.jpg)
ទិដ្ឋភាពនៃការតាំងពិព័រណ៍យោធាកម្ពុជា-ចិន នៅកោះពេជ្ររាជធានីភ្នំពេញ។ ផា លីណា
ភ្នំពេញៈ ក្រសួងការពារជាតិចិន និង កម្ពុជា នៅថ្ងៃទី១៩ មិថុនានេះ បានរួមគ្នារៀបចំពិព័រណ៍ស្ដីពីកិច្ចសហប្រតិបត្តិការយោធា កម្ពុជា-ចិន ក្រោមពាក្យស្លោក «ដួងចិត្តតែមួយ ដើម្បីកសាងសហគមន៍និងវាសនាតែមួយ ចាប់ដៃគ្នាដើម្បីរក្សាសន្តិភាពនិងធ្វើការអភិវឌ្ឍន៍» ជាអ្វីដែលបង្ហាញពីភាពរឹងមាំនៃកិច្ចសហប្រតិបត្តិការវាងប្រទេសទាំងពីរខណៈប្រទេសលោកខាងលិចហាក់កំពុងឃ្លាតឆ្ងាយ។
ការរៀបចំពិព័រណ៍នៅកោះពេជ្ររាជធានីភ្នំពេញនេះ បានធ្វើឡើងដោយមានការចូលរួមជាអធិបតីពីសំណាក់រដ្ឋមន្ត្រីការពារជាតិចិននិងលោករដ្ឋមន្ត្រីការពារជាតិកម្ពុជា ហើយក៏ជាការអបអរសាទរចំពោះចំណងការទូតរយៈពេល៦០ឆ្នាំរវាងប្រទេសទាំងពីរផងដែរ ខណៈដែលភាគីចិនប្រកាសផ្តល់ជំនួយចំនួន ១៣១ លានដុល្លារដើម្បីពង្រឹកទំនាក់ទំនងទ្វេភាគី។
យ៉ាងណាក្ដីពិធីនេះបានរៀបចំឡើងខណៈរដ្ឋាភិបាលកម្ពុជាកំពុងរងការរិះគន់និងដាក់សម្ពាធជាបន្តបន្ទាប់ពីសហគមន៍អឺរ៉ុបជុំវិញបរិយាកាសនយោបាយដែលនាំឲ្យទំនាក់ទំនងរវាងកម្ពុជានិងសហរដ្ឋអាមេរិក បាននិងកំពុងធ្លាក់ចុះ ពិសេសបន្ទាប់ពីក្រសួងរតនាគារជាតិអាមេរិកបានបង្កកទ្រព្យសម្បត្តិមន្ត្រីយោធាកម្ពុជាលោក ហ៊ីង ប៊ុនហៀង ដោយលើកហេតុផលថា បានរំលោភសិទ្ធិមនុស្ស និងបានប្រព្រឹត្តបទឧក្រិដ្ឋកម្មលើប្រជាពលរដ្ឋ។
ថ្លែងក្នុងឱកាសនោះលោកនាយឧត្តមសេនីយ៍ WEI FENGHE ដែលជារដ្ឋមន្ដ្រីក្រសួងការពារជាតិចិន បានលើកឡើងថា ពិព័រណ៍យោធារួមគ្នា កម្ពុជា-ចិន ក្រោមប្រធានបទ«ដួងចិត្តតែមួយដើម្បីកសាងសហគមន៍ វាសនាតែមួយ ចាប់ដៃគ្នាដើម្បីរក្សាសន្តិភាព និងធ្វើការអភិវឌ្ឍន៍» នេះ បានបង្ហាញពីភាពរឹងមាំនៃកិច្ចសហប្រតិបត្តិការលើចំណងការទូតរវាងកម្ពុជា-ចិន រយៈពេល៦០ឆ្នាំ ហើយក៏បានបញ្ជាក់ពីសាមគ្គីភាពគ្នាស្អិតរមួតរវាងប្រទេសទាំងពីរផងដែរ។
លោកបានបញ្ជាក់ថា៖«ក្នុងឱកាសនេះខ្ញុំសូមតាងនាមឲ្យក្រសួងការពារជាតិចិននិងក្នុងនាមខ្ញុំផ្ទាល់សូមសម្ដែងការអបអរសាទរ កក់ក្តៅចំពោះការបើពិព័រណ៍នេះ… យើងរៀបចំពិព័រណ៍នេះគឺមានគោលបំណងបង្ហាញរូបភាពដ៏រស់រវើកនិងដើម្បីបង្ហាញមិត្តភាពជាប្រពៃណីរវាងចិននិងកម្ពុជា និងជាការបង្ហាញពីការប្ដេជ្ញាចិត្តនិងទំនុកចិត្តរវាងភាគីចិននិងកម្ពុជាក្នុងការសាងសហគមន៍ទស្សនៈតែមួយក៏ដូចជាប្ដេជ្ញាចិត្តការពារសន្តិសុខស្ថិរភាពក្នុងតំបន់និងអន្តរជាតិ»។
លោកបានបន្ថែមថា៖«ក្នុងរយៈពេល៦០ឆ្នាំកន្លងមកអ្នកដឹកនាំកំពូលគ្រប់ជំនាន់នៃប្រទេសទាំងពីរបានផ្លាស់ប្តូរយ៉ាងជិតស្និទ្ធនិងបានកសាងមិត្តភាពយ៉ាងជ្រាលជ្រៅ…ប្រធានាធិបតីចិនក៏ធ្លាប់បានមានប្រសាសន៍ដែរថា ប្រទេស ចិន និង កម្ពុជា ជាមិត្តល្អដែលចេះយល់ចិត្តគ្នាហើយនិងជាដៃគូល្អរួមចិត្តរួមថ្លើមហើយក៏ជាសហគមន៍មានទស្សនៈតែមួយ… ”។
លោកបានបន្ថែមថា៖«ដួងចិត្តតែមួយដើម្បីកសាងសហគមន៍និងវាសនាតែមួយចាប់ដៃគ្នាដើម្បីរក្សាសន្តិភាពនិងធ្វើការអភិវឌ្ឍន៍…មិត្តភាពចិននិងកម្ពុជាស្ថិតស្ថេរជាអមតៈ»។
ជាមួយគា្ននោះដែរ រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បានលើកឡើងថា រាជរដ្ឋាភិបាលកម្ពុជាបច្ចុប្បន្នបានធ្វើឲ្យចំណងមិត្តភាពនិងសាមគ្គីភាពរវាងប្រជាជននៃប្រទេសទាំងពីរកម្ពុជាចិនកាន់តែមានភាពស្អិតរមួត ហើយកិច្ចសហប្រតិបត្តិការលើគ្រប់វិស័យត្រូវបានពង្រឹងនិងពង្រីកថែមទៀត ដែលនាំមកនូវផលប្រយោជន៍ទៅវិញទៅមក។
លោកបានបញ្ជាក់ថា៖ «វាបង្ហាញអំពីចំណងមិត្តភាពសាមគ្គីភាពនិងកិច្ចសហប្រតិបត្តិការរវាងប្រទេសទាំងពីរកម្ពុជា-ចិន កាន់តែមានប្រសិទ្ធភាពនិងស៊ីជម្រៅគ្រប់ជ្រុងជ្រោយនិងបានបង្ហាញជំហរបន្តជួយដល់យោធាកម្ពុជានៃកងយោពលខេរភូមិន្ទលើគ្រប់វិស័យ ឲ្យកាន់តែមានប្រសិទ្ធភាពរីកចម្រើនថែមមួយកម្រិតទៀត»។
ទោះជាយ៉ាងណា លោកស្រី Astrid Norn-Nilsson សាស្ត្រាចារ្យជាន់ខ្ពស់នៅសាកលវិទ្យាល័យ Centre for East and South-East Asian Studies at Lund University ធ្លាប់បានលើកឡើងថា វាជារឿងគួរឲ្យកត់សម្គាល់ដែលរដ្ឋាភិបាលកម្ពុជា បានអញ្ជើញរដ្ឋមន្ត្រីការពារជាតិចិនមកចុះហត្ថលេខាលើកិច្ចព្រមព្រៀងនៃកិច្ចសហប្រតិបត្តិការការពារជាតិថ្មីមួយគឺតែមួយខែនៅមុនការបោះឆ្នោតចូលមកដល់។
លោកស្រីថា៖«វាបញ្ជាក់ពីគោលនយោបាយកិច្ចការបរទេសរបស់កម្ពុជាហាក់នៅដាច់ឆ្ងាយពីកិច្ចសហប្រតិបត្តិការការពារជាតិអាមេរិក» ៕
