ថៃៈ លោកនាយករដ្ឋមន្ត្រី ហ៊ុន សែន បានចាកចេញពីប្រទេសកម្ពុជាទៅចូលរួមកិច្ចប្រជុំកំពូលអាស៊ានលើកទី ៣៥ និងកិច្ចប្រជុំកំពូលពាក់ព័ន្ធរយៈពេល ៤ ថ្ងៃចាប់ពីថ្ងៃទី ២ ដល់ថ្ងៃទី ៥ ខែវិច្ឆិកា នៅទីក្រុងបាងកក ប្រទេសថៃ ក្រោមមូលបទ «ជំរុញភាពជាដៃគូសម្រាប់ចីរភាព»។
យោងតាមខ្លឹមសារនៃកិច្ចប្រជុំដែលបានសរសេរនៅលើហ្វេសប៊ុករបស់លោក ហ៊ុន សែន កាលពីថ្ងៃអាទិត្យបានឲ្យដឹងនៅក្នុងកិច្ចប្រជុំកំពូលអាស៊ាន-ចិន លើកទី ២២ ថា កម្ពុជាផ្តល់សារៈសំខាន់ចំពោះឯកសារចក្ខុវិស័យភាពជាដៃគូអាស៊ាន-ចិន ឆ្នាំ ២០៣០ ដែលថ្នាក់ដឹកនាំអាស៊ាន-ចិន បានដាក់ចេញ ដើម្បីប្តេជ្ញាចិត្តរួមគ្នាក្នុងការធ្វើកិច្ចសហប្រតិបត្តិការជំរុញភាពជាដៃគូឲ្យកាន់តែស៊ីជម្រៅលើវិស័យសសរស្តម្ភទាំង ៣ គឺនយោបាយ និងសន្តិសុខ កិច្ចសហប្រតិបត្តិការសេដ្ឋកិច្ច និងកិច្ចសហប្រតិបត្តិការសង្គម វប្បធម៌។
តាមហ្វេសប៊ុកដដែលនេះលោក ហ៊ុន សែន ថ្លែងថា៖ «អាស៊ាន និងចិនគួររួមគ្នាខិតខំប្រែក្លាយចក្ខុវិស័យរួមឆ្នាំ ២០៣០ ឲ្យទៅជាការអនុវត្តជាក់ស្តែង ដើម្បីប្រសិទ្ធភាពនៃភាពជាដៃគូយុទ្ធសាស្ត្រដែលមានអនាគតរួមគ្នា»។
ហ្វេសប៊ុកលោក ហ៊ុន សែន បញ្ជាក់ថាមេដឹកនាំអាស៊ាន-ចិន បានស្វាគមន៍ការបន្តលើកកម្ពស់កិច្ចសហប្រតិបត្តិការរវាងអាស៊ាន និងចិនឲ្យកាន់តែប្រសើរឡើង និងបានទទួលនូវការលើកទឹកចិត្តចំពោះវឌ្ឍនភាពនៃការចរចាដើម្បីឆ្ពោះទៅកាន់ការបញ្ចប់ក្រមប្រតិបត្តិសមុទ្រចិនខាងត្បូង (COC) យ៉ាងឆាប់រហ័ស មានប្រសិទ្ធភាព និងស្របតាមពេលវេលាកំណត់ដែលបានឯកភាពដោយបណ្តាភាគី។
ហ្វេសប៊ុកលោក ហ៊ុន សែន បានឲ្យដឹងថា មេដឹកនាំអាស៊ាន-ចិន បានសង្កត់ធ្ងន់លើសារ:សំខាន់នៃការមិនធ្វើយោធូបនីយកម្ម និងការអត់ធ្មត់ក្នុងការធ្វើសកម្មភាពដោយរដ្ឋទាមទារអធិបតេយ្យ រដ្ឋផ្សេងទៀត និងភាគីនៃសេចក្តីថ្លែងការណ៍ស្តីពីការប្រតិបត្តិរបស់បណ្តាភាគីនៅសមុទ្រចិនខាងត្បូង ដែលអាចបង្កភាពស្មុគស្មាញ និងបង្កើនភាពតានតឹងនៅសមុទ្រចិនខាងត្បូង។
ហ្វេសប៊ុកលោក ហ៊ុន សែន បន្តទៀតថាក្នុងកិច្ចប្រជុំកំពូលអាស៊ាន-ឥណ្ឌាលើកទី ១៦ កាលពីថ្ងៃអាទិត្យកម្ពុជាគាំទ្រដល់ការពិភាក្សាដើម្បីរៀបចំផែនការសកម្មភាពថ្មីឆ្នាំ ២០២១-២០២៥ ដែលជាឯកសារសម្រាប់អនុវត្តសកម្មភាពកិច្ចសហប្រតិបត្តិការរួមដែលនឹងផ្តល់ផលប្រយោជន៍ឲ្យអាស៊ាន និងឥណ្ឌា។
ហ្វេសប៊ុកលោក ហ៊ុន សែន បញ្ជាក់ថា៖ «កម្ពុជាសូមលើកទឹកចិត្តអាស៊ាន និងឥណ្ឌា ផ្តល់អាទិភាពខ្ពស់ដល់ការពង្រឹង និងពង្រីកពាណិជ្ជកម្ម និងការវិនិយោគរវាងអាស៊ាន និងឥណ្ឌាបន្ថែមទៀតដើម្បីសម្រេចឲ្យបាននូវគោលដៅពាណិជ្ជកម្ម ២០០ ពាន់លានដុល្លារ នៅឆ្នាំ ២០២២។ ពិសេសទៅទៀតនោះ កម្ពុជាសូមលើកទឹកចិត្តជំរុញកិច្ចសហប្រតិបត្តិការបន្ថែមលើការតភ្ជាប់ជារូបវ័ន្ត និងឌីជីថលរវាងអាស៊ាន និងឥណ្ឌា ជាពិសេសសម្រាប់ប្រទេស កម្ពុជា ឡាវ មីយ៉ាន់ម៉ា និងវៀតណាមតាមរយៈការផ្តល់ជំនួយហិរញ្ញប្បទាន និងជំនួយបច្ចេកទេសផ្សេងៗ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ចំពោះប្រជាជាតិអាស៊ានមិនថាតូចមិនថាធំ និងមិនថាផលសរុបក្នុងស្រុក (GDP) ប៉ុនណានោះទេ ប្រជាជាតិអាស៊ានត្រូវការភាពជិតស្និទ្ធ និងសាមគ្គីភាពជាមួយគ្នាដែលមានចែងក្នុងរបៀបវារៈក្នុងការជជែកគ្នា។
លោកថ្លែងថា៖ «យើងជាសមាជិករបស់អាស៊ាន។ អាហ្នឹងសារៈសំខាន់ធំបំផុត ចូលរួមហ្នឹង អាហ្នឹងជាការងាររបស់អាស៊ាន...។ យើងនឹងចែករំលែកអនាគតមួយជាមួយគ្នារវាងសមាជិកអាស៊ានទាំងអស់។ ការប្រជុំជាទៀងទាត់ហ្នឹង អាហ្នឹងបង្ហាញអំពីសាមគ្គីភាពរវាងប្រជាជាតិអាស៊ាន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ដូចរាល់ឆ្នាំ ការដែលលោក ហ៊ុន សែន ចូលរួមកិច្ចប្រជុំនេះគឺជាកាតព្វកិច្ចរបស់រដ្ឋជាសមាជិកអាស៊ាន។ យ៉ាងណាក៏ដោយ វាគឺជាឱកាសដែលកម្ពុជាអាចថ្លែងនូវអ្វីដែលជាកង្វល់ បញ្ហា ឬគំនិតផ្តួចផ្តើមក្នុងកិច្ចការតំបន់ និងអន្តរជាតិផ្សេងទៀត។
លោក គិន ភា ថ្លែងថា៖ «អាហ្នឹងក៏វាបង្ហាញពីនយោបាយការបរទេសរបស់យើង ការពង្រីកនូវក្របខ័ណ្ឌកិច្ចសហប្រតិបត្តិការអន្តរជាតិរបស់កម្ពុជាជាមួយបណ្តាប្រទេសនៅក្នុងតំបន់ជាពិសេសក្នុងក្របខ័ណ្ឌអាស៊ានតែម្តង ព្រោះគោលការណ៍អាស៊ានជាគោលការណ៍កុងសង់ស៊ីស ដូច្នេះការសម្រេចចិត្តរបស់អាស៊ានក៏ឆ្លុះបញ្ចាំងពីការសម្រេចចិត្តនៃរដ្ឋជាសមាជិកទាំងអស់ដូចគ្នា»៕