The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​កំពុង​ប្រឈម​និង​កំពុង​ដោះ​ស្រាយ​បញ្ហា​ដីធ្លី

កម្ពុជា​កំពុង​ប្រឈម​និង​កំពុង​ដោះ​ស្រាយ​បញ្ហា​ដីធ្លី

សិក្ខា​សាលា​ស្តី​ពី «គោល​នយោបាយ​ដី​ធ្លី​ទូលំ​ទូលាយ​មូលដ្ឋាន​គ្រឹះ​ក្នុង​ការ​អភិវឌ្ឍ​ទីក្រុង...»។
សិក្ខា​សាលា​ស្តី​ពី «គោល​នយោបាយ​ដី​ធ្លី​ទូលំ​ទូលាយ​មូលដ្ឋាន​គ្រឹះ​ក្នុង​ការ​អភិវឌ្ឍ​ទីក្រុង...»។ រូបថត តាំង វីដា

កម្ពុជា​កំពុង​ប្រឈម​និង​កំពុង​ដោះ​ស្រាយ​បញ្ហា​ដីធ្លី

ភ្នំពេញៈ រដ្ឋ​មន្រ្តី​ក្រសួង​រៀបចំ​ដែនដី នគរូបនីយ​កម្ម និង​សំណង់ បាន​លើក​ឡើង​កាល​ពី​ម្សិល​មិញ​ថា វិស័យ​ដីធ្លី​គឺជា​មូលដ្ឋាន​គ្រឹះ​នៃ​ការ​រីក​ចម្រើន​សម្រាប់​វិស័យ​ដទៃ​ទៀត និង​ជា​បញ្ហា​ចម្បង​ដែល​កម្ពុជា​កំពុង​ប្រឈម​និង​កំពុង​ដោះ​ស្រាយ។

ការ​អះអាង​នេះ ធ្វើ​ឡើង​ក្នុង​សិក្ខា​សាលា​អន្តរជាតិ​លើក ទី៦ ស្តី​ពី «គោល​នយោបាយ​ដីធ្លី​ទូលំ​ទូលាយ​មូលដ្ឋាន​គ្រឹះ​ក្នុង​ការ​អភិវឌ្ឍ​ទីក្រុង និង​ទី​ជនបទ​ប្រកប​ដោយ​ចីរភាព» ដោយ​មាន​ការ​ចូល​រួម​ពី​ដៃ​គូ​ពាក់​ព័ន្ធ និង​វាគ្មិន​បរទេស​ពី​ប្រទេស អាល្លឺម៉ង់ ថៃ ឡាវ វៀតណាម ហ្វីលីពីន ចិន បង់ក្លាដែស នេប៉ាល់ និង​ស៊ែប៊ី ជាង ៣៥០​នាក់។ សិក្ខា​សាលា​នេះ ជា​ឱកាស​ក្នុង​ការ​ផ្លាស់​ប្តូរ​ទស្សនៈ និង​បទ​ពិសោធ​លើ​ការងារ​ដីធ្លី ធនធាន​ធម្មជាតិ​និង​ការ​ប្រែ​ប្រួល​អាកាស​ធាតុ រវាង​ប្រទេស​អភិវឌ្ឍន៍ និង​ប្រទេស​កំពុង​អភិវឌ្ឍន៍។

លោក អ៊ឹម ឈុនលឹម រដ្ឋ​មន្រ្តី​ក្រសួង​រៀបចំ​ដែនដី នគរូប​នីយកម្ម និង​សំណង់ បាន​ថ្លែង​ក្នុង​សិក្ខា​សាលា​ថា បច្ចុប្បន្ន​នេះ ក្រសួង​បាន​កំពុង​រៀបចំ​គោល​នយោបាយ​ដីធ្លី​ទូលំ​ទូលាយ ហៅ​ថា សៀវភៅ​ស​ដីធ្លី ជា​ឯកសារ​វិភាគ​ដី​ធ្លី​នូវ​ស្ថានភាព​នៃ​ការ​កាន់​កាប់ ការ​ប្រើ​ប្រាស់ និង​ការ​គ្រប់​គ្រង​ដី​ធ្លី និង​ធនធាន​ធម្មជាតិ ឆ្លើយ​តប​ទៅ​នឹង​ការ​អភិវឌ្ឍ​សេដ្ឋកិច្ច​និង​សង្គម។

លោក​បន្ត​ថា៖ «ការ​ជួប​ប្រជុំ ជជែក​ពី​បញ្ហា​ដែល​កើត​មាន​ដោយ​សារ​ដីធ្លី គឺ​ជា​រឿង​សំខាន់ ដើម្បី​ជំរុញ​រក​វិធី​ដោះស្រាយ​ទាំង​ក្នុង​ទីក្រុង និង​ទី​ជនបទ។ យើង​មាន​ពាក្យ​ស្លោក​ថា «ដីធ្លី​គឺជា​ជីវិត» ហើយ​ដីធ្លី គឺជា​មូលដ្ឋាន​នៃ​ផលិត​កម្ម​អាហារ និង​សន្តិសុខ​ស្បៀង រួម​នឹង​ចំណង​ពាក់​ព័ន្ធ​លើ​បរិស្ថាន ធនធាន​ធម្មជាតិ និង​កំណើន​សេដ្ឋកិច្ច និង​សង្គម»។

បើ​តាម​លោក​រដ្ឋ​មន្ត្រី អ៊ឹម ឈុនលឹម រហូត​មក​ទល់​ពេល​នេះ រាជ​រដ្ឋាភិបាល​បាន​ចេញ​ប័ណ្ណ​កម្មសិទ្ធិ​ជាង ៣,៧ លាន​ប័ណ្ណ​ជូន​ដល់​ប្រជា​ពលរដ្ឋ ប្រមាណ ៥០ ភាគរយ នៃ​ក្បាល​ដី​សរុប​ទូទាំង​ប្រទេស និង​មាន​ផែន​ការ​ចុះ​បញ្ជី​ឲ្យ​បាន ៧០ ភាគរយ​ក្នុង ឆ្នាំ​២០១៨ និង​ឲ្យ​បាន ១០០ ភាគរយ​ក្នុង ឆ្នាំ​២០២៣។ ក្នុង​នោះ រយៈ​ពេល ២ ឆ្នាំ​ចុង​ក្រោយ​នេះ រដ្ឋាភិបាល​បាន​ផ្តល់​ដី​ជូន​ពលរដ្ឋ ប្រមាណ ១,២ លាន​ហិកតា សម្រាប់​ប្រមាណ ៤០ ម៉ឺន​គ្រួសារ។

អគ្គ​រដ្ឋ​ទូត​នៃ​ស្ថានទូត​អាល្លឺម៉ង់ ប្រចាំ​កម្ពុជា លោក Baron Marchall von Bieberstein ថ្លែង​ឲ្យ​ដឹង​ដែរ​ថា កម្ពុជា​បាន​និង​កំពុង​អភិវឌ្ឍ​ខ្លួន ក្នុង​វិស័យ​ដីធ្លី​ស្រប​តាម​គោល​នយោបាយ ប៉ុន្តែ បញ្ហា​មួយ​ចំនួន​នៅ​តែ​កើត​មាន ដែល​ទាម​ទារ​ឲ្យ​មាន​ការ​យក​ចិត្ត​ទុក​ដាក់ និង​ដោះ​ស្រាយ​ជា​បន្ទាន់។

លោក​បន្ត​ថា៖ «ក្នុង​នោះ​មាន​បញ្ហា​ជម្លោះ​ដីធ្លី​តំបន់​បឹង​កក់ តម្លៃ​ដីធ្លី​កើន​ឡើង​ថ្លៃ​ក្នុង​ទីក្រុង បញ្ហា​រំលោភ​សិទ្ធិ​ដីធ្លី និង​បញ្ហា​ចំណាក​ស្រុក ដែល​គ្មាន​សណ្តាប់​ធ្នាប់ គឺជា​ឧបសគ្គ​នៃ​ការ​អវិឌ្ឍ​ក្នុង​វិស័យ​នេះ»។

តួលេខ ដែល​កត់​ត្រា​ដោយ​គណៈកម្មការ​សុរិយោ​ដី​ក្នុង​ក្រប​ខ័ណ្ឌ​ទូទាំង​ប្រទេស ក្នុង ៦ ខែ​ដើម ឆ្នាំ​២០១៤ នេះ​ទទួល​បាន​បណ្តឹង​សរុប ៨៥ ករណី ដែល​ពាក់​ព័ន្ធ​នឹង​ពលរដ្ឋ​ប្រមាណ ៧០ គ្រួសារ​ប៉ុណ្ណោះ។ ប៉ុន្តែ​តាម​របាយ​ការណ៍ ក្នុង ៣ ខែ​ដើម ឆ្នាំ​២០១៤ របស់​សមាគម​សិទ្ធិ​មនុស្ស​អាដហុក មាន​ករណី​វិវាទ​ដីធ្លី​ត្រូវ​បាន​ស៊ើប​អង្កេត ៣៧ ករណី​ដែល​ប៉ះ​ពាល់​ដល់​ពលរដ្ឋ ២៦១៧ គ្រួសារ​ស្មើ​នឹង​ប្រមាណ ៦៤៧០ នាក់ និង​មាន​ទំហំ​ដី​សរុប​ជាង ៥៤០០ ហិកតា៕

អត្ថបទគួរចាប់អារម្មណ៍