.jpg)
ប្លង់ទីបញ្ជាការជួរមុខថ្មីនៅកោះព្រាបនៅខេត្តព្រះសីហនុ។ រូបថត គ.ជ.ស.ស
ភ្នំពេញៈ កាលពីថ្ងៃចន្ទអគ្គលេខាធិការដ្ឋានគណៈកម្មាធិការជាតិសន្តិសុខលម្ហសមុទ្រ (គ.ជ.ស.ស) បានប្រកាសពីជំហរម៉ឺងម៉ាត់របស់ខ្លួនក្នុងកិច្ចសហប្រតិបត្តិការជាមួយដៃគូទាំងអស់ដើម្បីបង្កើនសមត្ថភាពប្រតិបត្តិការរបស់ទីបញ្ជាការជួរមុខ បន្ទាប់ពីទីបញ្ជាការនេះប្ដូរទីតាំងចេញពីមូលដ្ឋាន ទ័ពរាមទៅកាន់ទីតាំងថ្មីនៅកោះព្រាបដែលមានចម្ងាយប្រហែល ៣០ គីឡូម៉ែត្រពីទីតាំងចាស់។
ការបញ្ជាក់ជំហរបែបនេះធ្វើឡើងតាមរយៈសេចក្ដីថ្លែងការណ៍មួយដែលជាការបំភ្លឺអំពីការរុះរើអគារទីបញ្ជាការចាស់ដែលជួសជុលដោយសហរដ្ឋអាមេរិកនៅមូលដ្ឋានទ័ពរាម។
សេចក្ដីថ្លែងការណ៍បញ្ជាក់ថា៖ «អគ្គលេខាធិការដ្ឋាន គ.ជ.ស.ស. នៅតែប្រកាន់ជំហរយ៉ាងម៉ឺងម៉ាត់នៅក្នុងស្មារតីនៃការរក្សា និងលើកស្ទួយកិច្ចសហប្រតិបត្តិការជិតស្និទ្ធជាមួយបណ្ដាប្រទេសជាដៃគូទាំងអស់ប្រកបដោយតម្លាភាព និងការគោរពផលប្រយោជន៍គ្នាទៅវិញទៅមក។ គ.ជ.ស.ស. នៅតែស្វាគមន៍យ៉ាងកក់ក្ដៅបំផុតចំពោះការចូលរួមពីសំណាក់ដៃគូអន្តរជាតិនានា ដើម្បីបង្កើនសមត្ថភាពផ្នែកប្រតិបត្តិការរបស់ទីបញ្ជាការជួរមុខតទៅថ្ងៃអនាគត»។
ចំពោះការប្ដូរទីតាំងទីបញ្ជាការជួរមុខទៅកោះព្រាប គ.ជ.ស.ស. បញ្ជាក់ថា ធ្វើឡើងដោយសារតែទីបញ្ជាការជួរមុខចាស់ស្ថិតនៅបណ្ដោះអាសន្នក្នុងបរិវេណមូលដ្ឋានកងទ័ពជើងទឹកដែលធ្វើឲ្យប្រសិទ្ធភាពនៃកិច្ចសហប្រតិបត្តិការរបស់ស្ថាប័នចម្រុះមានកម្រិត និងជួបការលំបាក។ ទីតាំងចាស់មិនមានកន្លែងសម្រាប់ចតនាវា និងមិនអាចពង្រីករចនាសម្ព័ន្ធទៀតបានព្រមទាំងមានការលំបាកសម្រាប់បុគ្គលិកមកពីស្ថាប័ន ស៊ីវិលនានា ក្នុងការចេញចូលក្នុងទីតាំងយោធា ដោយសារការរឹតត្បិតផ្នែកសន្តិសុខ។
ការប្ដូរទីតាំងនេះក៏ធ្វើឡើងដោយសារតែទីបញ្ជាការជួរមុខត្រូវមានទីតាំងសមស្របមួយ ប្រកបដោយឯករាជភាពក្នុងឋានៈជាស្ថាប័នជាតិ ព្រមទាំងងាយស្រួលក្នុងការចេញប្រតិបត្តិការ ការធ្វើអន្តរាគមន៍ និងការជួយសង្គ្រោះ។ ទីបញ្ជាការនេះក៏ត្រូវពង្រីក និងអភិវឌ្ឍសមត្ថភាពរបស់ខ្លួន ទាំងផ្នែកហេដ្ឋារចនាសម្ព័ន្ធ និងប្រសិទ្ធភាពនៃកិច្ចសហប្រតិបត្តិការ ដែលភាពចាំបាច់នេះមិនអាចធ្វើបានទេនៅទីតាំងចាស់។ នេះបើតាមសេចក្ដីថ្លែងការណ៍ដដែល។
គ.ជ.ស.ស. រៀបរាប់ថាទីបញ្ជាការជួរមុខគឺជាអង្គភាពប្រតិបត្តិការអនុវត្តច្បាប់ចម្រុះស្ថាប័ន។ នៅឆ្នាំ ២០១០ ទីបញ្ជាការនេះបានស្នើសុំផ្នែកតូចមួយនៃមូលដ្ឋានទ័ពសមុទ្ររាមចំណុះឲ្យកងទ័ពជើងទឹកធ្វើជាទីតាំងបណ្ដោះអាសន្ន។
ទីបញ្ជាការជួរមុខ គឺជាមជ្ឈមណ្ឌលសម្រាប់បញ្ជា គ្រប់គ្រង និងសម្របសម្រួលកិច្ចសហប្រតិបត្តិការកម្លាំងចម្រុះពាក់ព័ន្ធនឹងកិច្ចការសន្តិសុខលម្ហសមុទ្រ។ មជ្ឈមណ្ឌលនេះប្រមូលផ្ដុំមន្ត្រីជំនាញមកពីក្រសួងស្ថាប័នពាក់ព័ន្ធរួមទាំងយោធា និងនគរបាល និងធ្វើកិច្ចការពាក់ព័ន្ធនឹងសន្តិសុខលម្ហសមុទ្រ ការគ្រប់គ្រង និងវិភាគព័ត៌មានសន្តិសុខលម្ហសមុទ្រក៏ដូចជាការពារព្រំដែនទឹក។
ស្ថិតក្រោមកិច្ចសហប្រតិបត្តិការយោធាជាមួយបរទេសជាដៃគូសហរដ្ឋអាមេរិក និងអូស្ត្រាលីបានផ្ដល់ការគាំទ្រផ្នែកហេដ្ឋារចនាសម្ព័ន្ធខ្នាតតូច ការហ្វឹកហ្វឺន ដល់ទីបញ្ជាការនេះ។ ប៉ុន្តែលទ្ធផលនៃប្រតិបត្តិការនៅទីនេះមានទាំងជោគជ័យ និងលំបាក។
ចាប់តាំងពីឆ្នាំ ២០១៧ មក គ.ជ.ស.ស. បានធ្វើការសិក្សាពីគម្រោងផ្លាស់ប្ដូរទីតាំងនេះយ៉ាងល្អិតល្អន់ ព្រមទាំងបានជូនដំណឹងដល់ប្រទេសដៃគូ ជាពិសេស សហរដ្ឋអាមេរិក ដោយឈរលើស្មារតីសហប្រតិបត្តិការ។ ទោះបីជូនដំណឹងរួចហើយក្ដី គ.ជ.ស.ស. មិនដែលទទួលបានការជំទាស់ផ្លូវការណាមួយចំពោះការប្ដូរទីតាំងនេះទេ។
គ.ជ.ស.ស. បញ្ជាក់ថា ទីបញ្ជាការជួរមុខនៅកោះព្រាបមានទំហំធំ ចំនួនអគារច្រើន ប៉ុន្តែ គ.ជ.ស.ស. ព្យាយាមមិនឲ្យបាត់បង់នូវសមិទ្ធផលដែលប្រទេសដៃគូបានផ្ដល់នោះទេ។ សេចក្ដីថ្លែងការណ៍បញ្ជាក់ថា៖ «ទីតាំងថ្មីរបស់ទីបញ្ជាការជួរមុខនឹងជួយសម្រួល និងបង្កើនប្រសិទ្ធភាពប្រតិបត្តិការ ដោយមានការកសាងផែសម្រាប់ចតនាវា ផ្ដល់ភាពងាយស្រួលក្នុងការទំនាក់ទំនងជាមួយស្ថាប័នជាតិនានាដែលពាក់ព័ន្ធ ព្រមទាំងឯករាជភាពសម្រាប់ការពង្រីកហេដ្ឋរចនាសម្ព័ន្ធ និងពង្រីកកិច្ចសហប្រតិបត្តិការជាមួយដៃគូអន្តរជាតិតទៅថ្ងៃអនាគត»។
ក្នុងរយៈពេលប៉ុន្មានថ្ងៃចុងក្រោយនេះអង្គការមួយមានមូលដ្ឋាននៅសហរដ្ឋអាមេរិក និងកាសែតបរទេសជាច្រើនបានចុះផ្សាយជាបន្តបន្ទាប់ថា កម្ពុជារុះរើអគារដែលកសាងឡើងដោយសហរដ្ឋអាមេរិក ហើយថា ការពង្រីកកំពង់ផែរាមកំពុងដំណើរការដោយមានការគាំទ្រពីចិន។
ទោះយ៉ាងណាការរុះរើអគារទីបញ្ជាការជួរមុខ ក៏ដូចជាការពង្រីកកំពង់ផែរាម មិនមែនជារឿងថ្មីនោះឡើយ។ កាលពីថ្ងៃទី ១ មិថុនា លោកនាយករដ្ឋមន្ត្រី ហ៊ុន សែន បានបញ្ជាក់យ៉ាងច្បាស់អំពីការអភិវឌ្ឍកំពង់ផែនេះ នៅពេលលោកចុះពិនិត្យការអភិវឌ្ឍខេត្តព្រះសីហនុ។
លោកមានប្រសាសន៍ថា៖ «បើសិនជាមើលឃើញយើងធ្វើអាហ្នឹងបែរជាថាអាហ្នឹងចិនជាអ្នកធ្វើ ពិតហើយយើងត្រូវការនិយាយឲ្យត្រង់ យើងត្រូវការហិរញ្ញប្បទានពីចិន ដើម្បីមកធ្វើអាហ្នឹង។ ប៉ុន្តែបើសិនជាអស់លោកណាចង់ដាក់លុយ មកយើងស្វាគមន៍ទទួលយក»។
លោកបានបន្តថា៖ «ហើយខ្ញុំសុំប្រកាសតែមួយទេ ដើម្បីឲ្យច្បាស់។ មូលដ្ឋានជើងទឹករាមនឹងស្វាគមន៍គ្រប់ប្រទេសទាំងអស់ដែលមានបំណងចូលនាវាចម្បាំងរបស់ខ្លួនមកសំចត ឈប់សម្រាក ឬចូលរួមធ្វើសមយុទ្ធជាមួយកម្ពុជា។ យើងមិនធ្វើតែជាមួយចិនទេ អាមេរិកចង់ធ្វើក៏សូមអញ្ជើញ បារាំងចង់ធ្វើក៏អញ្ជើញ កាណាដាចង់ធ្វើក៏អញ្ជើញ ឥណ្ឌាចង់ធ្វើក៏មក អង់គ្លេសចង់ធ្វើក៏មក ជប៉ុនចង់ធ្វើក៏មក អូស្ត្រាលីចង់ធ្វើក៏មក មកចុះ»។
កម្ពុជាស្វាគមន៍ទទួលយកជំនួយទាំងអស់ពីប្រទេសនានារួមមានមកពីអាមេរិក បារាំង ជប៉ុន ចិន និងប្រទេសនានាសម្រាប់ការកសាងទីបញ្ជាការជួរមុខ ក៏ដូចជា ការអភិវឌ្ឍកំពង់ផែរាម។ ការពង្រីកកំពង់ផែនេះធ្វើឡើងដោយសារតែបទពិសោធលំបាករបស់កម្ពុជាដែលត្រូវយកនាវាទៅជួសជុលនៅប្រទេសថៃ និងវៀតណាម។ នៅពេលសាងសង់រួច កំពង់ផែរាមនឹងមានកន្លែងជួសជុលនាវា ហើយកម្ពុជានឹងអនុញ្ញាតឲ្យបរទេសចូលមកជួសជុលបាន។ នេះបើតាមប្រសាសន៍លោក ហ៊ុន សែន។
លោកបានបញ្ជាក់ច្បាស់ថា បើទោះបីជាកម្ពុជាទទួលបានហិរញ្ញប្បទានពីចិនសម្រាប់ការអភិវឌ្ឍកំពង់ផែនេះក៏ដោយ កម្ពុជានឹងមិនអនុញ្ញាតឲ្យទ័ពបរទេសណាមួយប្រើប្រាស់មូលដ្ឋានយោធានៅក្នុងប្រទេសកម្ពុជាទេ ព្រោះជាទង្វើផ្ទុយនឹងរដ្ឋធម្មនុញ្ញ៕
វីដេអូ៖
