.jpg)
ស្លាកសញ្ញាមីនថៃដាក់នៅព្រំដែនមិនទាន់ឯកភាពនៅស្រុកថ្មពួក រុះរើនៅថ្ងៃទី ១២ ធ្នូ។រូប FN
បន្ទាយមានជ័យៈ ស្លាកសញ្ញា មីន និងខ្សែក្រហមព័ទ្ធទីតាំងមានមីនប្រមាណជិត ១០០ ស្លាក ដែលមន្ត្រីមជ្ឈមណ្ឌលសកម្មភាពកម្ចាត់មីនថៃ (TMAC) ដាក់ពង្រាយ ចន្លោះបង្គោលព្រំដែនលេខ ៣២-៣៣ នៅភូមិសាមគ្គី ឃុំគោករមៀត ស្រុកថ្មពួក ខេត្តបន្ទាយមានជ័យ ត្រូវបានមន្ត្រីយោធាកម្ពុជាចុះទៅរុះរើនាថ្ងៃទី ១២ ធ្នូ ដោយអះអាងថា ទីតាំងនោះមិនទាន់ឯកភាពគ្នានៅឡើយ។
លោក សេង ធារិន មេបញ្ជាការរង និងជានាយសេនាធិការយោធភូមិភាគទី ៥ ប្រាប់ ភ្នំពេញ ប៉ុស្ដិ៍ ពីម្សិលមិញថា មន្ត្រីយោធាកម្ពុជាបានចុះទៅរុះរើស្លាកសញ្ញាមីន និងខ្សែក្រហមព័ទ្ធទីតាំងមានមីនប្រមាណជិត ១០០ ស្លាកដែល TMAC បានដាក់ពង្រាយនៅចន្លោះបង្គោលព្រំដែនលេខ ៣២-៣៣ ស្ថិតក្នុងភូមិសាស្ត្រខាងលើក្នុងអំឡុងខែធ្នូ ខណៈតំបន់ទាំងនេះមិនទាន់ត្រូវបានគណៈកម្មការបច្ចេកទេសកិច្ចការព្រំដែននៃប្រទេសទាំង ២ ឯកភាពគ្នានៅឡើយ។
លោកបញ្ជាក់ថា៖ «កន្លងមកគាត់តែងតែមានគំនិតចង់ដោះមីនតាមបណ្ដោយព្រំដែនហ្នឹង ក្រោមហេតុផលថា គាត់មិនចង់ឱ្យមានគ្រោះថ្នាក់ដល់ប្រជាជននៃប្រទេសទាំង ២។ ប៉ុន្ដែរាល់សំណើរបស់ភាគីថៃ គឺយើងសុំគោលការណ៍ពីថ្នាក់លើឱ្យផ្អាកសិន ដើម្បីពិនិត្យ ថា តើទីតាំងដែលគាត់ស្នើមកហ្នឹងត្រូវបានឯកភាពគ្នាហើយឬនៅ? ជាក់ស្ដែងទីតាំងហ្នឹងមិនទាន់ឯកភាពគ្នាទេ គឺយើងសុំឱ្យរក្សាភាពដើមសិន»។
លោកថា បើកម្ពុជាអនុញ្ញាតឱ្យភាគីថៃបោះស្លាកសញ្ញាមីន ឬធ្វើសកម្មភាពអ្វីនៅលើតំបន់មិនទាន់ឯកភាពគ្នានេះ គឺវាស្មើនឹងកម្ពុជាទទួលស្គាល់ដីតំបន់នោះជារបស់ប្រទេសថៃ។ ដូច្នេះកម្ពុជាក៏ស្នើទៅវិញដើម្បីឱ្យរក្សាទីតាំងនោះឱ្យនៅដដែល ដោយយោងទៅតាមអនុស្សរណៈយោគយល់គ្នាកាលពីឆ្នាំ ២០០០ ហើយរង់ចាំគណៈកម្មការបច្ចេកទេសកិច្ចការព្រំដែនប្រទេសទាំង ២ ឯកភាពគ្នា។
ទោះជាយ៉ាងណាលោក សេង ធារិន ប្រាប់ថាក្នុងអំឡុងពេលចុះទៅរុះរើស្លាកសញ្ញាមីននេះមិនមានភាពតានតឹង ឬបង្កទំនាស់ជាមួយភាគីថៃទេ។ បន្ទាប់ពីដោះរួចរាល់ មន្ត្រីយោធាកម្ពុជានៅតែបន្តឃ្លាំមើលគ្រប់ពេលវេលា ដើម្បីកុំឱ្យភាគីថៃឆ្លៀតឱកាសដើរបោះស្លាកសញ្ញាទាំងនេះម្ដងទៀត។
អភិបាលខេត្តបន្ទាយមានជ័យលោក អ៊ុំ រាត្រី ពីម្សិលមិញបានបដិសេធធ្វើអត្ថាធិប្បាយជុំវិញករណីនេះ ដោយលោកអះអាងថា កំពុងជាប់រវល់ប្រជុំមិនអាចនិយាយទូរស័ព្ទបានទេ។
តំណាងមជ្ឈមណ្ឌលសកម្មភាពកម្ចាត់មីនថៃ TMAC ពីម្សិលមិញមិនទាន់អាចស្វែងរកប្រភពទាក់ទង សុំការបញ្ជាក់ករណីនេះបានទេ។
រីឯតំណាងស្ថានទូតប្រទេសថៃប្រចាំកម្ពុជាបានឱ្យដឹងតាមរយៈសារអេឡិចត្រូនិកពីម្សិលមិញថា មន្ត្រីជំនាញនៃអាជ្ញាធរថៃកំពុងស្រាវជ្រាវ និងស៊ើបអង្កេតឱ្យបានដឹងការពិតសិន ដើម្បីចៀសវាងការយល់ច្រឡំទៅលើទំនាក់ទំនងនៃប្រទេសទាំង ២។
តំណាងស្ថានទូតថៃបញ្ជាក់ថា៖ «ខ្ញុំគិតថាយើងគួរតែរង់ចាំការស្រាវជ្រាវរកព័ត៌មានច្បាស់ការសិនទៅ ហើយកុំទាន់តក់ក្រហល់បូកសរុប ព័ត៌មានផ្ដេសផ្ដាស ឬធ្វើការសន្និដ្ឋានណាមួយដែលអាចធ្វើឱ្យមានការយល់ច្រឡំទំនាក់ទំនងរវាងកម្ពុជា និងថៃ»។
បើតាមលោក សេង ធារិន លោក និងអាជ្ញាធរពាក់ព័ន្ធបានជូនដំណឹងទៅអាជ្ញាធរថៃប្រញាប់រុះរើស្លាកសញ្ញាដោះមីនឱ្យអស់ត្រឹមថ្ងៃទី ៩ ខែធ្នូ។ ប៉ុន្ដែមិនទាន់មានការឆ្លើយតប ឬជូនដំណឹងអ្វីមកភាគីកម្ពុជាវិញទេ ទើបនៅល្ងាចថ្ងៃទី ១២ ខែធ្នូ កម្ពុជាបានសម្រេចចុះទៅរុះរើចេញដោយផ្ទាល់។
លោក វ៉ា គឹមហុង ប្រធានអាជ្ញាធរជាតិទទួលបន្ទុកកិច្ចការព្រំដែនថ្លែងពីម្សិលមិញថា លោកមិនទាន់បានទទួលដំណឹងនេះនៅឡើយ ដោយលោកអះអាងថា លោកនឹងចាត់មន្ត្រីជំនាញចុះស្រាវជ្រាវឱ្យបានច្បាស់លាស់។
លោកបានបញ្ជាក់ថា៖ «គឺរង់ចាំមើលខ្ញុំបានទទួលរបាយការណ៍ពីមន្ត្រីអាជ្ញាធរនៅមូលដ្ឋានសិន។ ក្រោយមកទៀតទើបយើងចាត់មន្ត្រីជំនាញយើងចុះទៅស្រាវជ្រាវឱ្យច្បាស់លាស់ ព្រោះខ្ញុំចាំមិនច្បាស់ថា នៅចន្លោះបង្គោលព្រំដែនលេខ ៣២-៣៣ ហ្នឹង យើងបានឯកភាពគ្នា ឬនៅទេ គឺយើងនឹងស្រាវជ្រាវសិន»៕
