.jpg)
ភ្នំពេញៈ កម្ពុជាបង្ហាញការព្រួយបារម្ភ ជុំវិញផលប៉ះពាល់ដែលបណ្តាលមកពីសារធាតុអាសបេស្តុស ដែលមាននៅក្នុងផលិតផលនានា ក្នុងវិស័យឧស្សាហកម្មខុសៗគ្នាជាពិសេសវិស័យសំណង់ដែលអ្នកជំនាញអះអាងថា សម្ភារមានផ្ទុកនូវសារធាតុទាំងនោះ ភាគច្រើនបាននាំចូលពីក្រៅប្រទេស។
កាលពីម្សិលមិញ មានមន្ត្រីជាន់ខ្ពស់រាជរដ្ឋាភិបាល សង្គមស៊ីវិលសហជីពជាតិ និងអន្តរជាតិ អង្គទូត និងអ្នកជំនាញប្រមាណ ៣០០ នាក់ បានជួបពិភាក្សាគ្នា និងចែករំលែកនូវព័ត៌មានមួយចំនួន អំពីសារធាតុអាសបេស្តុសដែលប្រមូលបានពីកម្ពុជា ស្របពេលក្រសួងការងារ បណ្តុះបណ្តាលវិជ្ជាជីវៈបានដាក់ផ្សព្វផ្សាយ នូវកម្រង់ព័ត៌មានជាតិស្តីពីសារធាតុអាសបេស្តុសនៅកម្ពុជា។
តាមអ្នកជំនាញ និយាយថា សារធាតុអាសបេស្តុសនេះ គឺបណ្តាលឱ្យមានផលប៉ះពាល់យ៉ាងច្រើនដល់សុខភាពមនុស្ស តាមរយៈការដកដង្ហើម ដែលបណ្តាលឱ្យកើតជំងឺមហារីកសួត មហារីកស្រោមសួត មហារីកស្បូនដុំក្នុងសួត រលាកសួត ស្រោមសួតក្រាស់ ត្បៀតទងសួត ជំងឺប្រព័ន្ធផ្លូវដង្ហើម និងរហូតដល់កើតជំងឺមហារីកបំពង់អាហារ មហារីកក្រពះ និងមហារីកពោះវៀន។
យោងតាមសេចក្តីសង្ខេបកម្រង់ព័ត៌មានជាតិ ស្តីពីសារធាតុអាសបេស្តុសនៅកម្ពុជា ដែលបានផ្សព្វផ្សាយកាលពីម្សិលមិញ បង្ហាញថា សារធាតុអាសបេស្តុស គឺជាជាតិសរសៃតូចឆ្មារ ដែលគេជីកបានពីរ៉ែ ហើយវាត្រូវបានគេដាក់បញ្ចូលជាធាតុផ្សំក្នុងផលិតផលមួយចំនួន ដើម្បីឲ្យមានភាពធន់ រឹងមាំ ដែលធ្វើឲ្យវាមានតម្លៃថោកជាងសម្ភារដទៃទៀត ដែលមិនប្រើប្រាស់នូវសារធាតុអាសបេស្តុសនេះ។
លោក អុិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ថ្លែងក្នុងឱកាសនោះថា ប្រទេសកម្ពុជាមិនទាន់មានច្បាប់គ្រប់គ្រងការប្រើប្រាស់សារធាតុអាសបេស្តុសនេះ ឲ្យបានពេញលេញនោះទេ គឺមានតែការទទួលស្គាល់ពីកាកសំណល់ដែលមានសមាសធាតុអាសបេស្តុសថា ជាប្រភេទមានគ្រោះថ្នាក់ប៉ុណ្ណោះ ស្របពេលកម្ពុជាមានច្បាប់តិចណាស់ដែលបានចែងបញ្ញត្តិអំពីផលប៉ះពាល់ពីសារធាតុនេះ។ «ក្រុមការងារកសាងកម្រងព័ត៌មានជាតិស្តីពីសារធាតុអាសបេស្តុសកម្ពុជា ដែលបានខិតខំប្រឹងប្រែងប្រមែប្រមូលផ្តល់ទិន្នន័យព័ត៌មាន និងរបាយការណ៍ហើយនឹងត្រូវធ្វើបច្ចុប្បន្នភាពញឹកញាប់ ដើម្បីជូនព័ត៌មានពីការអភិវឌ្ឍគោលនយោបាយការកំណត់បញ្ហាប្រឈមនៅកន្លែងធ្វើការជួយរៀបចំផែនការ និងកំណត់សកម្មភាពអាទិភាពសំដៅកាត់បន្ថយការប៉ះពាល់នៃសរសៃអាសបេស្តុស»។
យោងតាមសេចក្តីសង្ខេបកម្រងព័ត៌មានជាតិស្តីពីសារធាតុអាសបេស្តុសនៅកម្ពុជា បង្ហាញថា តាមលទ្ធផលវិភាគលើគំរូសំណាកក្នុងចំណោម ១១៧ ដែលបានធ្វើតេស្តក្នុងឆ្នាំ ២០១៨ បង្ហាញថា សម្ភារដែលមានសារធាតុអាសបេស្តុសមាន ៥៣ % លើផលិតផលហ្វីប្រូស៊ីម៉ងត៍ អំបោះឆៅ វាយនភណ្ឌ ស្បែក ហ្រ្វាំង រ៉ងទ្រនាប់ម៉ាស៊ីន និងសម្ភារអុីសូឡង់។
លោក ឡេង តុង ប្រធាននាយកដ្ឋានពេទ្យការងារថ្លែងថា មកដល់ពេលនេះ កម្ពុជា មិនទាន់មានឧបករណ៍ធ្វើតេស្តសំណាកដើម្បីពិនិត្យមើលសារធាតុអាសបេស្តុសនេះនៅឡើយទេហេតុដូច្នេះហើយទើបកម្ពុជា ត្រូវសិក្សាបន្ថែមទៀតដើម្បីឈានទៅរកការគ្រប់គ្រងនូវសារធាតុនេះឲ្យមានប្រសិទ្ធភាព។
លោកថ្លែងថា៖ «បច្ចុប្បន្នវាមានការប៉ះពាល់ច្រើនព្រោះវិស័យសំណង់យើងមានការរីកចម្រើនខ្លាំងអ៊ីចឹងការប្រើប្រាស់នូវសម្ភារសំណង់វាច្រើនបើសិនជាប្រើប្រាស់អត់មានការការពារត្រឹមត្រូវឲ្យល្អទេគឺប៉ះពាល់សុខភាពរបស់កម្មករ»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា ថ្លែងថា ក្នុងពេលបច្ចុប្បន្ន រាជរដ្ឋាភិបាលហាក់មិនសូវយកចិត្តទុកដាក់ នឹងវិស័យសំណង់នោះទេ បូករួមទាំងអត្ថប្រយោជន៍ និងការគិតគូរពីសុខភាពកម្មករ។ «អត់សូវយកចិត្តទុកដាក់ ជាមួយកម្មករសំណង់ទេ បើគាត់មិនចេះថែរក្សាសុខភាពខ្លួនគាត់ទេគឺជារឿងរបស់ពួកគាត់»៕
