.jpg)
វាលស្រែមួយកន្លែងស្ថិតក្នុងគម្រោង (IAIP) របស់ EU។ រូបថត EU
ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ស្វាគមន៍ការវិនិយោគពីធនាគារវិនិយោគអឺរ៉ុប (EIB) ក្នុងទឹកប្រាក់ប្រមាណ ៩៧ លានដុល្លារ ដើម្បីធ្វើទំនើបកម្មប្រព័ន្ធធារាសាស្ត្រនៅខេត្តមួយចំនួននៅកម្ពុជា។
លោកចាត់ទុកការវិនិយោគនេះថា ជាជំហានដ៏សំខាន់មួយឆ្ពោះទៅកាន់ការធ្វើឱ្យប្រសើរឡើងដល់ជីវភាព និងផលិតកម្មកសិកម្មនៅក្នុងប្រទេសកម្ពុជា។ នេះបើតាមសេចក្ដីប្រកាសព័ត៌មានរបស់ EIB ចេញផ្សាយកាលពីថ្ងៃទី ១៥ ធ្នូ។ បើតាម EIB ទឹកប្រាក់ ៨០ លានអឺរ៉ូ ឬប្រមាណ ៩៧ លានដុល្លារ គឺជាប្រភេទហិរញ្ញប្បទានសម្បទាន (កម្ចី) ដែលនឹងត្រូវវិនិយោគលើ «គម្រោងកែលម្អកសិកម្មដែលមានប្រព័ន្ធធារាសាស្ត្រ» ហៅកាត់ថា IAIP ដើម្បីធ្វើទំនើបកម្មហេដ្ឋារចនាសម្ព័ន្ធផ្គត់ផ្គង់ទឹក និងប្រព័ន្ធធារាសាស្ត្រនៅតំបន់ជនបទនៃប្រទេសកម្ពុជា។
លោក អូន ព័ន្ធមុនីរ័ត្ន ថ្លែងថា៖ «គម្រោងកែលម្អកសិកម្មដែលមានប្រព័ន្ធធារាសាស្ត្រក៏នឹងធ្វើឱ្យកម្ពុជាអាចបន្សាំខ្លួនទៅនឹងការប្រែប្រួលអាកាសធាតុ និងកែលម្អរបៀបដែលយើងគ្រប់គ្រងទឹកសម្រាប់គោលដៅកសិកម្ម និងសកម្មភាពកសិកម្មផ្សេងៗទៀត។ គម្រោងនេះ គឺជាគំរូល្អមួយដែលបង្ហាញថា ដៃគូផ្សេងៗអាចរួមសាមគ្គីគ្នានៅជុំវិញទស្សនវិស័យមួយ និងធ្វើកិច្ចការដើម្បីឱ្យកម្ពុជាកាន់តែមានភាពមាំទាំ និងវិបុលភាព»។
គម្រោងកែលម្អកសិកម្ម ដែលមានប្រព័ន្ធធារាសាស្ត្រនេះនឹងមានសារៈប្រយោជន៍សម្រាប់មនុស្ស ២០ ម៉ឺននាក់នៅក្នុងខេត្តចំនួន ៥ ដោយគ្របដណ្ដប់លើផ្ទៃដីដាំដុះទំហំ ៥ ម៉ឺន ១ ពាន់ហិកតា។ គម្រោងវិនិយោគនេះ និងធ្វើឡើងក្រោមកិច្ចសហប្រតិបត្តិការជាមួយធនាគារអភិវឌ្ឍន៍អាស៊ី (ADB) រាជរដ្ឋាភិបាលកម្ពុជា សហភាពអឺរ៉ុបក្នុងគោលបំណងកាត់បន្ថយភាពក្រីក្រ និងរួមចំណែកដល់ការអនុវត្តកសិកម្មប្រកបដោយនិរន្តរភាព និងសន្តិសុខស្បៀង។ នេះបើតាម EIB។
EIB ថា គម្រោងនេះនឹងជួយឱ្យកម្ពុជាបង្កើតនូវមជ្ឈមណ្ឌលគ្រប់គ្រងទិន្នន័យធនធានទឹកថ្នាក់ជាតិដែលមានសារៈសំខាន់ក្នុងរយៈពេលវែង ដើម្បីឱ្យកម្ពុជាមានសមត្ថភាពបញ្ចៀសផលប៉ះពាល់បង្កដោយបម្រែបម្រួលអាកាសធាតុទៅលើការផ្គត់ផ្គង់ទឹក និងកសិកម្ម។
លោក Christian Kettel Thomsen អនុប្រធានធនាគារ EIB ថ្លែងថា គម្រោងនេះក៏នឹងចូលរួមដល់ការស្តារឡើងវិញផ្នែកបរិស្ថានបន្ទាប់ពីបញ្ចប់បញ្ហាកូវីដ១៩នៅកម្ពុជា ហើយធនាគារ EIB មានមោទនភាពជាខ្លាំងដែលរដ្ឋាភិបាលទទួលស្គាល់ធនាគារនេះថា ជាដៃគូដ៏ល្អមួយ។
ស្រដៀងគ្នានេះ លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជាថ្លែងថា ជាមួយនឹងគម្រោងថ្មីនេះ ក្រុមការងាររបស់សហភាពអឺរ៉ុបនៅកម្ពុជានឹងបន្តគាំទ្រដល់កម្ពុជាក្នុងកិច្ចប្រឹងប្រែងស្ដារឡើងវិញប្រកបដោយភាពបៃតង និងបរិយាប័ន្ននៅក្រោយកូវីដនៅក្នុងវិស័យសេដ្ឋកិច្ចដ៏សំខាន់នេះ។
គម្រោងកែលម្អកសិកម្មដែលមានប្រព័ន្ធធារាសាស្ត្រនេះ ជាគម្រោងទី ៣ ហើយដែលទទួលបានការគាំទ្រពីធនាគារ EIB។ គិតចាប់ពីពេលដែលធនាគារនេះមានវត្តមាននៅកម្ពុជានៅឆ្នាំ ២០១៨ ទឹកប្រាក់ប្រមាណ ២៧១ លានដុល្លារត្រូវបានវិនិយោគ៕
