The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​កាត់​បន្ថយ​ចំនួន​អនុសាសន៍​របស់ UN

កម្ពុជា​កាត់​បន្ថយ​ចំនួន​អនុសាសន៍​របស់ UN

លោក​ស្រី Wenny Kusuma ក្នុង​បទ​សម្ភាស​មួយ​ពី​ម្សិល​មិញ។
លោក​ស្រី Wenny Kusuma ក្នុង​បទ​សម្ភាស​មួយ​ពី​ម្សិល​មិញ។ ហុង មិនា

កម្ពុជា​កាត់​បន្ថយ​ចំនួន​អនុសាសន៍​របស់ UN

ភ្នំពេញៈ កម្ពុជា​បាន​កាត់​បន្ថយ​ចំនួន​អនុសាសន៍​ស្តីពី​សិទិ្ធ​មនុស្ស ដែល​កម្ពុជា​នឹង​អនុវត្ត​ជា​ផ្នែក​មួយ​នៃ Universal Periodic Review របស់​អង្គការ​សហ​ប្រជាជាតិ ដោយ​បញ្ជាក់​ថា អនុសាសន៍​ទាំង​នោះ​មាន​លក្ខណៈ​ដដែលៗ។

កាល​ពី ខែ​មករា ឆ្នាំ​នេះ​កម្ពុជា ទទួល​បាន​អនុសាសន៍​ស្តីពី​សិទិ្ធ​មនុស្ស​ចំនួន ២០៥ ពី​ការិយាល័យ​ឧត្តម​ស្នងការ​អង្គការ​ប្រជាជាតិ​ទទួល​បន្ទុក​សិទិ្ធ​មនុស្ស ដែល​កម្ពុជា​បាន​កាត់​បន្ថយ​មក​ចំនួន ១៦៣ កាល​ពី ខែ​មិថុនា ហើយ​ឥឡូវ​នេះ​មក​ត្រឹម ៤៨។

ខណៈ​ដែល​កម្ពុជា​ត្រូវ​បាន​រិះគន់​នៅ​ពេល​នោះ ដោយ​សារ​មិន​សម្រេច​ពី​អនុសាសន៍ ដែល​ពាក់​ព័ន្ធ​នឹង​បញ្ហា​ផ្សេងៗ ដូច​ជា សេរីភាព​បញ្ចេញ​មតិ និង​សិទិ្ធ​ប្រមូល​ផ្តុំ កម្ពុជា​បាន​បញ្ជាក់​ថា ឥឡូវ​នេះ ខ្លួន​ត្រូវ​បញ្ចូល​អនុសាសន៍​ទាំង​នេះ​ជា​ក្រុម ដោយ​សារ​តែ​អនុសាសន៍​ទាំង​នោះ​មាន​លក្ខណៈ​ជា​រឿង​ដដែលៗ។

លោក ម៉ក់ សម្បតិ្ត អនុ​ប្រធាន​គណៈ​កម្មាធិការ​សិទិ្ធ​មនុស្ស​របស់​រដ្ឋាភិបាល បាន​ថ្លែង​ថា អនុសាសន៍​ទាំង​នោះ​ប្រើ ឃ្លា​ប្រយោគ​ដដែល ដើម្បី​បញ្ជាក់​ពី​ចំណុច​ដូច​គ្នា។

លោក​បាន​គូស​បញ្ជាក់​ក្នុង​សន្និសីទ​មួយ នៅ​ភ្នំពេញ កាល​ពី​ម្សិល​មិញ​ថា៖ «ឧទាហរណ៍... ចំពោះ​កំណែ​ទម្រង់​ប្រព័ន្ធ​តុលាការ ១១ ចំណុច មាន​លក្ខណៈ​ដូច​គ្នា ដូច្នេះ យើង​បញ្ចូល​តែ​មួយ»។

លោក Wan-Hea Lee ប្រធាន​ឧត្តម​ស្នងការ​សហ​ប្រជាជាតិ​ទទួល​បន្ទុក​សិទិ្ធ​មនុស្ស បាន​ថ្លែង​ថា ខណៈ​ដែល​អនុសាសន៍​ទាំង​នោះ​មាន​លក្ខណៈ​ប្រហាក់​ប្រហែល​គ្នា «ចំពោះ​អនុសាសន៍ ដែល​យើង​មើល​ឃើញ​ដដែលៗ វា​មាន​ន័យ​ថា មាន​ក្តី​បារម្ភ​ខ្លាំង​ដោយ​ប្រទេស​ជាច្រើន»។ ប៉ុន្តែ​លោក Lee ក៏​បាន​កត់​សម្គាល់​ថា កម្ពុជា បាន​ឆ្លើយ​តប «យ៉ាង​ល្អ» ចំពោះ​អនុសាសន៍ ដរាប​ណា​កម្ពុជា​ពិនិត្យ និង​អនុវត្ត​តាម​អនុសាសន៍​នីមួយៗ»។

អង្គការ​សហ​ប្រជាជាតិ​និង​រដ្ឋាភិបាល​កម្ពុជា ហាក់​បី​ដូច​ជា ខ្វែង​គំនិត​គ្នា​ទាក់​ទង​នឹង​អ្វី ដែល​កំណត់​ថា ជា​ការ​រំលោភ​សិទិ្ធ​មនុស្ស​ដោយ​លោក សម្បតិ្ត បាន​ថ្លែង​ថា បញ្ហា​ចម្រូង​ចម្រាស ដូច​ជា វិវាទ​ដីធ្លី និង​បាតុកម្ម​នយោបាយ ត្រូវ​តែ​ដោះ​ស្រាយ តាម​ច្បាប់​កម្ពុជា។

លោក​បាន​បន្ត​ថា៖ «ប្រសិន​បើ​ប្រជាជន​ធ្វើ​បាតុកម្ម​និង​ដេក ៥ យប់ និង ៥ ថ្ងៃ​នៅ​លើ​សួន តើ​រដ្ឋាភិបាល​នៅ​អឺរ៉ុប អនុញ្ញាត​ឲ្យ​ពួក​គេ​ធ្វើ​ដែរ​ឬ​ទេ?»។

ដោយ​យោង​ពី​ការ​អត្ថាធិប្បាយ​នោះ លោក Lee បាន​ថ្លែង​ថា តាម​ពិត មាន​ប្រទេស​ជាច្រើន ដែល​អនុញ្ញាត​ឲ្យ​បាតុករ​បោះ​ជំរំ​បែប​នោះ»។

លោក ម៉ក់ សម្បតិ្ត បាន​អះអាង​ថា កម្ពុជា បាន​យក​ចិត្ត​ទុក​ដាក់​ក្នុង​ការ​អនុវត្ត​អនុសាសន៍​ទាំង ៤៨ ដោយ​ជំរុញ​ឲ្យ​បង្កើត​ក្រុម​ការងារ ដើម្បី​ធានា​ថា អនុសាសន៍​ទាំង​នេះ​បាន​បញ្ជូន​ទៅ​ក្រសួង​សម​ស្រប។

លោក Phil Robertson អនុ​ប្រធាន​ប្រចាំ​អាស៊ី​នៃ​អង្គការ​ឃ្លាំ​មើល​សិទិ្ធ​មនុស្ស បាន​ថ្លែង​ថា៖ «ក្នុង​ពិភព​សិទិ្ធ​មនុស្ស រដ្ឋាភិបាល​កម្ពុជា​ល្បី​ឈ្មោះ​ដែល​បាន​ចុះ​សន្ធិ​សញ្ញា​សិទិ្ធ​មនុស្ស​អន្តរជាតិ​ជាច្រើន ប៉ុន្តែ​អនុវត្ត​ពាក្យ​សន្យា​របស់​ខ្លួន​បាន​តិច​តួច​បំផុត»។

លោក Phil Robertson បាន​គូស​បញ្ជាក់​ទៀត​ថា៖ «មាន​ចន្លោះ​រវាង​អ្វី​ដែល​រដ្ឋាភិបាល​កម្ពុជា​សន្យា និង​អ្វី​ដែល​រដ្ឋាភិបាល​អនុវត្ត ហើយ​ដំណើរ​ការ UPR ក៏​មិន​ខុស​គ្នា​ដែរ»។

អង្គការ​សហ​ប្រជាជាតិ​បាន​ឆ្លង​កាត់​ការ​វាយ​តម្លៃ UPR រៀង​រាល់ ៤ ឆ្នាំ​ហើយ​អាច​ទទួល​យក​ឬ​កត់​សម្គាល់​ពី​អនុសាសន៍ ដែល​ពុំ​មាន​លក្ខណៈ​ចង​កាតព្វកិច្ច។

លោក​ស្រី Wenny Kusuma ប្រធាន​ប្រចាំ​ប្រទេស​នៃ​អង្គការ UN Women បាន​មាន​ប្រសាសន៍​ថា៖ «ផល​វិបាក​មួយ​នៃ​ការ​មិន​យល់​ស្រប​តាម​អនុសាសន៍ គឺ​អនុសាសន៍​ទាំង​នោះ នឹង​ត្រូវ​បាន​បញ្ជាក់​ឡើង​វិញ​នៅ​ថ្ងៃ​អនាគត»៕

អត្ថបទគួរចាប់អារម្មណ៍