The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ប្រារព្ធ​ទិវា​សត្វ​ត្មាត​អន្តរជាតិ​ដែល​ជា​សត្វ​កម្រ

កម្ពុជា​ប្រារព្ធ​ទិវា​សត្វ​ត្មាត​អន្តរជាតិ​ដែល​ជា​សត្វ​កម្រ

សត្វ​ត្មាត​នៅ​តំបន់​អភិរក្ស​ក្នុង​ខេត្ត​ព្រះវិហារ​ដែល​កំពុង​ត្រូវ​បាន​គេ​យក​ចិត្ត​ទុកដាក់​។
សត្វ​ត្មាត​នៅ​តំបន់​អភិរក្ស​ក្នុង​ខេត្ត​ព្រះវិហារ​ដែល​កំពុង​ត្រូវ​បាន​គេ​យក​ចិត្ត​ទុកដាក់​។ ហុង មិនា

កម្ពុជា​ប្រារព្ធ​ទិវា​សត្វ​ត្មាត​អន្តរជាតិ​ដែល​ជា​សត្វ​កម្រ

ព្រះវិហារៈ កម្ពុជា​បាន​ប្រារព្ធ​ទិវា​សត្វ​ត្មាត​អន្តរជាតិ​ជា​លើក​ដំបូង​ដោយ​កំណត់​ធ្វើ​ជា​រៀងរាល់​ឆ្នាំ​នៅ​ថ្ងៃ​ទី ៥ ខែ​កញ្ញា​ ដើម្បី​ផ្សព្វផ្សាយ​ពី​សារៈសំខាន់​របស់​ត្មាត​ក្នុង​តួនាទី​ជា​អ្នក​សម្អាត​បរិស្ថាន​បង្ការ​ប្រភព​ចម្លង​មេរោគ​នៅក្នុង​តំបន់​ព្រៃ​ការពារ​ព្រះវិហារ។

ទិវា​នេះ​បាន​ធ្វើ​ឡើង​នៅ​ភូមិ​ដងផ្លិត ឃុំ​ឆែបពីរ ស្រុក​ឆែប ខេត្ត​ព្រះវិហារ ដោយ​មាន​ពលរដ្ឋ​ចូលរួម​ជាង ៣០០ នាក់ និង​រៀបចំ​ដោយ​អង្គការ សមាគម​អភិរក្ស​សត្វព្រៃ Wildlife Conservation Society ដែល​ទទួល​បាន​ថវិកា​ឧបត្ថម្ភ​ទាំង​ស្រុង​ពី​ជំនួយ​របស់​ពលរដ្ឋ​អាមេរិក​ (USAID) តាមរយៈ​គម្រោង​គាំទ្រ​ព្រៃឈើ និង​ជីវចម្រុះ SFB នៃ​អង្គការ Winrock international។

ក្នុង​កិច្ច​បើក​កម្មវិធី​អនុប្រធាន​គម្រោង​តំបន់​ព្រៃ​ការពារ​លោក តាន់ សេដ្ឋា បាន​ថ្លែង​ថា​បើ​ទោះបី​ជា​សត្វ​ត្មាត​ជា​សត្វ​ស្លាប​ដែល​មាន​មាឌ​ធំ និង​ចូលចិត្ត​ស៊ី​គម្រង់​សាកសព​ជា​ចំណី​អាហារ​ក្តី​តែ​សត្វ​ត្មាត​ត្រូវ​បាន​រកឃើញ​ថា​មាន​តួនាទី​សំខាន់​ក្នុង​កិច្ច​ការពារ​សម្អាត​បរិស្ថាន​ដោយ​ហេតុថា​សត្វ​នេះ​ស៊ី​គម្រង់​ដែល​ជា​ប្រភព​ចម្លង​មេរោគ​។

លោក​បន្ត​ថា ​ក្នុង​រយៈពេល​ជាង​ ២០ ​ឆ្នាំ​ចុងក្រោយ​នេះ​របាយ​សត្វ​ត្មាត​បាន​ថយ​ចុះ​យ៉ាង​ច្រើន​នៅលើ​ពិភពលោក​ដោយសារ​ប្រជាជន​បាន​ប្រើប្រាស់​ប្រភេទ​ថ្នាំ Diclofenac ដែល​ចាក់​ទៅលើ​សត្វ​គោ ឬ​ក្របី​ដែល​ផ្ទុក​នូវ​ជាតិ​អាស៊ីត​បង្ក​ឲ្យ​មាន​ប្រតិកម្ម​ទៅលើ​សត្វ​ត្មាត​នៅពេល​សត្វ​ត្មាត​ស៊ី​សាច់​វា​ដោយឡែក​សម្រាប់​កម្ពុជា​សត្វ​ត្មាត​បាន​ថយ​ចុះ​ដោយសារ​តែ​​កង្វះ​នូវ​ចំណី​អាហារ​។

លោក តាន់ សេដ្ឋា បាន​ឲ្យ​ដឹង​ថា៖ «គម្រោង​ព្រៃ​ការពារ​ព្រះវិហារ​បាន​ចាប់ផ្តើម​កម្មវិធី​អាហារដ្ឋាន​សត្វ​ត្មាត​ចាប់​តាំងពី​ឆ្នាំ ២០០៣ មក​ហើយ​គោលបំណង​នៃ​ការ​ចាប់ផ្តើម​ប្រារព្ធ​ទិវា​អន្តរជាតិ​នៅ​ឆ្នាំ​ ២០១៥ នេះ​គឺ​ដើម្បី​ផ្សព្វផ្សាយ​ពី​សារៈសំខាន់​របស់​ត្មាត​ដែល​ជា​អ្នក​សម្អាត​បរិស្ថាន​ព្រោះ​សត្វ​នេះ​ស៊ី​នូវ​របស់​កង្វក់​ដែល​ជា​ប្រភព​ចម្លង​មេរោគ​ដល់​ប្រជាពលរដ្ឋ»។

បើ​តាម​លោក តាន់ សេដ្ឋា បច្ចុប្បន្ន​នេះ​របាយ​សត្វ​ត្មាត​ក្នុង​ព្រៃ​ការពារ​ព្រះវិហារ​មាន​ពី​ ៩០ ទៅ​ ១០០ ក្បាល​បើ​ធៀប​នឹង​របាយ​សរុប​ទូទាំង​ប្រទេស​កម្ពុជា​ដែល​មាន​ចន្លោះ​ពី ២០១ ទៅ​ ៣១៣ ​ក្បាល។

ប្រធាន​តំបន់​ព្រៃ​ការពារ​ព្រះវិហារ និង​ជា​នាយរង​អធិការដ្ឋាន​រដ្ឋបាល​ព្រៃឈើ​លោក ឃឹម ប៉ាន់ បាន​ឲ្យ​ដឹង​ថា​ក្រៅពី​កិច្ចការ​សម្អាត​បរិស្ថាន​សត្វត្មាត​ក៏​ត្រូវ​បាន​ចាត់​ទុក​ជា​ប្រភព​នៃ​ការ​រក​ចំណូល​ពី​ភ្ញៀវ​ទេសចរ​សម្រាប់​ប្រជាពលរដ្ឋ​ក្នុង​សហគមន៍​នេះ​តាមរយៈ​ការ​លក់​សំបុត្រ​ចូល​ទស្សនា​សត្វ​ត្មាត​ក្នុង​កម្មវិធី​អាហារដ្ឋាន​ដែល​ត្រូវ​បាន​ធ្វើ​ឡើង​មាន​រយៈពេល​ពីរ​ដង​ក្នុង​មួយ​ខែ​។

លោក​ថា៖ «ក្នុង​ពិធី​អាហារដ្ឋាន​សត្វ​ត្មាត​យើង​សម្លាប់​គោ​ពីរ​ក្បាល​ក្នុង ១ លើក និង​ ២ ​លើក​ក្នុង​ ១ ​ខែ​សម្រាប់​ដាក់​ឲ្យ​ត្មាត​ស៊ី​តែ​ក្រៅពី​នោះ​ជាក់ស្តែង​ក៏​យើង​មាន​ធ្វើ​ឡើង​សម្រាប់​ពេល​ភ្ញៀវទេសចរ​ចុះ​មក​មើល​ផង​ដែរ​។ ក្រៅពី​ផ្តល់​ការ​យល់ដឹង​ដល់​ពលរដ្ឋ​អាជ្ញាធរ​ក៏​បាន​អភិរក្ស​លើ​ការ​ពង​កូន​របស់​សត្វ​ត្មាត​ដើម្បី​កុំ​ឲ្យ​វា​បាត់បង់ ឬ​ផុត​ពូជ»​។

ក្រៅពី​សត្វ​ត្មាត​ព្រៃ​ការពារ​ព្រះវិហារ​ក៏​មាន​នូវ​សត្វ​ព្រៃ​ប្រភេទ​ជិត​ផុត​ពូជ និង​ប្រភេទ​កម្រ​មាន​ជាច្រើន​ដូចជា ក្រៀល ក្ងោក ត្រយង​យក្ស ត្រយង​ចង្កំ​កស ខ្លា ដំរី ខ្ទីង ទន្សោង ព្រម​ទាំង​សត្វ​ល្មូន និង​សត្វ​ល្អិត​ផ្សេងៗ​។

តាម​របាយការណ៍ ៤ ទំព័រ នៃ​សកម្មភាព​អនុវត្ត​គម្រោង​អភិរក្ស​ជីវចម្រុះ​តំបន់​ព្រៃ​ការពារ​ព្រះវិហារ​ចុះ​ថ្ងៃ ទី ៥ ខែ​កញ្ញា ឆ្នាំ​ ២០១៥ បាន​ឲ្យ​ដឹង​ថា​ព្រៃ​ការពារ​ព្រះវិហារ​ក្នុង​ភូមិ​ដង​ផ្លិត​បច្ចុប្បន្ន​បាន​ក្លាយ​ជា​ភូមិ​គោលដៅ​នៃ​តំបន់​អេកូ​ទេសចរណ៍​ចំនួន​ ៣ កន្លែង​គឺ​តំបន់​អេកូទេចរណ៍​អូរគគីរ​តំប​ន់​វាលក្រួស និង​តំបន់​វាលក្បាល​ដំរី​ហើយ​គិត ​ចាប់ពី​ឆ្នាំ​ ២០០៨ ដល់​ឆ្នាំ​ ២០១៥ តំបន់​ទេសចរណ៍​ធម្មជាតិ​នេះ​បាន​ទាក់ទាញ​ភ្ញៀវ​ទេសចរ​មក​ទស្សនា​សត្វ​ព្រៃ​សរុប ៣៤៣ ​នាក់​ដែល​ប្រមូល​ថវិកា​សរុប​បាន​ជាង​ ៤ ម៉ឺន​ ៥ ពាន់​ដុល្លារ​។

យ៉ាង​ណា​មិញ​របាយការណ៍​នេះ​ក៏​បាន​រំលេច​ឡើង​នូវ​បទល្មើស​ព្រៃឈើ និង​សត្វ​ព្រៃ​ដែល​ត្រូវ​បាន​បង្ក្រាប​បាន​កន្លង​មក​ដែល​មាន​ឈើ​ប្រណីត​រាប់រយ​ម៉ែត្រគុប និង​ឧបករណ៍​អារ​ឈើ​ឧបករណ៍​បរបាញ់​សត្វព្រៃ​ជាច្រើន​ប្រភេទ​ផង​ដែរ​។

តប​នឹង​រឿង​នេះ​លោក អ៊ិត ភូម្រា នាយ​ខណ្ឌ​រដ្ឋបាល​ព្រៃឈើ​ព្រះវិហារ​បាន​ទទួល​ស្គាល់​នូវ​ភាព​ខ្វះ​ចន្លោះ​នៃ​ការ​អនុវត្ត​ការងារ និង​ច្បាប់​ក្នុង​ខេត្ត​នេះ​ដោយ​លើក​បញ្ហា​ប្រឈម​ពី​កង្វះ​ធនធាន​មនុស្ស និង​បច្ចេកទេស​ក្នុង​តំបន់។

លោក​ថ្លែង​ថា៖ «ការ​បង្ក្រាប​មិន​អាច​ទៅ​ដល់​គ្រប់​កន្លែង​ទេ​ដោយសារ​កម្លាំង​មន្រ្តី​អភិរក្ស​មាន​តិច​ហើយ​ផ្ទៃដី​មាន​ធំ​ដូច្នេះ​កម្លាំង​មិន​អាច​ឆ្លើយតប​បាន​ទេ​ធ្វើឲ្យ​ការងារ​មាន​ការ​ឆក​ល្វែង​ខ្លាំង​ខ្ញុំ​ទទួល​ស្គាល់​»។

បើ​តាម​លោក អ៊ិត ភូម្រា គិត​ត្រឹម​ ៦ ​ខែ​ដើម​ឆ្នាំ​ ២០១៥ ​នេះ​បទល្មើស​ព្រៃឈើ និង​សត្វ​ព្រៃ​មាន​ចំនួន ៥៦ ​ករណី​ចំណែក​រយៈពេល​មួយ​ឆ្នាំ ២០១៤ បទល្មើស​មាន​ចំនួន ១៤៩ ​ករណី​។ ព្រៃ​ការពារ​ព្រះវិហារ​ដែល​ត្រូវ​បាន​បង្កើត​​ឡើង​ដោយ​អនុក្រឹត្យ​លេខ ៧៦ ចុះ​ថ្ងៃ​ទី​ ៣០ ខែ​កក្កដា ឆ្នាំ ២០០២ ​មាន​ផ្ទៃដី​សរុប​ជាង ១៩ ​ម៉ឺន​ហិកតា។ មួយ​ភាគ​ធំ​នៃ​តំបន់​នេះ​ជា​ប្រភេទ​ព្រៃ​របោះ​ក្រៅពី​នេះ​មាន​ព្រៃស្រោង និង​ព្រៃ​ពាក់កណ្តាល​ស្រោង៕

អត្ថបទគួរចាប់អារម្មណ៍