.jpg)
ជនបរទេសនៅពេលចូលមកកម្ពុជាកន្លងមក។ រូបថត អគ្គនាយកដ្ឋានអន្តោប្រវេសន៍
ភ្នំពេញៈ រដ្ឋាភិបាលកម្ពុជាបានសម្រេចអនុញ្ញាតឱ្យភ្ញៀវទេសចរបរទេសដែលបានមកដល់កម្ពុជា ក្រោយថ្ងៃទី ១ ខែ មករា ឆ្នាំ ២០២០ ដែលជាអ្នកកាន់ទិដ្ឋាការទេសចរណ៍ (Visa T) ហើយលើសកំណត់អាចបន្តស្នាក់នៅតទៅទៀតបានរហូតដល់អាចមានលទ្ធភាពត្រឡប់ទៅប្រទេសខ្លួនវិញបានដោយមិនមានការផាកពិន័យឡើយ។ នេះបើតាមលិខិតរបស់ក្រសួងការបរទេស និងសហប្រតិបត្តិការអន្តរជាតិកម្ពុជាដែលចេញផ្សាយនៅថ្ងៃទី ៣ ខែមេសា ឆ្នាំ ២០២០។
លិខិតរបស់ក្រសួងការបរទេសបញ្ជាក់ថា៖ «សូមជូនដំណឹងដល់ស្ថានបេសកកម្មការទូត និងកុងស៊ុលនៅកម្ពុជាទាំងអស់ឱ្យបានជ្រាបថា ដោយសារតែការរាតត្បាត COVID-19 ធ្វើឱ្យអ្នកទេសចរដែលមកលេងកម្ពុជា ក្រោយថ្ងៃទី ១ ខែមករា ឆ្នាំ ២០២០ មិនអាចធ្វើមាតុភូមិនិវត្តន៍ទៅវិញបានឡើយព្រោះគ្មានជើងហោះហើរ»។
លិខិតដដែលបញ្ជាក់ថា៖ «រាជរដ្ឋាភិបាលកម្ពុជាបានសម្រេចចិត្តផ្តល់ការពន្យារពេលដោយស្វ័យប្រវត្តិចំពោះទិដ្ឋាការប្រភេទទេសចរណ៍ (Visa T) ដល់ជនបរទេសទាំងនោះចាប់ពីថ្ងៃទី ៣ ខែមេសា ឆ្នាំ ២០២០ និងលើកលែងការផាកពិន័យចំពាះការស្នាក់នៅលើសកំណត់រហូតដល់ពួកគេអាចវិលត្រទ្បប់ទៅប្រទេសខ្លួនវិញ»។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍បានថ្លែងកាលពីថ្ងៃអាទិត្យម្សិលមិញថា អ្នកដែលចូលមកក្រោយថ្ងៃទី ១ ខែ មករា ឆ្នាំ ២០២០ គឺអាចបន្តស្នាក់នៅរហូតដល់ពួកគេអាចមានលទ្ធភាពចាកចេញពីកម្ពុជា។
លោកបានបញ្ជាក់ថា៖ «ដោយឡែកចំពោះជនបរទេសដែលចូលមកកម្ពុជាដោយខុសច្បាប់យើងនឹងអនុវត្ដតាមនីតិវិធីច្បាប់អន្តោប្រវេសន៍ដដែល។ ដូចជាជនបរទេសស្នាក់នៅលើសទិដ្ឋការ និងមិនមានលិខិតឆ្លងដែនអីជាដើមនេះ គឺយើងត្រូវចាប់បញ្ជូនចេញហើយ ព្រោះជាការខុសច្បាប់»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានអបអរសាទរជំនួសមុខឱ្យភ្ញៀវទេសចរបរទេសដែលនៅសេសសល់ក្នុងកម្ពុជា តាមរយៈការអនុវត្ដវិធានការថ្មីរបស់រាជរដ្ឋាភិបាលចំពោះការពន្យារពេលទិដ្ឋាការដល់ពួកគាត់បែបនេះ។
លោកស្រីថ្លែងកាលពីម្សិលមិញថា៖ «ភ្ញៀវទេសចរបរទេសខ្លះ គាត់មិនទាន់ចេញផុត ដូច្នេះតម្រូវឱ្យពួកគាត់ស្នាក់នៅប្រទេសយើងសិន។ ខណៈពេលដែលពួកគាត់កំពុងរាំងស្ទះនៅកម្ពុជា ពួកគាត់ក៏កំពុងមានការព្រួយបារម្ភខ្លាំងមែនទែនចំពោះការធ្វើដំណើរ និងការស្នាក់នៅរបស់ខ្លួននៅមុនពេលរាជរដ្ឋាភិបាលចេញសេចក្ដីប្រកាសពីការអាចឱ្យពួកគាត់បន្តសា្នក់នៅកម្ពុជាបានដោយមិនមានការផាកពិន័យនេះ»។
លោកស្រីបញ្ជាក់ថា ពួកគាត់កាលពីដំបូងមិនដឹងគិតយ៉ាងណានោះទេ ឥឡូវនេះពួកគាត់សប្បាយចិត្ដមែនទែននៅពេលទទួលបានការពន្យារទិដ្ឋាការនេះ។
លោកស្រី ស៊ីវលីន លើកឡើងថាតាមរយៈកាយវិការ និងសន្ដានចិត្ដដ៏ល្អរបស់កម្ពុជានេះនឹងបង្ហាញទៅកាន់ភ្ញៀវទេសចរដែលកំពុងជាប់ស្ទះនៅក្នុងប្រទេសកម្ពុជា ដោយសារតែគ្មានជើងហោះហើរឲ្យអាចយល់ពីទឹកចិត្ដរបស់រាជរដ្ឋាភិបាលក៏ដូចជាប្រជាជនកម្ពុជាបន្ថែមទៀត និងអាចត្រឡប់មកលេងកម្ពុជានាពេលក្រោយៗទៀត៕
