ភ្នំពេញៈ រដ្ឋាភិបាលនឹងផ្អាកជើងហោះហើរមកពីប្រទេសហ្វីលីពីនមួយរយៈ ចាប់ពីថ្ងៃទី ១៣ ខែសីហា ស្អែកនេះតទៅ ក្រោយពីមានករណីនាំចូលជំងឺកូវីដ ១៩ ពីប្រទេសនេះមកកម្ពុជាចំនួន ១៣ នាក់កាលពីថ្ងៃទី ៩ ខែសីហា។
សេចក្ដីប្រកាសព័ត៌មានរបស់ក្រសួងសុខាភិបាលដែលចេញកាលពីម្សិលមិញបញ្ជាក់ថា លោកនាយករដ្ឋមន្ត្រី ហ៊ុន សែន បានសម្រេចជាផ្លូវការនៅថ្ងៃទី ១១ ខែសីហា ឱ្យផ្អាកជើងហោះហើរមកពីប្រទេសហ្វីលីពីនជាបណ្ដោះអាសន្នដោយសារប្រទេសនេះកំពុងមានអត្រាឆ្លងជំងឺកូវីដ ១៩ យ៉ាងគំហុក និងជាប្រទេសមានចំនួនឆ្លងខ្ពស់ជាងគេបំផុតនៅក្នុងចំណោមប្រទេសសមាជិកអាស៊ាន។
សេចក្ដីប្រកាសព័ត៌មានបានបញ្ជាក់ថា៖ «អ្នកដំណើរមកពីប្រទេសហ្វីលីពីនក៏ជាការព្រួយបារម្ភផងដែរ។ ម្យ៉ាងទៀតកាលពីថ្ងៃទី ៩ សីហា ជើងហោះហើរ មកពីប្រទេសហ្វីលីពីន មួយដែលមានអ្នកដំណើរសរុបចំនួន ១១៩ នាក់ត្រូវបានធ្វើតេស្ដរកឃើញអ្នកវិជ្ជមានវីរុសកូវីដ ១៩ រហូតដល់ ១៣»។
កាលពីថ្ងៃទី ១០ សីហា ក្រសួងសុខាភិបាល ប្រទេសហ្វីលីពីនបានរាយការណ៍ថា មានករណីឆ្លងថ្មីជំងឺកូវីដ ១៩ ចំនួន ៦ ៩៥៨ នាក់ និងជាករណីឆ្លងប្រចាំថ្ងៃកើនឡើងខ្ពស់បំផុតដែលបានធ្វើឱ្យប្រទេសនេះមានអ្នកឆ្លងសរុបកើនដល់ ១៣៦ ៦៣៨ នាក់។ ក្រសួងដដែលបន្តថា ចំណែកអ្នកស្លាប់ថ្មីមានចំនួន ២៤ នាក់ ដែលធ្វើឱ្យចំនួនអ្នកស្លាប់កើនឡើងដល់ ២ ២៩៣ នាក់។
ហ្វីលីពីន ទើបបានប្រកាសបិទរដ្ឋធានីម៉ានីល និងតំបន់ជុំវិញទីក្រុងនេះសាជាថ្មី ដើម្បីទប់ស្កាត់ការឆ្លងជំងឺកូវីដ ១៩។
កាលពីថ្ងៃម្សិលមិញ ក្រសួងសុខាភិបាលកម្ពុជាបានរាយការណ៍ថាមានករណីនាំចូលជំងឺកូវីដពីក្រៅប្រទេសចំនួន ១៥ ករណីបន្ថែមទៀត ដែលធ្វើឱ្យករណីឆ្លងសរុបកើនដល់ ២៦៦ នាក់ និងករណីជាសះស្បើយថ្មីម្នាក់ទៀតដែលធ្វើឱ្យអ្នកជាសះស្បើយទាំងអស់កើនដល់ ២២០ នាក់។
ករណីថ្មីទាំង ១៥ នាក់ក្នុងនោះមាន ១៣ នាក់ ស្ថិតក្នុងចំណោមអ្នកដំណើរជនជាតិចិនចំនួន ១១៩ នាក់ ដែលបានធ្វើដំណើរមកពីប្រទេសហ្វីលីពីន និង ២ នាក់ទៀតជាស្ដ្រីជនជាតិខ្មែរក្នុងនោះជាកុមារីអាយុ ១៣ ឆ្នាំម្នាក់ស្ថិតក្នុងចំណោមអ្នកដំណើរទាំង ៧២ នាក់ផ្សេងទៀតមកពីសហរដ្ឋអាមេរិកហើយតជើងហោះហើរនៅកោះតៃវ៉ាន់។ ជើងហោះហើរទាំង ២ ដែលដឹកអ្នកដំណើរមកពីសហរដ្ឋអាមេរិក និងហ្វីលីពីននេះបានមកដល់កម្ពុជាកាលពីថ្ងៃទី ៩ សីហា។
រដ្ឋាភិបាលកម្ពុជាទើបតែបានផ្អាកជើងហោះហើរ មកពីប្រទេសឥណ្ឌូនេស៊ី និងម៉ាឡេស៊ី ក្រោយពីប្រទេសទាំង ២ នេះបាននាំចូលជំងឺកូវីដ ១៩ ច្រើនបំផុត ចូលមកកាន់ប្រទេសកម្ពុជា។
លោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី ៩ ខែសីហា ថា ជំងឺកូវីដ ១៩ កំពុងគំរាមកំហែងការរស់នៅអាយុជីវិត និងសេដ្ឋកិច្ចនៅទូទាំងសកលលោក ប៉ុន្តែលោកបញ្ជាក់ថា ស្ថានភាពជំងឺកូវីដ ១៩ នៅកម្ពុជាគឺមិនមានភាពធ្ងន់ធ្ងរទេ ដោយសារមិនមានការឆ្លងនៅក្នុងប្រទេស និងមានតែករណីនាំចូលពីក្រៅប្រទេស។
ក្រសួងសុខាភិបាលបានបន្តអំពាវនាវឱ្យពលរដ្ឋត្រូវអនុវត្តវិធានការការពារខ្លួនជាចាំបាច់ ដើម្បីទប់ស្កាត់ការចម្លងពីមនុស្សម្នាក់ទៅមនុស្សម្នាក់ ខណៈថ្ងៃឈប់សម្រាកសងចូលឆ្នាំមានរយៈពេលយូររហូត ៩ ថ្ងៃ នៅក្នុងខែសីហានេះ កាន់តែខិតជិតមកដល់៕