.jpg)
កម្ពុជា-ចិន ប្រជុំពង្រឹងកិច្ចសហការត្រួតពិនិត្យគ្រឿងញៀនថ្ងៃទី ២៤ ធ្នូ។ រូប ក្រសួងមហាផ្ទៃ
ភ្នំពេញៈ លោក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនថ្លែងថា ប្រទេសកម្ពុជា-ចិន បានឯកភាពគ្នា ពង្រឹងកិច្ចសហប្រតិបត្តិការក្នុងការត្រួតពិនិត្យគ្រឿងញៀន ព្រមទាំងទប់ស្កាត់ និងបង្ក្រាបការជួញដូរគ្រឿងញៀននៅក្នុងតំបន់ត្រីកោណមាស។
បើតាមលោក មាស វិរិទ្ធ ឲ្យដឹងថាក្នុងកិច្ចប្រជុំទ្វេភាគី កម្ពុជា-ចិនលើកទី ៨ ស្តីពីកិច្ចសហប្រតិបត្តិការត្រួតពិនិត្យគ្រឿងញៀននៅខេត្តឆាងសា ខេត្តហ៊ូណាន ប្រទេស ចិនដែលមានការចូលរួមពីមន្ត្រីជាន់ខ្ពស់អាជ្ញាធរជាតិប្រយុទ្ធប្រឆាំងគ្រឿងញៀន កម្ពុជា និងចិន បានឯកភាពគ្នាក្នុងការពង្រឹងកិច្ចសហប្រតិបត្តិការ ត្រួតពិនិត្យគ្រឿងញៀន និងរឹតចំណងសាមគ្គីភាពរវាងប្រទេសទាំង ២ ក្នុងការទប់ស្កាត់ និងបង្ក្រាបការជួញដូរគ្រឿងញៀន។
លោកបន្តថា ក្នុងកិច្ចប្រជុំទ្វេភាគីនេះមានការអញ្ជើញចូលរួមពីភាគីតំណាងពីក្រសួង ស្ថាប័នពាក់ព័ន្ធមានក្រសួងសង្គមកិច្ច អតីតយុទ្ធជន និងយុវនីតិសម្បទា អគ្គស្នងការដ្ឋាននគរបាលជាតិ អគ្គនាយកដ្ឋានគយ និងរដ្ឋាករកម្ពុជា កងរាជអាវុធហត្ថលើផ្ទៃប្រទេស។
ភាគីចិនមានការចូលរួមពីលោក លាង យុន អគ្គលេខាធិការរងនៃគណៈកម្មការជាតិត្រួតពិនិត្យគ្រឿងញៀនចិន និងជាអគ្គនាយកនៃអគ្គនាយកដ្ឋាន ត្រួតពិនិត្យគ្រឿងញៀននៃក្រសួងសន្តិសុខសាធារណៈចិន តំណាងមូលនិធិត្រួតពិនិត្យគ្រឿងញៀនចិននៃគណៈកម្មការជាតិត្រួតពិនិត្យគ្រឿងញៀនចិន តំណាងខេត្តហ៊ូណានតំណាងខេត្តយូណាន ប្រទេស ចិន។
លោកថា៖ «កិច្ចប្រជុំនេះគឺជាកិច្ចប្រជុំផ្លាស់វេនគ្នាប្រចាំឆ្នាំដោយផ្តោតទៅលើកិច្ចការសំខាន់ៗមួយចំនួនដូចជាទី ១ ការចែករំលែកព័ត៌មានស្តីពីគ្រឿងញៀនទៅវិញទៅមករវាងប្រទេសទាំង ២។ ទី ២ កិច្ចសហប្រតិបត្តិការក្នុងការងារអនុវត្តច្បាប់ កិច្ចសហប្រតិបត្តិការក្នុងវិស័យកាត់បន្ថយតម្រូវការ ការអប់រំផ្សព្វផ្សាយ ការព្យាបាលស្តារនីតិសម្បទា ការធ្វើសមាហរណកម្ម និងការគាំទ្រការបណ្តុះបណ្តាលជំនាញឲ្យគ្នាទៅវិញទៅមក»។
លោកបន្ថែមថា ភាគីចិនបានបណ្តុះបណ្តាលធនធានមន្ត្រីអនុវត្តច្បាប់កម្ពុជាដើម្បីឆ្លើយតបនឹងការដោះស្រាយបញ្ហាគ្រឿងញៀននៅប្រទេសកម្ពុជា។ ផ្តល់ធនធានក្នុងការផ្លាស់ប្តូរព័ត៌មាន និងសភាពការណ៍ទៅវិញទៅមក និងលទ្ធផលនៃការបង្ក្រាបគ្រឿងញៀន និងសកម្មភាពផ្សេងៗ។
លោកបន្តថា ប្រទេស កម្ពុជា និងចិនគឺជាប្រទេសដែលរងគ្រោះ ដោយសារក្រុមឧក្រិដ្ឋជនលួចធ្វើសកម្មភាព ចរាចរដឹកជញ្ជូនគ្រឿងញៀនពីតំបន់ត្រីកោណមាសឆ្លងកាត់ប្រទេសទាំង ២ និងប្រទេសតំបន់ទន្លេមេគង្គដែលតម្រូវឲ្យប្រទេសទាំង ២ ត្រូវខិតខំកាន់តែខ្លាំងឡើងថែមទៀតក្នុងការសហការ និងគាំទ្រគ្នាទៅវិញទៅមកក្នុងការទប់ស្កាត់ការចរាចរ គ្រឿងញៀនពីតំបន់ត្រីកោណមាស និងដើម្បីបំផ្លាញអង្គការចាត់តាំងគ្រឿងញៀន។
លោកបញ្ជាក់ថា៖ «យើងបានកត់សម្គាល់ឃើញថា ប្រទេសយើងទាំង ២ បានទទួលរងការគំរាមកំហែងដោយសារតែគ្រឿងញៀនដែលក្រុមឧក្រិដ្ឋជនលួចផលិតនៅក្នុងតំបន់ត្រីកោណមាស ហើយធ្វើការជួញដូរឆ្លងកាត់ប្រទេសយើងទាំង ២។ ដូច្នេះហើយយើងប្តេជ្ញារួមគ្នាទប់ស្កាត់ ការចរាចរគ្រឿងញៀនពីតំបន់ត្រីកោណមាស ដើម្បីធ្វើយ៉ាងណាកុំឲ្យគ្រឿងញៀនបន្តការគំរាមកំហែង ឬធ្វើសកម្មភាពកាន់តែរីករាលដាល ទាំងការជួញដូរ និងការប្រើប្រាស់ និងបង្រួមទីផ្សារនៃការជួញដូរ និងប្រើប្រាស់»។
ជាមួយគ្នានេះលោក យ៉ាង ហ្វេនរី (Yang Fengrui) ប្រធានមូលនិធិត្រួតពិនិត្យគ្រឿងញៀននៃគណៈកម្មការជាតិត្រួតពិនិត្យគ្រឿងញៀនចិនបានផ្តល់តេស្តបឋមស្វែងរកសារធាតុញៀនដែលមានតម្លៃ ៥០០ ០០០ យន់ដល់កម្ពុជា។ សូមបញ្ជាក់ថាកម្ពុជានឹងទទួលធ្វើជាម្ចាស់ផ្ទះនៃកិច្ចប្រជុំទ្វេភាគីកម្ពុជា-ចិនថ្នាក់មន្ត្រីជាន់ខ្ពស់លើកទី ៩ ឆ្នាំ ២០២០ នៅប្រទេសកម្ពុជា។
លោក មាស សុវណ្ណ ប្រធានសមាគមសង្គ្រោះជនរងគ្រោះដោយសារគ្រឿងញៀនកម្ពុជាស្វាគមន៍នូវការឯកភាពគ្នារវាងកម្ពុជា-ចិនក្នុងការពង្រឹងកិច្ចសហប្រតិបត្តិការត្រួតពិនិត្យគ្រឿងញៀន និងការទប់ស្កាត់ និងបង្ក្រាប ការជួញដូរគ្រឿងញៀន។ លោកសង្ឃឹមថាតាមរយៈការប្រឹងប្រែងនេះនឹងជួយកាត់បន្ថយការរីករាលដាលការជួញដូរគ្រឿងញៀននៅក្នុងតំបន់ត្រីកោណមាស។
លោកថ្លែងថា៖ «យើងស្វាគមន៍ ការខិតខំរបស់អាជ្ញាធរកម្ពុជា និងប្រទេសចិនក្នុងការរួមចំណែកទប់ស្កាត់ការជួញដូរគ្រឿងញៀន ដោយសារតែបញ្ហាគ្រឿងញៀនបាន និងកំពុងតែរីករាលយ៉ាងខ្លាំងទាំងក្នុងប្រទេស ក្នុងតំបន់ និងអន្តរជាតិ។ ប្រសិនបើអាជ្ញាធរមិនអាចទប់ស្កាត់ការរីករាលដាលនេះបានទេ វានឹងបង្កផលប៉ះពាល់យ៉ាងធំដល់សង្គមជាតិយើង»។
តាមគេហទំព័ររបស់អគ្គស្នងការដ្ឋាននគរបាលជាតិបានឲ្យដឹងថា ជនសង្ស័យចំនួន ៣៦ នាក់ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ២២ ករណី ទូទាំងប្រទេសនៅថ្ងៃទី ២៤ ខែធ្នូនេះ។ ក្នុងចំណោមជនសង្ស័យទាំង ៣៦ នាក់ មានមុខសញ្ញាជួញដូរគ្រឿងញៀនចំនួន ២០ នាក់ និងប្រើប្រាស់ ១៦ នាក់។
វត្ថុតាងដែលចាប់សរុបក្នុងថ្ងៃនោះដែរ រួមមានមេតំហ្វេតាមីន ១៩,៨១ ក្រាម និង ៨៧ កញ្ចប់តូច កេតាមីន ០,៤១ ក្រាម និងអិចស្តាហ្ស៊ី ១,០២ ក្រាម។ របាយការណ៏អគ្គស្នងការដ្ឋាននគរបាលជាតិឲ្យដឹងថារយៈពេលជាង ១១ ខែក្នុងឆ្នាំនេះ កម្លាំងនគរបាលប្រឆាំងគ្រឿងញៀនបានដកហូតសារធាតុញៀនជិត ៦៧៦ គីឡូក្រាម និងឃាត់ខ្លួនជនសង្ស័យជិត ២ ម៉ឺននាក់ ក្នុងនោះមាន ៣០ ភាគរយ ជាអ្នកប្រើប្រាស់គ្រឿងញៀន។
របាយការណ៍បញ្ជាក់ថា ក្នុងប្រតិបត្តិការនោះបានឃាត់ខ្លួនជនសង្ស័យជាង ១ ម៉ឺន ៨ ពាន់នាក់ មានស្រីជាង ១ ២០០ នាក់ ក្នុងនោះជនបរទេស ៣៨១ នាក់ និងមាន ១២ សញ្ជាតិ។ របាយការណ៍បន្ថែមថា សារធាតុញៀនគ្រប់ប្រភេទដែលត្រូវបានដកហូតមានទម្ងន់ជិត ៦៧៦ គីឡូ និងកញ្ឆាក្រៀម ៩៩ គីឡូរួមទាំងប្រភេទកញ្ឆាស្រស់ចំនួន ៨៦ ៤១៦ ដើម៕
