ភ្នំពេញៈ ហេដ្ឋារចនាសម្ព័ន្ធផ្លូវថ្នល់គឺជាសរសៃឈាមដ៏សំខាន់ក្នុងការអភិវឌ្ឍសេដ្ឋកិច្ចសង្គមនៅកម្ពុជា។ នេះជាការលើកឡើងរបស់លោក ផាក ហ៊ឹងឃ្យុង ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជា។
ក្នុងពិធីបើកការដ្ឋានស្តារ និងសាងសង់ផ្លូវជាតិលេខ ២ និងលេខ ២២ ដែលត្រូវបានធ្វើឡើងកាលពីព្រឹកថ្ងៃម្សិលមិញលោក ផាក បានថ្លែងថា ការស្ដារ និងអភិវឌ្ឍន៍ផ្លូវជាតិទាំង ២ ខ្សែនាពេលនេះគឺជាការតភ្ជាប់បណ្ដាញផ្លូវមិនត្រឹមតែនៅក្នុងប្រទេសកម្ពុជាប៉ុណ្ណោះទេ ថែមទាំងជាការតភ្ជាប់រវាងព្រំដែននៃប្រទេសកម្ពុជា និង ប្រទេសវៀតណាមដែលនឹងនាំមកនូវការសម្រួលការធ្វើចរាចរណ៍ដឹកជញ្ជូនទំនិញនៃប្រទេសទាំង ២ (កម្ពុជា-វៀតណាម) ផងដែរ។
លោកថ្លែងថា៖ «ការកសាងហេដ្ឋារចនាសម្ព័ន្ធផ្លូវថ្នល់គឺជាការកសាងសរសៃឈាមដ៏សំខាន់ក្នុងការអភិវឌ្ឍសេដ្ឋកិច្ចសង្គមនៅកម្ពុជា។ យើងរីករាយដែលបានចូលរួមនៅក្នុងគម្រោងដ៏សំខាន់នេះជាមួយកម្ពុជា»។
លោកផាកបានថ្លែងឲ្យដឹងផងដែរថា រដ្ឋាភិបាលកូរ៉េនឹងបន្តពង្រឹងកិច្ចសហប្រតិបត្តិការជាមួយកម្ពុជា ដើម្បីលើកកម្ពស់អភិបាលសេដ្ឋកិច្ចនៅកម្ពុជា និងដើម្បីភាពរីកចម្រើនរបស់ប្រជាជាតិនៃប្រទេសទាំង ២ (កម្ពុជា-កូរ៉េ) ផងដែរ។
នៅក្នុងឱកាសនោះលោកនាយករដ្ឋមន្ត្រី ហ៊ុន សែន បានមានប្រសាសន៍ថា ការអភិវឌ្ឍបណ្ដាញផ្លូវ មិនមែនសម្រាប់តភ្ជាប់តែនៅក្នុងប្រទេសនោះទេ តែត្រូវតភ្ជាប់ជាមួយប្រទេសជិតខាង ដើម្បីសម្រួលដល់ការធ្វើពាណិជ្ជកម្មរបស់ប្រជាពលរដ្ឋកម្ពុជា និងប្រទេសជិតខាង ហើយនៅពេលនេះ «មិត្តកូរ៉េបានជួយតភ្ជាប់បណ្ដាញផ្លូវឲ្យយើង» ទៅជាប់ជាមួយបណ្ដាញផ្លូវរបស់វៀតណាម ដែលអាចសម្រួលដល់ការផ្លាស់ប្ដូរពាណិជ្ជកម្មកម្ពុជា-វៀតណាម។
លោកបានបន្តថា មិនមែនតែផ្លូវ ២ ខ្សែនោះទេ ផ្លូវលេខ ២១ ដែលបាននិងកំពុងអភិវឌ្ឍសាងសង់ពីខេត្តកណ្ដាលទៅជ្រៃធំជាប់ព្រំប្រទល់ប្រទេសវៀតណាមរួមទាំងផ្លូវជាតិលេខ ៤៨ ដែលតភ្ជាប់ពីខេត្តកោះកុងមកផ្លូវជាតិលេខ ៤ ក៏ជាជំនួយហិរញ្ញប្បទានរបស់រដ្ឋាភិបាលសាធារណរដ្ឋកូរ៉េផងដែរ។
លោក ហ៊ុន សែន ថ្លែងថា៖ «ខ្ញុំសូមអរគុណរដ្ឋាភិបាល និងពលរដ្ឋកូរ៉េដែលបានគាំទ្រការអភិវឌ្ឍរបស់កម្ពុជា។ ការតភ្ជាប់ទំនាក់ទំនងខាងនយោបាយ និងរដ្ឋបាល វាមិនគ្រប់គ្រាន់ទេ តែវាត្រូវមានការតភ្ជាប់ជារូបវន្ត សំខាន់សំដៅលើការតភ្ជាប់បណ្ដាញផ្លូវថ្នល់នេះតែម្ដង»។
យោងតាមរបាយការណ៍របស់ក្រសួងសាធារណការ និងដឹកជញ្ជូន គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ២ និងផ្លូវជាតិលេខ ២២ មានប្រវែងសរុប ៧២.១៧ គីឡូម៉ែត្រនឹងត្រូវសាងសង់ជាប្រភេទផ្លូវបេតុងកៅស៊ូ AC ដោយគ្រោងចំណាយថវិកាសរុបប្រមាណ ៥៦.១ លានដុល្លារអាមេរិកជាហិរញ្ញប្បទានពីរដ្ឋាភិបាលសាធារណរដ្ឋកូរ៉េរួមជាមួយថវិកាបដិភាគរបស់រាជរដ្ឋាភិបាលកម្ពុជា។ ក្នុងនោះកំណាត់ផ្លូវជាតិលេខ ២ ចាប់ពីរង្វង់មូលតាខ្មៅដល់អូរចំបក់ខេត្តតាកែវមានប្រវែង ៦២.៥៦ គីឡូម៉ែត្រ (ឆ្លងកាត់រាជធានីភ្នំពេញ ខេត្តកណ្តាល និងខេត្តតាកែវ) និងផ្លូវជាតិ ២២ ពីអូរចំបក់ដល់អង្គតាសោមមានប្រវែង ៩.៦១ គីឡូម៉ែត្រស្ថិតក្នុងភូមិសាស្ត្រ ខេត្តតាកែវ។
ក្រុមហ៊ុន Hanshin Engineering & Construction Co., Ltd របស់កូរ៉េខាងត្បូងជាអ្នកប្រតិបត្តិការសាងសង់ផ្លូវទាំង ២ ខ្សែនេះ និងមានការត្រួតពិនិត្យបច្ចេកទេសសាងសង់ដោយសម្ព័ន្ធក្រុមហ៊ុនទីប្រឹក្សាបច្ចេកទេស Dasan Consultants Co., Ltd, Dong Il Engineering Consultants Co., Ltd, និង Seoyoung Engineering Co., Ltd Joint Venture ដោយប្រើរយៈពេលសាងសង់ចំនួន ៣០ ខែគិតចាប់ពីខែតុលា ឆ្នាំ ២០១៩ រហូតដល់ខែមេសា ឆ្នាំ ២០២២។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា៖ «ការស្ដារ និងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូនបានដើរតួនាទីយ៉ាងសំខាន់ក្នុងការធ្វើសមាហរណកម្មតភ្ជាប់ទំនាក់ទំនង និងការផ្លាស់ប្ដូរទំហំពាណិជ្ជកម្មនៅក្នុងតំបន់ ដើម្បីចូលរួមចំណែកអភិវឌ្ឍវិស័យសេដ្ឋកិច្ច និង ទេសចរណ៍ និងរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍នៅកម្ពុជាផងដែរ»។
លោកបានថ្លែងថា បន្ទាប់ពីការសាងសង់រួចជាស្ថាពរ ផ្លូវជាតិលេខ ២ និងលេខ ២២ នេះនឹងក្លាយជាខ្សែផ្លូវដ៏រឹងមាំមានលក្ខណៈធំទូលាយដែលអាចចូលរួមចំណែកលើកកម្ពស់ប្រសិទ្ធភាពនៃការធ្វើដំណើរ និងប្រព័ន្ធភ័ស្តុភារកម្មរបស់កម្ពុជាសំដៅសម្រួលដល់ការដឹកជញ្ជូនផលិតផល ដំណាំកសិផល និងកសិឧស្សាហកម្មរបស់ក្រុមហ៊ុនវិនិយោគ និងបងប្អូនប្រជាពលរដ្ឋមកពីគ្រប់តំបន់នៅទូទាំងប្រទេសទៅកាន់ទីផ្សារក្នុងស្រុក និងទីផ្សារអន្តរជាតិ កម្ពុជា-វៀតណាម (ភ្នំដិន-ទិញបៀន) ប្រកបដោយភាពងាយស្រួល ឆាប់រហ័ស និងចំណាយតិច។
យោងតាមប្រសាសន៍របស់លោក ហ៊ុន សែន បញ្ហាផ្លូវថ្នល់មិនមែនជារឿងថ្មីថ្មោងនោះទេ។ កាលពី ៣៣ ឆ្នាំមុនលោកនាយករដ្ឋមន្ត្រីធ្លាប់បានប្រកាសឲ្យសហការីរបស់លោកផ្ដោតការយកចិត្តទុកដាក់ និងផ្ដល់អាទិភាពទៅលើការអភិវឌ្ឍធនធានមនុស្ស ទឹក ភ្លើង និង ផ្លូវថ្នល់នេះ ហើយ ៣៣ ឆ្នាំក្រោយ ចក្ខុវិស័យនេះបានឆ្លើយតបជាវិជ្ជមាន ហើយវាអាចនឹងនៅតែត្រឹមត្រូវសម្រាប់រយៈពេល ១០០ ឆ្នាំខាងមុខទៀត។
លោកបានលើកជាសំណួរដើម្បីឲ្យប្រជាពលរដ្ឋកម្ពុជាពិចារណាផងដែរថា «តើយើងអាចអភិវឌ្ឍន៍សេដ្ឋកិច្ចសង្គមបានយ៉ាងដូចម្ដេច បើយើងផលិតកសិផល ឬផលិតផលបានហើយគ្មានផ្លូវដឹកជញ្ជូន ឬការចំណាយលើថ្លៃដឹកជញ្ជូនវាថ្លៃពេកនោះ?» តាមរយៈការអភិវឌ្ឍហេដ្ឋារចនាសម្ព័ន្ធផ្លូវថ្នល់នេះរដ្ឋាភិបាលបានផ្ដល់អត្ថប្រយោជន៍ច្រើនណាស់ដែលកាលពីមុនផ្លូវលំបាកប្រជាពលរដ្ឋត្រូវចំណាយថវិកាអស់ច្រើន និងប្រើពេលយូរ តែពេលនេះចំណាយថវិកាតិច ពេលតិច៕