.jpg)
ប្រជាជនឥណ្ឌាបានលើកពាក្យស្លោកប្រឆាំង នឹងប៉ាគីស្ថាន និងបានកាន់រូបថតរបស់អ្នកបើកយន្តហោះជនជាតិឥណ្ឌាឈ្មោះ Abhinandan Varthaman ទាមទារឱ្យដោះលែងគាត់មកវិញ។ AFP
ភ្នំពេញៈ រាជរដ្ឋាភិបាលកម្ពុជា តាមរយៈក្រសួងការបរទេសបានស្នើឱ្យប្រទេសឥណ្ឌា និងប៉ាគីស្ថានរក្សាការអត់ធ្មត់ខ្ពស់បំផុត ដើម្បីចៀសវាងការប៉ះទង្គិចគ្នាដោយអាវុធបន្តទៀត ដែលនឹងនាំឲ្យមានអរិភាពក្នុងចំណោមប្រជាជននៃប្រទេសទាំង ២។ នេះបើតាមសេចក្តីថ្លែងការណ៍របស់ក្រសួងការបរទេសចុះផ្សាយកាលពីម្សិលមិញ។
តាមសេចក្តីថ្លែងការណ៍ដដែលបានឲ្យដឹងថា កម្ពុជាជឿជាក់ថាប្រទេសប៉ាគីស្ថាន និងឥណ្ឌា អាចចរចាគ្នាដើម្បីកាត់បន្ថយភាពតានតឹងនាពេលបច្ចុប្បន្ននិងស្វែងរកដំណោះស្រាយទំនាស់តាមមធ្យោបាយសន្តិវិធី។
សេចក្ដីថ្លែងការណ៍ដដែលបញ្ជាក់ថា៖ «កម្ពុជាសូមបញ្ជាក់ជាថី្មអំពីការថ្កោលទោសចំពោះការវាយប្រហារភេរវកម្ម កាលពីថ្ងៃទី ១៤ កុម្ភៈឆ្នាំ ២០១៩ នៅតំបន់ Pulwama និងការបេ្តជ្ញាចូលរួមចំណែកក្នុងកិច្ចប្រឹងប្រែងដើម្បីប្រយុទ្ធប្រឆាំងនឹងអំពើភេរវកម្មគ្រប់ទម្រង់និងគ្រប់រូបភាពទាំងអស់»។
គួរបញ្ជាក់ថា ភាពតានតឹងនេះបានផ្ទុះឡើងបន្ទាប់ពីមានការវាយប្រហារដោយបំផ្ទុះគ្រាប់បែកអត្តឃាតកាលពីពាក់កណ្តាលខែកុម្ភៈទៅលើកងសន្តិសុខឥណ្ឌាក្នុងតំបន់ការស្មៀរដែលកំពុងកាន់កាប់ដោយឥណ្ឌាបណ្តាលឲ្យមនុស្សជាង ៤០ នាក់ស្លាប់។
បន្ទាប់ពីមានអំពើភេរវកម្មនេះ មានយន្តហោះឥណ្ឌា២គ្រឿងត្រូវបានមន្ត្រីនាំពាក្យយោធាប៉ាគីស្ថានអះអាងថាត្រូវបានបាញ់ធ្លាក់កាលពីថ្ងៃពុធ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជានិងជាអ្នកវិភាគបញ្ហានយោបាយបានមើលឃើញថាប្រទេសកម្ពុជាស្រឡាញ់សន្ដិភាព ដូច្នេះក្នុងកាតព្វកិច្ចជាមិត្ដកម្ពុជាមិនអាចធ្វើអ្វីបានក្រៅពីស្នើឲ្យប្រទេសទាំង ២ រក្សាភាពអត់ធ្មត់ខ្ពស់បំផុត ដោយវិលត្រឡប់ទៅរកការចរចាវិញនោះទេ។
លោកថា៖ «រាល់ដំណោះស្រាយទាំងអស់ គ្មានអ្វីប្រសើរជាងការចរចាអង្គុយតុជាមួយគ្នាទេ។ ជម្លោះធំៗនៅលើពិភពលោក មិនដែលបញ្ចប់ទៅដោយការប្រយុទ្ធគ្នាទេ គឺមានតែការចរចា»។
លោក គិន ភា លើកឡើងថា ទោះបីជាការអំពាវនាវរបស់កម្ពុជាមានឥទ្ធិពលតិចក្ដី ក៏បានបង្ហាញពីការយកចិត្ដទុកដាក់អំពីបញ្ហានៅក្នុងតំបន់ និងការស្រឡាញ់សន្ដិភាពរបស់ព្រះរាជាណាចក្រកម្ពុជាដែរ៕
