The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​រក​មេធាវី​ការពារ​ពលរដ្ឋ​បី​នាក់​ដែល​ថៃ​បាញ់​របួស

កម្ពុជា​រក​មេធាវី​ការពារ​ពលរដ្ឋ​បី​នាក់​ដែល​ថៃ​បាញ់​របួស

ពលករ​ឆ្លងដែន​ថៃ​ខុស​ច្បាប់ ត្រូវ​តម្រួត​ថៃ​ចាប់​បញ្ជូន​មក​វិញ។
ពលករ​ឆ្លងដែន​ថៃ​ខុស​ច្បាប់ ត្រូវ​តម្រួត​ថៃ​ចាប់​បញ្ជូន​មក​វិញ។ ម៉ៃ វីរៈ

កម្ពុជា​រក​មេធាវី​ការពារ​ពលរដ្ឋ​បី​នាក់​ដែល​ថៃ​បាញ់​របួស

ភ្នំពេញៈ មន្ត្រី​ជាន់​ខ្ពស់​ក្រសួង​ការ​បរទេស​កម្ពុជា បាន​ឲ្យ​ដឹង​ថា កុងស៊ុល​កម្ពុជា​ប្រចាំ​នៅ​ប្រទេស​ថៃ បាន​ចាត់​តាំង​មេធាវី ការពារ​ក្តី​ដល់​ពលរដ្ឋ​ខ្មែរ​បី​នាក់ ដែល​ម្នាក់​ត្រូវ​ទាហាន​ថៃ​បាញ់​របួស​ជើង និង​ពីរ​នាក់​ទៀត​កំពុង​ជាប់​ឃុំ​ពាក់ព័ន្ធ​ករណី​ជួញដូរ​គ្រឿង​ញៀន​ឆ្លង​ដែន​ទៅ​ថៃ កាលពី​សប្តាហ៍​មុន។

កាលពី​ថ្ងៃ ទី២៥ ខែ​កុម្ភៈ នៅ​ម៉ោង​ជាង ៥​ល្ងាច ត្រង់​ចំណុច ភូមិ​គោក​ធ្យូង ឃុំ​គោក​ធ្យូង ស្រុក​គោក​ធ្យូង ខេត្ត​ស្រះកែវ ប្រទេស​ថៃ ឈម​នឹង ភូមិ​ព្រែក​ចន្ទន៍ ឃុំ​អូរ​បី​ជាន់ ស្រុក​អូរជ្រៅ ខេត្ត​បន្ទាយ​មាន​ជ័យ ពលរដ្ឋ​ខ្មែរ​ទាំង​បី​នាក់​បាន​ឆ្លង​ដែន​ទៅ​ជួញ​គ្រឿង​ញៀន ចំនួន ២០០ គ្រាប់​នៅ​ប្រទេស​ថៃ ក្រោយ​មក ទាហាន​ថៃ​បាន​ប្រទះ​ឃើញ ក៏​បាន​ដេញ​ចាប់​និង​បាន​បាញ់​ត្រូវ​ម្នាក់​បណ្តាល​ឲ្យ​របួស​ជើង និង​ចាប់​ខ្លួន​បាន​ពីរ​នាក់។

អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គួង បាន​ប្រាប់ ភ្នំពេញ ប៉ុស្តិ៍ ថា ករណី​នេះ​មន្ត្រី​ទូត​កម្ពុជា នឹង​ចាត់តាំង​មេធាវី ដើម្បី​ជួយ​ការពារ​ក្តី​ឲ្យ​ពលរដ្ឋ​ទាំង​នោះ។

លោក កុយ គួង ថ្លែង​ថា៖ «ខ្ញុំ​បាន​ទាក់ទង​ទៅ​កុងស៊ុល​យើង​ហើយ ហើយ​យើង​ក៏​បាន​ចាត់​តាំង​មេធាវី​ការពារ​ឲ្យ​ពួកគាត់​ដែរ។ ការ​ផ្តល់​សេវា​ផ្លូវ​ច្បាប់​នេះ​ឲ្យ​តែ​មាន​ករណី​ឡើង​ដល់​តុលាការ គឺ​យើង​តែង​រក​មេធាវី​ឲ្យ​ពួក​គាត់​ជានិច្ច សំខាន់​ដើម្បី​ឲ្យ​ពួកគាត់​ទទួល​បាន​យុត្តិធម៌ ប៉ុន្តែ ឥឡូវ​ខាង​សមត្ថកិច្ច​ថៃ គេ​នៅ​បន្ត​សាកសួរ​នៅ​ឡើយ តែ​យើង​ត្រៀម​មេធាវី​រួច​ហើយ»។

លោក​បន្ត​ឲ្យ​ដឹង​ថា បច្ចុប្បន្ន​ពលរដ្ឋ​រង​របួស​ត្រូវ​បញ្ជូន​ទៅ​ព្យាបាល​នៅ​មន្ទីរពេទ្យ ខេត្ត​ស្រះកែវ ចំណែក​ពលរដ្ឋ​ពីរ​នាក់​ទៀត​ត្រូវ​បាន​បញ្ជូន​ទៅ​ឃុំ​នៅ​ខេត្ត​ស្រះកែវ ប្រទេស​ថៃ ជាធម្មតា បទ​ល្មើស​កើត​លើ​ទឹក​ដី​គេ គឺជា​ដែន​សមត្ថកិច្ច​របស់​គេ​ហើយ។

នាយក​អង្គការ​ខារ៉ាម​កម្ពុជា លោក យ៉ា ណាវុធ បាន​សម្តែង​ការ​បារម្ភ​ចំពោះ​ការ​កើត​មាន​ការ​បាញ់​ប្រហារ​ពី​ទាហាន​ថៃ មក​លើ​ពលរដ្ឋ​កម្ពុជា ដែល​បន្លាស់​ទី​ខុស​ច្បាប់​នេះ។

លោក​យល់​ថា ក្រៅ​ពី​វិធាន​ការ​កំណត់​ទូត រដ្ឋាភិបាល​កម្ពុជា​គប្បី​ចាត់​វិធានការ​ផ្លូវ​ច្បាប់​ដើម្បី​ប្រឆាំង​អំពើ​អមនុស្ស​ធម៌​ទាំង​នេះ៖ «យើង​មាន​អនុស្សរណៈ​យោគ​យល់​តាំង​ពី ឆ្នាំ​២០០៣ មក តែ​មិន​ត្រូវ​បាន​អនុវត្ត​ម៉ឺងម៉ាត់​ទេ រដ្ឋាភិបាល​គប្បី​ចាត់​វិធានការ​ជា​សកម្ម​ភាព​ឲ្យ​មាន​លទ្ធផល​ជាក់​លាក់ និង​បង្ហាញ​ពី​ការ​ឆ្លើយ​តប​របស់​ខ្លួន ក្នុង​នាម​រដ្ឋ​ការពារ​ប្រជាជន»។

គិត​ត្រឹម ខែ​កុម្ភៈ ដើម​ឆ្នាំ​នេះ អគ្គ​ស្នងការ​នគរបាល​ជាតិ បាន​រាយការណ៍ ការ​បាញ់​ប្រហារ​ពី​ទាហាន​ថៃ​លើ​ពលរដ្ឋ​កម្ពុជា ឆ្លង​ដែន​ខុស​ច្បាប់ មាន ៣​ករណី ក្នុង​នោះ ៣ នាក់​ត្រូវ​បាញ់​ស្លាប់ ២ នាក់​ត្រូវ​ដុត​ស្លាប់ ខណៈ​ភាគី​ប្រទេស​ទាំង​ពីរ មិន​ទាន់​អាច​កំណត់​ថា ជា​ពលរដ្ឋ​របស់​ភាគី​ណា​នៅ​ឡើយ និង​មួយ​ចំនួន​ទៀត​រង​របួស៕

អត្ថបទគួរចាប់អារម្មណ៍