.jpg)
លោក ទៀ បាញ់ និង លោក វ៉េ ហ៊្វុងហឺ រដ្ឋមន្ត្រីការពារជាតិចិន។ រូបថត ក្រសួងការពារជាតិ
ភ្នំពេញៈ លោក វ៉េ ហ៊្វុងហឺ (Wei Fenghe) រដ្ឋមន្ត្រីក្រសួងការពារជាតិចិនបានចុះហត្ថលេខាជាមួយសមភាគីកម្ពុជាលោក ទៀ បាញ់ ក្នុងជំនួបទ្វេភាគីនៅទីក្រុងប៉េកាំងកាលពីថ្ងៃទី ២០ ខែតុលា លើកិច្ចព្រមព្រៀងស្តីពីកិច្ចសហប្រតិបត្តិការរវាងកងទ័ពប្រទេសទាំង ២ កម្ពុជា និងចិនក្នុងការបង្កើនកម្រិតនៃការធ្វើលំហាត់ហ្វឹកហ្វឺនបង្កើនប្រសិទ្ធភាពនៃការបណ្តុះបណ្តាលធនធានមនុស្សរួមទាំងកិច្ចសហប្រតិបត្តិការកម្រិតតំបន់ និងអន្តរជាតិ ដើម្បីធ្វើឲ្យទំនាក់ទំនងកងទ័ពទាំង ២ កាន់តែរឹងមាំ។
ក្នុងជំនួបទ្វេភាគី លោករដ្ឋមន្ត្រីការពារជាតិចិនបានថ្លែងថា៖ «ចិន និងកម្ពុជាជាមិត្តភក្តិដែកថែប។ ក្រោមការដឹកនាំរបស់ប្រធានាធិបតី ស៊ី ជីនភីង ក៏ដូចជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទំនាក់ទំនងកិច្ចសហប្រតិបត្តិការរវាងប្រទេសទាំង ២ កាន់តែស៊ីជម្រៅ ហើយបច្ចុប្បន្ននេះគឺស្ថិតនៅក្នុងកម្រិតខ្ពស់ជាងគេក្នុងប្រវត្តិសាស្ត្រ។ ប្រទេសចិននៅតែបន្តផ្តល់ជំនួយ និងការគាំទ្រដល់ការកសាងកងទ័ព និងការអភិវឌ្ឍវិស័យការពារជាតិរបស់ប្រទេសកម្ពុជា។
ពិធីចុះហត្ថលេខារបស់រដ្ឋមន្ត្រីការពារជាតិចិន-កម្ពុជា ធ្វើឡើងក្នុងអំឡុងពេលដែល លោក ទៀ បាញ់ និងមន្ត្រីយោធាជាន់ខ្ពស់របស់លោកមួយក្រុមមានលោក ណឹម សុវត្ថិ ទីប្រឹក្សាពិសេស និងជាអគ្គនាយក អគ្គនាយកដ្ឋាននយោបាយ និងកិច្ចការបរទេស, លោក ចៅ ភិរុណ អគ្គនាយក អគ្គនាយកដ្ឋានសម្ភារបច្ចេកទេស និងលោក ហ៊ុន ម៉ានិត អគ្គនាយក អគ្គនាយកដ្ឋានស្រាវជ្រាវចារកិច្ច ក្រសួងការពារជាតិបាននិងកំពុងធ្វើដំណើរទស្សនកិច្ចរយៈពេល ៥ ថ្ងៃ ដើម្បីចូលរួមការប្រកួតកីឡាយោធិនពិភពលោក និងពិភាក្សាលើបញ្ហាសន្តិសុខនៅក្នុងតំបន់ ដើម្បីលើកកម្ពស់សន្តិភាព។
ក្នុងជំនួបដដែលនោះដែរលោក ទៀ បាញ់ បានអះអាងចំពោះមុខសមភាគីចិនថា ទំនាក់ទំនងមិត្តភាពរវាងប្រជាជន និងកងទ័ពប្រទេសទាំង ២ កម្ពុជា-ចិន ដែលបានចាប់ផ្តើមដោយថ្នាក់ដឹកនាំគ្រប់ជំនាន់រហូតមកដល់បច្ចុប្បន្ននេះ ត្រូវបានពង្រឹង និងពង្រីកថែមទៀតយ៉ាងខ្លាំងក្លាក្រោមការដឹកនាំរបស់លោក នាយករដ្ឋមន្ត្រី ហ៊ុន សែន។
លោក ទៀ បាញ់ ថ្លែងថា៖ «ការជួយឧបត្ថម្ភក្នុងការអនុវត្តកិច្ចសហប្រតិបត្តិការទ្វេភាគីរវាងកងទ័ពទាំង ២ កម្ពុជា-ចិនដូចជា ការផ្លាស់ប្តូរគណៈប្រតិភូ ការបង្កើនកម្រិតនៃការធ្វើលំហាត់ហ្វឹកហ្វឺន បង្កើនប្រសិទ្ធភាព នៃការបណ្តុះបណ្តាលធនធានមនុស្សរួមទាំងកិច្ចសហប្រតិបត្តិការកម្រិតតំបន់ និងអន្តរជាតិផងដែរដែលបានធ្វើឲ្យទំនាក់ទំនងកងទ័ពទាំង ២ កាន់តែរឹងមាំ»។
ក្នុងជំនួបពិភាក្សាការងារទ្វេភាគីនាពេលនោះលោក ទៀ បាញ់ ក៏បានសម្ដែងការអបអរសាទរក្នុងឱកាសប្រទេសចិនបានប្រារព្ធខួបលើកទី ៧០ ថ្ងៃបង្កើតសាធារណរដ្ឋប្រជាមានិតចិនដ៏មហោឡារិកកាលពីថ្ងៃទី ១ ខែ តុលា ឆ្នាំ ២០១៩ និង អបអរសាទរចំពោះជោគជ័យនៃពិធីបើកការប្រកួតកីឡាយោធាពិភពលោកលើកទី ៧ នៅទីក្រុងអ៊ូហាន។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានឲ្យដឹងថា ដំណើរទស្សនកិច្ចនេះជាផ្នែកមួយនៃកិច្ចខិតខំប្រឹងប្រែងពង្រឹងកិច្ចសហប្រតិបត្តិការ និងទំនាក់ទំនងវិស័យការពារជាតិរវាងប្រទេសទាំង ២ ឲ្យកាន់តែខ្លាំងហើយនិងជួយឲ្យវិស័យការពារប្រទេសកម្ពុជាកាន់តែមានភាពរីកចម្រើន។
លោកបានថ្លែងថា៖ «ទំនាក់ទំនងកម្ពុជាចិនគឺជាទំនាក់ទំនងយ៉ាងល្អហើយរហូតមកដល់បច្ចុប្បន្ននេះទំនាក់ទំនងនេះបានឈានដល់កម្រិតកំពូល។ យើងមានការប្តេជ្ញាចិត្តខ្ពស់របស់ថ្នាក់ដឹកនាំកំពូលនៃប្រទេសទាំងពីរក្នុងការរក្សានូវកម្រិតទំនាក់ទំនង ហើយវាជាការជួយគ្នាទៅវិញទៅមក ហើយដែលត្រូវការគ្នាទៅវិញទៅមក»។
លោកបានបន្តថា បើទោះបីជាប្រទេសកម្ពុជាមានទំនាក់ទំនងយ៉ាងល្អជាមួយប្រទេស ចិន ប្រទេស កម្ពុជា តែងតែបើកទ្វារចំហក្នុងការពង្រឹងទំនាក់ទំនង ជាមួយប្រទេសដទៃទៀតដែលពង្រឹងទំនាក់ទំនង និងកិច្ចសហប្រតិបត្តិការជាមួយប្រទេសកម្ពុជា។
លោក ភា ថ្លែងថា៖ «ទំនាក់ទំនងល្អរវាងប្រទេស កម្ពុជា និងចិននឹងមិនធ្វើឲ្យប៉ះពាល់ដល់ទំនាក់ទំនង និងកិច្ចសហប្រតិបត្តិការជាមួយសហរដ្ឋអាមេរិកនោះទេ»។
លោក ឡៅ ម៉ុងហៃ អ្នកវិភាគនយោបាយបានថ្លែងថា ទំនាក់ទំនងកម្ពុជា-ចិន វាមិនគួរឲ្យមានអ្វីភ្ញាក់ផ្អើលនោះទេ នៅពេលដែលប្រទេស ចិន មើលឃើញកងទ័ពរបស់កម្ពុជាជាកម្លាំងដ៏ខ្លាំងបំផុតរបស់ប្រទេស។
លោក ឡៅ ម៉ុងហៃ ថ្លែងថា៖ «កងកម្លាំងនេះអាចធានាផលប្រយោជន៍ជាយុទ្ធសាស្ត្រនៅក្នុងកម្ពុជា និងតំបន់»។
ក្នុងអំឡុងពេលទស្សនកិច្ចលោក ទៀ បាញ់ និងប្រតិភូក្រសួងការពារជាតិកម្ពុជាបានចូលរួមក្នុងពិធីបើកការប្រកួតកីឡាយោធាពិភពលោកលើកទី ៧ នៅថ្ងៃទី ១៨ ខែ តុលា ឆ្នាំ ២០១៩ នៅទីក្រុងអ៊ូហាន ខេត្តហ៊ូបេ សាធារណរដ្ឋប្រជាមានិតចិន និងចូលជួបសម្ដែងការគួរសមលោក ស៊ី ជីនភីង អគ្គលេខាគណបក្សកុម្មុយនីស្តចិនដែលប្រធានាធិបតីនៃសាធារណរដ្ឋប្រជាមានិតចិន និងជាប្រធានគណៈកម្មាធិការយោធាមជ្ឈិម។
លោក ទៀ បាញ់ បានថ្លែងថា ព្រឹត្តិការណ៍កីឡាយោធាពិភពលោកនេះពិតជាបានដើរតួយ៉ាងសំខាន់នៅក្នុងបុព្វហេតុស្វែងរក និងធានាសន្តិភាព ស្ថិរភាព ទាំងក្នុងតំបន់ និងលើពិភពលោកក្រោមខ្លឹមសារកីឡានាំមកនូវសន្តិភាព កីឡានាំមកនូវមិត្តភាព និងជាធាតុមួយយ៉ាងសំខាន់ក្នុងការបណ្តុះឆន្ទៈស្មារតីស្រឡាញ់នូវសន្តិភាព សម្រាប់វិស័យអប់រំក្នុងកងទ័ព និងជាវេទិកាបើកចំហឲ្យកងទ័ពទាំងអស់នៅលើពិភពលោកមានឱកាសបានប្រាស្រ័យទាក់ទង ឈ្វេងយល់ពីគ្នាទៅវិញទៅមករួមចំណែកពង្រឹង និងពង្រីកមិត្តភាព កិច្ចសហប្រតិបត្តិការក្រោមឆត្រនៃបេសកកម្មរក្សាសន្តិភាពដែលមានតម្លៃយ៉ាងធំធេងក្នុងប្រវត្តិសាស្ត្រមនុស្សជាតិ។
ក្នុងដំណើរទស្សនកិច្ចទៅកាន់ប្រទេសចិននេះគឺត្រូវបានធ្វើឡើងក្រោយពីទទួលបានការអញ្ជើញពីរដ្ឋមន្ត្រីការពារជាតិនៃសាធារណរដ្ឋប្រជាមានិតចិនលោក Wei Fenghe៕
វីដេអូ៖
