.jpg)
កម្ពុជាផ្អាកការផ្លាស់ប្តូរកងកម្លាំងមួកខៀវតាមការជូនដំណឹងរបស់ UN ដើម្បីទប់ស្កាត់ការឆ្លងរីករាលដាលជំងឺកូវីដ ១៩។ ហេង ជីវ័ន
ភ្នំពេញៈ អនុលោមតាមការណែនាំរបស់អគ្គលេខាធិការអង្គការសហប្រជាជាតិក្នុងការចូលរួមទប់ស្កាត់ និងប្រយុទ្ធប្រឆាំងការឆ្លងរីករាលដាលនៃជំងឺកូវីដ ១៩ ជាលក្ខណៈសកល មជ្ឈមណ្ឌលជាតិរក្សាសន្តិភាពនៃកងកម្លាំងមួកខៀវកម្ពុជាបានប្រកាសផ្អាកការផ្លាស់ប្តូរកងកម្លាំងជាលក្ខណៈប្តូរវេនជាបណ្ដោះអាសន្នរហូតដល់មានបទបញ្ជាថ្មីពីអង្គការសហប្រជាជាតិនៅចុងខែមិថុនា។
លោកស្រី កុសល ម៉ាលីនដា អគ្គនាយករង និងជាអ្នកនាំពាក្យ មជ្ឈមណ្ឌលជាតិរក្សាសន្តិភាពកម្ពុជាបានប្រាប់ភ្នំពេញប៉ុស្ដិ៍នៅថ្ងៃអាទិត្យថា ដំណើរការផ្លាស់ប្ដូរវេន កងកម្លាំងរក្សាសន្តិភាពត្រូវបានធ្វើឡើងជាប្រចាំតាមផែនការសម្រេចរបស់អង្គការសហប្រជាជាតិជារៀងរាល់ ១ ឆ្នាំម្តង។ ប៉ុន្តែសម្រាប់ឆ្នាំនេះអាណត្តិនៃការផ្លាស់ប្ដូរវេនកងកម្លាំងរក្សាសន្តិភាពត្រូវបានផ្អាកជាបណ្ដោះអាសន្នដើម្បីកាត់បន្ថយការឆ្លងរីករាលដាលនៃជំងឺកូវីដ ១៩។
លោកស្រីបញ្ជាក់ថា៖ «ទន្ទឹមនឹងនេះ កងទ័ពមួកខៀវកម្ពុជាដែលកំពុងបំពេញបេសកកម្មនៅក្រៅប្រទេសក៏ត្រូវបានណែនាំឲ្យបង្ការ និងការពារពីការឆ្លងនៃជំងឺកូវីដ១៩ផងដែរ»។
បើតាមលោកស្រី ម៉ាលីនដា បច្ចុប្បន្នកងទ័ពមួកខៀវកម្ពុជាដែលកំពុងបំពេញបេសកកម្មក្រោមឆត្ររបស់អង្គការសហប្រជាជាតិមានចំនួន ៧៨៧ នាក់ក្នុងនោះរួមមានស្ត្រី ៧៦ នាក់ និងបានបែងចែកជា ៥ កងនៃតំបន់បេសកកម្ម ដែលរួមមាន សាធារណរដ្ឋស៊ូដង់ខាងត្បូងចំនួន ១ កង, លីបង់ចំនួន ១ កង, អាហ្វ្រិកកណ្តាលចំនួន ១ កង និងនៅប្រទេសម៉ាលីចំនួន ២ កង (កងវិស្វកម្ម ១ កង និងកងកម្ទេចគ្រាប់យុទ្ធភណ្ឌមិនទាន់ផ្ទុះ ១ កង)។
លោកស្រីបញ្ជាក់ទៀតថា៖ «ដោយសារកងទ័ពមួកខៀវកម្ពុជាយើងមានវិន័យល្អ និងបានអនុវត្តនូវគោលការអនាម័យសុខភាពបានល្អជាប្រចាំស្របតាមការណែនាំរបស់អង្គការសុខភាពពិភពលោករហូតមកដល់ពេលនេះ គ្មានកងទ័ពមួកខៀវកម្ពុជាណាម្នាក់ត្រូវបានគេរាយការណ៍ថា មានករណីឆ្លងជំងឺកូវីដ ១៩ នោះទេ»។
កាលពីថ្ងៃទី ២៧ ខែ មីនា ឆ្នាំ ២០២០ ប្រមុខអង្គការសហប្រជាជាតិលោក Antonio Guterres បានជូនដំណឹងដល់បណ្តាប្រទេសជាសមាជិកដែលកំពុងចូលរួមចំណែកកងទ័ព ដើម្បីគ្រប់គ្រងការវិលជុំក្នុងកិច្ចប្រឹងប្រែងមួយ ដើម្បីទប់ស្កាត់ការរីករាលដាលនៃវីរុសកូរ៉ូណា។
លោកអគ្គលេខាធិការបានថ្លែងថា ដោយសារតែការផ្លាស់ប្តូរវេន កងទ័ពនៅក្នុង និងក្រៅប្រទេសក្នុងអំឡុងពេលមានជំងឺរាតត្បាតពិភពលោកគឺ «ជាបញ្ហាប្រឈមខ្លាំង» ដូច្នេះអង្គការសហប្រជាជាតិបានសម្រេចពន្យារពេលការវិលជុំ ឬផ្លាស់ប្ដូរវេននេះជាបណ្ដោះអាសន្ន។
លោក Antonio Guterres ពន្យល់ថា៖ «លក្ខណវិនិច្ឆ័យកំពុងត្រូវបានបង្កើតឡើង ដើម្បីកំណត់ថាតើក្នុងកាលៈទេសៈបច្ចុប្បន្ននេះការផ្លាស់ប្ដូរវេននឹងត្រូវធ្វើឡើងនៅពេលណា។ យើងកំពុងពិភាក្សាយ៉ាងជិតស្និទ្ធជាមួយនឹងប្រទេសម្ចាស់ផ្ទះ និងប្រទេសដែលចូលរួមវិភាគទានកងទ័ព និងប្រទេសដែលចូលរួមវិភាគទានកងកម្លាំងនគរបាល ដើម្បីចូលរួមជម្នះរាល់ការលំបាកដែលមានសព្វថ្ងៃនេះ»។
ទោះបីជាកងកម្លាំងថែរក្សាសន្តិភាពរបស់អង្គការសហប្រជាជាតិសម្របខ្លួនទៅនឹងបញ្ហាប្រឈមដែលបង្កឡើងដោយវីរុសកូរ៉ូណាក៏ដោយ ក៏ពួកគេនៅតែបន្តបំពេញភារកិច្ចថែរក្សាការពារសន្តិភាព និងសន្តិសុខសំខាន់ៗរបស់ពួកគេ ដែលក្នុងខណៈពេលនេះ ពួកគេជួយទប់ស្កាត់ការរីករាលដាលនៃជំងឺរាតត្បាតកូវីដ ១៩ ថែមទៀត៕
