ភ្នំពេញៈ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានថ្លែងថា កម្ពុជាស្វាគមន៍ការដំឡើងកម្រិតកិច្ចសហប្រតិបត្តិការមេគង្គ-កូរ៉េខាងត្បូង ទៅជា «ដៃគូយុទ្ធសាស្ត្រ» តាមការស្នើសុំរបស់រដ្ឋមន្ត្រីការបរទេសកូរ៉េខាងត្បូង កាង ក្យុងវ៉ា។
ការគាំទ្រឲ្យដំឡើងកម្រិតកិច្ចសហប្រតិបត្តិការនេះធ្វើឡើងក្នុងកិច្ចប្រជុំរដ្ឋមន្ត្រីការបរទេសមេគង្គសាធារណរដ្ឋកូរ៉េលើកទី ១០ ធ្វើឡើងតាមប្រព័ន្ធវីដេអូ កាលពីថ្ងៃចន្ទ ទី ២៨ កញ្ញា។ នេះបើតាមសេចក្ដីប្រកាសព័ត៌មានរបស់ក្រសួងការបរទេស។
ក្រសួងការបរទេសបានថ្លែងថា រដ្ឋមន្ត្រីការបរទេសកូរ៉េខាងត្បូង កាង ក្យុងវ៉ា បានប្រកាសនៅក្នុងអង្គប្រជុំអំពីសំណើរបស់សាធារណរដ្ឋកូរ៉េក្នុងការដំឡើងកម្រិតនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ទៅជាភាពជាដៃគូយុទ្ធសាស្ត្រ។
ក្រសួងបញ្ជាក់ថា៖ «ឯកឧត្តមឧបនាយករដ្ឋមន្ត្រី ប្រាក់ សុខុន បានបង្ហាញពីការស្វាគមន៍យ៉ាងកក់ក្តៅ និងការគាំទ្រយ៉ាងពេញទំហឹងរបស់កម្ពុជាចំពោះសំណើរបស់សាធារណរដ្ឋកូរ៉េ ក្នុងការដំឡើងកម្រិតនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ទៅជាភាពជាដៃគូយុទ្ធសាស្ត្រ ដែលនេះស្របទៅនឹងគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន កាលពីឆ្នាំមុនក្នុងការដំឡើងកម្រិតយន្តការនៃកិច្ចប្រជុំនេះទៅដល់កម្រិតកិច្ចប្រជុំកំពូល»។
ដោយផ្អែកលើលក្ខណសម្បត្តិរបស់កូរ៉េខាងត្បូងលោក ប្រាក់ សុខុន កោតសរសើរចំពោះការប្តេជ្ញាចិត្តរបស់សាធារណរដ្ឋកូរ៉េក្នុងការរួមចំណែក និងការយកចិត្តទុកដាក់ជាចម្បងលើការអភិវឌ្ឍនៅក្នុងតំបន់មេគង្គ និងការសម្រេចឲ្យបាននូវសហគមន៍អាស៊ាន ដែលជាវិសាលភាពដ៏ធំធេងនៅក្នុងក្របខ័ណ្ឌនេះ។
លោកបន្ថែមទៀតថា៖ «ដោយផ្តោតលើនិរន្តរភាពដ៏យូរអង្វែងនៃកិច្ចសហប្រតិបត្តិការរបស់យើងខ្ញុំមានទស្សនៈថាជំនួយអភិវឌ្ឍន៍គ្រាន់តែជាផ្នែកមួយនៃរឿងប៉ុណ្ណោះ។ ក្នុងអំឡុងពេលនៃការស្តារឡើងវិញនូវសេដ្ឋកិច្ចក្រោយការយកឈ្នះ ជំងឺរាតត្បាតកូវីដ ១៩ ភាពធន់នៃប្រជាជាតិរបស់យើងគឺពឹងផ្អែកលើសមត្ថភាពរបស់រដ្ឋាភិបាលរៀងៗខ្លួន ដើម្បីជំរុញសេដ្ឋកិច្ចរបស់យើងតាមរយៈពាណិជ្ជកម្ម ការវិនិយោគ និងទេសចរណ៍»។
ក្រៅពីជំហរគាំទ្រការដំឡើងកម្រិតកិច្ចសហប្រតិបត្តិការនេះលោក ប្រាក់ សុខុន ក៏បានថ្លែងអំណរគុណចំពោះជំនួយ មនុស្សធម៌របស់សាធារណរដ្ឋកូរ៉េ ដែលមានទឹកប្រាក់ប្រមាណ ៣០ ម៉ឺនដុល្លារ ដែលជំនួយនេះធ្វើឡើងក្នុងរូបភាពជាបរិក្ខារវេជ្ជសាស្ត្រសម្រាប់កម្ពុជាក្នុងការប្រយុទ្ធប្រឆាំងនឹងជំងឺរាតត្បាតកូវីដ ១៩។
យោងតាមគេហទំព័រក្រសួងការបរទេសមេគង្គ-កូរ៉េ ត្រូវបានបង្កើតឡើងចាប់តាំងពីឆ្នាំ ២០១០ ដោយផ្ដោតលើវិស័យអាទិភាពចំនួន ៦ រួមមានហេដ្ឋារចនាសម្ព័ន្ធ បច្ចេកវិទ្យាព័ត៌មាន និងទូរគមនាគមន៍ការរីកចម្រើនបៃតងការអភិវឌ្ឍធនធានទឹក កសិកម្ម និងការអភិវឌ្ឍជនបទ និងការអភិវឌ្ឍធនធានមនុស្ស។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា យល់ឃើញថា នៅពេលដែលកិច្ចសហប្រតិបត្តិការឈានដល់កម្រិតដៃគូយុទ្ធសាស្ត្រ ការសម្រេចនានា និងសកម្មភាពជាក់ស្ដែងក្នុងកិច្ចសហប្រតិបត្តិការនានាមានផលប្រយោជន៍ខ្ពស់។
លោកថា មកទល់ពេលនេះ កិច្ចប្រជុំមេគង្គសាធារណរដ្ឋកូរ៉េមានត្រឹមតែកម្រិតរដ្ឋមន្ត្រីការបរទេសប៉ុណ្ណោះ មិនទាន់ដល់កម្រិតកំពូលទេ។ លោកថ្លែងថា ក្របខ័ណ្ឌគោលនយោបាយនេះ ដើរស្របគ្នាទៅនឹងគោលនយោបាយសម្លឹងទៅទិសខាងត្បូងរបស់សាធារណរដ្ឋកូរ៉េដែលសម្លឹងមើលលើអាស៊ាន និងឥណ្ឌា។ ដូច្នេះប្រទេសនៅតំបន់មេគង្គមានឱកាសក្នុងការទទួលបានផលប្រយោជន៍ច្រើនពីកិច្ចសហប្រតិបត្តិការជាមួយកូរ៉េខាងត្បូង៕