The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ស្វាគមន៍​ការ​ត្រឡប់​មក​វិញ​នៃ​ពិធី​បុណ្យ​អុំ​ទូក




កម្ពុជា​ស្វាគមន៍​ការ​ត្រឡប់​មក​វិញ​នៃ​ពិធី​បុណ្យ​អុំ​ទូក

ទិដ្ឋភាព និង​សកម្មភាព​របស់​ប្រជា​ពលរដ្ឋ និង​កីឡាករ-កីឡាការិនី​អុំទូក នៅ​ត្រើយ​ខាង​កើត កាល​ពី​ថ្ងៃ​ម្សិល​មិញ។
ទិដ្ឋភាព និង​សកម្មភាព​របស់​ប្រជា​ពលរដ្ឋ និង​កីឡាករ-កីឡាការិនី​អុំទូក នៅ​ត្រើយ​ខាង​កើត កាល​ពី​ថ្ងៃ​ម្សិល​មិញ។ ម៉ៃ វីរៈ

កម្ពុជា​ស្វាគមន៍​ការ​ត្រឡប់​មក​វិញ​នៃ​ពិធី​បុណ្យ​អុំ​ទូក

ភ្នំពេញៈ បួន​ឆ្នាំ​បន្ទាប់​ពីមាន​សោកនាដកម្ម​នៅ​កោះ​ពេជ្រ ហើយ​បន្ទាប់​ពី​ពិធី​បុណ្យ​អុំទូក​នេះ​បាន​លុប​ចោល ៣ ឆ្នាំ​ជាប់ៗ​គ្នា ពន្លឺ​ភ្លើង​ពណ៌ និង​ថាមពល នៃ​ពិធី​បុណ្យ​នេះ​បាន​វិល​ត្រឡប់​មក​តាម​ផ្លូវ និង​មាត់​ទន្លេ​មុខ​ព្រះ​បរម​រាជវាំង​ក្នុង​រាជធានី​ភ្នំពេញ​វិញ​ហើយ។ មនុស្ស​ជា​ច្រើន​ក៏​នឹង​វិល​មក​វិញ​ផង​ដែរ។

លោក ឈិន កេតនា អគ្គ​លេខាធិការ​នៃ​គណៈ​កម្មាធិការ​ជាតិ​រៀប​ចំ​បុណ្យ​ជាតិ និង​អន្តរជាតិ បាន​ថ្លែង​ថា៖ «យើង​ព្យាករ​ថា មនុស្ស​ប្រហែល ២ លាន​នាក់​នឹង​មក​ចូល​រួម»។

ចំពោះ​មនុស្ស​ជាច្រើន​នាក់ ការ​វិល​មក​វិញ​នៃ​ពិធី​បុណ្យ​នេះ នឹង​ធ្វើ​ឲ្យ​គេ​ចង​ចាំ​ពី​ការ​ឈឺ​ចាប់​នៃ​គ្រោះ​ថ្នាក់​ជាន់​គ្នា​ស្លាប់​នៅ​ស្ពាន​កោះ​ពេជ្រ​ដែល​សម្លាប់​មនុស្ស ៣៥៣ នាក់។ ហេតុ​ការណ៍​នេះ ត្រូវ​បាន​លោក​នាយក​រដ្ឋ​មន្រ្តី ហ៊ុន សែន ហៅ​ថា ជា​សោកនាដកម្ម​អាក្រក់​បំផុត​របស់​ប្រទេស ចាប់​តាំង​ពី​សម័យ ប៉ុល ពត។

ទិដ្ឋភាព​នៅ​តាម​មាត់​ទន្លេ​សាប ខាង​មុខ​ព្រះ​បរម​រាជវាំង កាល​ពី​ម្សិល​មិញ។
ទិដ្ឋភាព​នៅ​តាម​មាត់​ទន្លេ​សាប ខាង​មុខ​ព្រះ​បរម​រាជវាំង កាល​ពី​ម្សិល​មិញ។ ម៉ៃ វីរៈ

ដោយ​សោកនាដ​កម្ម​នេះ​នៅ​តែ​ថ្មី​សន្លាង​នៅ​ឡើយ ក្នុង​ខួរ​ក្បាល​របស់​ប្រជា​ពលរដ្ឋ មាន​ក្តី​កង្វល់​អំពី​សុវត្ថិភាព​ក្នុង​ពិធី​បុណ្យ​ឆ្នាំ​នេះ​ជា​ពិសេស ចាប់​តាំង​ពី​ការ​បាញ់​កាំ​ជ្រួច​ខុស​បច្ចេកទេស​បាន​សម្លាប់​និស្សិត ណាគ្រី ដារ៉ូ អាយុ ២២ ឆ្នាំ កាល​ពី​ថ្ងៃ​ពុធ សប្តាហ៍​មុន។

ប៉ុន្តែ លោក ខេង ទីតូ អ្នក​នាំ​ពាក្យ​កង​រាជ​អាវុធហត្ថ​បាន​ថ្លែង​កាល​ពី​ម្សិល​មិញ​ថា អាជ្ញាធរ​ដែល​នឹង​ផ្តល់​សេវា​គ្រប់​គ្រង​មនុស្ស ២៤ ម៉ោង នៅ​ក្នុង​ពិធី​បុណ្យ គឺ​ប្រហែល ១ ម៉ឺន​នាក់ បាន​ទទួល​ការ​បណ្តុះ​បណ្តាល​សង្គ្រោះ​បន្ទាន់​ជា​ប្រចាំ ចាប់​តាំង​ពី​គ្រោះ​ថ្នាក់​ជាន់​គ្នា​នៅ​កោះ​ពេជ្រ​មក។

លោក​បន្ថែម​ថា៖ «នគរបាល និង​កង​រាជ​អាវុធហត្ថ​បាន​ត្រៀម​ការពារ​សុវត្ថិភាព​ជូន​ប្រជាជន ដែល​ចង់​ចូល​រួម​ក្នុង​ពិធី​បុណ្យ។ [មន្រ្តី] បាន​ទទួល​ការ​បណ្តុះ​បណ្តាល ៤ ឬ ៥ ដង​ក្នុង​មួយ​ឆ្នាំ។ ឆ្នាំ​នេះ យើង​នឹង​មាន​វត្តមាន​ច្រើន»។

សញ្ញា​តាម​ផ្លូវ​កាល​ពី​ម្សិល​មិញ បាន​បង្ហាញ​ថា ការ​សម្រាក​រយៈ​ពេល ៣ ឆ្នាំ​មក​នេះ ពុំ​បាន​ធ្វើ​ឲ្យ​អារម្មណ៍​ពុះ​កញ្ជ្រោល​ចូល​រួម​ក្នុង​ពិធី​នេះ​ខ្លាំង​ឡើយ។ លោក ខូវ លីមហៀង អាយុ ១៨ ឆ្នាំ ជា​សិស្ស​វិទ្យាល័យ​ម្នាក់​នៅ​ភ្នំពេញ បាន​ថ្លែង​ថា៖ «យើង​ចង់​មើល​ទូក​ប្រណាំង ប៉ុន្តែ​យើង​ក៏​ចូល​ចិត្ត​មក​ទី​នេះ ដើម្បី​ញ៉ាំ​អាហារ​ផង​ដែរ។ បន្ទាប់​ពី​គ្រោះ​ថ្នាក់​ជាន់​គ្នា​ស្លាប់​កាល​ពី ៣ ឆ្នាំ​មុន​សុវត្ថិភាព​គឺ​ជា​ក្តី​កង្វល់​ធំ​ចំពោះ​យើង...»។

គណបក្ស​សង្គ្រោះ​ជាតិ បាន​ចោទ​សួរ​ពី​សមត្ថភាព​របស់​នគរបាល​ក្នុង​ការ​ឆ្លើយ​តប​នឹង​ស្ថាន​ការណ៍​អាសន្ន។ លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ បាន​ថ្លែង​កាល​ពី​ម្សិល​មិញ​ថា៖ «យើង​មិន​ចង់​ឃើញ​អ្នក​ណា​ម្នាក់​ស្លាប់​ក្នុង​ពិធី​នេះ​ម្តង​ទៀត​ទេ។ ខ្ញុំ​ជឿ​ជាក់​ថា ផ្អែក​លើ​អ្វី​ដែល​បាន​កើត​ឡើង​កាល​ពី ឆ្នាំ​២០១០ និង​គ្រោះ​ថ្នាក់​បាញ់​កាំជ្រួច​សប្តាហ៍​មុន នគរបាល​នឹង​យក​ចិត្ត​ទុក​ដាក់​លើ​សុវត្ថិភាព​របស់​ពលរដ្ឋ... ប្រសិន​បើ​មិន​មាន​សុវត្ថិភាព​ទេ ពួក​គេ​គ្មាន​សមត្ថភាព​ការពារ​ប្រទេស​ជាតិ​ទេ»។

នៅ​ច្រាំង​ម្ខាង​នៃ​ទន្លេ​នៅ ខណ្ឌ​ជ្រោយ​ចង្វារ មនុស្ស​ជាច្រើន​កំពុង​សាង​សង់​កន្លែង​ស្នាក់​នៅ​យ៉ាង​លឿន។ ក្រុម​កីឡាករ​អុំ​ទូក​សម្រាក​ក្រោម​តង់ ខណៈ​ដែល​កម្មករ​រៀបចំ​ឆាក​ប្រគំ​តន្រ្តី។ បន្ទាប់​ពី​ការ​ប្រណាំង​សាកល្បង​រយៈ​ពេល ៣ ថ្ងៃ​កន្លង​មក​នេះ ការ​ប្រកួត​ពិត​ប្រាកដ​នឹង​ចាប់​ផ្តើម​នៅ​ព្រឹក​នេះ នឹង​មាន​ទូក​ជាង ២៤០ ទូក​ចូល​រួម​ក្នុង​ការ​ប្រណាំង។

រថយន្ត​ដឹក​កីឡាករ​ប្រណាំង​ទូក​នៅ​តាម​ផ្លូវ​ក្បែរ​មាត់​ទន្លេ​កាល​ពី​ម្សិល​មិញ។
រថយន្ត​ដឹក​កីឡាករ​ប្រណាំង​ទូក​នៅ​តាម​ផ្លូវ​ក្បែរ​មាត់​ទន្លេ​កាល​ពី​ម្សិល​មិញ។ ម៉ៃ វីរៈ

លោក ឡៅ អេង ប្រធាន​ក្រុម​ទូក​មក​ពី ស្រុក​ខ្សាច់​កណ្តាល ខេត្ត​កណ្តាល បាន​ថ្លែង​ថា៖ «យើង​បាន​ឈ្នះ ៤ លើក​ពី​មុន។ យើង​សង្ឃឹម​ឈ្នះ​ម្តង​ទៀត។ យើង​ត្រូវ​យក​ជ័យជម្នះ​ទៅ​ភូមិ​យើង​វិញ​ដើម្បី​ចែក​រំលែក​ជាមួយ​នឹង​អ្នក​ភូមិ​យើង»។ ក្រុម​នេះ ដែល​មាន​មនុស្ស​ប្រហែល ១៦០ នាក់ ត្រូវ​បាន​ឧបត្ថម្ភ​ដោយ​វត្ត​ក្នុង​ស្រុក​របស់​ពួក​គេ ដោយ​មាន​ជំនួយ​ពី​ឯកឧត្តម ដែល​មិន​ប្រាប់​ឈ្មោះ។ ក្នុង​ក្រុម​នេះ ក៏​មាន​ចុងភៅ ៣ នាក់​ផង​ដែរ ដែល​នឹង​ទទួល​បន្ទុក​ផ្តល់​ម្ហូប​អាហារ​ដល់​ក្រុម ៣ ពេល​ក្នុង​មួយ​ថ្ងៃ។

លោក អេង បាន​បញ្ជាក់​ថា៖ «ម្ហូប​អាហារ​ទាំង​អស់ យើង​ទិញ​ពី​ផ្សារ។ យើង​ចំណាយ ៥០០ ដុល្លារ​ក្នុង​មួយ​ថ្ងៃ»។

លោក​បន្ថែម​ថា ជា​លើក ទី១ ក្រុម​លោក​បញ្ជូន​ទូក​ពីរ​ចូល​ប្រណំាង​ក្នុង​ពិធី​បុណ្យ​អុំ​ទូក​នេះ។

លោក​បន្ត​ថា៖ «ទូក ទី១ របស់​យើង មាន​ឈ្មោះ​ថា សារាយ​ពុទ្ធ​សែន​ជ័យ។ ឈ្មោះ​នេះ យើង​ធ្លាប់​មាន​ក្នុង​អំឡុង​សម័យ​សម្ដេច​ឪ។ ប៉ុន្តែ វា​ត្រូវ​បាន​បំផ្លាញ​ក្នុង​សម័យ ប៉ុល ពត។ យើង​បាន​ធ្វើ​ទូក​ថ្មី ដោយ​ទុក​ឈ្មោះ​នោះ។ ប្រជាជន​យើង​ស្គាល់​ពី​ឈ្មោះ​នេះ»។ បន្ទាប់​ពី​រង់​ចាំ​រយៈ​ពេល ៣ ឆ្នាំ ក្រុម​នេះ​ត្រៀម​ជា​ស្រេច​ដើម្បី​បញ្ចេញ​ទូក ទី២។

កន្លែង​ដែល​លោក ណាគ្រី ដារ៉ូ ស្លាប់​ដោយ​សារ​បំណែក​កាំជ្រួច​ក្បែរ​សណ្ឋាគារ សុខា មាន​មនុស្ស​ច្រើន​កាល​ពី​ម្សិល​មិញ ហើយ​នឹង​មាន​មនុស្ស​ច្រើន​នៅ​ទីនោះ​រយៈ​ពេល​ប៉ុន្មាន​ថ្ងៃ​ទៀត។

មន្រ្តី​ថា កាំជ្រួច​ក្នុង​ពិធី​បុណ្យ​អុំទូក​នឹង​បាញ់​ពី​លើ​សាឡង់។ លោក កេតនា អគ្គ​លេខាធិការ​គណៈ​កម្មាធិការ​រៀបចំ​បុណ្យ​ជាតិ និង​អន្តរជាតិ បាន​បញ្ជាក់​ថា៖ «យើង​បាន​គិត​ពី​សុវត្ថិភាព​របស់​ប្រជាជន...កាំ​ជ្រួច​នឹង​បាញ់​ពី​កណ្តាល​ទន្លេ។ យើង​នឹង​បាញ់​កាំជ្រួច​រាល់​ថ្ងៃ។ ថ្ងៃ​នេះ យើង​នឹង​បាញ់ ២០ នាទី ពេល​បណ្តែត​ប្រទីប»។

លោក​បាន​បន្ថែម​ថា ការ​បាញ់​កាំ​ជ្រួច​មួយ​ទៀត​នឹង​ធ្វើ​ឡើង​នៅ​ពាក់​កណ្តាល​យប់​ថ្ងៃ​ស្អែក។

លោក​បញ្ជាក់​ថា៖ «ថ្ងៃ ទី២ គឺ​សំខាន់​ណាស់។ ពាក់​កណ្តាល​អធ្រាត្រ គឺជា​ពេល​ប្រជាជន​អក​អំបុក ជាមួយ​នឹង​ចេក និង​ដូង។ ព្រះចន្ទ​នឹង​ភ្លឺ ហើយ​ប្រជាជន​នឹង​បួង​សួង»។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​បាន​ថ្លែង​ថា អាជីវករ​ជាង ៧០០ នាក់ បាន​ទទួល​ការ​អនុញ្ញាត​ឲ្យ​រៀបចំ​ស្តង់​លក់។

លោក​បាន​បន្ថែម​ថា ស្តង់​ភាគ​ច្រើន​នៅ​កោះ​ពេជ្រ។ ស្តង់​ផ្សេង​ទៀត​ត្រូវ​បាន​រៀបចំ​មុខ​វត្ត​បទុមវតី កាល​ពី​ម្សិល​មិញ និង​ខាង​ត្បូង​តាម​បណ្តោយ​មហា​វិថី​សុធារស។

លោក ឌីម៉ង់ បាន​បន្ត​ថា ការ​ប្រគំ​តន្រ្តី​បន្ត​ផ្ទាល់​ក៏​បាន​គ្រោង​សម្រាប់​ពេល​យប់​នៅ​ជុំវិញ​កោះ​ពេជ្រ វត្ត​បទុម​វតី វត្ត​ភ្នំ និង​ជ្រោយ​ចង្វារ។

ស្តង់​ដែល​គេ​សង់​សម្រាប់​​ត្រៀម​លក់​អីវ៉ាន់​នៅ​កោះ​ពេជ្រ​កាល​ពី​ម្សិល​មិញ។
ស្តង់​ដែល​គេ​សង់​សម្រាប់​​ត្រៀម​លក់​អីវ៉ាន់​នៅ​កោះ​ពេជ្រ​កាល​ពី​ម្សិល​មិញ។ ម៉ៃ វីរៈ

លោក ខេង ទីតូ អ្នក​នាំ​ពាក្យ​កង​រាជ​អាវុធហត្ថ​បញ្ជាក់​ថា អាជ្ញាធរ​ព្រួយ​បារម្ភ​ពី​ការ​កក​ស្ទះ​ចរាចរណ៍ និង​គ្រោះ​ថ្នាក់។ លោក​បាន​បន្ត​ថា៖ «យើង​ជំរុញ​ឲ្យ​អ្នក​ប្រើ​ប្រាស់​ផ្លូវ​ដោយ​ប្រុង​ប្រយ័ត្ន។ កោះ​ពេជ្រ​និង​ផ្សារ​អ៊ីអន នឹង​ជា​ចំណុច​ផ្តោត​ខ្លាំង​របស់​យើង»។

លោក ជា សុខហៀក អ្នក​គ្រប់​គ្រង​ទូទៅ​នៃ​ផ្សារ​សូរិយា ដែល​ជា​ផ្សារ​ធំ ទី២ បន្ទាប់​ពី​ផ្សារ​អ៊ីអន ក៏​រំពឹង​ថា នឹង​មាន​មនុស្ស​ច្រើន​មក​ផ្សារ​ផង​ដែរ។

យោង​តាម​លោក សុខហៀក បាន​ឲ្យ​ដឹង​ថា ផ្សារ​មាន​មនុស្ស​ប្រហែល ១ ម៉ឺន​នាក់ នៅ​ថ្ងៃ​ធ្វើ​ការ និង ២ ម៉ឺន​នាក់​នៅ​ថ្ងៃ​ចុង​សប្តាហ៍។ ប៉ុន្តែ ផ្អែក​លើ​ចំនួន​មនុស្ស​កាល​ពី​ពិធី​បុណ្យ​អុំ​ទូក ឆ្នាំ​២០១០ លោក សុខ ហៀក រំពឹង​ថា មាន​មនុស្ស​ពី ៧ ម៉ឺន ទៅ ១ សែន​នាក់​មក​ផ្សារ​សូរិយា ក្នុង​អំឡុង​ពិធី​បុណ្យ​អុំទូក។

លោក សុខហៀក បន្ថែម​ទៀត​ថា៖ «មាន​កន្លែង​ច្រើន​ថែម​ទៀត​នៅ​ភ្នំពេញ​សម្រាប់​មនុស្ស​មក​លេង​ឥឡូវ​នេះ។ ខ្ញុំ​គិត​ថា ផ្សារ​យើង​នឹង​ទាក់​ទាញ​មនុស្ស​ច្រើន​ក្នុង​អំឡុង​ពិធី​បុណ្យ​អុំ​ទូក»។

លោក​បន្ថែម​ថា៖ «យើង​បាន​បន្ថែម​បុគ្គលិក និង​សន្តិសុខ​នៅ​គ្រប់​ជាន់​ក្នុង​ផ្សារ ដើម្បី​ធានា​សន្តិសុខ»។

ប៉ុន្តែ លោក ទីតូ បាន​បញ្ជាក់​ថា ប្រជាជន​ត្រូវ​ប្រុង​ប្រយ័ត្ន​ខ្លួន​ឯង និង​អ្នក​ដទៃ។ «កុំ​ទៅ​កន្លែង​ចង្អៀត​ដែល​អាច​បង្ក​បញ្ហា​ដល់​អ្នក។ សូម​សហការ​ជាមួយ​នឹង​អាជ្ញាធរ និង​រាយ​ការណ៍​ពី​ហេតុ​ការណ៍​ដែល​អ្នក​មើល​ឃើញ»។

ដោយ​គិត​ពី​សុវត្ថិភាព​ផ្ទាល់​ខ្លួន អ្នក​ស្រី Katja មក​ពី ប្រទេស​ហូឡង់ ដែល​បាន​មើល​ទូក​កាល​ពី​ម្សិល​មិញ កំពុង​ត្រៀម​ចេញ​ដើរ​នៅ​ថ្ងៃ​នេះ។

អ្នក​ស្រី​បាន​ថ្លែង​ថា៖ «ខ្ញុំ​គិត​ថា វា​ជា​ពិធី​បុណ្យ​អស្ចារ្យ​សំខាន់​ណាស់​ចំពោះ​ពលរដ្ឋ​ក្នុង​ប្រទេស​នេះ។ មនុស្ស​ជាច្រើន​បាន​មក​ហើយ ដូច្នេះ វា​ជា​បរិយាកាស​អស្ចារ្យ​មួយ»៕

រាយការណ៍​បន្ថែម​ដោយ ហ៊ គឹមសាយ

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។