The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ស្នើ IAEA ជួយ​លើ​ការ​ប្រើ​ប្រាស់​ឋាមពល​នុយក្លេអ៊ែរ

កម្ពុជា​ស្នើ IAEA ជួយ​លើ​ការ​ប្រើ​ប្រាស់​ឋាមពល​នុយក្លេអ៊ែរ

កម្ពុជា​ស្នើ IAEA ជួយ​លើ​ការ​ប្រើ​ប្រាស់​ឋាមពល​នុយក្លេអ៊ែរ

ភ្នំពេញៈ កម្ពុជា​បាន​ស្នើ​ទីភ្នាក់ងារ​ថាមពល​អាតូមិក​អន្តរជាតិ (IAEA) ឲ្យ​ជួយ​ធ្វើ​ការ​បណ្តុះ​បណ្តាល​ធនធាន​មនុស្ស នៅ​ក្នុង​ប្រទេស កម្ពុជា អំពី​ររៀប​ប្រើ​ប្រាស់​បច្ចេកវិទ្យា​ឋាមពល​នុយក្លេអ៊ែរ​សម្រាប់​ធ្វើ​ការ​អភិវឌ្ឍ​លើ​វិស័យ​កសិកម្ម និង​វិស័យ​សុខាភិបាល។

លោក អ៊ាង សុផល្លែត ជំនួយការ​ផ្ទាល់​របស់​លោក​នាយក​រដ្ឋ​មន្រ្តី ហ៊ុន សែន បាន​ថ្លែង​ថា សំណើ​នេះ​ត្រូវ​បាន​ធ្វើ​ឡើង បន្ទាប់​ពី​កិច្ច​ជំនួប​មួយ​រវាង​លោក​នាយក​រដ្ឋ​មន្រ្តី ហ៊ុន សែន និង​អគ្គ​នាយក​នៃ​ទីភ្នាក់ងារ​ថាមពល​អាតូមិក​អន្តរជាតិ​លោក Yukiya Amano កាល​ពី​ថ្ងៃ​អង្គារ​នៅ​វិមាន​សន្តិភាព​រាជធានី​ភ្នំពេញ។

បើ​តាម​លោក សុផល្លែត បាន​ឲ្យ​ដឹង​ថា លោក​នាយក​រដ្ឋ​មន្រ្តី ហ៊ុន សែន ក៏​បាន​សុំ​ឲ្យ IAEA ជួយ​តាក់តែង​ច្បាប់​ស្តី​អំពី​ថាមពល​នុយក្លេអ៊ែរ សម្រាប់​ក្រសួង រ៉ែ និង​ថាមពល​របស់​កម្ពុជា​ផង​ដែរ។

លោក សុផល្លែត បាន​ស្រង់​សម្តី​លោក​នាយក​រដ្ឋ​មន្រ្តី ដែល​បាន​និយាយ​ទៅ​កាន់​លោក Amano នៅ​ក្នុង​ជំនួប​នោះ​ថា៖ «កម្ពុជា​មិន​មាន​មហិច្ឆតា​ណា​មួយ​ក្នុង​ការ​ប្រើ​ប្រាស់​បច្ចេកវិទ្យា​នុយក្លេអ៊ែរ សម្រាប់​មហា​អំណាច​នុយក្លេរអ៊ែរ​ទេ»។

ចំណែក​លោក Amano បាន​ប្រាប់​លោក ហ៊ុន សែន ថា ថាមពល​នុយក្លេអ៊ែរ អាច​ប្រើ​សម្រាប់​ធ្វើ​ឲ្យ​ប្រសើរ​ឡើង​នូវ​ផលិតកម្ម​កសិកម្ម និង​នៅ​ក្នុង​វិស័យ​សុខាភិបាល។

លោក សុផល្លែត បាន​ស្រង់​សម្តី​លោក Amano ដែល​ប្រាប់​ទៅ​លោក​នាយក​រដ្ឋ​មន្រ្តី​ថា៖ «ដំណើរ​ទស្សនកិច្ច​របស់​ខ្ញុំ​មក​កាន់​ប្រទេស កម្ពុជា លើក​នេះ គឺ​ដើម្បី​រៀន​អំពី​ការ​រំពឹង​ទុក អំពី​ការ​ប្រើ​ប្រាស់​នៃ​បច្ចេកវិទ្យា​នុយក្លេអ៊ែរ។ វា​គឺ​អាស្រ័យ​ទៅ​លើ​រដ្ឋាភិបាល កម្ពុជា ថា តើ​ចង់​ប្រើ​ប្រាស់​បច្ចេកវិទ្យា​នេះ ឬ​អត់? ប៉ុន្តែ IAEA នឹង​ជួយ​កម្ពុជា​នៅ​ក្នុង​វិស័យ​នេះ [ប្រសិន​បើ​កម្ពុជា​ពិត​ជា​ចង់​ប្រើ​ប្រាស់​បច្ចេកវិទ្យា​នេះ​មែន​នោះ]»៕ PS

អត្ថបទគួរចាប់អារម្មណ៍