ភ្នំពេញៈ លោក អាន សុខខឿន ឯកអគ្គរាជទូត និងជាតំណាងអចិន្រៃ្តយ៍កម្ពុជាប្រចាំទីក្រុងហ្សឺណែវបានធ្វើបទអន្តរាគមន៍ក្នុងសម័យប្រជុំលើកទី៤៦ នៃក្រុមប្រឹក្សាសិទ្ធិមនុស្សក្នុងកិច្ចពិភាក្សាទូទៅលើរបៀបវារៈទី១០ ស្តីពីកិច្ចសហប្រតិបត្តិការបចេ្ចកទេសកាលពីថ្ងៃទី ២៣ ខែ មីនា ឆ្នាំ ២០២១ នាទីក្រុងហ្សឺណែវដោយបានសម្ដែងការខកចិត្តយ៉ាងខ្លាំងទៅនឹងសេចក្ដីថ្លែងការណ៍របស់គណៈប្រតិភូហ្វាំងឡង់ដែលបានវាយតម្លៃអំពីស្ថានភាពសិទ្ធិមនុស្សនៅកម្ពុជាបន្តធ្លាក់ចុះ។
លោក អាន សុខខឿន បានថ្លែងថា៖ «យើងខ្ញុំកត់សម្គាល់ដោយការខកចិត្តយ៉ាងខ្លាំង ចំពោះគណៈប្រតិភូហ្វាំងឡង់ដែលបានបដិសេធមិនប្រកាន់យកវិធីសាស្ត្រប្រកបដោយភាពសត្យានុម័ត មិនជ្រើសរើសតែមួយជ្រុង និងមិនធ្វើនយោបាយូបនីយកម្ម នៅពេលវាយតម្លៃស្ថានភាពសិទ្ធិមនុស្សនៅកម្ពុជា»។
ប្រតិភូក្រុមប្រឹក្សាហ្វាំងឡង់លោកស្រី កើស្ទិ គុពិ (Kirsti Kauppi) ដែលបានថ្លែងក្នុងកិច្ចប្រជុំក្រុមប្រឹក្សាសិទ្ធិមនុស្សលើកទី៤៦ កាលពីថ្ងៃទី ២២ ខែ មីនា ឆ្នាំ ២០២១ កន្លងមកដោយចោទថា ស្ថានភាពសិទ្ធិមនុស្សនៅកម្ពុជានៅតែបន្តធ្លាក់ចុះ និងបានអំពាវនាវឱ្យរដ្ឋាភិបាលកម្ពុជាត្រូវសហការជាមួយនឹងការិយាល័យឧត្តមស្នងការទទួលបន្ទុកសិទិ្ធមនុស្ស (OHCHR)។
លោកស្រីបានថ្លែងថា៖ «ស្ថានភាពសិទ្ធិមនុស្សនៅកម្ពុជា នៅតែបន្តធ្លាក់ចុះ។ យើងសូមអំពាវនាវឱ្យរដ្ឋាភិបាលនៃប្រទេសកម្ពុជា សហការជាមួយការិយាល័យ OHCHR ដើម្បីធានាឱ្យបាននូវការគោរពសិទិ្ធនយោបាយ និងសិទិ្ធជនស៊ីវិលទាំងអស់ ក្នុងពេលដែលច្បាប់ស្តីពីវិធានការនានាដើម្បីទប់ស្កាត់ការរីករាលដាលនៃជំងឺកូវីដ ១៩ និងជំងឺដទៃផ្សេងទៀតត្រូវបានបញ្ចប់ ដើម្បីធ្វើជាគំរូដ៏ល្អនៃកិច្ចសហប្រតិបត្តិការនេះ»។
ឆ្លើយតបទៅនឹងការលើកឡើងរបស់លោកស្រី គណៈប្រតិភូហ្វាំងឡង់នេះ លោក អាន សុខខឿន បានថ្លែងថា៖ «វាជារឿងគួរឱ្យអស់សំណើចដែលប្រទេសហ្វាំងឡង់ទើបប្រកាសបិទប្រទេស និងដាក់ក្នុងភាពអាសន្នដែលធ្វើឱ្យមានការរឹតត្បិត សេរីភាពមូលដ្ឋានរបស់ប្រជាជនខ្លួននាពេលថ្មីៗនេះ តែបែរជាប្រតិភូនៃប្រទេសនេះមកទាមទារឱ្យកម្ពុជាគោរពសិទ្ធិ ពលរដ្ឋ និងនយោបាយជាងសិទ្ធិដទៃទៀត»។ មួយវិញទៀត ការអំពាវនាវឱ្យកម្ពុជាសហការជាមួយការិយាល័យឧត្តមស្នងការ សិទ្ធិមនុស្សបានបង្ហាញឱ្យឃើញយ៉ាងច្បាស់នូវការមិនអើពើរបស់ហ្វាំងឡង់ចំពោះការពិតនៅកម្ពុជា។
លោក អាន សុខខឿន បានថ្លែងដោយអះអាងថា ការិយាល័យ ឧត្តមស្នងការសិទ្ធិមនុស្សប្រចាំកម្ពុជាមានវត្តមានជិត ៣ ទសវត្សរ៍ហើយចាប់តាំងពីឆ្នាំ ១៩៩៣ មក ដែលបច្ចុប្បន្ននេះក្លាយជាការិយាល័យវ័យចំណាស់ជាងគេបំផុតនៅលើពិភពលោក ដែលនេះជាសក្ខីភាពមួយឆ្លុះបញ្ចាំងអំពីកិច្ចសហប្រតិបត្តិការដោយបើកចំហ និងស្ថាបនារបស់កម្ពុជាជាមួយការិយាល័យឧត្តមស្នងការសិទ្ធិមនុស្សអង្គការសហប្រជាជាតិ។
កាលពីខែធ្នូ ឆ្នាំ ២០២០ រាជរដ្ឋាភិបាលកម្ពុជាបានបន្តសុពលភាពដោយបានចុះអនុស្សរណៈយោគយល់ជាមួយការិយាល័យឧត្តមស្នងការសិទ្ធិមនុស្សអង្គការសហប្រជាជាតិដែលប្រការនេះស្ដែងឱ្យឃើញយ៉ាងច្បាស់នូវការបេ្ដជ្ញាចិត្តឥតងាករេរបស់កម្ពុជា ក្នុងការលើកកម្ពស់សិទ្ធិមនុស្សគ្រប់ប្រភេទតាមរយៈកម្មវិធីកិច្ចសហប្រតិបត្តិការបច្ចេកទេស។
ចំពោះច្បាប់ស្តីពីវិធានការទប់ស្កាត់ការឆ្លងរាលដាលនៃមេរោគកូវីដ១៩ ដែលត្រូវបានអនុម័តនាពេលថ្មីៗនេះ ដោយសភាទាំង ២ ថ្នាក់របស់កម្ពុជា ប្រកាន់ខ្ជាប់នូវគោលការណ៍នីត្យានុកូលភាព ភាពចាំបាច់ និងសមាមាត្រភាព។
លោកថ្លែងថា៖ «ច្បាប់នេះពុំមានគោលបំណងដាក់ទោសទណ្ឌលើបុគ្គលណាម្នាក់នោះទេ ផ្ទុយទៅវិញច្បាប់នេះមានគោលបំណងការពារអាយុជីវិត និងលើកទឹកចិត្តពលរដ្ឋគ្រប់រូបឱ្យចូលរួមប្រកបដោយការទទួលខុសត្រូវខ្ពស់ក្នុងកិច្ចប្រឹងប្រែងធានាសុវត្ថិភាពសុខភាពសាធារណៈ និងអាយុជីវិតដ៏មានតម្លៃរបស់ពលរដ្ឋ»។
លោកថា៖ «មានតែពលរដ្ឋកម្ពុជាប៉ុណ្ណោះដែលមានសិទ្ធិខ្ពស់បំផុតក្នុងការវាយតម្លៃពីស្ថានភាពលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។ សិទ្ធិអំណាចត្រូវបានឆ្លុះបញ្ជាំងតាមរយៈលទ្ធផលនៃការបោះឆ្នោតដែលបុគ្គលគ្រប់រូបត្រូវតែគោរពតាម»៕