ខេត្ត/ភ្នំពេញៈ ការរាំ និងពិធីបួងសួងត្រូវបានប្រារព្ធឡើងកាលពីម្សិលមិញដោយមានការចូលរួមពីកងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋបានប្រមូលផ្ដុំគ្នានៅក្នុងបណ្ដាខេត្តមួយចំនួន ជាពិសេសខេត្តព្រះវិហារ និងខេត្តកំពង់ធំ ដើម្បីប្រារព្ធខួប ១០ ឆ្នាំនៃប្រាសាទព្រះវិហារដែលបានចុះក្នុងបញ្ជីបេតិកភណ្ឌពិភពលោក និងខួប ១ ឆ្នាំនៃការដាក់បញ្ចូលប្រាសាទសំបូរព្រៃគុកជាសម្បត្តិបេតិកភណ្ឌពិភពលោកជាប្រាសាទលេចធ្លោជាសកល។
មានប្រជាពលរដ្ឋ និងមន្ត្រីរដ្ឋាភិបាលជាច្រើនពាន់នាក់បានប្រមូលផ្ដុំគ្នានៅពហុកីឡដ្ឋានជាតិអូឡាំពិកពីម្សិលមិញដែលមានលោកនាយករដ្ឋមន្ត្រីចូលរួមជាអធិបតីក្នុងពិធីប្រារព្ធខួប ១០ ឆ្នាំនេះ ដោយលោក ហ៊ុន សែន បានថ្លែងសារដោយអំពាវនាវឲ្យចូលរួមការពារប្រាសាទ ខណៈពេលដែលកម្ពុជាបានបញ្ចប់សង្គ្រាម ២០ ឆ្នាំរហូតមកដល់ពេលបច្ចុប្បន្ន ដែលជាគោលនយោបាយអាទិភាពរបស់លោកគឺប្រែក្លាយតំបន់អតីតសមរភូមិទាំងអស់ឲ្យក្លាយជាទីផ្សារ និងការអភិវឌ្ឍ និងប្រែក្លាយតំបន់ព្រំដែនជាមួយប្រទេសជិតខាងឲ្យទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។
នៅចំពោះមុខអ្នកចូលរួមលោក ហ៊ុន សែន បានថ្លែងថា៖ «ការប្រយុទ្ធមិនមែនជាជម្រើសល្អទេ តែវិធីដោះស្រាយដោយសន្តិវិធីទើបជាជម្រើសដ៏ល្អ ខ្ញុំគិតថារឿងនេះមិត្តថៃពិតជាមិនប្រកាន់ខឹងនឹងខ្ញុំនិយាយទេព្រោះនេះជាការពិតបានផ្ដល់មេរៀនឲ្យប្រទេសយើងទាំង ២ កសាងព្រំដែនសន្តិភាព យើងមានបទពិសោធរួមគ្នាដោះស្រាយជាមួយព្រះរាជាណាចក្រថៃ និងព្រះរាជាណាចក្រកម្ពុជាដែលជាប្រទេសជិតខាងធ្វើឲ្យចំណងមិត្តភាពកាន់តែរឹងមាំ»។
លោកថ្លែងបន្តថា៖ «កាលពី ១០ ឆ្នាំមុនថ្ងៃនេះគឺជាថ្ងៃដែលខ្ញុំលំបាកជាងគេក្នុងការធ្វើសេចក្ដីសម្រេចចិត្តមួយ ខ្ញុំសុំអភ័យទោសចំពោះសមភាគីថៃដែលខ្ញុំមិនគួររំឭក តែយើងមិនអាចមើលរំលង ព្រោះនេះជាបទពិសោធយើងត្រូវចងចាំទាំងអស់គ្នា ហើយយើងត្រូវខិតខំរួមគ្នាបង្កើតខ្សែព្រំដែនរបស់យើង ឲ្យទៅជាខ្សែព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ»។
កាលពីឆ្នាំ ១៩៦២ តុលាការយុត្តិធម៌អន្តរជាតិ (ICJ) បានសម្រេចឲ្យកម្ពុជា ឈ្នះក្ដីលើភាគីថៃក្នុងបណ្ដឹងប្រាសាទព្រះវិហារដោយបញ្ជាឲ្យប្រទេសថៃដកទ័ពចេញពីតំបន់ប្រាសាទព្រះវិហារ។ តែនៅថ្ងៃទី ៧ ខែកក្កដា ឆ្នាំ ២០០៨ នៅពេលអង្គការយូណេស្កូ (UNESCO) ដាក់ប្រាសាទព្រះវិហារក្នុងបញ្ជីបេតិកភណ្ឌពិភពលោកតាមការស្នើសុំរបស់កម្ពុជា ប្រទេសថៃបានលើកទ័ពចូលតំបន់ប្រាសាទព្រះវិហាររហូតឈានដល់ការផ្ទុះអាវុធដាក់គ្នារវាងកងទ័ពប្រទេសទាំង ២ នៅថ្ងៃទី ១៥ ខែកក្កដា។ ដើម្បីបញ្ចប់ជម្លោះនេះកម្ពុជាបានស្នើឲ្យតុលាការយុត្តិធម៌អន្តរជាតិបកស្រាយឡើងវិញនូវការសម្រេចឆ្នាំ ១៩៦២។
នៅថ្ងៃទី ១១ វិច្ឆិកា ឆ្នាំ ២០១៣ តុលាការបានសម្រេចឲ្យកម្ពុជាឈ្នះក្តីជាថ្មី។ នៅថ្ងៃទី ៧ ខែកក្កដា ឆ្នាំ ២០០៨ កម្ពុជាត្រូវបានដាក់បញ្ចូលប្រាសាទព្រះវិហារ នៅក្នុងបញ្ជីបេតិកភណ្ឌពិភពលោក (៧ កក្កដា ២០០៨-៧ កក្កដា ២០១៨) និងខួប ១ ឆ្នាំនៃការដាក់បញ្ចូលប្រាសាទសំបូរព្រៃគុកជាសម្បត្តិបេតិកភណ្ឌពិភពលោក (៨ កក្កដា ២០១៧-៨កក្កដា ២០១៨)។
លោកស្រី Mechtild Rossler នាយិកាមជ្ឈមណ្ឌលបេតិកភណ្ឌពិភពលោកនៃអង្គការយូណេស្កូដែលបានផ្ញើសារចូលរួមអបអរក្នុងពិធីរំឭកខួបនេះដែរថ្លែងថារយៈពេល ១០ ឆ្នាំមកនេះហាក់ដូចជាពេលវេលាមួយយ៉ាងយូរ ក៏ប៉ុន្តែជាមួយនឹងឯកសិទ្ធិក្នុងការមើលឃើញផ្ទាល់នូវអារ្យធម៌ពីអតីតកាល និងដំណើរទស្សនកិច្ចទៅប្រាសាទផ្ទាល់ គេអាចយល់ច្បាស់ថាសកម្មភាពនៅថ្ងៃនេះនឹងត្រូវបានចារទៅក្នុងពេលវេលាដ៏យូរអង្វែងនាគ្រាក្រោយទៀត៕