The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ទុក​ពេល​ឲ្យ​ថៃ​ខណៈ​ថៃ​មិន​ទាន់​ទទួល​ស្គាល់​សាលដីកា ឡាអេ

កម្ពុជា​ទុក​ពេល​ឲ្យ​ថៃ​ខណៈ​ថៃ​មិន​ទាន់​ទទួល​ស្គាល់​សាលដីកា ឡាអេ

កម្ពុជា​ទុក​ពេល​ឲ្យ​ថៃ​ខណៈ​ថៃ​មិន​ទាន់​ទទួល​ស្គាល់​សាលដីកា ឡាអេ

Content image - Phnom Penh Post

ភ្នំពេញៈ កម្ពុជា​នឹង​មិន​ប្រញាប់​ប្រញាល់​ឲ្យ​ថៃ​ចាប់​ផ្តើម​ការ​ចរចា អំពី​របៀប​អនុវត្ត​សាលដីកា​ថ្ងៃ ទី១១ វិច្ឆិកា របស់​តុលាការ​យុត្តិធម៌​អន្តរជាតិ (ICJ) ទេ ពាក់​ព័ន្ធ​នឹង​ដី​ជុំវិញ​ប្រាសាទ​ព្រះ​វិហារ។ នេះ​បើ​តាម​រដ្ឋ​មន្រ្តី​ក្រសួង​ព័ត៌មាន លោក ខៀវ កាញារីទ្ធ ដែល​បាន​ថ្លែង​កាល​ពី​ម្សិលមិញ។

ឆ្លើយ​តប​នឹង​សំណួរ​របស់​អ្នក​កាសែត បន្ទាប់​ពី​កិច្ច​ប្រជុំ​ជាមួយ​ឯក​អគ្គ​រដ្ឋ​ទូត​ចិន លោក​ស្រី Bu Jianguo លោក ខៀវ កាញារីទ្ធ បាន​ថ្លែង​ថា រដ្ឋាភិបាល ចង់​ទុក​ពេល​ឲ្យ​នាយក​រដ្ឋ​មន្រ្តី​ថៃ លោក​ស្រី យីងឡាក់ ស៊ីណាវ៉ាត្រា ដក​ដង្ហើម​ឲ្យ​បាន​ស្រួល​សិន ខណៈ​លោក​ស្រី​កំពុង​ដោះស្រាយ​បញ្ហា​សម្ពាធ​ក្នុង​ស្រុក។

លោក​ស្រី យីងឡាក់ ប្រឈម​នឹង​ការ​តវ៉ា​ធំៗ​ប្រឆាំង​រដ្ឋាភិបាល​ពាក់​ព័ន្ធ​នឹង​សាល​ដីកា​របស់​តុលាការ​យុត្តិធម៌​អន្តរជាតិ​និង​សេចក្តី​ព្រាង​ច្បាប់​លើក​លែង​ទោស​នយោបាយ​ដែល​មាន​លក្ខណៈ​ចម្រូង​ចម្រាស​និង​សំណើ​ផ្លាស់​ប្តូរ​រដ្ឋ​ធម្មនុញ្ញ​ថៃ​ដទៃៗ​ទៀត។

លោក ខៀវ កាញារីទ្ធ បាន​ថ្លែង​កាល​ពី​ម្សិលមិញ​ថា៖ «ដោយ​សារ​ឥឡូវ​នេះ យើង​បាន​ឈ្នះ​នៅ ICJ យើង​មិន​ចង់​ឲ្យ​ពួក​ជ្រុល​និយម​ថៃ ប្រើ​បញ្ហា​នេះ​ដាក់​សម្ពាធ​បន្ថែម ទៅ​លើ​រដ្ឋាភិបាល​របស់​លោក​ស្រី យីងឡាក់ ទេ»។

លោក​បន្ត​ទៀត​ថា៖ «ប្រសិន​បើ​លោក​ស្រី អាច​ដោះស្រាយ​បញ្ហា​នេះ​បាន លោក​ស្រី​អាច​នឹង​មិន​ទទួល​វាសនា ដូច​បង​ប្រុស​របស់​លោក​ស្រី [លោក ថាក់ស៊ីន ស៊ីណាវ៉ាត្រា អតីត​នាយក​រដ្ឋ​មន្រ្តី​ថៃ ដែល​ត្រូវ​បាន​បណ្តេញ​ចេញ​ពី​តំណែង] ទេ។ លោក​បន្ត​ទៀត​ថា៖ «យើង​មិន​ចង់​ប្រញាប់​ប្រញាល់​ឬ​ដាក់​សម្ពាធ​ទៅ​លើ​ថៃ​ទេ ពីព្រោះ​យើង​ដឹង​ថា យើង​បាន​ឈ្នះ​សំណុំ​រឿង​នេះ​រួច​ហើយ»។

សាលដីកា ICJ កាល​ពី​សប្តាហ៍​មុន បាន​បញ្ជាក់​បំភ្លឺ​អំពី​អធិបតេយ្យ​របស់​កម្ពុជា ទៅ​លើ​តំបន់​ទាំង​មូល​នៃ​ប្រាសាទ​ព្រះវិហារ។ ប្រទេស​ទាំង​ពីរ នៅ​ត្រូវ​ការ​ការ​ឯកភាព​គ្នា ស្តី​ពី​របៀប​កំណត់​ខណ្ឌសីមា តំបន់​ទាំង​នេះ នៅ​លើ​ផ្ទៃ​ដី​ជាក់ស្តែង។ បញ្ហា​នៃ​តំបន់ ៤,៦ គីឡូម៉ែត្រ​ការ៉េ ដែល​លើក​ឡើង​ដោយ​ភាគី​ថៃ នៅ​មិន​ទាន់​ឈាន​ដល់​ការ​ឯកភាព​គ្នា​នៅ​ឡើយ​ទេ ហើយ​ក៏​នឹង​ត្រូវ​ដោះស្រាយ​ផង​ដែរ ដោយ​ទ្វេ​ភាគី ឬ​តាម​រយៈ​យន្តការ​អាស៊ាន។

131119_03a
បន្លាលួសដែលថៃដាក់ឃាំង នៅច្រកជណ្តើរឡើងពីទឹកដីថៃ មកកាន់ប្រាសាទព្រះវិហារ ហេង ជីវ័ន

រដ្ឋាភិបាល​ថៃ បាន​ថ្លែង​ថា ខ្លួន​មិន​ទាន់​ទទួល​ស្គាល់​ជា​ផ្លូវ​ការ​នៅ​ឡើយ​ទេ ចំពោះ​សេចក្តី​សម្រេច​របស់ ICJ ហើយ​នឹង​មិន​ដក​ទ័ព​ទេ រហូត​ដល់​ភាគី​ទាំង​ពីរ​បាន​ជួប​ប្រជុំ​គ្នា។

អ្នក​នាំ​ពាក្យ​ក្រសួង ការបរទេស ថៃ លោក Sek Wannamethee កាល​ពី​ម្សិលមិញ បាន​ស្វាគមន៍ ពាក្យ​សម្តី​របស់​លោក ខៀវ កាញារីទ្ធ។ លោក​ថ្លែង​ថា៖ «ខ្ញុំ​គិត​ថា វា​ឆ្លុះ​បញ្ចាំង​យ៉ាង​ជាក់​ច្បាស់​អំពី​អ្វី​ដែល​រដ្ឋ​មន្រ្តី​ការ​បរទេស​ទាំង​ពីរ បាន​ប្រកាស​កាល​ពី​ថ្ងៃ ទី២៨ តុលា»។

លោក​បន្ត​ថា៖ «ដំបូង កម្ពុជា​និង ថៃ ត្រូវ​ឆ្លង​កាត់​ដំណើរការ​ផ្ទៃ​ក្នុង ហើយ​យើង​ទាំង​ពីរ​យល់​ថា នៅ​ខាង​ថៃ ដោយ​សារ​តែ​សង្គម​ប្រជាធិបតេយ្យ​បើក​ចំហ វា​នឹង​មាន​ទស្សនៈ​ផ្សេងៗ​លើ​លទ្ធផល​នៃ​សាលដីកា​នោះ»។

លោក​បាន​លើក​ឡើង​ថា រដ្ឋ​មន្រ្តី​ការ​បរទេស​កម្ពុជា លោក ហោ ណាំហុង បាន​ថ្លែង​ថា លោក​យល់​ទាំង​ស្រុង​អំពី​បញ្ហា​នេះ។ លោក Wannamethee បាន​បន្ថែម​ថា គណៈកម្មាធិការ​របស់​ថៃ នឹង​ធ្វើ​ការ​ប្រជុំ​គ្នា​នៅ​ថ្ងៃ​នេះ​ដើម្បី «សិក្សា​និង​វិភាគ​សាលដីកា​នេះ» ខណៈ​ការ​បក​ប្រែ​ភាសា​ថៃ​ផ្លូវ​ការ នៃ​សាលដីកា​នេះ នៅ​កំពុង​ត្រូវ​បាន​អនុម័ត​នៅ​ឡើយ។

អ្នក​វិភាគ​នយោបាយ​ក្នុង​ស្រុក បាន​រិះគន់​ជំហ​ររបស់​រដ្ឋាភិបាល​កម្ពុជា កាល​ពី​ម្សិលមិញ។

លោក​បណ្ឌិត សុខ ទូច អ្នក​វិទ្យាសាស្រ្ត​នយោបាយ និង​ជា​សាកល​វិទ្យាធិការ​នៃ​សាកល​វិទ្យាល័យ ខេមរៈ បាន​ថ្លែង​ថា រដ្ឋ​សមាជិក​អង្គការ​សហ​ប្រជាជាតិ​ទាំង​អស់​មាន​កាតព្វកិច្ច​គោរព​តាម​សាលដីកា​របស់ ICJ។

លោក​បាន​បន្ត​ថា៖ «នេះ​ជា​ដំណោះស្រាយ​ដែល​ដោះស្រាយ​បញ្ហា​បូរណភាព​ទឹក​ដី និង​អធិបតេយ្យ​ដូច្នេះ​មិន​ចាំ​បាច់​ទុក​ពេល​វេលា​ឲ្យ​ថៃ ដោះស្រាយ​បញ្ហា​ផ្ទៃ​ក្នុង​របស់​ខ្លួន​ទេ»។ «ប្រសិន​បើ​ថៃ​បរាជ័យ មិន​គោរព​តាម​សាលដីកា កម្ពុជា មាន​សិទ្ធិ​ប្រើ​មធ្យោបាយ​ណា​មួយ ដើម្បី​អនុវត្ត​សេចក្តី​សម្រេច​របស់ ICJ ដែល​ថៃ​បរាជ័យ​មិន​គោរព​តាម»។

លោក​បន្ត​ថា៖ «អ្នក​នយោបាយ​មិន​គួរ​មាន​មនោសញ្ចេតនា​ទេ មិន​ថា​ជា​បញ្ហា​ផ្ទាល់​ខ្លួន ឬ​គ្រួសារ​ទេ បញ្ហា​ដែល​ពាក់​ព័ន្ធ​នឹង​អត្ថ​ប្រយោជន៍​ជាតិ កម្ពុជា​អាច​អនុវត្ត​បញ្ជា​របស់​តុលាការ​លើ​ប្រជាជន​ខ្មែរ​ខ្លួន​ឯង​បាន ចុះ​ហេតុ​អ្វី​មិន​ព្រម​អនុវត្ត​លើ​ជាតិ​សាសន៍​ដទៃ?»។

លោក​នាយក​រដ្ឋ​មន្រ្តី ហ៊ុន សែន ជា​មិត្តភក្តិ​ជិត​ស្និទ្ធ ជាមួយ​លោក ថាក់ស៊ីន ដែល​គេ​ជឿ​ផង​ដែរ​ថា លោក ថាក់ស៊ីន មាន​ឥទ្ធិពល​នៅ​ពី​ក្រោយ​រដ្ឋាភិបាល​ប្អូន​ស្រី​របស់​គាត់ បើ​ទោះ​បី​ជា​គាត់ រស់​នៅ​និរទេស​ក៏​ដោយ។

អ្នក​វិភាគ​នយោបាយ​លោក កែម ឡី បាន​ថ្លែង​ថា បើ​ទោះ​បី​ជា​បន្ទាត់​ព្រំដែន នឹង​ត្រូវ​ការ​បង្កើត​ដោយ​គណៈកម្មការ​ព្រំដែន​ចម្រុះ​ក៏​ដោយ ក៏​រដ្ឋាភិបាល​ថៃ គ្មាន​ហេតុ​ផល​ណា ដែល​ត្រូវ​រង់​ចាំ​ការ​ដក​ទ័ព​ពី​តំបន់​ប្រាសាទ​ដែរ។

លោក​បាន​ថ្លែង​បន្ត​ថា៖ «កងទ័ព​និង​ឆ្មាំ​ព្រំដែន​ទាំង​អស់​គួរ​ដក​ចេញ​ទាំង​ស្រុង​ហើយ​ពួក​គេ​ត្រូវ​តែ​គោរព​សាលដីកា នេះ​ជា​ឆន្ទៈ​ដែល​ថៃ​ត្រូវ​តែ​ធ្វើ​ដោយ​ស្ម័គ្រ​ចិត្ត»។ លោក​បន្ត​ថា៖ «ថៃ​ត្រូវ​តែ​ដោះស្រាយ​ជម្លោះ​ផ្ទៃ​ក្នុង​ដោយ​ខ្លួន​ឯង...​បើ​មិន​ដូច្នោះ​មិន​គោរព ICJ ឬ​អង្គការ​សហ​ប្រជាជាតិ​ទេ»៕ PS

អត្ថបទគួរចាប់អារម្មណ៍