The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​មាន​វៀតណាម​ខុសច្បាប់​រស់នៅ​ ១៦ ម៉ឺន​នាក់

កម្ពុជា​មាន​វៀតណាម​ខុសច្បាប់​រស់នៅ​ ១៦ ម៉ឺន​នាក់

ជន​អន្តោប្រវេសន៍​ខុស​ច្បាប់​ភាគច្រើន​ជា​វៀតណាម​ត្រូវ​ឃាត់​ខ្លួន​នៅ​កោះពេជ្រ​ពី​ខែ​មុន​។
ជន​អន្តោប្រវេសន៍​ខុស​ច្បាប់​ភាគច្រើន​ជា​វៀតណាម​ត្រូវ​ឃាត់​ខ្លួន​នៅ​កោះពេជ្រ​ពី​ខែ​មុន​។ រូបថត ហ្វេសប៊ុក

កម្ពុជា​មាន​វៀតណាម​ខុសច្បាប់​រស់នៅ​ ១៦ ម៉ឺន​នាក់

ភ្នំពេញៈ ការ​ធ្វើ​ជំរឿន​នៅក្នុង​ឆ្នាំ ២០១៤ បាន​រកឃើញ​ថា​មាន​ជន​អន្តោប្រវេសន៍​​វៀតណាម​ខុស​ច្បាប់​រស់នៅ​ក្នុង​ប្រទេស​កម្ពុជា​ប្រមាណ ១៦​ ម៉ឺន​នាក់ ខណៈ​ដែល​ក្នុង​រយៈពេល ៦ ខែ​ដើម​ឆ្នាំ ២០១៥ នេះ​ក្រសួង​មហាផ្ទៃ​បាន​​បណ្តេញ​ជនអន្តោប្រវេសន៍​ខុសច្បាប់​ចំនួន ១២០០ នាក់​ចេញ​ពី​កម្ពុជា​ដែល​ក្នុង​នោះ ៩៨ ​ភាគរយ​ជា​ជនជាតិ​វៀតណាម។

ក្នុង​កិច្ចប្រជុំ​ផ្សព្វផ្សាយ​ផែនការ​អនុវត្ត​ការ​គ្រប់គ្រង​ទៅលើ​ជនអន្តោប្រវេសន៍​ដែល​ធ្វើ​ឡើង​នៅ​ទីស្តីការ​ក្រសួង​មហាផ្ទៃ​កាលពី​ម្សិលមិញ​អគ្គនាយក​នៃ​អគ្គនាយកដ្ឋាន​ជន​អន្តោប្រវេសន៍ លោក សុខ ផល បាន​ថ្លែង​ថា​លំហូរ​ចូល​នៃ​ជនបរទេស​មក​រស់នៅ​កម្ពុជា​ដោយ​មិន​មាន​លិខិត​ស្នាម​ត្រឹមត្រូវ​កើនឡើង​គួរ​ឲ្យ​កត់សម្គាល់​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ហើយ​ក្នុង​នោះ​ជនជាតិ​វៀតណាម​មាន​រហូត​ដល់​ទៅ ៩៥ ភាគរយ​នៃ​ជន​អន្តោប្រវេសន៍​ខុស​ច្បាប់​សរុប។

លោក សុខ ផល បាន​ឲ្យ​ដឹង​ទៀត​ថា​តួលេខ​នៃ​ជំរឿន​ជនជាតិ​វៀតណាម​ដែល​រស់នៅ​កម្ពុជា​ក្នុង​ឆ្នាំ​ ២០០២ មាន​ចំនួន ៧ ​ម៉ឺន​នាក់ ឆ្នាំ​ ២០១០ មាន​ ១០ ​ម៉ឺន​នាក់​ ហើយ​រហូត​ដល់​ឆ្នាំ​ ២០១៤ បាន​កើន​រហូត​ដល់ ១៦ ​​ម៉ឺន​នាក់​នៃ​ការងារ​ដែល​ទើប​អនុវត្ត​បាន​ប្រមាណ ៧០ ភាគរយ។

លោក​ថា៖ «បើ​គិត​ដល់​ ១០០ ​ភាគរយ គឺ​មាន​ច្រើន​ជាង​នេះ អ៊ីចឹង​ការ​លោត​ផ្លោះ​នៃ​ការ​កើនឡើង​នៃ​ជនបរទេស​នេះ ជាពិសេស​ក្នុង​រយៈពេល​ ៤ ទៅ​ ៥ ​ឆ្នាំ​ចុងក្រោយ​នេះ​គឺ​ច្រើន​ស្មើ​នឹង​ ១ ​គុណ​នឹង ៩ បើ​ធៀប​នឹង​ឆ្នាំ ៨០, ៩០ ទៅ​នឹង​ឆ្នាំ​ ២០០០ ​នេះ»។

បើ​តាម​លោក សុខ ផល ក្នុង​រយៈពេល​ ៨ ​ខែ ចុង​ឆ្នាំ​ ២០១៤ មន្ត្រី​អន្តោប្រវេសន៍​បាន​រកឃើញ​ជន​អន្តោប្រវេសន៍​ដែល​គ្មាន​លិខិត​ស្នាម​ត្រឹមត្រូវ​មាន​ចំនួន​ ១៨០០ ​​នាក់ ក្នុង​នោះ​ជនជាតិ​វៀតណាម​មាន​ ១៥០០ ​នាក់​ដែល​ត្រូវ​បាន​បណ្តេញ​ចេញ​ចំណែក​ដើម​ឆ្នាំ​ ២០១៥ ​វិញ​ជន​អន្តោប្រវេសន៍​មិន​ស្រប​ច្បាប់​ដែល​ត្រូវ​បាន​បណ្តេញ​ចេញ​មាន ១២០០ នាក់​ក្នុង​នោះ ៩៨ ភាគរយ​គឺជា​ជនជាតិ​វៀតណាម។

លោក សុខ ផល បាន​ទទួល​ស្គាល់​ថា​ជនជាតិ​វៀតណាម​បាន​ហូរ​ចូល​តាម​ប៉ុស្តិ៍​ព្រំដែន​ប្រមាណ ២០ ​ទៅ​ ៣០ ​ភាគរយ ក្រៅពី​នោះ គឺ​ហូរ​ចូល​តាម​ច្រក​របៀង​ផ្សេងៗ​។

ថ្លែង​ប្រាប់​អ្នក​សារព័ត៌មាន​ខណៈ​សម្រាក​ពី​កិច្ចប្រជុំ លោក ខាត់ សារ៉ាត់ ប្រធាន​ប៉ុស្តិ៍​ច្រក​ព្រំដែន​អន្តរជាតិ​បាវិត​បាន​ឲ្យ​ដឹង​ថា​តាមរយៈ​ការ​អនុវត្ត​ច្បាប់​អន្តោប្រវេសន៍​លោក​បាន​បង្កើន​វិធានការ​រឹតត្បិត​សម្រាប់​ជនបរទេស​ចូល​ក្នុង​កម្ពុជា​ដោយ​មាន​ប្រសិទ្ធភាព​រហូត​ពី​ ៨០ ទៅ​ ៩០ ​ភាគរយ។

លោក​ថា៖ «ខ្ញុំ​បាន​ទប់ស្កាត់​ជា​បន្តបន្ទាប់​ទាល់តែ​មាន​ Passport និង​លិខិត​ស្នាម​ត្រឹមត្រូវ​ទើប​ឲ្យ​ចូល ខ្ញុំ​មាន​កម្លាំង​យាមកាម ២៤ ​ម៉ោង​លើ​ ២៤ ​​ម៉ោង​។ ច្រក​បាវិត គឺ​ធំធេង​ប៉ុន្មាន​គីឡូ​ដី​ក្រៅពី​ភូមិសាស្ត្រ​របស់​ខ្ញុំ​ការពារ គឺ​ខេត្ត​នីមួយៗ​ដែល​មាន​ច្រក​របៀង​ត្រូវ​គ្រប់គ្រង​។ ពួក​វៀតណាម​ហ្នឹង​ភាគច្រើន​វា​ចូល​តាម​ច្រក​របៀង​តាម​ខេត្ត​នានា​វាលស្រែ ព្រៃ​ជាដើម»។

ក្នុង​កិច្ចប្រជុំ​នេះ លោក សុខ ផល ក៏​បាន​រាយការណ៍​ពី​​ជំនួប​ជាមួយ​ក្រសួង​នគរបាល​របស់​វៀតណាម កាលពី​សប្តាហ៍​មុន​ផង​ដែរ ដែល​ភាគី​កម្ពុជា និង​វៀតណាម​បាន​ឯកភាព​គ្នា​ជា​គោលការណ៍​ពាក់ព័ន្ធ​នឹង​ជនអន្តោប្រវេសន៍​វៀតណាម​ក្នុង​នោះ​វៀតណាម​សន្យា​គោរព​អធិបតេយ្យ​ និង​ឯករាជភាព​របស់​កម្ពុជា​ក្នុង​ការ​ពិនិត្យ​ដោះស្រាយ​លើ​ពលរដ្ឋ​វៀតណាម​ដែល​បាន​កំពុង​ស្នាក់នៅ​កម្ពុជា វៀតណាម​បាន​ឯកភាព​បែងចែក​ប្រភេទ​ជនអន្តោប្រវេសន៍​ និង​បាន​ស្នើ​ឲ្យ​កម្ពុជា​ពិចារណា​តាម​សំណូមពរ​របស់​ពលរដ្ឋ​វៀតណាម​ដែល​មក​រស់នៅ​លើ​ទឹកដី​កម្ពុជា​។

ក្នុង​ពិធី​ផ្សព្វផ្សាយ​ផែនការ​ការងារ​លើ​ជនអន្តោប្រវេសន៍​នេះ លោក សុខ ផល ឲ្យ​ដឹង​ផង​ដែរ​ថា​នៅក្នុង​ឆ្នាំ​ ២០១៤ ពលករ​បរទេស​បាន​កើន​ដល់​ប្រមាណ ២៤០០០ នាក់ ដែល​បាន​ទៅ​ចុះ​ឈ្មោះ​សុំ​ប័ណ្ណ​ការងារ​នៅ​ក្រសួង​ការងារ។ ក្រៅពី​នោះ​ពលករ​បរទេស​ជិត ៥០០០ នាក់​ផ្សេង​ទៀត​ដែល​គ្មាន​ប័ណ្ណ​ការងារ​ត្រូវ​បាន​ផាក​ពិន័យ​យក​ថវិកា​ចូល​រដ្ឋ​បាន​រាប់​សែន​ដុល្លារ៕

អត្ថបទគួរចាប់អារម្មណ៍