ភ្នំពេញៈ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន និងឯកអគ្គរដ្ឋទូតចិនលោក វ៉ាង វិនធាន ពីម្សិលមិញបានចុះហត្ថលេខាលើកិច្ចព្រមព្រៀងស្តីពី គម្រោងកិច្ចសហប្រតិបត្តិការចំនួន ២០ គម្រោងដែលមានទឹកប្រាក់ជាង ៧ លានដុល្លារ សម្រាប់មូលនិធិពិសេសកិច្ចសហប្រតិបត្តិការមេគង្គ-ឡានឆាង ២០២០។
យោងតាមសេចក្ដីប្រកាសព័ត៌មានរបស់ក្រសួងការបរទេសគម្រោងទាំង ២០ ថ្មីនេះ ភាគច្រើនគ្របដណ្ដប់លើសកម្មភាពនានាពាក់ព័ន្ធនឹងការអភិវឌ្ឍវិស័យសេដ្ឋកិច្ចសង្គម អភិវឌ្ឍន៍ធនធានមនុស្ស សន្តិសុខតាមប្រព័ន្ធអ៊ីនធឺណិត ការកសាងសមត្ថភាព ទេសចរណ៍ និងសេវាកម្ម បរិស្ថាន និងការការពារធម្មជាតិជាដើម។ កិច្ចព្រមព្រៀងនេះមានទឹកប្រាក់ ៧ ២២៥ ៤០០ ដុល្លារ។
ថ្លែងក្នុងពិធីចុះហត្ថលេខានោះលោករដ្ឋមន្ត្រីការបរទេស ប្រាក់ សុខុន មានប្រសាសន៍ថា កាលពីខែកុម្ភៈ ឆ្នាំ ២០១៩ លោកបានចុះហត្ថលេខាជាមួយ លោក វ៉ាង វិនធាន ម្ដងហើយសម្រាប់គម្រោងចំនួន ១៩ របស់កម្ពុជាដែលគាំទ្រដោយមូលនិធិពិសេសកិច្ចសហប្រតិបត្តិការមេគង្គ-ឡានឆាង ឆ្នាំ ២០១៨។
លោកថា គម្រោងទាំងនេះត្រូវបានអនុវត្តប្រកបដោយវឌ្ឍនភាពគួរឱ្យកត់សម្គាល់ ហើយបានបង្កើតនូវសមិទ្ធផលរូបីជាច្រើនក្នុងការលើកកម្ពស់ជីវភាព និងសុខុមាលភាពរបស់ប្រជាជនកម្ពុជា។
លោកថ្លែងដូច្នេះថា៖ «ឆ្លៀតក្នុងឱកាសនេះ ខ្ញុំសូមសម្តែងនូវការពេញចិត្តយ៉ាងជ្រាលជ្រៅចំពោះរដ្ឋាភិបាលសាធារណរដ្ឋប្រជាមានិតចិន សម្រាប់ការគាំទ្រដែលមិនអាចកាត់ថ្លៃបានសម្រាប់គម្រោងថ្មីចំនួន ២០ បន្ថែមទៀត គាំទ្រដោយមូលនិធិពិសេសកិច្ចសហប្រតិបត្តិការមេគង្គ-ឡានឆាងឆ្នាំ ២០២០ ដែលមានថវិកាសរុបចំនួនប្រមាណជាង ៧ លានដុល្លារអាមេរិក»។
លោកថ្លែងថា គម្រោងទាំងនេះនឹងបន្តរួមចំណែកដល់កិច្ចសហប្រតិបត្តិការក្នុងវិស័យអភិវឌ្ឍន៍ជនបទ ធនធានទឹក កសិកម្ម ការតភ្ជាប់ផ្លូវអាកាស អប់រំ បេតិកភណ្ឌវប្បធម៌ ជាដើម។ បើទោះបីជាមានផលប៉ះពាល់យ៉ាងធ្ងន់ធ្ងរពីវិបត្ដិកូវីដ ១៩ ក៏ដោយ ក៏កិច្ចសហប្រតិបត្តិការកម្ពុជា-ចិនទាំងកម្រិតទ្វេភាគី និងពហុភាគីគឺនៅតែរក្សាបាននូវភាពសំខាន់។
ប្រទេសចិន បានចាត់ទុកប្រទេសកម្ពុជា ជាអាទិភាពចម្បងក្នុងការចូលរួមចំណែកគ្រប់គ្រងការរីករាលដាលនៃជំងឺដ៏កាចសាហាវនេះ និងកាត់បន្ថយផលប៉ះពាល់សេដ្ឋកិច្ច-សង្គម។
លោក ប្រាក់ សុខុន បន្តថាប្រទេសចិនបានបញ្ជូនគ្រឿងបរិក្ខារប្រឆាំងនឹងជំងឺរាតត្បាត និងអ្នកជំនាញវេជ្ជសាស្ត្រយ៉ាងឆាប់រហ័ស ដើម្បីជួយដល់កិច្ចខិតខំប្រឹងប្រែងរបស់កម្ពុជា ហើយនាវាដឹកជញ្ជូនត្រូវបានចាត់ចែងជាពិសេសដើម្បីធានានូវលំហូរនៃវត្ថុធាតុដើម សម្រាប់ផលិតកម្មឧស្សាហកម្មនៅកម្ពុជា។
លោកថា ពិធីចុះហត្ថលេខានេះធ្វើឡើងទាន់ពេលវេលា និងមានសារៈសំខាន់បំផុតក្នុងពេលវេលាដ៏លំបាកនេះដើម្បីបង្ហាញពីភាពរឹងមាំ និងជាការអះអាងជាថ្មីនូវមូលដ្ឋានដ៏រឹងមាំនៃកិច្ចសហប្រតិបត្តិការមេគង្គ-ឡានឆាង។ ចាប់តាំងពីការចាប់ផ្តើមមូលនិធិពិសេសនៅឆ្នាំ ២០១៦ គម្រោងទាំងនេះបានរួមចំណែកក្នុងការលើកកម្ពស់ការអភិវឌ្ឍសេដ្ឋកិច្ចសង្គមរបស់បណ្តាប្រទេសមេគង្គ-ឡានឆាង តាមរយៈការបង្រួម គម្លាតនៃការអភិវឌ្ឍ ការពង្រឹងទំនុកចិត្ត និងការយោគយល់គ្នាទៅវិញទៅមក និងការពង្រឹងសមត្ថភាពរបស់យើងក្នុងការឆ្លើយតបឱ្យកាន់តែប្រសើរឡើងទៅនឹងតម្រូវការរបស់ប្រជាជន។
លោកថ្លែងថា៖«ខ្ញុំសូមអះអាងសាជាថ្មីនូវការប្តេជ្ញាចិត្តរបស់កម្ពុជាក្នុងការពង្រឹង និងរឹតចំណងមិត្តភាពរវាងបណ្តាប្រទេសមេគង្គ និងប្រទេសចិន»។
ឯកអគ្គរដ្ឋទូតចិន លោក វ៉ាង វិនធាន ប្រាប់លោក ប្រាក់ សុខុន ថាចាប់តាំងពីការបង្កើតមក កិច្ចសហប្រតិបត្តិការឡានឆាង-មេគង្គនេះដើរតួនាទីក្នុងការធ្វើឲ្យភូមិសាស្ត្រតំបន់វប្បធម៌ និងមិត្តភាពនៃប្រទេសទាំង ៦ ក្នុងតំបន់ខិតជិតគ្នា ព្រមទាំងលើកកម្ពស់កិច្ចសហប្រតិបត្តិការមានប្រយោជន៍ទៅវិញទៅមកកាន់តែស៊ីជម្រៅ។
លោកបន្តថា សមភាព និងការគាំទ្រគ្នាទៅវិញទៅមកក្នុងគោលគំនិតរបស់កិច្ចសហប្រតិបត្តិការឡានឆាង-មេគង្គក្នុងបរិយាកាសជាគ្រួសារនេះ ទទួលបានការគាំទ្រកាន់តែច្រើនពីសាធារណជន។
លោកបញ្ជាក់ថា កម្ពុជាបានទទួលផលយ៉ាងច្រើនពីគម្រោងមូលនិធិពិសេសនៃកិច្ចសហប្រតិបត្តិការឡានឆាង-មេគង្គអស់រយៈពេល ៣ ឆ្នាំជាប់គ្នា ដែលមានគម្រោងសរុប ៥៥ បូករួមទាំងគម្រោងឆ្នាំនេះ ហើយមានទឹកប្រាក់សរុបជាង ២០ លានដុល្លារ។
លោកថ្លែងថា៖ «នេះឆ្លុះបញ្ចាំងពីការចូលរួមយ៉ាងសកម្មរបស់កម្ពុជាក្នុងកិច្ចសហប្រតិបត្តិការឡានឆាង-មេគង្គ និងបញ្ជាក់ថា កិច្ចសហប្រតិបត្តិការចិន-កម្ពុជាក្នុងកិច្ចសហប្រតិបត្តិការឡានឆាង-មេគង្គពិតជាមានផ្លែផ្កាយ៉ាងខ្លាំង។ យើងសង្ឃឹមថា គម្រោងទាំងនេះនឹងជួយពង្រឹងដល់ជីវភាពរបស់ប្រជាពលរដ្ឋកម្ពុជា និងពន្លឿនការអភិវឌ្ឍសេដ្ឋកិច្ចកម្ពុជា សង្គម និងផ្នែកផ្សេងៗទៀត»។
លោក វ៉ាង វិនធាន បានមានប្រសាសន៍ថាគម្រោងថ្មីសម្រាប់ឆ្នាំ ២០២១ កំពុងចាប់ផ្ដើម ហើយលោកសង្ឃឹមថា គម្រោងដែលមានគុណភាពទាំងនោះនឹងត្រូវប្រកាស និងផ្ដល់ការគាំទ្រដល់ការអភិវឌ្ឍសង្គម និងសេដ្ឋកិច្ចក្នុងតំបន់ បន្ទាប់ពីការរាតត្បាតជំងឺកូវីដ ១៩។ ចិននឹងលើកកម្ពស់កិច្ចសហប្រតិបត្តិការឡានឆាង-មេគង្គ ឲ្យឈានដល់កម្រិតថ្មីមួយទៀតជួយដល់ការស្ដារសេដ្ឋកិច្ចអនុតំបន់ចេញពីភាពលំបាក និងធ្វើឲ្យរួមវិភាគទានដ៏ត្រឹមត្រូវរបស់ចិនរួមចំណែកដល់ស្ថិរភាពសេដ្ឋកិច្ចនៅអាស៊ី និងនៅលើពិភពលោក៕