.jpg)
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានអចិន្រៃ្តយ៍ គណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងកាលពីម្សិលមិញ។ វ៉ន ដារ៉ា
ភ្នំពេញៈ រដ្ឋាភិបាលនឹងធ្វើវិសោធនកម្មច្បាប់ចរាចរណ៍ផ្លូវគោកឡើងវិញជាថ្មីទៀត ដើម្បីរឹតបន្តឹងបន្ថែម ខណៈដែលចំនួនអ្នកស្លាប់ដោយសារគ្រោះថ្នាក់ចរាចរណ៍នៅតែបន្តកើនឡើងខ្ពស់ដោយក្នុងឆ្នាំ ២០១៨ មានអ្នកស្លាប់រហូតដល់ចំនួន ១៨០០ នាក់ហើយនៅក្នុងឆ្នាំ ២០១៩ នេះអាចនឹងមានអ្នកស្លាប់កើនឡើងរហូតដល់ជាង ២០០០ នាក់ដែលគិតជាមធ្យមមានអ្នកស្លាប់ពី ៥ ទៅ ៦ នាក់ជារៀងរាល់ថ្ងៃ។
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានអចិន្រៃ្តយ៍ គណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងកាលពីថ្ងៃព្រហស្បតិ៍ម្សិលមិញក្នុងសន្និសីទប្រចាំឆ្នាំលើកទី ២ ស្ដីពីសុវត្ថិភាពចរាចរណ៍ផ្លូវគោកនៅកម្ពុជាថា ស្ថាប័នពាក់ព័ន្ធនឹងខិតខំប្រឹងប្រែងបន្តធ្វើការថែមទៀតក្នុងការរឹតបន្តឹងឲ្យមានការគោរពច្បាប់ចរាចរណ៍ដើម្បីកាត់បន្ថយគ្រោះថ្នាក់។ «សម្ដេចក្រឡាហោម (ស ខេង) បានផ្ដល់អនុសាសន៍ឲ្យយើងបង្កើតក្រុមការងារមួយធ្វើវិសោធនកម្មច្បាប់ចរាចរណ៍ផ្លូវគោកម្ដងទៀតដើម្បីរឹតបន្តឹង និងពិន័យឲ្យបានតឹងរ៉ឹងថែមទៀត»។
លោកបន្ដថា ការធ្វើវិសោធនកម្មច្បាប់នេះ សំដៅពិនិត្យលើរថយន្ដកែច្នៃ និងរថយន្ដដឹកទំនិញ លើសទម្ងន់កំណត់ និងខុសលក្ខណៈបច្ចេកទេសជាដើម ដែលត្រូវតែកែប្រែឡើងវិញ។
បើតាមលោករដ្ឋមន្ដ្រីច្បាប់ចរាចរណ៍របស់ប្រទេសកម្ពុជានាពេលបច្ចុប្បន្ន បើប្រៀបធៀបជាមួយប្រទេសដទៃគឺនៅមានចំណុចខ្វះខាតនៅឡើយ ដែលត្រូវពិនិត្យមើលដើម្បីធ្វើវិសោធនកម្ម ពិសេសលើចំណុចបច្ចេកទេស និងលក្ខណៈយានយន្ដ។
លោកលើកឧទាហរណ៍ចំពោះការធ្វើវិសោធនកម្មច្បាប់នេះថា៖ «បើឡានដឹកលើសទម្ងន់ខ្លាំងពេក យើងអាចរឹបអូសទុករយៈពេល ១ ខែជាដើម ដើម្បីធ្វើម៉េចរឹតបន្តឹងច្បាប់។ វិសោធនកម្មច្បាប់នេះក៏ធ្វើឡើងដើម្បីកុំឲ្យផ្លូវយើងខូចខាតផងត្រួតពិនិត្យមើលលើការកែច្នៃខុសលក្ខណៈបច្ចេកទេសរបស់យានយន្ដផង និងឲ្យពលរដ្ឋនាំគ្នាគោរពច្បាប់ចរាចរណ៍ទាំងអស់គ្នាផង»។
លោកបន្តថា៖ «យើងទើបតែបង្កើតក្រុមការងារ ដើម្បីសិក្សាគ្រប់ជ្រុងជ្រោយទាំងអស់ មុននឹងយើងធ្វើវិសោធនកម្មច្បាប់ចរាចរណ៍នេះឡើងវិញ។ យើងធ្វើនេះ គឺត្រូវមើលឲ្យបានគ្រប់ជ្រុងជ្រោយដើម្បីកែច្បាប់នេះឡើងវិញ»។
លោកលើកឡើងថា ចំនួនអ្នកស្លាប់ដោយសារគ្រោះថ្នាក់ចរាចរណ៍នៅកម្ពុជាក្នុងឆ្នាំ ២០១៨ មានចំនួន ១៨០០ នាក់ក្នុង ១ ខែមាន ១៥០ នាក់ និងស្លាប់ក្នុងរង្វង់ចាប់ពី ៥-៦ នាក់ក្នុង ១ ថ្ងៃដែលចំនួននេះធំធេងណាស់ ធ្វើឲ្យរាជដ្ឋាភិបាលមានការព្រួយបារម្ភខ្លាំង។ ដូច្នេះតាមរយៈការខិតខំប្រឹងប្រែង និងការធ្វើវិសោធនកម្មច្បាប់ឡើងវិញនឹងធ្វើឲ្យចំនួនអ្នកស្លាប់ថយចុះ។
បើតាមលោក ស៊ុន ចាន់ថុល ក្នុងរយៈពេល ៦ ខែនៃឆមាសទី ១ ឆ្នាំ ២០១៩ នេះចំនួនអ្នកស្លាប់ដោយគ្រោះថ្នាក់ចរាចរណ៍មានរហូតដល់ ១០៣៣ នាក់ ហើយរហូតដល់ដាច់ឆ្នាំ ២០១៩ អាចនឹងកើនដល់ជាង ២០០០ នាក់ បើមិនមានការរឹតបន្ដឹងច្បាប់។ ជាមួយគ្នានេះគ្រោះថ្នាក់ចរាចរណ៍ក៏បានធ្វើឲ្យខាតបង់ថវិកាជាតិប្រមាណ ៣៥០ លានដុល្លារផងដែរក្នុង ១ ឆ្នាំ។
លោក គឹម បញ្ញា នាយកអង្គការមូលនិធិបង្ការបួសអាស៊ីប្រចាំកម្ពុជាជាអង្គការដែលរៀបចំសន្និសីទនេះថ្លែងថា សន្និសីទឆ្នាំនេះប្រារព្ធឡើងក្រោមប្រធានបទ «ធ្វើការរួមគ្នាដើម្បីសង្គ្រោះជីវិតពីគ្រោះថ្នាក់ចរាចរណ៍ក្នុងពេលបច្ចុប្បន្ន និងក្នុងទសវត្សរ៍បន្ទាប់» មានរយៈពេលពីថ្ងៃគឺថ្ងៃទី ៤-៥ ខែ កញ្ញា ដើម្បីផ្លាស់ប្ដូរចំណេះដឹង និងបទពិសោធនានាជាមួយភាគីពាក់ព័ន្ធ ដើម្បីកាត់បន្ថយការស្លាប់ដោយគ្រោះថ្នាក់ចរាចរណ៍។
លោកថ្លែងថា៖ «ចំនួនអ្នកស្លាប់ដោយគ្រោះថ្នាក់ចរាចរណ៍នៅតែមានតួលេខខ្ពស់ពិសេសរយៈពេល ៦ ខែឆ្នាំ ២០១៩ ដែលការព្យាករបានឲ្យដឹងថា ក្នុងឆ្នាំ ២០១៩ នេះអាចមានអ្នកស្លាប់រហូតដល់ ៣០១២ នាក់បើសិនជាគ្មានវិធានការឲ្យបានសមស្របទេនោះ»។
លោក បញ្ញា លើកឡើងថាក្នុងផែនការរៀបចំសុវត្ថិភាពចរាចរណ៍ផ្លូវគោកបន្ទាន់សម្រាប់ឆ្នាំ ២០២១-២០៣០ បើសិនជាកម្ពុជាមិនមានផែនការសកម្មភាពឲ្យបានច្បាស់លាស់ទេ នោះចំនួនអ្នកស្លាប់នឹងកើនឡើងខ្ពស់ជាងនេះទៅទៀត។
លោកថាតាមរយៈសន្និសីទដែលមានវាគ្មិនចូលរួមជាង ៥០ រូប និងភាគីពាក់ព័ន្ធមកពីស្ថាប័នរដ្ឋ និងឯកជនជាង ៣០០ នាក់ទៀតបានពិភាក្សាគ្នាជុំវិញបញ្ហានៃគ្រោះថ្នាក់ចរាចរណ៍ និងបានលើកឡើងជាអនុសាសន៍ដូចជាសមត្ថកិច្ចត្រូវពង្រឹងការអនុវត្ដច្បាប់ និងការអប់រំត្រូវធ្វើឲ្យបានទន្ទឹមគ្នា បង្កើនការបំពេញការងារជាក្រុមជាមួយស្ថាប័នពាក់ព័ន្ធ ជំរុញការយល់ដឹងបន្ថែមពីច្បាប់ចរាចរណ៍ផ្លូវគោកជាដើម។
ទាក់ទងនឹងបញ្ហាអ្នកបើកបរមិនគោរពច្បាប់ចរាចរណ៍ និងមិនគោរពភ្លើងស្ដុបនៅពេលយប់ លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានបញ្ជាក់ថា សមត្ថកិច្ចកំពុងរៀបចំក្រុមដើម្បីរងចាំល្បាតពេលយប់នៅតាមស្ដុប ព្រោះជាទូទៅភ្លើងស្ដុបគឺត្រូវបិទនៅអំឡុងម៉ោង ៩ យប់៕
