The Phnom Penh Post Search

Search form

Logo of Phnom Penh Post newspaper Phnom Penh Post - កម្ពុជា​ស្វែងរក​ការពង្រឹង​ទំនាក់ទំនង​វិស័យ​យោធា ​ជាមួយ​​នឹង​មីយ៉ាន់ម៉ា​ឲ្យ​កាន់តែ​រឹងមាំ




កម្ពុជា​ស្វែងរក​ការពង្រឹង​ទំនាក់ទំនង​វិស័យ​យោធា ​ជាមួយ​​នឹង​មីយ៉ាន់ម៉ា​ឲ្យ​កាន់តែ​រឹងមាំ

Content image - Phnom Penh Post
លោក វង្ស ពិសេន បាន​ទៅ​ទស្សនកិច្ច​ផ្លូវការ​នៅ​ប្រទេស ​​មីយ៉ាន់ម៉ា ​កាលពី​ថ្ងៃទី​ ១៣ ខែមករា។ រូបថត RCAF

កម្ពុជា​ស្វែងរក​ការពង្រឹង​ទំនាក់ទំនង​វិស័យ​យោធា ​ជាមួយ​​នឹង​មីយ៉ាន់ម៉ា​ឲ្យ​កាន់តែ​រឹងមាំ

ភ្នំពេញៈ អគ្គមេបញ្ជាការ​នៃ​កងយោធពល​ខេមរភូមិន្ទ​លោកនាយ​ឧត្តមសេនីយ៍ វង្ស ពិសេន បាន​ដឹកនាំ​គណៈប្រតិភូ​កម្ពុជា​ទៅ​ទស្សនកិច្ច​ផ្លូវការ​នៅ​ប្រទេស​​ មីយ៉ាន់ម៉ា​ រយៈពេល​ ៤ ​ថ្ងៃ​ ដើម្បី​ពង្រឹង​ទំនាក់ទំនង​វិស័យ​យោធា​​ប្រទេស​ទាំង​ ២ ​ឱ្យ​កាន់តែ​រឹងមាំ​ថែមទៀត ស្រប​ពេល​ដែល​ប្រទេស​ទាំង ​២ ប្រារព្ធ​ខួប​ទី​ ៦៥ ​ឆ្នាំ​​នៃ​ការបង្កើត​ទំនាក់ទំនង​ការទូត​ជាមួយ​គ្នា​។

លោក វង្ស ពិសេន បាន​ទៅ​ទស្សនកិច្ច​ផ្លូវការ​នៅ​ប្រទេស ​​មីយ៉ាន់ម៉ា ​ចាប់ពី​ថ្ងៃទី​ ១៣ ​ដល់​ថ្ងៃទី​ ១៦ មករា ហើយ​កាលពី​ថ្ងៃទី​ ១៤ មករា លោក​ត្រូវ​បានទទួល​ស្វាគមន៍​ដោយ​លោក Min Aung Hlaing អគ្គមេបញ្ជាការ​នៃ​កងកម្លាំង​ការពារ​ជាតិ​មីយ៉ាន់ម៉ា និង​លោកស្រី អ៊ុងសាន ស៊ូជី ទីប្រឹក្សា​រដ្ឋ និង​ជា​រដ្ឋមន្ត្រីការបរទេស​មីយ៉ាន់ម៉ា​។ នេះ​បើតាម​ការចុះផ្សាយ​ព័ត៌មាន​ដោយ​ក្រសួង​ការពារ​ជាតិ​កម្ពុជា​ពី​ម្សិលមិញ​។

លោក វង្ស ពិសេន បាន​បញ្ជាក់ថា ដំណើរ​ទស្សនកិច្ច​នេះ​​គឺ​ដើម្បី​ពង្រឹង​ទំនាក់ទំនង​កិច្ចសហប្រតិបត្តិការ​រវាង​ប្រទេស​ទាំង​ ២ ជា​គោលបំណង​របស់លោក​នាយករដ្ឋមន្ត្រី ហ៊ុន សែន ដែល​ចង់ឱ្យមាន​ការរៀបចំ​ប្រារព្ធ​​ពិធី​រំឭក​ខួប​លើក​ទី​ ៦៥ ​នៃ​ទំនាក់ទំនង​ការទូត​ឱ្យបាន​ពិសេស​។

តាម​ការចុះផ្សាយ​របស់​ក្រសួង​​ការពារជាតិ​បាន​ដកស្រង់​សម្ដី​លោក វង្ស ពិសេន ថា​៖ «​ក្នុង​ដំណើរ​ទស្សនកិច្ច​នេះ លោក​( វង្ស ពិសេន​) ​មាន​បំណង​ចង់​ពង្រឹង​ពង្រីក​កិច្ច​សហប្រតិបត្តិការ​ក្នុង​វិស័យ​កងទ័ព​នៃ​ប្រទេស​ទាំង​ ២ ឱ្យ​កាន់តែ​រឹងមាំ​ដោយ​ក្នុងនោះ​លោក​ស្នើ​ឱ្យមាន​ទំនាក់ទំនង​កិច្ចសហប្រតិបត្តិការ​ល្អ​ជាមួយគ្នា​លើ​ការផ្លាស់ប្ដូរ​ព័ត៌មាន ការងារ​សន្ដិសុខ ការ​រួមគ្នា​បង្ក្រាប​បទល្មើស​ឆ្លងដែន​ភេរវកម្ម​ការជួញដូរ​មនុស្ស​ការជួញដូរ​គ្រឿងញៀន ការជួញដូរ​អាវុធ និង​បន្ត​បន្ថែម​ការបណ្ដុះបណ្ដាល​ធនធាន​មនុស្ស​»​។

ក្រសួង​ការពារជាតិ​បាន​បញ្ជាក់​ដែរ​ថា​លោកស្រី អ៊ុងសាន ស៊ូជី ក៏បាន​ទទួល​យក​ការអញ្ជើញ​ពី​រដ្ឋាភិបាល​កម្ពុជា​ដើម្បី​មក​ចូលរួម​កិច្ចប្រជុំ​អាស៊ីអឺរ៉ុប​ឆ្នាំ​ ២០២០ នៅពេល​កម្ពុជា​ត្រូវ​ធ្វើជា​ម្ចាស់ផ្ទះ​ផងដែរ​។

លោក ឈុំ សុជាត អ្នកនាំពាក្យ​​ក្រសួង​ការពារជាតិ​មិន​អាច​​សុំ​ការបញ្ជាក់​បន្ថែម​ជុំវិញ​ទំនាក់ទំនង​វិស័យ​យោធា​កម្ពុជា-មីយ៉ាន់ម៉ា​បានទេ​កាលពី​ម្សិលមិញ ដោយសារ​ទូរស័ព្ទ​របស់​លោក​មិនមាន​អ្នកទទួល​។

លោក កុយ គួង អ្នកនាំពាក្យ​ក្រសួង​ការបរទេស​កម្ពុជា​បាន​លើកឡើង​ថា កម្ពុជា-មីយ៉ាន់ម៉ា​មាន​ទំនាក់ទំនង​ជា​ប្រពៃណី​យូរណាស់​មកហើយ ប៉ុន្តែ​ទំនាក់ទំនង​នេះ​ត្រូវបាន​ពង្រឹង​បន្ថែម​នៅពេល​ប្រទេស​ទាំង​ ២ ​បាន​ក្លាយជា​សមាជិក​អាស៊ាន​ដែល​ជា​សហគម​តែមួយ​មាន​វាសនា​តែមួយ ។

លោក​ថា​៖ «​កន្លងមក​យើង​មើល​ទំនាក់ទំនង​កម្ពុជា-មីយ៉ាន់ម៉ា​គឺមាន​លក្ខណៈ​ទូទៅ និង​ធម្មតា​មិន​មាន​អី​ឱ្យ​ពិសេស​ដាច់ដោយឡែក​ដើម្បី​សង្កត់ធ្ងន់​ឱ្យ​សំខាន់​ណាស់​នោះទេ​។ យើង​គ្រាន់​តែ​មាន​ទំនាក់ទំនង​ជារួម​ទាំង​វិស័យ​ទេសចរណ៍ វប្បធម៌ ពាណិជ្ជកម្ម សេដ្ឋកិច្ច ដោយ​អត់​មាន​អ្វីមួយ​ឱ្យ​លេចធ្លោ​សំខាន់​នោះទេ​»​។

លោក គិន ភា ប្រធាន​វិទ្យាស្ថាន​អន្តរជាតិ​នៃ​រាជបណ្ឌិត្យ​សភា​កម្ពុជា​បានលើកឡើង​ថា ទំនាក់ទំនង​កម្ពុជា​ និង​មីយ៉ាន់ម៉ា​ពេលនេះ​គឺ​មាន​លក្ខណៈ​ធម្មតា ជាពិសេស​លើ​វិស័យ​អប់រំ និង​សាសនា ដោយសារ​​ប្រទេស​ទាំង​ ២ ​កាន់​ព្រះពុទ្ធ​សាសនា​ដូចគ្នា​។ រីឯ​ក្នុង​ក្របខ័ណ្ឌ​អាស៊ាន​កម្ពុជា-មីយ៉ាន់ម៉ា តែងតែ​ផ្ដល់​ការគាំទ្រ​ឱ្យ​គ្នា​ទៅវិញ​ទៅមក​ជុំវិញ​បញ្ហា​តំបន់ និង​ពិភពលោក​ដោយសារ​ប្រទេស​ទាំង​ ២ ​មាន​ទម្រង់​ដឹកនាំ និង​ការអភិវឌ្ឍ​ប្រហែល​គ្នា​។

លោក​ថា​៖ «​បើ​យើង​និយាយ​អំពី​ការដោះដូរ​ពាណិជ្ជកម្ម និង​ក្របខ័ណ្ឌ​លើ​កិច្ចសហប្រតិបត្តិការ​លើ​វិស័យ​ការពារជាតិ​យើង​​ឃើញថា វា​មិន​សូវ​មាន​លក្ខណៈ​ស៊ីជម្រៅ​ដុំកំភួន​ ឬ​លក្ខណៈ​យុទ្ធសាស្ដ្រ​អ្វី​គួរឱ្យ​កត់សម្គាល់​នោះទេ​។ ​ខ្ញុំ​មើល​ទៅ​ក្នុង​វិស័យ​យោធា​គឺ​ក្របខ័ណ្ឌ​ក្នុង​កិច្ចសហប្រតិបត្តិការ​របស់​ប្រទេស​ទាំង​ ២ ​ក្នុង​កម្រិត​ធម្មតា​ដែរ ហើយ​យើង​មើលឃើញ​ថា ប្រទេស​ទាំង​ ២ ​មាន​ទស្សនៈ​រួម​លើ​បញ្ហា​សន្ដិសុខ​ក្នុង​តំបន់ និង​ពិភពលោក​»៕

អត្ថបទគួរចាប់អារម្មណ៍