The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​អាច​នឹង​ពិចារណា​បញ្ជូន​ពលករ​ទៅ​ កាតា

កម្ពុជា​អាច​នឹង​ពិចារណា​បញ្ជូន​ពលករ​ទៅ​ កាតា

លោក កុយ គួង អ្នកនាំពាក្យ​ក្រសួង​ការបរទេស​នៅក្នុង​ពិធី​មួយ​នា​ពេល​កន្លងមក​។
លោក កុយ គួង អ្នកនាំពាក្យ​ក្រសួង​ការបរទេស​នៅក្នុង​ពិធី​មួយ​នា​ពេល​កន្លងមក​។ ហេង ជីវ័ន

កម្ពុជា​អាច​នឹង​ពិចារណា​បញ្ជូន​ពលករ​ទៅ​ កាតា

ភ្នំពេញៈកម្ពុជា​និង​កាតា​អាច​នឹង​ពិចារណា​ពិនិត្យ​មើល​ឡើង​វិញ​នូវ​ការ​អនុវត្ត​កិច្ចព្រមព្រៀង ឆ្នាំ​២០១១ ពាក់ព័ន្ធ​ការ​បញ្ជូន​ពលករ​បម្រើ​ការងារ​កម្ពុជា​ទៅកាន់​ប្រទេស​កាតា​ក្នុង​ដំណើរ​ទស្សនកិច្ច​ផ្លូវការ របស់​រដ្ឋមន្រ្តី​ក្រសួង​ការបរទេស​កម្ពុជា និង​ធុរជន​ទៅកាន់​រដ្ឋ​កាតា ក្នុង​ពេល​ឆាប់ៗ​នេះ ដើម្បី​ចុះហត្ថលេខា​លើ​អនុស្សរណៈ​យោគយល់​ចំនួន ៤​។

ក្នុង​សន្និសីទ​សារព័ត៌មាន ក្រោយ​ជំនួប​ពិភាក្សា​រវាង​រដ្ឋមន្រ្តី​ការបរទេស​កម្ពុជា លោក ហោ ណាំហុង និង ឧបការី​ការបរទេស​នៃ​រដ្ឋ​កាតា លោក Mohamed Abdulla AL-Rumaihi អ្នក​នាំពាក្យ​ក្រសួង​ការបរទេស​កម្ពុជា លោក កុយ គួង បាន​ឲ្យ​ដឹង​ថា កន្លងមក​ភាគី​ប្រទេស​ទាំង​ពីរ​បាន​ចុះកិច្ចព្រមព្រៀង​មួយ​ចំនួន ហើយ​មាន​កិច្ចព្រមព្រៀង​ខ្លះ បាន​ឯកភាព​គ្នា ប៉ុន្តែ​នៅ​មិន​ទាន់​បាន​ចុះហត្ថលេខា​នៅ​ឡើយ ក្នុង​នោះ អនុស្សរណៈ​យោគយល់​ចំនួន​៤ អាច​នឹង​ត្រូវ​ចុះហត្ថលេខា​យល់ព្រម ក្នុង​ទស្សនកិច្ច​ផ្លូវការ របស់​គណៈប្រតិភូ​កម្ពុជា ទៅកាន់​រដ្ឋ​កាតា ក្នុង​ពេល​ឆាប់ៗ​នេះ​។

អនុស្សរណៈ​ទាំងនោះ​រួមមាន ទី​១.ស្តី​ពី​ការ​ពិគ្រោះ​យោបល់ រវាង​ក្រសួង​ការបរទេស​ទាំង​ពីរ ទី​២.​ស្តីពី​វិស័យ​អប់រំ វិស័យ​ស្រាវជ្រាវ​ផ្នែក​វិទ្យាសាស្ត្រ ទី​៣. កិច្ចព្រមព្រៀង​ស្តីពី​កិច្ចសហប្រតិបត្តិការ​សេដ្ឋកិច្ច បច្ចេកទេស និង​ពាណិជ្ជកម្ម និង​ទី​៤. កិច្ចព្រមព្រៀង​ស្តីពី​ការ​ការពារ និង​ជំរុញ​វិនិយោគ​នៃ​ប្រទេស​ទាំង​ពីរ​ទៅវិញ​ទៅមក​។

លោក កុយ គួង បាន​បន្ត​ថា ក្នុង​ជំនួប​នេះ ភាគី​ទាំង​ពីរ​ក៏​បាន​លើក​ឡើង​នូវ​កិច្ចព្រមព្រៀង​ឆ្នាំ​២០១១ ពាក់ព័ន្ធ​នឹង​រឿង​បញ្ជូន​ពលករ​ខ្មែរ​ទៅ​ធ្វើការ​នៅ​កាតា តែ​មិន​ទាន់​ត្រូវ​បាន​ផ្តល់​សច្ចាប័ន​នៅ​ឡើយ​។

លោក​ថា៖ «កិច្ចព្រមព្រៀង​នេះ មិន​ទាន់​បាន​អនុវត្ត ដោយសារ​ប្រទេស​ទាំង​ពីរ នៅ​មិន​ទាន់​មាន​ទីភ្នាក់ងារ​ទាំង​សង​ខាង​ដើម្បី​បញ្ជូន​ពលករ និង​ពិនិត្យ​មើល​លើ​បញ្ហា​នានា​នៅ​ឡើយ​...រឿង​សុវត្ថិភាព​ហ្នឹង អាច​ជា​ចំណុច​ដែល​ត្រូវ​សិក្សា​ឲ្យ​ហ្មត់ចត់​។ ភាគច្រើន ពលករ​ខ្មែរ​យើង គឺ​បម្រើ​សេវា​ទូទៅ ដូចជា​តាម​សណ្ឋាគារ​និង​តាម​សំណង់​ជាដើម»​។

ភ្នំពេញ​ប៉ុស្តិ៍ មិន​អាច​សុំ​ការ​ឆ្លើយ​បំភ្លឺ​បន្ថែម​ពី​អ្នក​នាំពាក្យ​ក្រសួង​ការងារ លោក ហេង សួរ បាន​ទេ​កាលពី​ម្សិលមិញ​។

លោកស្រី លឹម មុន្នី អនុប្រធាន​កម្មវិធី​ផ្នែក​ស្រ្តី និង​កុមារ​នៃ​សមាគម​អាដហុក ដែល​បាន​ធ្វើការ​ស្រាវជ្រាវ​ពាក់ព័ន្ធ​នឹង​ពលករ​ខ្មែរ​ចំណាកស្រុក បាន​ឲ្យ​ដឹង​ថា រហូត​មក​ទល់​ពេល​នេះ កម្ពុជា​នៅ​មិន​ទាន់​មាន​ពលករ​ដែល​ជា​ជនរងគ្រោះ​មកពី​រដ្ឋ​កាតា​នោះ​ទេ បើ​ទោះបី​ជា​ក្រសួង​ការងារ បាន​ផ្តល់​អាជ្ញាប័ណ្ណ​ទទួល​ស្គាល់​ក្តី​។

លោកស្រី​បន្ត​ថា៖ «​យើង​ស្វាគមន៍​បើ​មាន​ការ​បញ្ជូន​ពលករ​ទៅ​កាតា តែ​ត្រូវ​សិក្សា​ពី​សុវត្ថិភាព និង​ប្រាក់ចំណូល​សមរម្យ​របស់​ពលករ​ខ្មែរ​ជា​មុន​សិន​»។

ក្នុង​ជំនួប​ដដែល​នោះ បើ​តាម​លោក កុយ គួង ភាគី​ទាំង​ពីរ​ក៏​បាន​ពិភាក្សា​អំពី​ការ​ពង្រឹង និង​ពង្រីក​ទំនាក់ទំនង​ការទូត​រវាង​ប្រទេស​ទាំង​ពីរ​ផង​ដែរ ប៉ុន្តែ​កន្លងមក វិស័យ​វិនិយោគ ទេសចរណ៍ ពាណិជ្ចកម្ម និង​វិស័យ​ផ្សេង​ទៀត​នៅ​មាន​កម្រិត​ទាប​ដែល​ទាមទារ​ការ​ជំរុញ​បន្ថែម​ទៀត​។

លោក​បន្ត​ថា រាជរដ្ឋាភិបាល​កម្ពុជា តាមរយៈ​លោក ហោ ណាំហុង ក៏​បាន​ស្នើសុំ​ហិរញ្ញប្បទាន (កម្ចី​មាន​ការប្រាក់​ទាប​)ពី​រដ្ឋ​កាតា ដើម្បី​អភិវឌ្ឍ​ប្រទេស​កម្ពុជា​ផង​ដែរ។

លោក ​គួង ​បញ្ជាក់​ថា​៖​«កាតា មាន​ចំណែក​នៅក្នុង​ធនាគារ​វិនិយោគ​ហេដ្ឋារចនាសម្ព័ន្ធ​អាស៊ី ដែល​ហៅថា AIIB ផ្តួចផ្តើម​ដោយ​ចិន ដូច្នេះ​តាមរយៈ​ធនាគារ​នេះ ឯក​ឧត្តមឧបនាយករដ្ឋមន្រ្តី​ស្នើឲ្យ​កាតា​ផ្តល់​ហិរញ្ញប្បទាន​ដើម្បី​អភិវឌ្ឍ​កម្ពុជា​មួយ​ចំនួន​»។

លោក កុយ គួង បាន​បន្ត​ថា ជា​ការ​ឆ្លើយតប Mohanmed Abdulle AI-Rumaihi បាន​លើក​ឡើង​ថា៖«មិនមែន​ខ្ចី​ត្រឹមតែ​ធនាគារ​នេះ​មួយ​ទេ គឺ​ប្រទេស​ទាំង​ពីរ អាច​ធ្វើ​ឡើង​តាមរយៈ​ទំនាក់ទំនង​ទ្វេភាគី​ឬ​កិច្ចពិគ្រោះ​យោបល់​សហប្រតិបត្តិការ​អាស៊ី​ផ្ទាល់​តែ​ម្តង​»៕

អត្ថបទគួរចាប់អារម្មណ៍