខេត្តមួយចំនួន នៅភាគឦសាន និងភាគនិរតីនៃប្រទេសកម្ពុជា។
តាមរយៈការពិនិត្យអង្កេតនេះក្រុមព្យាការី ផ្នែកអាកាសធាតុ បានព្យាករថា តំបន់វាលទំនាបកណ្ដាល និងតំបន់មាត់សមុទ្រនឹងមានភ្លៀងធ្លាក់ដោយអន្លើក្នុងកម្រិតពីតិចទៅច្រើនព្រមទាំងមានខ្យល់កន្ត្រាក់ និងផ្គររន្ទះ កើតឡើងព្រមជាមួយគ្នាផងដែរ។ ចំណែកតំបន់ជួរភ្នំដងរែក និងខ្ពង់រាបឦសានមានភ្លៀងធ្លាក់តិចតួចប៉ុណ្ណោះ៕