ភ្នំពេញៈ កម្ពុជាសង្ឃឹមថា សហរដ្ឋអាមេរិកនឹងវាយតម្លៃកម្ពុជាល្អជាងឆ្នាំមុន ស្តីពីការប្រយុទ្ធប្រឆាំងនឹងអំពើជួញដូរមនុស្ស ដោយសារកម្ពុជាបានធ្វើការងារជាច្រើនលើសពីអនុសាសន៍ ដែលសហរដ្ឋអាមេរិកបានផ្ដល់។ នេះបើតាមការថ្លែងរបស់លោកស្រី ជូ ប៊ុនអេង។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានថ្លែងបែបនេះ ប្រាប់ ភ្នំពេញ ប៉ុស្តិ៍ ពីម្សិលមិញ បន្ទាប់ពីលោកស្រីបានជួបប្រជុំជាមួយឯកអគ្គរដ្ឋទូតសហរដ្ឋអាមេរិកលោក Patrick Murphy នៅក្រសួងមហាផ្ទៃ ដោយបានពិភាក្សាអំពី «វឌ្ឍនភាពនៃការងារប្រយុទ្ធប្រឆាំងអំពើជួញដូរមនុស្ស ការប្រឈម និងដំណោះស្រាយ» កាលពីថ្ងៃទី ២២ មករា។
លោកស្រីថ្លែងថា៖ «យើងបានធ្វើការងារច្រើនលើសពីអ្វីដែលសហរដ្ឋបានផ្ដល់អនុសាសន៍ថែមទៀត។ យើងគ្រាន់តែសង្ឃឹមថា អ្វីដែលយើងបានខិតខំប្រឹងប្រែងនេះនឹងផ្ដល់លទ្ធផលល្អប្រសើរជាងអ្វីដែលយើងបានទទួលពីមុនមក។ យើងពិតជាបានប្រឹងប្រែងគ្រាន់តែថា អ្វីដែលអ្នកវាយតម្លៃចង់បានយើងមិនដឹងថាវាចំចំណុចដែលគាត់ចង់បានហើយឬនៅ។ ធម្មតាគេដាក់ពិន្ទុគេមានលក្ខខណ្ឌរបស់គេ»។
ប្រទេសកម្ពុជាត្រូវបានសហរដ្ឋអាមេរិកដាក់ក្នុងចំណាត់ថ្នាក់ទី ២ នៃបញ្ជីឃ្លាំមើលអស់រយៈពេល ២ ឆ្នាំគឺឆ្នាំ ២០១៩ និងឆ្នាំ ២០២០។ ក្រសួងការបរទេសអាមេរិកបញ្ជាក់ថា ចំណាត់ថ្នាក់នេះបង្ហាញថា រដ្ឋាភិបាលកម្ពុជាមិនបានឆ្លើយតបទៅនឹងស្តង់ដាអប្បបរមានៃការលុបបំបាត់អំពើជួញដូរមនុស្ស ប៉ុន្តែបានប្រឹងប្រែងធ្វើកិច្ចការនេះជាច្រើន ដូចជាការផ្តន្ទាទោសជនល្មើស ការបង្កើតផែនការសកម្មភាព ៥ ឆ្នាំ និងការបង្កើត និងប្រើប្រាស់បច្ចេកវិទ្យាក្នុងការកំណត់ជនរងគ្រោះ និងប្រមូលព័ត៌មាន។
ប៉ុន្តែលោកស្រី ប៊ុនអេង បញ្ជាក់ថា៖ «យើងបានធ្វើកិច្ចការមួយចំនួនធំហើយ ដូចជាការនៅក្នុងវិស័យយុត្តិធម៌ កម្ពុជាបានបង្កើនល្បឿនការផ្ដន្ទាទោស។ ចំពោះការអនុវត្តច្បាប់វិញ ទោះបីមានកូវីដ ១៩ ក៏កម្ពុជានៅតែបន្តបង្ក្រាប ស៊ើបអង្កេតឥតឈប់ឈរ។ ការជួយជនរងគ្រោះក៏ដូចគ្នាដែរ គឺជនរងគ្រោះមកវិញកាន់តែច្រើន មិនមែនរងគ្រោះតែមួយមុខសញ្ញាទេគឺគាត់រងគ្រោះដោយសារអត់ការងារធ្វើផង ត្រូវគេបណ្ដេញចេញផងត្រូវបានគេឃាត់ គេចាប់ គេពិន័យ។ គឺមានច្រើនណាស់ដែលយើងបានធ្វើ»។
បើតាមលោកស្រី ជូ ប៊ុនអេង សហរដ្ឋអាមេរិកបានផ្ដល់អនុសាសន៍រហូតដល់ទៅ ១៧ ចំណុចសម្រាប់ឱ្យកម្ពុជាអនុវត្ត ប៉ុន្តែអនុសាសន៍ទាំង ១៧ នោះអាចបង្រួមមកនៅត្រឹមតែ ៥ ធំៗ ហើយកម្ពុជាបានប្រឹងប្រែងលើសពីចំណុចទាំង ៥ នោះ។
លោកស្រី ជូ ប៊ុនអេង បានថ្លែងថា៖ «យើងក៏កំពុងស្វែងយល់ថាតើគាត់ចង់បានអ្វីឱ្យប្រាកដ។ អ៊ីចឹង ឆ្លងតាមការពិភាក្សា ខ្ញុំគិតថា យើងអាចយល់ពីគ្នាបានច្រើន ហើយគ្រាន់តែដូចឯកឧត្តមឯកអគ្គរាជទូតគាត់ថា ខាងស្ថានទូត ឬអ្នកធ្វើការក្នុងប្រទេសយល់ហើយអំពីបញ្ហា និងសកម្មភាពដែលរដ្ឋាភិបាលកម្ពុជាបានខិតខំ»។
លោកស្រីបានបញ្ជាក់ថា៖ «ប៉ុន្តែគាត់ (ឯកអគ្គរដ្ឋទូត) នៅតែមិនទាន់ហ៊ានអះអាងអ្វីទេ ព្រោះអ្នកដែលវាយតម្លៃគាត់នៅវ៉ាស៊ីនតោន»។
ក្នុងឆ្នាំ ២០២០ កន្លងទៅកម្ពុជាបានប្រឹងប្រែងជាច្រើនដើម្បីទប់ស្កាត់អំពើជួញដូរមនុស្ស ទោះបីគម្រោងថវិកាជាតិត្រូវបានបង្វែរទៅលើការយកចិត្តទុកដាក់លើប្រជាពលរដ្ឋដែលបាត់បង់ការងារ ប្រាក់ចំណូល ព្រមទាំងពលរដ្ឋទេសន្តរប្រវេសន៍វិលត្រឡប់ពីក្រៅប្រទេសជាង ១០ ម៉ឺននាក់ដោយអ្នកខ្លះនាំមកជាមួយនូវជំងឺកូវីដ១៩ក៏ដោយ។ ក្រសួងនានាក៏បានដាក់ចេញវិធានការពាក់ព័ន្ធនានាដើម្បីកុំឱ្យមានការធ្វើចំណាកស្រុកដែលប្រឈមនឹងការជួញដូរ។
កាលពីថ្ងៃចន្ទ ទី ២៥ ខែមករា ម្សិលមិញ អគ្គស្នងការដ្ឋាននគរបាលជាតិបានចេញផ្សាយព័ត៌មានអំពីកិច្ចប្រជុំកាលពីថ្ងៃ ២២ មករា ដោយបានស្រង់សម្ដីលោក Patrick Murphy ដែលបាននិយាយថា លោកមានសេចក្តីសោមនស្សរីករាយក្នុងការស្គាល់គ្នា ឱ្យបានកាន់តែប្រសើរ និងបង្កើនកិច្ចសន្ទនា និងពិភាក្សាដើម្បីឆ្លុះបញ្ចាំងអំពីដំណើរការនៃការប្រយុទ្ធប្រឆាំងនឹងអំពើជួញដូរមនុស្ស៕
វីដេអូ៖