ភ្នំពេញៈ កម្ពុជាបានស្នើដល់បណ្ដាប្រទេសក្នុងមហាអនុតំបន់ទន្លេមេគង្គ និងអង្គការ UNODC ស្វែងរកដំណោះស្រាយឆ្លើយតបនឹងការគំរាមកំហែងដោយសារគ្រឿងញៀនក្នុងអំឡុងពេលដែលសកលលោកកំពុងមានវិបត្ដិជំងឺកូវីដ១៩ ហើយក្រុមឧក្រិដ្ឋជនអន្តរជាតិដែលមានអង្គការចាត់តាំងបានបង្កើនការឃុបឃិតជាមួយឧក្រិដ្ឋជនគ្រឿងញៀនក្នុងស្រុកធ្វើសកម្មភាពល្មើសច្បាប់កាន់តែសកម្ម និងខ្លាំងក្លាជាងមុន។
លោក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើសំណើនេះតាមរយៈសេចក្ដីថ្លែងការណ៍នៅក្នុងពិធីបើកកិច្ចប្រជុំតាមប្រព័ន្ធអនឡាញជាមួយមន្ត្រីសម្របសម្រួលប្រទេសហត្ថលេខីអនុស្សរណៈនៃការយោគយល់គ្នា (MOU) ស្តីពីការត្រួតពិនិត្យគ្រឿងញៀនក្នុងមហាអនុតំបន់ទន្លេមេគង្គ។ ក្នុងនោះមានប្រទេសកម្ពុជា ចិន ភូមា ឡាវ ថៃ វៀតណាម និងអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) កាលពីថ្ងៃពុធ ទី ២៧ ខែឧសភា នេះ។
យោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនដែលបានចេញផ្សាយ និងសេចក្ដីថ្លែងរបស់លោក មាស វិរិទ្ធ ក្នុងកិច្ចប្រជុំកាលពីម្សិលមិញថា កម្ពុជាបានចូលរួមយ៉ាងសកម្មជាមួយប្រទេសអនុតំបន់ និងសកលលោកក្នុងការខិតខំប្រឹងប្រែងបង្ការទប់ស្កាត់ដោយយកចិត្តទុកដាក់ និងទទួលខុសត្រូវខ្ពស់នូវយុទ្ធសាស្ត្រពហុវិស័យស្តីពីការងារត្រួតពិនិត្យគ្រឿងញៀន និងបន្តអនុវត្តយ៉ាងសកម្មនូវយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទូទាំងប្រទេស។
លោក មាស វិរិទ្ធ បានថ្លែងថា៖ «ដោយសារបញ្ហាជំងឺកូវីដ១៩ យើងពុំទាន់អនុវត្តបាននូវផែនការសកម្មភាពត្រួតពិនិត្យគ្រឿងញៀនអនុតំបន់ទី ១១ ក្រោមការជួយឧបត្ថម្ភរបស់អង្គការ UNODC ឡើយ និងសុំស្នើអង្គប្រជុំរបស់យើងជជែកពិភាក្សាគ្នារកឲ្យឃើញនូវដំណោះស្រាយសមស្របណាមួយដើម្បីអនុវត្តផែនការសកម្មភាពអនុតំបន់នេះឈានទៅឆ្លើយតបឲ្យបានទៅនឹងការគំរាមកំហែងដោយគ្រឿងញៀននាពេលបច្ចុប្បន្ននេះ»។
លោកបន្តថា៖ «ស្របពេលដែលយើងមានបញ្ហាជំងឺកូវីដ១៩ កិច្ចសហប្រតិបត្តិការគ្នាទាំងក្នុងតំបន់ និងលើសកលលោកមានការធ្លាក់ចុះបានធ្វើឲ្យក្រុមឧក្រិដ្ឋជនអន្តរជាតិ ដែលមានអង្គការចាត់តាំងបានបង្កើនការឃុបឃិតជាមួយពួកឧក្រិដ្ឋជនគ្រឿងញៀនក្នុងស្រុក ធ្វើសកម្មភាពល្មើសច្បាប់កាន់តែសកម្ម និងខ្លាំងក្លាជាងមុន។ សកម្មភាពនេះបាននិងកំពុងក្លាយជាឧបសគ្គរារាំងក្នុងការអនុវត្តផែនការអនុតំបន់ដែលរៀបចំដោយអង្គការ UNODC។
តាមរបាយការណ៍ដដែលនេះបង្ហាញថាក្នុងឆ្នាំ ២០១៩ ប្រទេសកម្ពុជាបង្ក្រាបបទល្មើសគ្រឿងញៀនបានជិត ១ ម៉ឺនករណី ឃាត់ខ្លួនជនសង្ស័យបានជាង ២ ម៉ឺននាក់ចាប់យកគ្រឿងញៀនគ្រប់ប្រភេទបាន ៧៥០ គីឡូក្រាមផងដែរ។
អាជ្ញាធរជាតិប្រយុទ្ធប្រឆាំងគ្រឿងញៀន ឲ្យដឹងទៀតថា ក្នុងយុទ្ធនាការប្រឆាំងគ្រឿងញៀនខុសច្បាប់ អនុវត្តច្បាប់ប្រចាំថ្ងៃទី ២៦ ខែឧសភា ឆ្នាំ ២០២០ បង្ក្រាប ការជួញដូរ ការរក្សាទុក ការដឹកជញ្ជូន ការដាំដុះ ការផលិតកែច្នៃ ការចាត់ចែងផ្ដល់ទីតាំង និងប្រើប្រាស់បានចំនួន ២១ ករណី ឃាត់ខ្លួនជនសង្ស័យបាន ៣៩ នាក់ ។ ចំណែកលទ្ធផលអនុវត្តន៍ច្បាប់ពីការបង្គ្រាបចាប់ពីថ្ងៃទី ១ ខែមករា ដល់ថ្ងៃទី ២៦ ខែឧសភា ឆ្នាំ ២០២០ បង្ក្រាបបានជាង ៤ ពាន់ករណីឃាត់មនុស្សជិត ៩ ពាន់នាក់មានស្រី និងប្រុស មាន ៧ សញ្ជាតិ និងរឹបអូសសារធាតុញៀនគ្រប់ប្រភេទសរុប ២៥៧ គីឡូក្រាម៕