ភ្នំពេញៈ កម្ពុជាស្នើឲ្យធនាគារអភិវឌ្ឍន៍អាស៊ី (ADB) ពិចារណាជួយដល់ជនងាយរងគ្រោះ ជាពិសេសជនចាស់ជរា ជនមានពិការភាព និងកុមារកំព្រា ខណៈ ធនាគារមួយ នេះកំពុងសិក្សាលើវិស័យកិច្ចគាំពារសង្គមនៅកម្ពុជា មុនប្រកាសផ្ដល់ជំនួយបច្ចេកទេសលើការអនុវត្តគម្រោង «មូលនិធិអភិវឌ្ឍន៍កិច្ចគាំពារសង្គម»។
ការសិក្សារបស់ ADB ចាប់ផ្តើមពីឆ្នាំ ២០១៩ រហូតដល់ឆ្នាំ ២០២១ ដែលក្នុងជំហានដំបូងធ្វើឡើងជាលក្ខណៈបច្ចេកទេស ក្នុងការបង្កើតជាឯកសារយុទ្ធសាស្ត្រសម្រាប់កម្ពុជា ប៉ុន្តែ ADB មិនទាន់អាចវាយតម្លៃជាទឹកប្រាក់បាននៅឡើយទេ ចំពោះគម្រោងនេះ។ នេះបើតាមការអះអាងរបស់ក្រសួងការងារបណ្ដុះបណ្ដាលវិជ្ជាជីវៈ ក្រោយចប់ជំនួបពិភាក្សាការងាររវាងលោក អុិត សំហេង រដ្ឋមន្ត្រីក្រសួងនេះជាមួយលោកស្រី Sri Wening Handayni ប្រធានក្រុមប្រឹក្សាអ្នកជំនាញផ្នែកអភិវឌ្ឍន៍សង្គមស្ដីពីជំនួយបច្ចេកទេសផ្នែកគាំពារសង្គម របស់ធនាគារ ADB នៅទីស្ដីការក្រសួង កាលពីម្សិលមិញ។
ជាមួយនឹងជំនួបនេះ លោក អុិត សំហេង បានស្នើឱ្យមានការសិក្សាលើការគាំពារសិទ្ធិ និងការរស់នៅរបស់ជនងាយរងគ្រោះ ជនចាស់ជរា ជនមានពិការភាព កុមារកំព្រាជាដើម ខណៈលោកក៏ស្នើទៅកាន់លោកស្រីតំណាង ADB ឱ្យមានការគិតគូរលើនិរន្តរភាពហិរញ្ញវត្ថុនៃកិច្ចគាំពារសង្គមនេះផងដែរ។
លោកបានបញ្ជាក់ក្នុងទំព័រហ្វេសប៊ុករបស់លោកថា៖ «(ខ្ញុំ) បានចាត់ក្រុមការងាររបស់បេឡាជាតិរបបសន្តិសុខសង្គម និងអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ដែលធ្វើការងារលើវិស័យទាំងនោះស្រាប់ ឱ្យចូលរួមសហការជាមួយក្រុមការងាររបស់ធនាគារ ADB សំដៅធ្វើយ៉ាងណាឱ្យការងារនេះទទួលបានលទ្ធផលល្អ»។
លោកស្រី Sri Wening Handayni បានលើកឡើងថា លោកស្រីបានស្នើសុំយោបល់មួយចំនួនពីកម្ពុជា ដើម្បីជាគន្លឹះក្នុងការអនុវត្តការសិក្សាលើគម្រោង «មូលនិធិអភិវឌ្ឍន៍កិច្ចគាំពារសង្គម» ព្រោះវា ជាគម្រោងអភិវឌ្ឍន៍ធំមួយទៀតរបស់ ADB ដើម្បីជួយអភិវឌ្ឍប្រទេសមួយចំនួនលើវិស័យការងារ បណ្ដុះបណ្ដាលវិជ្ជាជីវៈ និងការគាំពារសង្គម។
លោកស្រី បន្តថា មូលនិធិអភិវឌ្ឍន៍កិច្ចគាំពារសង្គមនេះគឺជាគម្រោងអភិវឌ្ឍន៍ថ្មីមួយលើវិស័យការងារ បណ្ដុះបណ្ដាលវិជ្ជាជីវៈ និងការគាំពារសង្គមដែល ADB បាន និងកំពុងសិក្សានៅប្រទេសចំនួន ៦ ក្នុងនោះរួមមាន ឥណ្ឌូនេស៊ី មីយ៉ាន់ម៉ា ទីម័រខាងកើត កម្ពុជា អ៊ូសបេគីស្ថាន និងអាស៊ែបៃហ្សង់។
លោកស្រី បានបញ្ជាក់ថា៖ «ជំនួយបច្ចេកទេសនេះត្រូវបានអនុវត្តក្នុងប្រទេសចំនួន ៣ រួមមាន ឥណ្ឌូនេស៊ី មីយ៉ាន់ម៉ា និងទីម័រខាងកើត រីឯប្រទេស៣បន្ទាប់ រួមមាន កម្ពុជា អាស៊ែបៃហ្សង់ និងអ៊ូសបេគីស្ថាន»។
បើតាមលោក ង៉ុយ រិទ្ធ អនុរដ្ឋលេខាធិការក្រសួងការងារ បានផ្តល់បទសម្ភាសដល់អ្នកកាសែតក្រោយបញ្ចប់កិច្ចពិភាក្សា បានបញ្ជាក់ថា ការសិក្សានេះ គឺដើម្បីសិក្សាពីហានិភ័យជុំវិញកិច្ចគាំពារសង្គមនៅកម្ពុជា ដោយលោកថា កន្លងទៅ កម្ពុជាបានអនុវត្តល្អលើផ្នែកមួយចំនួនរួចមកហើយនូវបេឡាជាតិរបបសន្តិសុខសង្គមដែលកម្ពុជានឹងឈានទៅអនុវត្តគោលការណ៍មួយជំហានទៀតក្នុងពេលឆាប់ៗនេះ ដែលហៅថា របបសោធននិវត្តន៍។
លោក ង៉ុយ រិទ្ធ បញ្ជាក់ថា៖ «ដើម្បីផ្តល់ជំនួយបច្ចេកទេសសព្វបែបយ៉ាងកុំឲ្យមានហានិភ័យទៅថ្ងៃក្រោយ ក្នុងការទទួលជាបទពិសោធពីកិច្ចគាំពារសង្គមនេះ។ វាប្រឈមនឹងហានិភ័យខ្ពស់ដែរក្នុងដំណាក់កាលណាមួយប្រៀបធៀបនឹងកំណើនសេដ្ឋកិច្ច និងចំណូលជាតិ ហើយបើបៀបធៀបជាមួយកំណើនពលរដ្ឋ ដែលជាដំណាក់កាលមួយនឹងជួបហានិភ័យ។ ដូច្នេះ ADB នឹងជាផ្នែកមួយ ដែលមានជំនាញឯកទេសក្នុងការសិក្សាហ្នឹង គឺគេចង់សិក្សា មុនផ្តល់ជំនួយផ្នែកបច្ចេកទេសទៅដល់មុខសញ្ញានៃកិច្ចគាំពារសង្គមហ្នឹង។ ដោយក្រោយពីធ្វើការសិក្សាហើយ គេនឹងបង្កើតជាឯកសារជំនួយស្មារតីដល់រដ្ឋាភិបាលយើងក្នុងការដាក់បញ្ចូលក្នុងផែនការសកម្មភាពផ្សេងៗក្នុងការធ្វើយ៉ាងណាឲ្យមាននិរន្តរភាព» ៕
