ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាថ្លែងថា កម្ពុជាប្តេជ្ញាយ៉ាងពេញទំហឹងចូលរួមក្នុងរបៀបវារៈនៃការអប់រំ ដើម្បីការអភិវឌ្ឍប្រកបដោយចីរភាព ព្រមទាំងបន្តចូលរួមជាវិជ្ជមានក្នុងកិច្ចខិតខំប្រឹងប្រែងរបស់សកលលោក ដោយមិនបណ្ដោយឱ្យអ្នកណាម្នាក់ ឬប្រទេសណាមួយត្រូវបានទុកចោលឡើយ។
លោករដ្ឋមន្ដ្រីបានថ្លែងនៅក្នុងសុន្ទរកថាតំណាងឱ្យប្រតិភូនៃព្រះរាជាណាចក្រកម្ពុជានៃសន្និសីទសកលអង្គការយូណេស្កូស្ដីពីការអប់រំ ដើម្បីការអភិវឌ្ឍប្រកបដោយចីរភាព «The UNESCO World Conference on Education for Sustainable Development (ESD)» នៅថ្ងៃទី ១៨ ខែឧសភា។
សន្និសីទនេះរៀបចំដោយ អង្គការយូណេស្កូសហការជាមួយក្រសួងអប់រំ និងស្រាវជ្រាវរបស់សហព័ន្ធអាល្លឺម៉ង់ និងគណៈកម្មការអាល្លឺម៉ង់សម្រាប់យូណេស្កូដែលប្រព្រឹត្តទៅចាប់ពីថ្ងៃទី ១៧-១៩ ឧសភា តាមរយៈ Video Conference។
លោក ហង់ជួន ណារ៉ុន ថ្លែងថា៖ «ព្រះរាជាណាចក្រកម្ពុជាបានប្តេជ្ញាយ៉ាងពេញទំហឹងចូលរួមក្នុងរបៀបវារៈនៃការអប់រំ ដើម្បីការអភិវឌ្ឍប្រកបដោយចីរភាព ព្រមទាំងបន្តចូលរួមជាវិជ្ជមានក្នុងកិច្ចខិតខំប្រឹងប្រែងរបស់សកលលោកដោយមិនបណ្ដោយឱ្យអ្នកណាម្នាក់ ឬប្រទេសណាមួយត្រូវបានទុកចោលឡើយ ហើយបន្តចូលរួមជាមួយបណ្ដាប្រទេសដទៃទៀតក្នុងការលើកកម្ពស់ ESD»។
បើតាមក្រសួងអប់រំ សន្និសីទនេះនឹងជួយបង្កើនសម្ទុះសម្រាប់ក្របខ័ណ្ឌថ្មីនៃ ESD សម្រាប់ឆ្នាំ ២០៣០ ដែលមានគោលបំណងរួមគ្នាកសាងពិភពលោកទាំងមូលដែលមានភាពត្រឹមត្រូវ និងប្រកបដោយនិរន្តរភាពតាមរយៈការពង្រឹង និងជាកត្តាមួយដែលអាចជំរុញឱ្យមានចូលរួមដល់ភាពជោគជ័យរបស់ SDGs ទាំង ១៧ (ត្រូវបានគេស្គាល់ថា គោលដៅអភិវឌ្ឍន៍ ប្រកបដោយចីរភាពរបស់អង្គការសហប្រជាជាតិ ដោយមានគោលបំណង ដើម្បីនាំទៅរក សកម្មភាពនៅក្នុងផ្នែកដ៏សំខាន់នាឆ្នាំ ២០៣០) និងដើម្បីកសាងប្រព័ន្ធអប់រំដែលគាំទ្រដល់អ្នកសិក្សាគ្រប់វ័យឱ្យមានការទទួលខុសត្រូវ និងចូលរួមចំណែកយ៉ាងសកម្មដល់សង្គមប្រកបដោយចីរភាព និងភពផែនដីដែលមានសុខុមាលភាព។
ក្រសួងបញ្ជាក់ថា ផ្អែកតាមភាពជាក់ស្តែងនៃសកលលោកនាពេលថ្មីៗនេះគឺមានការអភិវឌ្ឍលើគន្លងថ្មីក្នុងអំឡុងពេលជំងឺរាតត្បាតកូវីដ១៩ ដោយមានការលើកកម្ពស់ការយល់ដឹងអំពីបញ្ហាប្រឈមនៃការអភិវឌ្ឍប្រកបដោយចីរភាព និងតួនាទីសំខាន់របស់ ESD ដែលជាកម្លាំងរុញច្រានឱ្យទទួលបានជោគជ័យនៃ SDGs ទាំងអស់។
លោកបានឱ្យដឹងថា ក្នុងន័យបង្កើនសម្ទុះសម្រាប់ក្របខ័ណ្ឌសកលថ្មី ESD សម្រាប់ឆ្នាំ ២០៣០ និងសម្រាប់អំឡុងឆ្នាំ ២០២០-២០៣០ រួមជាមួយផែនទីបង្ហាញផ្លូវសម្រាប់ការអនុវត្តរួមមាន ១- ធានាឱ្យមានការប្តេជ្ញាចិត្តកម្រិតគោលនយោបាយឱ្យដល់ការអប់រំប្រកបដោយចីរភាព តាមរយៈសេចក្តីប្រកាសប៊ែរឡាំងដែលត្រូវបានគេរំពឹងថានឹងរួមបញ្ចូលការអំពាវនាវឱ្យមានសកម្មភាពជាបន្ទាន់ ដើម្បីពន្លឿននិរន្តរភាព និងសកម្មភាពយកចិត្តទុកដាក់ចំពោះការប្រែប្រួលអាកាសធាតុតាមរយៈការអប់រំ។
ចំណែកចំណុចទី២- ជំរុញការប្តេជ្ញាចិត្តរបស់ភាគីពាក់ព័ន្ធដល់ការអប់រំប្រកបដោយចីរភាពសម្រាប់ឆ្នាំ ២០៣០ រួមទាំងគំនិតផ្តួចផ្តើមរបស់ប្រទេស។
ចំណុចទី៣- គឺពង្រីក និងពង្រឹងភាពជាដៃគូ និងឱកាសនៃបណ្តាញទំនាក់ទំនងសម្រាប់ការអប់រំប្រកបដោយចីរភាព។
អង្គការ UNESCO ក៏បានលើកឡើង តាមរយៈសន្និសីទនេះផងដែរថា វិបត្ដិនៃការរីករាលដាលជំងឺកូវីដ ១៩ បាននិងកំពុងបង្កគ្រោះថ្នាក់ដល់អាយុជីវិតបុគ្គល និងសង្គមទាំងមូលរួមទាំងប្រព័ន្ធអប់រំនៅទូទាំងពិភពលោក។
UNESCO បានបញ្ជាក់ថា៖ «វិបត្តិកូវីដនេះ បានដាក់សម្ពាធលើយើងឱ្យឆ្លុះបញ្ចាំងពីរបៀបដែលយើងដឹកនាំជីវិតរបស់យើងរបៀបរស់នៅជាមួយគ្នា របៀបដែលយើងចិញ្ចឹមជីវិត និងរបៀបដែលយើងរស់នៅក្នុងភពតែមួយដែលយើងចែករំលែក»៕